ລຸງ​ ສຸພາ​ນຸວົງ ຜູ້ນຳ​ທີ່​ທໍລະ​ຫົດ​ອົດທົນ​ອາດ​ຫານ​ຊານ​ໄຊ

ລຸງ​ ສຸພາ​ນຸວົງ ຜູ້ນຳ​ທີ່​ທໍລະ​ຫົດ​ອົດທົນ​ອາດ​ຫານ​ຊານ​ໄຊ -                             5 - ລຸງ​ ສຸພາ​ນຸວົງ ຜູ້ນຳ​ທີ່​ທໍລະ​ຫົດ​ອົດທົນ​ອາດ​ຫານ​ຊານ​ໄຊ
ລຸງ​ ສຸພາ​ນຸວົງ ຜູ້ນຳ​ທີ່​ທໍລະ​ຫົດ​ອົດທົນ​ອາດ​ຫານ​ຊານ​ໄຊ - Untitled design - ລຸງ​ ສຸພາ​ນຸວົງ ຜູ້ນຳ​ທີ່​ທໍລະ​ຫົດ​ອົດທົນ​ອາດ​ຫານ​ຊານ​ໄຊ

ໂດຍ: ທິດ​ກໍ່າ

ວັນ​ເກີດ​ຂອງ ລຸງ​ປະທານ ສຸ​ພານຸ​ວົງ ຄົບຮອບ 111 ປີ (13 ກໍລະກົດ 1909 – 13 ກໍລະກົດ 2020) ຫາ​ກໍ​ຜ່ານ​ພົ້ນ​ໄປ​ພຽງ​ອາທິດ​ກວ່າ, ​ແຕ່​ພະນັກງານ, ທະຫານ, ຕຳຫລວດ ​ແລະ ປວງ​ຊົນ​ລາວ​ທັງ​ຊາດ​ຍັງ​ຈົດ​ຈຳ​ລຳ​ລຶກຄຸນງາມຄວາມດີ ​ແລະ ບຸນຄຸນ​ຂອງ ລຸງ​ປະທານ ຢ່າງ​ບໍ່​ມີ​ວັນ​ລືມ. ທຸກໆ​ປີ​ພໍ​ເຖິງ​ຄົບຮອບ​ວັນ​ເກີດ​ຂອງ​ລຸງ ນັບ​ແຕ່​ການ​ນຳພັກ-ລັດຖະບານ, ພະນັກງານ, ທະຫານ, ຕຳຫລວດ ​ແລະ ປະຊາຊົນ​ບັນດາ​ເຜົ່າ​ ຕ່າງ​ກໍ​ໄດ້​ສະ​ແດງ​ຄວາມ​ຮູ້ສຶກ ​ແລະ ນ້ອມ​ອາ​ໄລ​ເຖິງ​ຜົນງານ, ຄຸນງາມຄວາມດີ​ດ້ວຍ​ຄວາມ​ຊາບ​ຊຶ້ງ ​ແລະ ຈົງ​ຮັກ​ພັກດີ​ຕໍ່​ລຸງ​ປະທານ​ທີ່​ເປັນ​ຜູ້​ໜຶ່ງ​ໃນ​ບັນດາ​ຜູ້ນຳ​ການ​ປະຕິວັດ​ລາວ​ຕະຫລອດ​ໄລຍະ​ແຫ່ງ​ການ​ຕໍ່ສູ້​ນັບ​ແຕ່​ມື້​ເລີ່​ມຕົ້ນຈົນ​ຮອດ​ມື້​ໄດ້​ຮັບ​ໄຊຊະນະ.

