ຫລານ ທຣຳ ແນະນຳ ທຣຳ ລາອອກ
ແມຣີ ທຣຳ ຜູ້ເປັນຫລານສາວປະທານາທິບໍດີ ໂດນັລ ທຣຳ ໃຫ້ສຳພາດຕໍ່ສຳນັກຂ່າວ ABC News ໃນວັນທີ 14 ກໍລະກົດຜ່ານມາ ໂດຍນາງຖືເປັນຄົນໃນຕະກູນທຣຳຄົນທຳອິດທີ່ອອກມາບອກໃຫ້ຜູ້ເປັນອາລາອອກຈາກຕຳແໜ່ງຜູ້ນຳອາເມລິກາ.
ແມຣີ ກ່າວວ່າ: ໄລຍະ 4 ເດືອນທຳອິດທີ່ອາຂອງນາງຮັບຕຳແໜ່ງຢູ່ທຳນຽບຂາວ, ນາງໄດ້ພົບກັບຜູ້ເປັນອາຢູ່ຫ້ອງເຮັດວຽກຮູບໄຂ່ໃນທຳນຽບຂາວ ພ້ອມໃຫ້ກຳລັງໃຈຜູ້ເປັນອາຂອງນາງວ່າ: ຢ່າໃຫ້ບັນດານັກວິຈານເຮັດໃຫ້ ອາທຣຳ ຮູ້ສຶກໝົດຫວັງ, ແຕ່ເມື່ອຜູ້ສຳພາດຖາມວ່າ: ຖ້າມື້ນັ້ນນາງໄດ້ມີໂອກາດພົບທ່ານ ທຣຳ ອີກ, ນາງຈະແນະນຳໃຫ້ທ່ານລາອອກ.
ແມຣີ ກ່າວວ່າ: ເມື່ອຄິດຢ້ອນກັບໄປ ຕອນທີ່ນາງເຂົ້າພົບຜູ້ເປັນອາຢູ່ທຳນຽບຂາວສາມຄັ້ງ ແລະ ໃນທຸກຄັ້ງອາຂອງນາງເມື່ອຍຕໍ່ສິ່ງທີ່ກະທຳຫລາຍ.
ນາງຍັງເວົ້າອີກວ່າ: ທ່ານ ທຣຳ ເປັນຄືທຸກວັນນີ້ເພາະ “ບັນຫາພາຍໃນຕະກູນທຣຳ ຈຶ່ງເຮັດໃຫ້ທ່ານກາຍເປັນຄົນໄຮ້ຄວາມສາມາດໃນການເປັນປະທານາທິບໍດີ”.
ການໃຫ້ສຳພາດຂອງນາງ ແມຣີ ທຣຳ ມີຂຶ້ນປະມານໜຶ່ງອາທິດຫລັງຈາກນາງໄດ້ຂຽນໜັງສືເປີດໂປ່ງຜູ້ເປັນອາ ແລະ ເລື່ອງລາວໃນຄອບຄົວທຣຳ ທີ່ມີຊື່ວ່າ: “Too Much and Never Enough: How My Family Crested the World’s Most Dangerous Man” ໂດຍໃນຫລາຍຕອນຂອງໜັງສືກ່າວເຖິງເລື່ອງບໍ່ດີຂອງທ່ານ ໂດນັລ ທຣຳ ແລະ ຄົນຕະກູນທຣຳ ໃນຫລາຍບັນຫາ ເຊິ່ງຫລໍ່ຫລອມໃຫ້ທ່ານ ໂດນັລ ທຣຳ ເປັນຄືທຸກວັນນີ້.
ແມຣີ ເຄີຍກ່າວວ່າ: ຄືນທີ່ປະກາດຜົນການເລືອກຕັ້ງຜູ້ນຳອາເມລິກາປີ 2016 ເປັນຄືນອັນໜ້າເສົ້າຂອງປະເທດ ແລະ ນາງໂພດຂໍ້ຄວາມວ່າ: “ຂ້ອຍຮູ້ສຶກເສົ້າໃຈແທນປະເທດຂອງເຮົາ”. ແມຣີ ບອກວ່າ: ອາຂອງນາງເປັນພວກມັກຖືກການອວຍ ເພາະຄວາມຈິງແລ້ວ ທ່ານບໍ່ແມ່ນຄົນດີຂະໜາດນັ້ນ ຈຶ່ງມັກໃຫ້ຜູ້ອື່ນຍົກຍ້ອງສັນລະເສີນຕົນເອງຕະຫລອດເວລາ ເພື່ອຮັກສາພາບພົດຕົນເອງໄວ້.
ສຳລັບ ແມຣີ ທຣຳ ອາຍຸ 55 ປີ ຈົບການສຶກສາປະລິນຍາເອກດ້ານຈິດຕະວິທະຍາ ເປັນລູກສາວຂອງທ້າວ ເຟຣັດ ທຣຳ ຈູເນຍ ເຊິ່ງເປັນອ້າຍກົກຂອງປະທານາທິບໍດີ ໂດນັລ ທຣຳ ໂດຍ ເຟຣັດ ເສຍຊີວິດຈາກອາການຫົວໃຈວາຍຈາກການສູບຢາເມື່ອນາງອາຍຸໄດ້ 16 ປີ.
