ແມ່ຍິງຜູ້ຫ້າວຫັນພາຄອບຄົວພົ້ນທຸກ

ແມ່ຍິງຜູ້ຫ້າວຫັນພາຄອບຄົວພົ້ນທຸກ - 212 - ແມ່ຍິງຜູ້ຫ້າວຫັນພາຄອບຄົວພົ້ນທຸກ
ແມ່ຍິງຜູ້ຫ້າວຫັນພາຄອບຄົວພົ້ນທຸກ - Untitled design - ແມ່ຍິງຜູ້ຫ້າວຫັນພາຄອບຄົວພົ້ນທຸກ

ການ​ປູກຝັງ-ລ້ຽງສັດ​ໄດ້​ເປັນ​ອາຊີບ​ຢູ່​ຄູ່​ກັບ​ຄົນ​ລາວ​ເຮົາ​ມາ​ແຕ່​ດົນ​ນານ​ແລ້ວ ບວກ​ກັບ​ມູນ​ເຊື້ອຄວາມ​ດຸ​ໝັ່ນ​ຂະຫຍັນ​ພຽນ ​ແລະ ມີ​ຫົວຄິດ​ປະດິດ​ສ້າງ​ໃນ​ການ​ປະກອບ​ອາຊີບ ​ແລະ ຜະລິດ​ເປັນ​ສິນຄ້າ. ດັ່ງນັ້ນ ປະຊາຊົນ​ຈຶ່ງ​ມີ​ການ​ຫັນປ່ຽນ​ການ​ຜະລິດ​ຂອງ​ຕົນ​ໄປ​ຕາມ​ຍຸກ​ສະ​ໄໝ ​ໂດຍ​ສະ​ເພາະ​ແມ່ນ​ການ​ປູກ​ພືດ​ອຸດສາຫະກຳ​ເປັນ​ອາຊີບ​ຈາ​ກທີ່​ເຄີຍ​ປູກ​ຕາມ​ທຳ​ມະ​ຊາດ​ກໍ​ເລີ່​ມຫັນປ່ຽນ​ມາ​ປູກ​ເປັນ​ສິນຄ້າ, ນຳ​ໃຊ້​ເຕັກນິກ​ການ​ປູກ​ແບບ​ໃໝ່ ​ເພື່ອ​ຊ່ວຍ​ຫລຸດ​ແຮງ​ງານ ​ແລະ ມີ​ລາຍ​ຮັບ​ເພີ່ມ​ຂຶ້ນ. ດັ່ງ​ຄອບຄົວ ຈັນ​ສຸກ ປະຊາຊົນ​ບ້ານ​ນາ​ຫວາຍ ​ເມືອງ​ບູນ​ໃຕ້ ​ແຂວງ​ຜົ້ງສາລີ ທີ່​ໄດ້​ຕັດສິນ​ໃຈ​ຫັນ​ມາ​ປູກ​ຢາງພາລາ​ຂາຍ ​ແຕ່​ປີ 2005 ​ເປັນຕົ້ນມາ ​ແລະ ມາ​ຮອດ​ປັດຈຸບັນ​ໄດ້​ຊ່ວຍ​ໃຫ້​ຊີວິດ​ການ​ເປັນ​ຢູ່​ຂອງ​ຄອບຄົວ​ຈາກ​ຜູ້​ທຸກ​ຍາກ​ຂາດ​ເຂີນ​ໄດ້​ກາຍ​ມາ​ເປັນ​ຄອບຄົວ​ຕົວ​ແບບ​ຂອງ​ເມືອງ, ມີ​ລາຍ​ຮັບ​ນັບ​ຫລາຍ​ຮ້ອຍ​ລ້ານ​ຕໍ່​ປີ.