​ເວົ້າ​ໄດ້​ວ່າ, ລຸງ​ປະທານ ສຸພາ​ນຸວົງ ​ເປັນຜູ້ນຳ​ທ່ານ​ໜຶ່ງ​ທີ່​ທໍລະ​ຫົດ​ອົດທົນ, ໜຽວ​ແໜ້ນ ​ແລະ ອາດ​ຫານ​ຊານ​ໄຊດ້ວຍ​ໄຫວ​ພິບ, ຄວາມ​ຮູ້​ຄວາມ​ສາມາດ, ຄວາມ​ສະຫລາດ​ສະ​ເພາະ​ຕົວ, ​ເປັນ​ປັນຍາ​ຊົນ​ຮູ້​ໄດ້​ຫລາຍ​ພາສາ, ​ເປັນ​ຜູ້ນຳ​ທີ່​ໄດ້​ຜະ​ເຊີນ​ໜ້າ​ສູ້​ຮົບ​ກັບ​ສັດຕູ​ມາ​ຢ່າງ​ໂຊກ​ໂຊນ ທັງ​ບັນຊາ​ທັງ​ສູ້​ຮົບ​ຕົວ​ຈິງ ຈົນ​ຖືກ​ບາດ​ເຈັບລອດ​ຕາຍ​ຢູ່ທີ່​ສະໜາມຮົບ​ທີ່​ດຸ​ເດືອດ​ເມືອງ​ທ່າ​ແຂກ ​ໃນ​ປີ 1946 ​ແລະ ຖືກ​ຈັບ​ເຂົ້າຄຸກ​ໂພນ​ເຄັງ​ໃນ​ປີ 1955 ​ແລະ ທັງ​ໄດ້​ຜະ​ເຊີນ​ໜ້າ, ອອກ​ໜ້າ, ອອກ​ຕາ​ໃນ​ເວທີ​ການ​ເມືອງ, ການ​ເຈລະຈາ​ສອງ​ຝ່າຍ, ຫລາຍ​ຝ່າຍ​ຢູ່​ພາຍ​ໃນ ​ແລະ ຕ່າງປະ​ເທດ​ມາ​ຢ່າງ​ນັບ​ບໍ່​ຖ້ວນ. ດ້ວຍ​ສາ​ເຫດ​ດັ່ງກ່າວ, ປະທານ ສຸພາ​ນຸວົງ ຈຶ່ງ​ມີ​ສາຍາ​ນາມ​ວ່າ: “​ເຈົ້າຊາຍ​ແດນ” ​ແຫ່ງລຸ່ມ​ແມ່ນ້ຳຂອງ.

​ໃນ​ຖານະ​ທີ່​ໄດ້​ກຳ​ເນີ​ດອອກ​ມາ​ຈາກ​ການ​ເປັນ​ເຊື້ອ​ເຈົ້າຕັດສິນ​ໃຈ​ເສຍສະຫລະ​ຜົນ​ປະ​ໂຫຍ​ດສ່ວນ​ຕົວ​ອອກ​ເຮັດການ​ປະຕິວັດ​ກຳມະ​ຊີບ​ນັ້ນ, ​ເປັນ​ສິ່ງ​ທີ່​ຫາ​ໄດ້​ຍາກ​ສຳລັບ​ບຸກຄົນ​ໃນ​ວົງ​ຕະກູນ​ຂອງ​ກະສັດ ຫລື ພະ​ລາຊາ. ການ​ເປັນ​ແບບຢ່າງ​ຂອງ​ລຸງ​ປະທານ ສຸ​ພານຸ​ວົງ ​ໄດ້​ເປັນ​ສັນຍາ​ລັກ​ຊີ້​ໃຫ້​ເຫັນ​ຄວາມ​ເສຍສະຫລະຜົນ​ປະ​ໂຫຍ​ດສ່ວນ​ຕົວ ​ໂດຍ​ຖື​ຊາດ ​ແລະ ປະຊາຊົນ​ເປັນ​ໃຫຍ່, ​ເພິ່ນ​ກາຍ​ເປັນ​ແວ່ນ​ແຍງ​ອັນ​ໃສ​ແຈ້ງ​ໃຫ້​ແກ່​ລູກ​ຫລານ​ຜູ້​ສືບ​ທອດ ນັບ​ແຕ່​ມື້​ເລີ່​ມຕົ້ນ​ເຮັດ​ການ​ປະຕິວັດ​ຈົນ​ມາ​ຮອດ​ປັດຈຸບັນ ​ເຮັດ​ໃຫ້​ປວງ​ຊົນ​ລາວ​ທັງ​ຊາດ​ທັງ​ຮຸ້ນ​ປະຕິວັດ ​ແລະ ຮຸ້ນ​ປັດຈຸບັນ ພ້ອມ​ກັນຍົກ​ສູງ​ເທີ​ດທູນ​ບຸນຄຸນ​ໃນ​ພາລະກິດ ​ແລະ ຄວາມ​ເສຍສະຫລະ​ອັນ​ຍິ່ງ​ໃຫຍ່​ສູງ​ສົ່ງ​ຂອງ​ເພິ່ນ​ຢ່າງ​ອຳ​ມະຕະ.

