3 ກຸ່ມວິໄຈເຜີຍຂ່າວດີພັດທະນາວັກແຊງໂຄວິດ-19 ຂະນະທີ່ມະຫາວິທະຍາໄລອອກຟອດໂຊຜົນທົດລອງ ຊີ້ວັກແຊງກະຕຸ້ນພູມຄຸ້ມກັນໄດ້

3 ກຸ່ມວິໄຈເຜີຍຂ່າວດີພັດທະນາວັກແຊງໂຄວິດ-19 ຂະນະທີ່ມະຫາວິທະຍາໄລອອກຟອດໂຊຜົນທົດລອງ ຊີ້ວັກແຊງກະຕຸ້ນພູມຄຸ້ມກັນໄດ້ - 214 - 3 ກຸ່ມວິໄຈເຜີຍຂ່າວດີພັດທະນາວັກແຊງໂຄວິດ-19 ຂະນະທີ່ມະຫາວິທະຍາໄລອອກຟອດໂຊຜົນທົດລອງ ຊີ້ວັກແຊງກະຕຸ້ນພູມຄຸ້ມກັນໄດ້
3 ກຸ່ມວິໄຈເຜີຍຂ່າວດີພັດທະນາວັກແຊງໂຄວິດ-19 ຂະນະທີ່ມະຫາວິທະຍາໄລອອກຟອດໂຊຜົນທົດລອງ ຊີ້ວັກແຊງກະຕຸ້ນພູມຄຸ້ມກັນໄດ້ - Untitled design - 3 ກຸ່ມວິໄຈເຜີຍຂ່າວດີພັດທະນາວັກແຊງໂຄວິດ-19 ຂະນະທີ່ມະຫາວິທະຍາໄລອອກຟອດໂຊຜົນທົດລອງ ຊີ້ວັກແຊງກະຕຸ້ນພູມຄຸ້ມກັນໄດ້

ວັນ​ທີ 20 ກໍລະກົດ, 3 ກຸ່ມ​ວິ​ໄຈ​ຈາກ​ສະຫະຣາຊະ​ອານາຈັກ, ຈີນ ​ແລະ ອາ​ເມ​ລິ​ກາ ຕ່າງ​ເຜີຍ​ແຜ່​ຜົນ​ທົດ​ລອງ​ວັກ​ແຊງ​ຕ້ານ​ໂຄ​ວິດ-19 ຂັ້ນຕົ້ນ​ໃນ​ຄົນ ພົບ​ສັນຍານ​ບວກ​ທີ່​ວັກ​ແຊງ​ສາມາດ​ກະ​ຕຸ້ນ​ການ​ຕອບ​ສະໜອງ​ຂອງ​ລະບົບ​ພູມ​ຄຸ້ມ​ກັນ ​ແລະ ​ໃຊ້​ງານ​ໄດ້​ຢ່າງ​ປອດ​ໄພ.

ຜົນ​ທົດ​ລອງ​ທຳ​ອິດ​ຈາກ​ທີ​ມວິ​ໄຈ​ມະຫາວິທະຍາ​ໄລ​ອອກ​ຟອດຂອງ​ສະຫະຣາຊະ​ອານາຈັກ ທີ່​ຮ່ວມ​ມື​ກັບ​ບໍລິສັດ​ຢາ AstraZeneca ພັດທະນາ​ວັກ​ແຊງ​ຊື່ວ່າ AZD1222 ພົບ​ສັນຍານ​ບວກ​ທີ່​ສຳຄັນ ​ໃນ​ການ​ທົດ​ລອງ​ຂັ້ນຕົ້ນ ​ໄລຍະ​ທີ 1/2.