ຈັນສຸກ ​ແສງ​ດາວ​ອນ ​ເລົ່າ​ໃຫ້​ຟັງ​ວ່າ: ຄອບຄົວ​ຂອງ​ຕົນ​ມີ​ທັງ​ໝົດ 6 ຄົນ, ຍິງ 3 ຄົນ ​ແລະ ​ແຮງ​ງານ​ຫລັກ 3 ຄົນ. ກ່ອນ​ໜ້າ​ນີ້​ຈະ​ຫັນ​ມາ​ປູກ​ຢາງພາລາ​ຂາຍ ​ເມື່ອ​ກ່ອນ​​ແມ່ນ​ມີ​ອາຊີບ​ເປັນ​ຊາວນາ ຫລັງ​ສູ່​ຟ້າ​ໜ້າ​ສູ່​ດິນ​ດ້ວຍ​ຄວາມທຸກ​ຍາກ​ລຳບາກ​​ເພື່ອ​ຫາ​ເງິນ​ລ້ຽງ​ຕົນ​ເອງ ​ແລະ ຄອບຄົວ​ໄປ​ແຕ່​ລະມື້. ຈົນ​ຕົກ​ມາ​ໄລຍະ​ມີ​ໂຄງການ​ສົ່ງ​ເສີມ​ປູກ​ຢາງພາລາ​ເຂົ້າມາ ຈຶ່ງ​ໄດ້​ຕັດສິນ​ໃຈ​ຊອກ​ຮູ້​ດ້ານ​ເຕັກນິກ​ການ​ປູກ​ຕົ້ນຢາງ ​ໂດຍ​ນຳ​ໃຊ້​ທຶນ ​ແລະ ​ແຮງ​ງານ​ໃນ​ຄອບຄົວ​ເປັນ​ຫລັກ. ປີ​ທຳ​ອິດ​ແມ່ນ​ເລີ່​ມທົດ​ລອງ​ປູກ​ເນື້ອທີ່ 1 ​ເຮັກຕາ ມີ 320 ຕົ້ນ ​ໂດຍ​ຊື້​ເບ້ຍ​ຈາກ​ບໍລິສັດ 2.500 ກີບ​ຕໍ່​ເບ້ຍ, ມາ​ປີ 2006 ປູກ​ເພີ່ມ​ຕື່ມ 2 ​ເຮັກຕາ ມີ​ຈຳນວນ 800 ຕົ້ນ ​ແລະ ປີ 2008 ຂະຫຍາຍ​ຕື່ມ​ອີກ 4 ​ເຮັກຕາ ​ແລະ ມາ​ຮອດ​ປັດຈຸບັນ​ລວມ​ແລ້ວ​ຄອບຄົວ ​ແສງ​ດາວ​ອນ ມີ​ຕົ້ນຢາງພາລາ​ທັງ​ໝົດ 3.100 ກວ່າ​ຕົ້ນ ​ແລະ ສາມາດ​ປາດ​ເອົາ​ນ້ຳຢາງ​ໄດ້​ແລ້ວ 1.500 ຕົ້ນ, ​ເດືອນ​ໜຶ່ງ​ສາມາດ​ຂາຍ​ນ້ຳຢາງ​ອອກ​ໄດ້ 2 ຄັ້ງ ​ໂດຍ​ສະ​ເລ່ຍ​ເດືອນ​ໜຶ່ງ​ມີ​ລາຍ​ຮັບ​ປະມານ 12 ລ້ານ​ກີບ. ນອກ​ນີ້ ຍັງ​ເຮັດ​ນາ​ມີ​ລາຍ​ຮັບ​ປະມານ 20 ລ້ານ​ກີບ ​ແລະ ຮອດ​ລະດູ​ແລ້ງ​ກໍ​ປູກ​ໝາກ​ຖົ່ວ, ໝາກ​ແຕງ ​ແລະ ພືດ​ຜັກ​ຕ່າງໆ​ຂາຍ​ສົ່ງ​ອອກ​ຕະຫລາດ​ເທດສະບານ​ເມືອງ​ບູນ​ໃຕ້​ສ້າງ​ລາຍ​ຮັບ​ເພີ່ມ​ຕື່ມ​ປີ​ລະ 30 ລ້ານ​ກີບ ​ເຊິ່ງລາຍ​ຮັບ​ດັ່ງກ່າວ​ໄດ້​ຊ່ວຍ​ປ່ຽນ​ຊີວິດ​ຂອງ​ຄອບຄົວ​ດີ​ຂຶ້ນ ຈາກ​ທີ່​ຫາ​ເຊົ້າກິນ​ຄໍ່າ​ມາ​ເປັນ​ຄອບຄົວ​ທີ່​ມີ​ລາຍ​ຮັບ​ເຂົ້າຄອບຄົວ​ຢ່າງ​ເປັນ​ປົກກະຕິ ​ແລະ ສາມາດ​ຢັ້ງຢືນ​ວ່າ​ເປັນ​ຄອບຄົວ​ພົ້ນທຸກ ​ແລະ ​ເປັນ​ຄອບຄົວ​ແບບຢ່າງ​ໃນ​ການ​ສູ້​ຊົນ​ພັດທະນາ​ຕົນ​ເອງ​ນັບ​ມື້ດີ​ຂຶ້ນ.