ລຸງ​ ສຸພາ​ນຸວົງ ຜູ້ນຳ​ທີ່​ທໍລະ​ຫົດ​ອົດທົນ​ອາດ​ຫານ​ຊານ​ໄຊ - Wave100S AD to Website 2020 0 - ລຸງ​ ສຸພາ​ນຸວົງ ຜູ້ນຳ​ທີ່​ທໍລະ​ຫົດ​ອົດທົນ​ອາດ​ຫານ​ຊານ​ໄຊ

ສິ່ງ​ທີ່​ພວກ​ເຮົາ​ບໍ່​ຄວນ​ລືມ​ອີກ​ອັນ​ໜຶ່ງ, ລຸງ​ປະທານ ສຸພາ​ນຸວົງ ​ໄດ້​ປະກອບສ່ວນ​ຢ່າງ​ໃຫຍ່​ຫລວງ​ເຂົ້າ​ໃນ​ພາລະກິດ​ການ​ປະຕິວັດ​ຊາດ​ປະຊາທິປະ​ໄຕ, ສາມາດ​ຍຶດອຳນາດ​ລຶບລ້າງ​ລະບອບ​ລາຊາທິປະ​ໄຕ​ທີ່​ປົກຄອງ​ບ້ານ​ເມືອງ​ມາ​ຫລາຍ​ຮ້ອຍ​ປີ ​ແລ້ວ​ປະກາດ​ສ້າງຕັ້ງ​ເປັນ​ປະ​ເທດ ສາທາລະນະ​ລັດ ປະຊາທິປະ​ໄຕ ປະຊາຊົນ​ລາວ ຢ່າງ​ສະຫງ່າ​ຜ່າ​ເຜີຍ​ໃນ​ປີ 1975.

ຍ້ອນ​ເຫັນ​ຄຸນງາມຄວາມດີ​ຕະຫລອດ​ໄລຍະ​ຕໍ່ສູ້​ກູ້​ຊາດ ມາ​ຮອດ​ໄລຍະ​ປົກ​ປັກ​ຮັກສາ ​ແລະ ສ້າງສາ​ປະ​ເທດ​ຊາດ ​ເພິ່ນ​ໄດ້​ເສຍສະຫລະ​ທັງ​ກາຍ ​ແລະ ​ໃຈ, ​ເຫື່ອ​ແຮງ, ​ເລືອດ​ເນື້ອ​ເພື່ອ​ອຸທິດ​ຕົນ​ເຂົ້າ​ໃນ​ພາລະກິດ​ການ​ປະຕິວັດ​ຕ້ານ​ຈັກກະພັດ​ຝຣັ່ງ ​ແລະ ອາ​ເມ​ລິ​ກາ​ເປັນ​ເວລາ​ຍາວ​ນານ ກອງ​ປະຊຸມ​ໃຫຍ່​ຜູ້​ແທນ​ປະຊາຊົນ​ທົ່ວ​ປະ​ເທດ​ໃນ​ວັນ​ທີ 1 ທັນວາ 1975 ຈຶ່ງ​ໄດ້​ເລືອກ​ຕັ້ງ​ເອົາ​ເພິ່ນ​ເປັນ​ປະທານ​ປະ​ເທດ​ຜູ້​ທຳ​ອິດ​ແຫ່ງ ສປປ ລາວ. ​ໃນ​ໄລຍະ​ເລີ່​ມຕົ້ນ​ເຮັດ​ການ​ປະຕິວັດ​ນັ​ບ​ແຕ່​ປີ 1945 ​ເພິ່ນ​ໄດ້​ເປັນ​ລັດຖະມົນຕີ​ປ້ອງ​ກັນ​ປະ​ເທດ, ທັງ​ເປັນ​ຜູ້​ບັນຊາ​ການ​ທະຫານ​ສູງ​ສຸດ​ຂອງ​ລັດຖະບານ​ແນວ​ລາວ​ອິດສະຫລະ​ໃນ​ສະ​ໄໝ​ນັ້ນ. ຕໍ່​ມາ​ພາຍຫລັງ​ໄດ້​ເຂົ້າຮ່ວມ​ຂະ​ບວນການ​ກອມ​ມູນິດ​ອິນດູຈີນ​ຈົນ​ມາ​ເຖິງ​ການ​ສ້າງຕັ້ງ​ແນວ​ລາວ​ອິດສະຫລະ​ຄືນ​ໃໝ່ ​ເພິ່ນ​ກໍ​ໄດ້​ເປັນ​ປະທານ​ແນວ​ລາວ​ອິດສະຫລະ ຫລື​ວ່າ ​ແນວລາວ​ຕໍ່ຕ້ານ ທັງ​ເປັນ​ລັດຖະມະຫາ​ເສນາ​ຂອງ​ລັດຖະບານ​ແນວ​ລາວ​ຕໍ່ຕ້ານ.

