ເຂດປ່າໂຄກອະນຸລັກ ໂອງ-ມັ່ງ ເພີ່ມຄວາມອຸດົມຮັ່ງຊີວະນາໆພັນ

ເຂດປ່າໂຄກອະນຸລັກ ໂອງ-ມັ່ງ ເພີ່ມຄວາມອຸດົມຮັ່ງຊີວະນາໆພັນ - Time fo an Adventure 2020 07 13T111803 - ເຂດປ່າໂຄກອະນຸລັກ ໂອງ-ມັ່ງ ເພີ່ມຄວາມອຸດົມຮັ່ງຊີວະນາໆພັນ
ເຂດປ່າໂຄກອະນຸລັກ ໂອງ-ມັ່ງ ເພີ່ມຄວາມອຸດົມຮັ່ງຊີວະນາໆພັນ - Untitled design - ເຂດປ່າໂຄກອະນຸລັກ ໂອງ-ມັ່ງ ເພີ່ມຄວາມອຸດົມຮັ່ງຊີວະນາໆພັນ

ວັນຈັນ ວັນທີ 13/7/2020 ນີິ້, ກົມປ່າໄມ້ ກະຊວງກະສິກໍາ ແລະ ປ່າໄມ້ ຮ່ວມກັບແຂວງສະຫວັນນະເຂດ ຈະຈັດພິທີປະກາດເຂດປ່າໂຄກໂອງ-ມັ່ງ ເປັນເຂດອະນຸລັກປ່າໂຄກໂອງ-ມັ່ງແຫ່ງຊາດ ຢ່າງເປັນທາງການ ຂຶ້ນທີ່ສູນອະນຸລັກລະບົບນິເວດປ່າໂຄກໂອງ-ມັ່ງ ເມືອງຊົນນະບູລີ.
ນີ້ຈະເປັນເຫດການສໍາຄັນໃນວຽກງານອະນຸລັກ ແລະການປົກປັກຮັກສາຊັບພະຍາກອນທຳມະຊາດ, ໂດຍສະເພາະສັດປ່າຫາຍາກ ແລະ ຊີວະນາໆພັນ ໃຫ້ໄປຕາມທິດພັດທະນາສີຂຽວ ແລະ ຍືນຍົງ ຕາມແນວທາງຂອງພັກ, ແຜນນະໂຍບາຍຂອງລັດຖະບານ.
ເຂດອະນຸລັກປ່າໂຄກໂອງ-ມັ່ງແຫ່ງຊາດຖືເປັນເຂດອະນຸລັກສັດປ່າແຫ່ງທໍາອິດຂອງລາວ ຊຶ່ງມີເນື້ອທີ່ທັງໝົດ 130.000 ເຮັກຕາ, ກວມເອົາ 5 ເມືອງ ຄື: ເມືອງຊົນນະບູລີ, ທ່າປາງທອງ, ພະລານໄຊ, ສອງຄອນ ແລະ ເມືອງພີນ. ໃນນີ້, ກວມເອົາເນື້ອທີ່ຂຶ້ນກັບເມືອງຊົນນະບູລີຫລາຍກວ່າໝູ່.

ໃນໂອກາດໃຫ້ສໍາພາດຕໍ່ສື່ມວນຊົນເມື່ອບໍ່ດົນນີ້, ທ່ານ ຊູຊາດ ໄຊຍະກຸມມານ ຫົວໜ້າກົມປ່າໄມ້, ກະຊວງກະສິກໍາ ແລະ ປ່າໄມ້ ໄດ້ໃຫ້ຮູ້ວ່າ: ເມື່ອກ່ອນຈໍານວນໂອງ-ມັ່ງມີບໍ່ຫລາຍ ແລະ ມີທ່າອ່ຽງຫລຸດລົງ. ໃນປີ 2002 ,ກະຊວງກະສິກໍາ ແລະ ປ່າໄມ້ ໄດ້ຮ່ວມກັບອົງການປົກຄອງທ້ອງຖິ່ນທີ່ກ່ຽວຂ້ອງ ເພື່ອອະນຸລັກໂອງ-ມັ່ງ ຕາມທ່າແຮງ ແລະ ເງື່ອນໄຂທີ່ມີ, ຈົນມາຮອດປີ 2016, ອົງການສະຫະປະຊາຊາດ ເພື່ອການພັດທະນາ ປະຈໍາລາວ ກໍ່ໄດ້ໃຫ້ທຶນຊ່ວຍເຫລືອ ປະກອບສ່ວນການອະນຸລັກລະບົບນິເວດປ່າໂຄກໂອງ-ມັ່ງ ແລະ ໂດຍສົມທົບກັບປະຊາຊົນ 16 ບ້ານພາຍໃນ 5 ເມືອງທີ່ກ່ຽວ ຂ້ອງໃນການປົກປັກຮັກສາເຂດປ່າໂຄກທີ່ເປັນເຂດອາໄສຂອງໂອງ-ມັ່ງ, ມາຮອດປັດຈຸບັນ ໄດ້ເຮັດໃຫ້ຈໍານວນໂອງ-ມັ່ງ ເພີ່ມຂຶ້ນເປັນເກືອບ 200 ໂຕ. ນອກຈາກນີ້ ໃນເຂດປ່າດັ່ງກ່າວ ຍັງມີນົກ 278 ຊະນິດ, ສັດລ້ຽງລູກດ້ວຍນໍ້ານົມ 67 ຊະນິດ, ສັດເລືອຄານ 47 ຊະນິດ, ສັດເຄິ່ງບົກ-ເຄິ່ງນໍ້າ 38 ຊະນິດ ແລະ ປາ 9 ຊະນິດ. ສ່ວນຕົ້ນໄມ້ ແລະ ພືດຊະນິດຕ່າງໆ ລວມແລ້ວກໍ່ມີເຖິງ 126 ຊະນິດ.