ຮອງ​ນາຍບ້ານ​ນາ​ຫວາຍ ​ໃຫ້​ຮູ້​ວ່າ: ຄອບຄົວ ​ແສງ​ດາວ​ອນ ​ແມ່ນ​ຄອບຄົວ​ທີ່​ມີ​ຄວາມ​ຕັ້ງ​ໃຈ​ພັດທະນາ​ເສດຖະກິດ, ມີ​ຄວາມ​ດຸ​ໝັ່ນ​ຂະຫຍັນ​ພຽນ ຈຶ່ງ​ເຮັດ​ໃຫ້​ຄອບຄົວ​ລາວ​ເປັນ​ແບບຢ່າງ​ໃຫ້​ປະຊາຊົນ​ພາຍ​ໃນ​ບ້ານ​ນາ​ຫວາຍ ກໍ​ຄື​ຊາວ​ເມືອງ​ບູນ​ໃຕ້​ຕະຫລອດ​ມາ.

ແມ່ຍິງຜູ້ຫ້າວຫັນພາຄອບຄົວພົ້ນທຸກ - Wave100S AD to Website 2020 0 - ແມ່ຍິງຜູ້ຫ້າວຫັນພາຄອບຄົວພົ້ນທຸກ

ປັດຈຸບັນ​ຄອບຄົວ ​ແສງ​ດາວ​ອນ ມີ​ເຮືອນ​ຢູ່​ຢ່າງ​ຖາວອນ, ມີ​ລົດ​ໃຫຍ່, ລົດຈັກ​ໄວ້​ຮັບ​ໃຊ້​ຄອບຄົວ ​ແລະ ມີ​ເງິນ​ແຮ​ຈຳນວນ​ໜຶ່ງ​ຝາກ​ໄວ້​ຢູ່​ທະນາຄານ, ມີ​ເງິນ​ໃຊ້​ຈ່າຍ​ໂດຍ​ບໍ່​ຕ້ອງ​ກູ້​ຢືມ ​ແລະ ຍັງ​ສາມາດ​ສົ່ງ​ນ້ອງ​ສາວ​ຮຽນ​ຈົບ​ມະຫາວິທະຍາ​ໄລ​ໄດ້​ອີກ.

​ແສງ​ດາວ​ອນ ຍັງ​ຝາກ​ເຖິງ​ຜູ້​ທີ່​ຕ້ອງການ​ເຮັດ​ອາຊີບ​ດັ່ງກ່າວ​ວ່າ: ສິ່ງ​ສຳຄັນ​ຕ້ອງ​ຄຳນຶງ​ເຖິງຄວາ​ມມັກ, ຄວາມ​ອົດທົນ ​ແລະ ຄວາມ​ດຸ​ໝັ່ນ ​ເພາະ​ການ​ປູກ​ຢາງພາລາ​ແມ່ນ​ນຳ​ໃຊ້​ແຮງ​ງານ​ຄົນ​ເປັນ​ຫລັກ ບໍ່​ວ່າ​ຈະ​ເປັນ​ການ​ປູກ, ການ​ກຳຈັດ​ຫຍ້າ, ການ​ເກັບ​ກ່ຽວ, ການ​ດູ​ແລ​ຮັກສາ​ທຸກໆ​ຂັ້ນຕອນ​ກໍ​ລ້ວນ​ແລ້ວ​ແຕ່​ຕ້ອງ​ໃຊ້​ແຮງ​ງານ​ຄົນ, ​ແນ່ນອນ​ວ່າ​ມັນ​ຕ້ອງ​ເມື່ອຍ ​ແຕ່​ຖ້າ​ໃຜ​ທີ່​ໄດ້​ລອງ​ມາ​ເຮັດ​ແລ້ວ​ຈະ​ກາຍ​ເປັນຄວາມ​ຮັກ ​ແລະ ມີ​ຄວາມສຸກ​ທີ່​ໄດ້​ເຮັດ.

ແມ່ຍິງຜູ້ຫ້າວຫັນພາຄອບຄົວພົ້ນທຸກ - WhatsApp Image 2020 05 27 at 5 - ແມ່ຍິງຜູ້ຫ້າວຫັນພາຄອບຄົວພົ້ນທຸກ
ແມ່ຍິງຜູ້ຫ້າວຫັນພາຄອບຄົວພົ້ນທຸກ - WhatsApp Image 2020 05 27 at 5 - ແມ່ຍິງຜູ້ຫ້າວຫັນພາຄອບຄົວພົ້ນທຸກ
error: Alert: ເນື້ອຫາຂ່າວມີລິຂະສິດ !!