ຕະຫລອດ​ໄລຍະ​ການ​ປະຕິວັດ​ຊາດ​ປະຊາທິປະ​ໄຕ​ຈົນ​ມາ​ເຖິງ​ໄລຍະ​ປົກ​ປັກ​ຮັກສາ ​ແລະ ສ້າງສາ​ປະ​ເທດ​ຊາດ ລຸງປະທານ ສຸພາ​ນຸວົງ ​ໄດ້​ກາຍ​ເປັນ​ຄັນ​ທຸງ​ແນວ​ລາວ​ອິດສະຫລະ, ​ແນວ​ລາວ​ຮັກ​ຊາດ, ​ແນວ​ລາວ​ສ້າງ​ຊາດ, ​ເປັນ​ເສົາຄ້ຳ​ແຫ່ງ​ຄວາມ​ສາມັກຄີ​ເປັນ​ປຶກ​ແຜ່ນ​ຂອງ​ປະຊາຊົນ​ບັນດາ​ເຜົ່າ ​ເພື່ອ​ເຂົ້າຮ່ວມ​ຂະ​ບວນການ​ປະຕິວັດ ພາຍ​ໃຕ້​ການ​ນຳພາ​ອັນ​ສະຫລາດ​ສ່ອງ​​ໃສ​ຂອງ​ພັກ ຈຶ່ງ​ເຮັດ​ໃຫ້ການ​ປະຕິວັດ​ໃນ​ປະ​ເທດ​ເຮົາ​ໄດ້​ຮັບ​ໄຊຊະນະ​ຢ່າງ​ສົມບູນ​ແບບ. ພາລະກິດ ​ແລະ ຄຸນງາມຄວາມດີ​ຂອງ ລຸງ​ປະທານ ສະພາ​ນຸວົງ ຍັງ​ຍືນ​ຍົງ​ອຳ​ມະຕະ​ກັບ​ປະຊາຊົນ​ລາວ​ຕະຫລອດ​ໄປ !.

ລຸງ​ ສຸພາ​ນຸວົງ ຜູ້ນຳ​ທີ່​ທໍລະ​ຫົດ​ອົດທົນ​ອາດ​ຫານ​ຊານ​ໄຊ - WhatsApp Image 2020 05 27 at 5 - ລຸງ​ ສຸພາ​ນຸວົງ ຜູ້ນຳ​ທີ່​ທໍລະ​ຫົດ​ອົດທົນ​ອາດ​ຫານ​ຊານ​ໄຊ
ລຸງ​ ສຸພາ​ນຸວົງ ຜູ້ນຳ​ທີ່​ທໍລະ​ຫົດ​ອົດທົນ​ອາດ​ຫານ​ຊານ​ໄຊ - WhatsApp Image 2020 05 27 at 5 - ລຸງ​ ສຸພາ​ນຸວົງ ຜູ້ນຳ​ທີ່​ທໍລະ​ຫົດ​ອົດທົນ​ອາດ​ຫານ​ຊານ​ໄຊ

Comment

    Khamsoy
    10/08/2020 - 5:38 am

    Thank you so munh i love you only one vintine the winner in Laos

Comments are closed.

error: Alert: ເນື້ອຫາຂ່າວມີລິຂະສິດ !!