ຂໍ້​ມູນ​ການ​ທົດ​ລອງ​ທີ່​ເຜີຍ​ແຜ່​ໃນ​ວາລະສານ​ການ​ແພດ The Lancet ລະບຸ​ວ່າ​ມີ​ການ​ສັກ​ວັກ​ແຊງ​ໃຫ້​ກຸ່ມ​ຕົວຢ່າງ​ຈຳນວນ 1.077 ຄົນ ອາຍຸ 18-55 ປີ ທີ່​ບໍ່​ມີ​ປະຫວັດ​ຕິດ​ເຊື້ອ​ໂຄ​ວິດ-19 ​ເຊິ່ງພົບ​ວ່າ​ວັກ​ແຊງ​ນັ້ນມີ​ຄວາມ​ປອດ​ໄພ ​ແລະ ສາມາດ​ກະ​ຕຸ້ນ​ການ​ຕອບ​ສະໜອງ​ຂອງ​ລະບົບ​ພູມ​ຄຸ້ມ​ກັນ​ໃນ​ຮ່າງກາຍ​ຂອງກຸ່ມ​ຕົວຢ່າງ​ໄດ້​ດີ​ເກືອບ​ທຸກ​ຄົນ ​ແລະ ນຳ​ໄປ​ສູ່​ການ​ສ້າງ​ພູມ​ຄຸ້ມ​ກັນ​ທີ່​ສຳຄັນ​ຄື​ແອນ​ຕິ​ບໍ​ດີ້ (Antibody) ຫລື ສານ​ພູມ​ຕ້ານທານ ​ແລະ ທີ​ເຊ​ລ (T-Cell) ຫລື ​ຈຸ​ລັງ​ເມັດ​ເລືອດ​ຂາວ​ຊະນິດ​ໜຶ່ງ​ທີ່​ຊ່ວຍ​ກຳຈັດ​ສິ່ງ​ແປກ​ປອມ​ໃນ​ຮ່າງກາຍ ​ເຮັດ​ໃຫ້​ສາມາດ​ຕ້ານທານ​ເຊື້ອ​ໄວຣັສ​ໂຄ​ໂຣນາ 2019 (SARS-CoV-2) ທີ່​ກໍ່​ໃຫ້​ເກີດ​ພະຍາດ​ໂຄ​ວິດ-19 ​ໄດ້.

ຈາກ​ການ​ທົດ​ລອງ​ພົບ​ວ່າ​ລະດັບ​ການ​ຕອບ​ສະໜອງ​ຂອງ​ທີ​ເຊ​ລຈະ​ເພີ່ມ​ສູງ​ສຸດ​ຫລັງ​ສັກ​ວັກ​ແຊງ​ໃນ​ໄລຍະ​ເວລາ​ປະມານ 14 ວັນ, ສ່ວນ​ແອນ​ຕິ​ບໍ​ດີ້​ຈະ​ມີ​ການ​ຕອບ​ສະໜອງ​ສູງ​ສຸດ​ຫລັງ​ສັກ​ວັກ​ແຊງ​​ໄປ​ແລ້ວ​ປະມານ 28 ວັນ ​ເຊິ່ງ​ໃນ​ການ​ທົດ​ລອງ​ຍັງ​ພົບ​ຜົນ​ຂ້າງຄຽງ​ທີ່​ບໍ່​ຮຸນ​ແຮງ​ຈາກ​ການ​ສັກ​ວັກ​ແຊງ​ເຊັ່ນ: ​ເປັນ​ໄຂ້ ​ແລະ ​ເຈັບຫົວ​ໃນ​ກຸ່ມ​ຕົວຢ່າງ​ປະມານ 70%.

ອອກ​ຟອດພັດທະນາ​ວັກ​ແຊງ AZD1222 ດ້ວຍ​ເຕັກ​ໂນ​ໂລ​ຊີ​ການ​ດັດ​ແປງ​ພັນທຸ​ກຳ​ໄວຣັສທີ່​ເປັນສາ​ເຫດ​ຂອງ​ພະຍາດ​ໄຂ້ຫວັດ ​ເຊິ່ງພົບ​ໄດ້​ທົ່ວ​ໄປ​ໃນ​ລີງ​ຊິ​ມ​ແປນ​ຊີ ​ໂດຍ​ເຊື້ອ​ໄວຣັສຈະ​ຖືກ​ດັດ​ແປງ​ພັນທຸ​ກຳ​ຂະໜານ​ໃຫຍ່​ຈົນ​ເຮັດ​ໃຫ້​ບໍ່​ສາມາດ​ກໍ່​ໃຫ້​ເກີດ​ການ​ຕິດ​ເຊື້ອ. ອີກ​ທັງ​ຍັງ​ມີ​ລັກສະນະ​ທາງ​ພັນທຸ​ກຳ​ທີ່​ຄື​ກັບ​ໄວຣັສ​ໂຄ​ໂຣນາ 2019 ​ແລະ ​ເມື່ອ​ສັກ​ເຂົ້າສູ່​ຮ່າງກາຍ​ແລ້ວ​ຈະ​ເຮັດ​ໃຫ້​ລະບົບ​ພູມ​ຄຸ້ມ​ກັນ​ເກີດ​ການ​ຕອບ​ສະໜອງ.