ຫລັງຈາກປະກາດເປັນເຂດອະນຸລັກປ່າໂຄກໂອງ-ມັ່ງແຫ່ງຊາດແລ້ວ, ກະຊວງກະສິກໍາ ແລະ ປ່າໄມ້ ຈະສືບຕໍ່ຮ່ວມກັບອົງການປົກຄອງທ້ອງຖິ່ນທີ່ກ່ຽວຂ້ອງ ພັດທະນາເຂດປ່າດັ່ງກ່າວໃຫ້ກາຍເປັນແຫລ່ງທ່ອງທ່ຽວທໍາມະຊາດທີ່ສວຍງາມ ເພື່ອສົ່ງເສີມການທ່ອງທ່ຽວ ແລະ ສ້າງລາຍຮັບໃຫ້ປະຊາຊົນພາຍໃນທ້ອງຖິ່ນ ຕາມນະໂຍບາຍຂອງລັດຖະບານ, ດ້ວຍການຫລຸດຜ່ອນການນໍາໃຊ້ຊັບພະຍາກອນປ່າໄມ້ໃນທາງກົງ ແລະ ຫັນໄປນໍາໃຊ້ຊັບພະຍາກອນປ່າໄມ້ໃນທາງອ້ອມ ເພື່ອຄວາມອຸດົມສົມບູນທາງທໍາມະຊາດ ແລະ ເຮັດໃຫ້ໂອງ-ມັ່ງ ກໍ່ຄື ສັດປ່ານາໆພັນໃນປ່າໂຄກໂອງ-ມັ່ງ ເພີ່ມຂຶ້ນເລື້ອຍໆ.

ໂອງ-ມັ່ງ ເປັນໜຶ່ງໃນຈໍານວນສັດປ່າປະເພດຫວງຫ້າມ ຫລື ບັນຊີ I ຕາມມະຕິຕົກລົງຂອງນາຍົກລັດຖະມົນຕີ ວ່າດ້ວຍການຮັບຮອງເອົາບັນຊີລາຍຊື່ສັດນໍ້າ ແລະ ສັດປ່າ ປະເພດຫວງຫ້າມ ຫລື ບັນຊີI ແລະ ປະເພດຄຸ້ມຄອງ ຫລື ບັນຊີII ສະບັບ ເລກທີ 81/ນຍ, ລົງວັນທີ 13/8/2008.

ໂອງ-ມັ່ງ ມີຊື່ຕາມພາສາສາກົນ Eld’s Deer, ຊື່ວິທະຍາສາດ Cervus eldii ເປັນສັດສີ່ຕີນ, ຕະກຸນສັດລ້ຽງລູກດ້ວຍນົມ, ກິນໃບໄມ້ຄ້ຽວເອື້ອງ ຕະກຸນດຽວກັບກວາງ, ຂົນເປັນສີນໍ້າຕານແດງ ຫລື ເຫລືອງເຂັ້ມ, ແຕ່ສີຂົນຈະຈາງລົງໃນຍາມແລ້ງ ອາກາດຮ້ອນ. ໂອງ-ມັ່ງ ທີ່ໃຫຍ່ເຕັມໄວ ຈະມີຄວາມຍາວຂອງລຳຕົວ ວັດແທກແຕ່ຫົວສຸດຫາງ ປະມານ 2,2-2,5 ແມັດ, ມີນໍ້າໜັກ 95-150 ກິໂລກຣາມ.

