ຫລາຍທ້ອງຖິ່ນຈັດພິທີປ່ອຍປາຄືນສູ່ທຳມະຊາດ (ເນື່ອງໃນໂອກາດ ອະນຸລັກສັດນ້ຳ-ສັດປ່າແຫ່ງຊາດ)
ເນື່ອງໃນໂອກາດວັນຄ້າຍວັນເກີດທ່ານ ປະທານ ສຸພານຸວົງ, ວັນປ່ອຍປາ ແລະ ອະນຸລັກສັດນ້ຳ-ສັດປ່າແຫ່ງຊາດ ວັນທີ 13 ກໍລະກົດ, ຫລາຍທ້ອງຖິ່ນໃນທົ່ວປະເທດໄດ້ຈັດພິທີປ່ອຍປາຄືນສູ່ທຳມະຊາດ ເຊັ່ນ: ແຂວງໄຊຍະບູລີ ມີແຜນຈະປ່ອຍປາທັງໝົດ 7.900.000 ໂຕ ໃນນັ້ນມີປາປາກ, ປາໄນ, ປານິນ; ເຊິ່ງໄດ້ປ່ອຍແລ້ວ 13 ຈຸດ, ມີປາທັງໝົດ 230.000 ໂຕຄືເ ຢູ່ອ່າງຫ້ວຍແຄ່ນ ມີ 40.000 ໂຕ, ວັງບວດບ້ານໃຫຍ່ 10.000 ໂຕ, ວັງບວດບ້ານນາໄຮ 10.000 ໂຕ, ວັງບວດບ້ານນາຕໍນ້ອຍ 10.000 ໂຕ, ວັງບວດບ້ານວັງຊອຍ 10.000 ໂຕ, ອ່າງນໍ້າຕຽນ 40.000 ໂຕ, ບ້ານປາກທັງ 2.000 ໂຕ, ກອງພັນ 609 ຈໍານວນ 20.000 ໂຕ, ຄຸມຂັງເມືອງ 2.000 ໂຕ, ມສ ຊົນເຜົ່າ 2.000 ໂຕ, ກອງພັນ 202 ຈໍານວນ 2.000 ໂຕ.
(ໜັງສືພິມ ລາວພັດທະນາ)
ແຂວງອັດຕະປື ໄດ້ຈັດພິທີປ່ອຍປາລົງສູ່ອ່າງ ທີ່ເຂື່ອນໄຟຟ້ານ້ຳກົງ 2 ເມືອງພູວົງ ຈຳນວນ 200.000 ໂຕ, ມີປາກິນຫຍ້າ, ປາປາກ, ປານິນ ແລະ ປາເຂັງ.
ສ່ວນຫ້ອງການກະສິກຳ-ປ່າໄມ້ ເມືອງລະຄອນເພັງ ແຂວງສາລະວັນ ມີແຜນສູ້ຊົນປ່ອຍປາໃຫ້ໄດ້ທັງໝົດ 125.000 ໂຕ, ລົງສູ່ອ່າງເກັບນໍ້າພະບາດບ້ານນາດູ່ເກົ່າ, ອ່າງເກັບນໍ້າວັງແຄນຄໍາ ບ້ານລະຄອນສີ, ທີກຸດລຳພອງ ບ້ານກຸດລຳພອງ, ທີ່ວັງສະຫງວນແກ້ງກົງ, ວັງສະຫງວນຫ້ວຍເຊືອກ ບ້ານນາຂັ້ນໃດ, ຕົ້ນຕໍແມ່ນ ປາປາກ, ປານວນຈັນ, ປາຈີນ ແລະ ປາໃນ.
ເມືອງດາກຈຶງ ແຂວງເຊກອງ ໄດ້ປ່ອຍປາທັງໝົດຈຳນວນ 17.429 ໂຕ ຢູ່ອ່າງຫ້ວຍປຣິງ ລວມມີປາປາກ, ປາໄນຄຳ ແລະ ປາກິນຫຍ້າ; ຫ້ອງການກະສິກຳ ແລະ ປ່າໄມ້ເມືອງທ່າແຂກ ແຂວງຄໍາມ່ວນ ໄດ້ປ່ອຍປາລົງສູ່ວັງສະຫງວນເຂດ ບ້ານນາບວບ ເຂດນາໂດນ-ເໝືອງບ່າ ເມືອງທ່າແຂກ ມີ 5.000 ໂຕ ຄື: ປາປາກ ແລະ ປາມະນີກ້ານ.
ເມືອງແປກ ສົມທົບກັບພະແນກກະສິກຳ ແລະ ປ່າໄມ້ ແຂວງຊຽງຂວາງ ກໍໄດ້ຈັດພິທີປ່ອຍປາຄືນສູ່ທຳມະຊາດ ຢູ່ອ່າງນ້ຳຫງຳ ຈຸດໃຈກາງເທດສະບານຂອງແຂວງຊຽງຂວາງເກືອບ 20 ພັນໂຕ, ມີປານິນ, ປາໄນ, ປາກິນຫຍ້າ.
ແຂວງວຽງຈັນ ໄດ້ປ່ອຍປາ ລົງສູ່ແມ່ນ້ຳທໍາມະຊາດ ນໍ້າແຈ້ງ ຈໍານວນ 50.000 ໂຕ, ປະກອບມີປານິນ, ປາໄນ, ປາປາກ, ປາເກັດແລບ ແລະ ປາທຳມະຊາດ ແລະ ເມືອງນ້ຳບາກ ແຂວງຫລວງພະບາງ ໄດ້ປ່ອຍປ່າ ລົງສູ່ແມ່ນ້ຳທຳມະຊາດ ທີ່ທ່າວັດ ເຂດວັງສະຫງວນບ້ານລີ່ ຈຳນວນ10.000 ກວ່າໂຕ, ມີປາປາກ, ປາໄນ, ປາອິນເດຍ ແລະ ປາກິນຫຍ້າ; ເມືອງໝື່ນ ແຂວງວຽງຈັນ ໄດ້ຈັດພິທີປ່ອຍປາຈຳນວນ 18.600 ໂຕ, ໃນນີ້ມີ ປານິນ 4.000 ໂຕ, ປາກິນຫຍ້າ 4.000 ໂຕ, ປາອິນເດຍ 4.000ໂຕ ແລະ ປາປາກ 2.600 ໂຕ.
ເມືອງລະມາມ ແຂວງເຊກອງ ປ່ອຍປາ ຈຳນວນ 41 ພັນໂຕ ລົງສູ່ວັງສະຫງວນແຫລ່ງທ່ອງທ່ຽວນ້ຳຕົກແຝກ; ນະຄອນຫລວງພະບາງ ປ່ອຍທັງໝົດ 30.000 ກວ່າໂຕ ລົງສູ່ທ່ານໍ້າຂອງທີ່ບ້ານຊຽງທອງ.
(ໜັງສືພິມ ລາວພັດທະນາ)