​ເຖິງ​ຢ່າງ​ໃດ​ກໍ​ຕາມ, ທີ​ມວິ​ໄຈ​ຂອງ​ອອກ​ຟອດຢືນຢັນ​ວ່າ: ຈຳ​ເປັນ​ຕ້ອງ​ມີ​ການ​ວິ​ໄຈ​ເພີ່ມ​ຕື່ມ ກ່ອນ​ຈະ​ຢືນຢັນ​ວ່າ ວັກ​ແຊງ​ນັ້ນສາມາດ​ຕ້ານທານ​ເຊື້ອ​ໄວຣັສ​ໂຄ​ໂຣນາ 2019 ​ໄດ້​ຢ່າງ​ມີ​ປະສິດທິພາບ ຕະຫລອດ​ຈົນ​ກວດ​ສອບ​ວ່າ​ວັກ​ແຊງ​ນັ້ນສາມາດ​ປົກ​ປ້ອງ​ຮ່າງກາຍ​ຈາກ​ໄວຣັສ​ໄດ້​ດົນ​ຊໍ່າ​ໃດ.

ຂະນະ​ທີ່​ຕອນ​ນີ້​ທີ​ມວິ​ໄຈ​ຂອງ​ອອກ​ຟອດ​ໄດ້​ເລີ່​ມການ​ທົດ​ລອງ​ໄລຍະ​ທີ 2/3 ​ເຊິ່ງຈະ​ມີ​ການ​ຂະຫຍາຍ​ການ​ທົດ​ລອງ​ໃນ​ກຸ່ມ​ຕົວຢ່າງ​ຢູ່​ສະຫະຣາຊະ​ອານາຈັກ​ເພີ່ມ​ເປັນ 10.000 ຄົນ ​ແລະ ​ໄດ້​ຂະຫຍາຍ​ການ​ທົດ​ລອງ​ໄປ​ຕ່າງປະ​ເທດ​ນຳ​ອີກ ​ເນື່ອງ​ຈາກ​ອັດຕາ​ການ​ຕິດ​ເຊື້ອຢູ່​ສະຫະຣາຊະ​ອານາຈັກ​ຕອນ​ນີ້​ຂ້ອນ​ຂ້າງ​ຕໍ່າ ​ເຮັດ​ໃຫ້​ຍາກ​ຕໍ່​ການ​ຢືນຢັນ​ປະສິດທິພາບ​ຂອງ​ວັກ​ແຊງ ​ໂດຍ​ປັດຈຸບັນ​ໄດ້​ເລີ່​ມການ​ທົດ​ລອງ​ຢູ່​ອາ​ຟຣິກາ​ໃຕ້ ​ແລະ ​ເບຣຊິນ​ແລ້ວ ​ແລະ ຈະ​ເລີ່​ມການ​ທົດ​ລອງ​ໃນ​ກຸ່ມ​ຕົວຢ່າງ 30.000 ຄົນ​ຢູ່​ອາ​ເມ​ລິ​ກາ ​ເດືອນ​ສິງຫາ​ນີ້.

ທາງ​ດ້ານ​ລັດຖະບານ​ສະຫະຣາຊະ​ອານາຈັກ​ເປີດ​ເຜີຍ​ວ່າ: ​ໄດ້​ເຮັດ​ຂໍ້​ຕົກລົງ ​ແລະ​ ຈ່າຍ​ເງິນ​ສັ່ງ​ຜະລິດ​ວັກ​ແຊງ​ໂຄ​ວິດ-19 ຈາກ 3 ກຸ່ມ​ວິ​ໄຈ ລວມທັງ​ອອກ​ຟອດ​ແລ້ວ ​ໂດຍ​ແບ່ງ​ເປັນ: ວັກ​ແຊງ 100 ລ້ານ​ໂດ​ສ ຂອງ​ມະຫາວິທະຍາ​ໄລ​ອອກ​ຟອດ, ວັກ​ແຊງ 30 ລ້ານ​ໂດ​ສ ຂອງ​ບໍລິສັດ BioNtech/Pfizer ​ແລະ ວັກ​ແຊງ 60 ລ້ານ​ໂດ​ສ ຂອງ​ບໍລິສັດ Valneva.