ເຂດປ່າໂຄກອະນຸລັກ ໂອງ-ມັ່ງ ເພີ່ມຄວາມອຸດົມຮັ່ງຊີວະນາໆພັນ - Wave100S AD to Website 2020 0 - ເຂດປ່າໂຄກອະນຸລັກ ໂອງ-ມັ່ງ ເພີ່ມຄວາມອຸດົມຮັ່ງຊີວະນາໆພັນ

ສັດປ່າຫວງຫ້າມ ບັນຊີI ເປັນສັດທີ່ຫາຍາກ, ໃກ້ຈະສູນພັນ, ມີຄຸນຄ່າສູງ ແລະ ມີຄວາມສຳຄັນເປັນພິເສດຕໍ່ການພັດທະນາເສດຖະກິດ-ສັງຄົມ, ສິ່ງແວດລ້ອມ ແລະ ການສຶກສາຄົ້ນຄວ້າທາງດ້ານວິທະຍາສາດ. ສັດຈໍາພວກນີ້ ຕ້ອງໄດ້ຮັບການຄຸ້ມຄອງ, ກວດກາ, ອະນຸລັກ, ປົກປັກຮັກສາ ແລະ ພັດທະນາ. ສ່ວນການນໍາໃຊ້ນັ້ນ ຕ້ອງໄດ້ຮັບອະນຸຍາດຈາກລັດຖະບານ.

ມາດຕາ 24 ການລ່າສັດນໍ້າ ແລະ ສັດປ່າ ຂອງກົດໝາຍວ່າດ້ວຍສັດນໍ້າ ແລະ ສັດປ່າ ກໍານົດໄວ້ແຈ້ງຄື: ສັດນໍ້າ ແລະ ສັດປ່າປະເພດຫວງຫ້າມ ທີ່ໄດ້ກໍານົດໄວ້ໃນບັນຊີI ແມ່ນບໍ່ອະນຸຍາດໃຫ້ຫາ ຫລື ລ່າ ຢ່າງເດັດຂາດ ເວັ້ນເສຍແຕ່ໃນກໍລະນີຈໍາເປັນ ເພື່ອການສຶກສາຄົ້ນຄວ້າ ແລະ ການຂະຫຍາຍພັນ,ແຕ່ຕ້ອງໄດ້ຮັບອະນຸຍາດຈາກລັດຖະບານ. ຖ້າວ່າສັດ ກໍ່ຄວາມເສຍຫາຍຢ່າງຫລວງຫລາຍຕໍ່ຊັບສິນຂອງບຸກຄົນ ແລະ ການຈັດຕັ້ງ ຕ້ອງໄດ້ລາຍງານຕໍ່ອົງການປົກຄອງເມືອງ, ເທດສະບານ, ເພື່ອພິຈາລະນາແກ້ໄຂ. ສໍາລັບສັດທີ່ກໍາລັງທໍາລາຍ, ກໍ່ກວນອາລະວາດຄົນ ຫລື ເປັນໄພອັນຕະລາຍ ຕໍ່ຊີວິດຂອງຄົນ ຕ້ອງແກ້ໄຂຢ່າງທັນການແລ້ວຈຶ່ງລາຍງານຕໍ່ການຈັດຕັ້ງທີ່ກ່ຽວຂ້ອງ.

ເຂດປ່າໂຄກອະນຸລັກ ໂອງ-ມັ່ງ ເພີ່ມຄວາມອຸດົມຮັ່ງຊີວະນາໆພັນ - WhatsApp Image 2020 05 27 at 5 - ເຂດປ່າໂຄກອະນຸລັກ ໂອງ-ມັ່ງ ເພີ່ມຄວາມອຸດົມຮັ່ງຊີວະນາໆພັນ
ເຂດປ່າໂຄກອະນຸລັກ ໂອງ-ມັ່ງ ເພີ່ມຄວາມອຸດົມຮັ່ງຊີວະນາໆພັນ - WhatsApp Image 2020 05 27 at 5 - ເຂດປ່າໂຄກອະນຸລັກ ໂອງ-ມັ່ງ ເພີ່ມຄວາມອຸດົມຮັ່ງຊີວະນາໆພັນ
error: Alert: ເນື້ອຫາຂ່າວມີລິຂະສິດ !!