ຫລາຍປະເທດກ່າວຫາ ຣັດເຊຍພະຍາຍາມລັກສູດວັກແຊງໂຄວິດ
ອາເມລິກາ-ອັງກິດ-ການາດາ ກ່າວຫາ ຣັດເຊຍພະຍາຍາມຈາລະກຳການວິໄຈວັກແຊງໂຄວິດ-19.
ລັດຖະບານອັງກິດອອກຖະແຫລງການລະບຸວ່າ: ໜ່ວຍງານດ້ານຄວາມໝັ້ນຄົງຂອງອາເມລິກາ, ອັງກິດ ແລະ ການາດາ ພົບຫລັກຖານວ່າ ລັດຖະບານເກຣມລິນກຳລັງພະຍາຍາມແຮັກເຈາະລະບົບ ເພື່ອຈາລະກຳຂໍ້ມູນການວິໄຈວັກແຊງປ້ອງກັນພະຍາດໂຄວິດ-19 ເຊິ່ງຫລາຍປະເທດກຳລັງເລັ່ງພັດທະນາ.
ໃນຖະແຫລງການລະບຸວ່າ: ໜ່ວຍງານດ້ານຄວາມໝັ້ນຄົງໄຊເບີແຫ່ງຊາດຂອງອັງກິດ ຫລື GCHQ ໄດ້ຮ່ວມມືກັບໜ່ວຍງານດ້ານຄວາມໝັ້ນຄົງຂອງອາເມລິກາ ແລະ ການາດາ ເຊິ່ງຕ່າງກໍເປັນສະມາຊິກກຸ່ມ Five Eyes ລະບຸວ່າ: ກຸ່ມນັກຈາລະກຳຂໍ້ມູນທີ່ມີຊື່ວ່າ: APT29 ຫລື ມີຊື່ເອີ້ນວ່າແກ້ງ Cozy Bear ພະຍາຍາມແຮັກເຂົ້າລະບົບສະຖາບັນວິໄຈວັກແຊງໃນຫລາຍແຫ່ງທົ່ວໂລກ ໂດຍພົບວ່າກຸ່ມນີ້ເປັນສ່ວນໜຶ່ງຂອງໜ່ວຍຂ່າວລັບຣັດເຊຍ.
“APT29 ເປັນກຸ່ມແຮັກເກີທີ່ຮູ້ຈັກກັນດີວ່າຕັ້ງເປົ້າຈາລະກຳຂໍ້ມູນສຳຄັນໃນອົງກອນດ້ານສາທາລະນະສຸກ ແລະ ພະລັງງານທົ່ວໂລກ. ດັ່ງນັ້ນ ເຮົາຈະສະໜັບສະໜູນໃຫ້ທຸກຄົນດຳເນີນຕໍ່ໄພຄຸກຄາມນີ້ຢ່າງຈິງຈັງ ແລະ ບັນເທົາຜົນກະທົບທີ່ຈະເກີດຂຶ້ນ”. ທ່ານ ແອນ ນອຍເບີເກີ ເຈົ້າໜ້າທີ່ຕົວແທນໜ່ວຍ NSA ຂອງອາເມລິກາລະບຸໃນຖະແຫລງຮ່ວມ.
ເຖິງຢ່າງໃດກໍດີ, ອັງກິດບໍ່ໄດ້ເປີດເຜີຍວ່າມີສະຖາບັນວິໄຈໃດແດ່ທີ່ຖືກແຮັກຂໍ້ມູນ ຫລື ໄດ້ຮັບຜົນກະທົບຈາກຄວາມພະຍາຍາມຈາລະກຳຄັ້ງນີ້. ແນ່ນອນວ່າເລື່ອງດັ່ງກ່າວ ລັດຖະບານຣັດເຊຍອອກມາປະຕິເສດເຖິງຄຳກ່າວອ້າງ ທັງວ່າໃຫ້ອັງກິດ ແລະ ບັນດາປະເທດທີ່ຮ່ວມກ່າວຫາຣັດເຊຍ ເປີດເຜີຍຫລັກຖານ ເພື່ອສະໜັບສະໜູນຂໍ້ກ່າວຫາ.