3 ກຸ່ມວິໄຈເຜີຍຂ່າວດີພັດທະນາວັກແຊງໂຄວິດ-19 ຂະນະທີ່ມະຫາວິທະຍາໄລອອກຟອດໂຊຜົນທົດລອງ ຊີ້ວັກແຊງກະຕຸ້ນພູມຄຸ້ມກັນໄດ້ - Wave100S AD to Website 2020 0 - 3 ກຸ່ມວິໄຈເຜີຍຂ່າວດີພັດທະນາວັກແຊງໂຄວິດ-19 ຂະນະທີ່ມະຫາວິທະຍາໄລອອກຟອດໂຊຜົນທົດລອງ ຊີ້ວັກແຊງກະຕຸ້ນພູມຄຸ້ມກັນໄດ້

​ເຊິ່ງທາງ​ປະທານ​ຄະນະດ້ານ​ວັກ​​ແຊງ​ຂອງ​ສະຫະຣາຊະ​ອານາຈັກ​ເປີດ​ເຜີຍ​ສາ​ເຫດ​ທີ່​ຕ້ອງ​ຄົ້ນຫາ ​ແລະ ສັ່ງ​ຜະລິດ​ວັກ​ແຊງ​ຈາກ​ກຸ່ມ​ວິ​ໄຈ​ທີ່​ມີ​ຄວາມ​ກ້າວໜ້າ ​​ເພື່ອ​ໃຫ້​ແນ​ໃຈ​ວ່າ​ສະຫະຣາຊະ​ອານາຈັກ​ຈະ​ໄດ້​ວັກ​ແຊງ​ຈາກ​ໜຶ່ງ​ໃນ​ກຸ່ມ​ວິ​ໄຈ​ເຫລົ່າ​ນີ້​ທີ່​ຜ່ານ​ການ​ພິສູດ​ແລ້ວ​ວ່າ​ປອດ​ໄພ ​ແລະ ມີ​ປະສິດທິພາບ.

ສຳລັບ​ຜົນ​ທົດ​ລອງ​ທີ 2 ​ເຜີຍ​ແຜ່​ອອກ​ມາ​ໃນ​ວັນ​ທີ 20 ກໍລະກົດ ​ເຊັ່ນ​ກັນ​ຄື​ຜົນ​ທົດ​ລອງ​ຈາກ​ບໍລິສັດ CanSino Biologics ຜູ້​ຜະລິດ​ວັກ​ແຊງ​ຂອງ​ຈີນ ​ເຊິ່ງທົດ​ລອງ​ໄລຍະ​ທີ 2 ຢູ່​ເມືອ​ງອູ່​ຮັ່ນ ນັບ​ແຕ່​ເດືອນ​ເມສາ​ຜ່ານ​ມາ ​ໂດຍ​ໃຫ້​ວັກ​ແຊງ​ກຸ່ມ​ຕົວຢ່າງ 500 ຄົນ ​ເຊິ່ງ​ແຕ່ລະຄົນ​ຈະ​ໄດ້​ຮັບ​ວັກ​ແຊງ​ໃນ​ປະລິມານ​ທີ່​ແຕກ​ຕ່າງ​ກັນ ທັງຫລາຍ, ໜ້ອຍ ​ແລະ ​ໄດ້​ວັກ​ແຊງ​ປອມ (Placebo).

ຈາກການທົດລອງພົບວ່າວັກແຊງນັ້ນມີຄວາມປອດໄພ ແລະ ໃນກຸ່ມຕົວຢ່າງ 95% ຂອງຜູ້ທີ່ໄດ້ຮັບວັກແຊງປະລິມານຫລາຍ ແລະ 91% ຂອງຜູ້ໄດ້ຮັບວັກແຊງປະລິມານໜ້ອຍ ມີການຕອບສະໜອງຂອງພູມຄຸ້ມກັນຄືແອນຕິບໍດີ້ ແລະ ທີເຊລໃນໄລຍະເວລາ 28 ວັນຫລັງໄດ້ຮັບວັກແຊງ ແຕ່ບໍ່ພົບວ່າຊ່ວຍຢັບຢັ້ງການຕິດເຊື້ອ ແລະ ໃນກຸ່ມທີ່ໄດ້ຮັບວັກແຊງປະລິມານຫລາຍ 9% ມີຜົນຂ້າງຄຽງຂ້ອນຂ້າງຮຸນແຮງ ເຊິ່ງຜົນຂ້າງຄຽງສ່ວນຫລາຍທີ່ພົບຄືມີໄຂ້ສູງ.

ອີກກຸ່ມວິໄຈທີ່ມີຄວາມກ້າວໜ້າໃນຜົນທົດລອງວັກແຊງໂຄວິດ-19 ຄືກຸ່ມວິໄຈພາຍໃຕ້ການຮ່ວມມືຂອງບໍລິສັດ Pfizer ຈາກ​ອາ​ເມ​ລິ​ກາ ​ແລະ ບໍລິສັດ BioNTech ຈາກ​ເຢຍລະ​ມັນ ​ເຊິ່ງພັດທະນາ​ວັກ​ແຊງ​ດ້ວຍ​ເຕັກ​ໂນ​ໂລ​ຊີ mRNA ຫລື ການ​ຕັດ​ຕໍ່​ສານ​ພັນທຸ​ກຳ.

ຜົນ​ການ​ທົດ​ລອງ​ຂັ້ນຕົ້ນ ​ໄລຍະ​ທີ 1/2 ທີ່​ເຜີຍ​​ແຜ່​ທາງ medRxiv.org ​ແຕ່​ຍັງ​ບໍ່​ຖືກ​ເຜີຍ​ແຜ່ ​ແລະ ກວດ​ສອບ​ແບບ Peer Review ​ໃນ​ວາລະສານ​ການ​ແພດ ພົບ​ວ່າ​ມີ​ການ​ສຸ່ມ​ໃຫ້​ວັກ​ແຊງ​ກຸ່ມ​ຕົວຢ່າງ 60 ຄົນ ອາຍຸ 18-55 ປີ ​ໃນ​ປະລິມານ​ທີ່​​ແຕກ​ຕ່າງ​ກັນ ​ໂດຍ​ໃນ​ກຸ່ມ​ທີ່​ໄດ້​ຮັບ​ວັກ​ແຊງ​ໃນ​ປະລິມານ​ໜ້ອຍ​ສາມາດ​ກະ​ຕຸ້ນ​ການ​ຕອບ​ສະໜອງ​ຂອງ​ແອນ​ຕິ​ບໍ​ດີ້ ​ແລະ ທີ​ເຊ​ລ​ໄດ້​ດີ.

ສຳລັບ​ຜົນ​ຂ້າງຄຽງ​ທີ່​ເກີດ​ກັບ​ກຸ່ມ​ຕົວຢ່າງ ຫລາຍ​ຄົນ​ມີ​ອາການ​ໃນ​ລະດັບ​ເບົາບາງ​ຈົນ​ເຖິງ​ປານ​ກາງ ​ເຊິ່ງອາການ​ສ່ວນ​ຫລາຍ​ຈະ​ຄື​ມີ​ໄຂ້. ຂະນະ​ທີ່ Pfizer ​ແລະ BioNTech ​ເປີດ​ເຜີຍ​ວ່າ​ຫລັງ​ຈາກ​ນີ້​ຈະ​ມີ​ການ​ຂະຫຍາຍ​ການ​ທົດ​ລອງ​ເຂົ້າສູ່​ໄລຍະ​ທີ 3 ​ແລະ ຂະຫຍາຍ​ການ​ທົດ​ລອງ​ໃນ​ກຸ່ມ​ຕົວຢ່າງ​ທີ່​ມີ​ສຸຂະພາບ​ແຂງ​ແຮງ​ເພີ່ມ​ເປັນ 30.000 ຄົນ ​ເຊິ່ງຈະ​ເລີ່​ມຕົ້ນ​ໃນ​ທ້າຍ​ເດືອນ​ນີ້.

3 ກຸ່ມວິໄຈເຜີຍຂ່າວດີພັດທະນາວັກແຊງໂຄວິດ-19 ຂະນະທີ່ມະຫາວິທະຍາໄລອອກຟອດໂຊຜົນທົດລອງ ຊີ້ວັກແຊງກະຕຸ້ນພູມຄຸ້ມກັນໄດ້ - WhatsApp Image 2020 05 27 at 5 - 3 ກຸ່ມວິໄຈເຜີຍຂ່າວດີພັດທະນາວັກແຊງໂຄວິດ-19 ຂະນະທີ່ມະຫາວິທະຍາໄລອອກຟອດໂຊຜົນທົດລອງ ຊີ້ວັກແຊງກະຕຸ້ນພູມຄຸ້ມກັນໄດ້
3 ກຸ່ມວິໄຈເຜີຍຂ່າວດີພັດທະນາວັກແຊງໂຄວິດ-19 ຂະນະທີ່ມະຫາວິທະຍາໄລອອກຟອດໂຊຜົນທົດລອງ ຊີ້ວັກແຊງກະຕຸ້ນພູມຄຸ້ມກັນໄດ້ - WhatsApp Image 2020 05 27 at 5 - 3 ກຸ່ມວິໄຈເຜີຍຂ່າວດີພັດທະນາວັກແຊງໂຄວິດ-19 ຂະນະທີ່ມະຫາວິທະຍາໄລອອກຟອດໂຊຜົນທົດລອງ ຊີ້ວັກແຊງກະຕຸ້ນພູມຄຸ້ມກັນໄດ້
error: Alert: ເນື້ອຫາຂ່າວມີລິຂະສິດ !!