ໂລກຮ້ອນຂຶ້ນ ສັນຍານເຕືອນຂອງໄພພິບັດຮຸນແຮງ

ໂລກຮ້ອນຂຶ້ນ ສັນຍານເຕືອນຂອງໄພພິບັດຮຸນແຮງ - 220 - ໂລກຮ້ອນຂຶ້ນ ສັນຍານເຕືອນຂອງໄພພິບັດຮຸນແຮງ
ໂລກຮ້ອນຂຶ້ນ ສັນຍານເຕືອນຂອງໄພພິບັດຮຸນແຮງ - AGL banner - ໂລກຮ້ອນຂຶ້ນ ສັນຍານເຕືອນຂອງໄພພິບັດຮຸນແຮງ

ຄວາມ​ລົ້ມ​ເຫ​ລວ​ໃນ​ການ​ຫລຸດ​ການ​ປ່ອຍ​ແກັສ​ເຮືອນ​ແກ້ວອາດ​ເຮັດ​ໃຫ້​ສະພາບ​ອາກາດ​ປ່ຽນ​ແປງ​ເຊັ່ນ: ຝົນຕົກ​ໜັກ, ນ້ຳຖ້ວມ​ກະທັນຫັນ ກາຍ​ເປັນ​ເລື່ອງ​ທີ່​ເກີດ​ຂຶ້ນ​ເປັນ​ປະຈຳ ​ແລະ ທະວີ​ຄວາມ​ຮຸນ​ແຮງ​ຂຶ້ນ.

​ໃນ​ກາງ​ເດືອນ​ຜ່ານ​ມາ, ຍີ່ປຸ່ນ​ຕ້ອງ​ພົບ​ກັບ​ນ້ຳຖ້ວມ ​ແລະ ​ແຜ່ນດິນ​ເຈື່ອນ​ໜັກ​ທີ່​ສຸດ​ຄັ້ງໜຶ່ງ​ຂອງ​ປະ​ເທດ ຈາກ​ຝົນ​ທີ່​ວ່າ​ກັນ​ວ່າ​ຕົກ​ໜັກ​ແບບ​ບໍ່​ເຄີຍ​ເກີດ​ຂຶ້ນມາ​ກ່ອນ ຕ້ອງ​ອົບ​ພະຍົບປະຊາຊົນ​ນັບ​ລ້ານ​ຄົນ.

​ເຖິງ​ວ່າ​ໄລຍະ​ເວລາ​ນັ້ນຈະ​ເປັນ​ໄລຍະ​ທີ່​ຍີ່ປຸ່ນ​ຕ້ອງ​ພົບ​ຝົນຕົກ​ໜັກ​ຢູ່​ແລ້ວ, ​ແຕ່​ສະພາບ​ອາກາດ​ປ່ຽນ​ແປງ (extreme weather) ​ແບບ​ນີ້​ມີ​ທ່າ​ອ່ຽງຈະ​ເກີດ​ຂຶ້ນ​ເລື້ອຍໆ ​ແລະ ຮຸ​ນ​ແຮງ​ຂຶ້ນຈົນ​ກາຍ​ເປັນ​ເລື່ອງ​ປົກກະຕິ ​ເນື່ອງ​ມາ​ຈາກ​ການ​ປ່ຽນ​ແປງ​ຂອງ​ສະພາບ​ອາກາດ.

​ເມື່ອ​ອຸນຫະພູມ​ສູງ​ຂຶ້ນ ບວກ​ກັບ​ລະດັບ​ນ້ຳທະ​ເລ​​ເພີ່ມ​ຂຶ້ນ ​ອາຍ​ນ້ຳມະຫາສານ​ຈາກ​ທະ​ເລ​ຈີນ​ຕາ​ເວັນ​ອອກ ​ແລະ ທະ​ເລ​ຈີນ​ໃຕ້ ຈະ​ກໍ່​ຕົວ​ເປັນ​ກຸ່ມ​ອາຍ​ນ້ຳ​ໃນ​ບັນຍາກາດ​ຂະໜາດ​ໃຫຍ່ ​ເຮັດ​ໃຫ້​ເກີດ​ພາຍຸ​ຝົນຕົກ​ໜັກ​ໃນ​ປະລິມານ​ເທົ່າ​ກັບ​ນ້ຳຝົນ​ໝົດ​ປີ​ຢູ່​ຍີ່ປຸ່ນ.

ສ່ວນ​ຈີນ​ພົບ​ຝົນຕົກ​ໜັກ​ຕໍ່​ເນື່ອງ​ຈົນ​ເກີດ​ດິນ​ເຈື່ອນ ​ແລະ ນ້ຳຖ້ວມ​ຄັ້ງ​ໃຫຍ່​ໃນ​ຮອບ​ຫລາຍ​ສິບ​ປີ​ໃນ​ພື້ນທີ່ 27 ມົນທົນ​ຈາກ​ທັງ​ໝົດ 31 ມົນທົນ ສົ່ງ​ຜົນ​ກະທົບ​ຕໍ່​ປະຊາຊົນ​ປະມານ 37 ລ້ານ​ຄົນ, ​ເສຍ​ຊີວິດ ຫລື ສູນ​​ຫາຍ 141 ຄົນ ​ແລະ ສ້າງ​ຄວາມ​ເສຍ​ຫາຍ​ທາງ​ເສດຖະກິດ​ແລ້ວ​ຫລາຍ​ກວ່າ 86.000 ລ້ານ​ຢວນ.

ຈີນ​ຕ້ອງ​ພົບ​ກັບ​ນ້ຳຖ້ວມ​ເປັນ​ປົກກະຕິ​ໃນ​ຊ່ວງ​ລະດູ​ຮ້ອນ ​ແຕ່​ເມື່ອ​ລວມກັບ​ປັດ​ໄຈ​ດ້ານ​ສະພາບ​ອາກາດ​ທີ່​ປ່ຽນ​ແປງ​ໄປ ຫລາຍ​ພື້ນທີ່​ຈຶ່ງ​ມີຝົນຕົກ​ໜັກ​ຍາວ​ນານ ​ແລະ ຕໍ່​ເນື່ອງ ​ໂດຍ​ສະ​ເພາະ​ໃນ​ຊ່ວງ​ບໍ່​ເທົ່າ​ໃດ​ປີຜ່ານມາ.

ລາຍ​ງານ​ປະຈຳ​ປີ​ດ້ານ​ການ​ປ່ຽນ​ແປງ​ຂອງ​ສະພາບ​ອາກາດ​ຂອງ​ຈີນ​​ໃນ​ປີຜ່ານມາ​ລະບຸ​ວ່າ: ນັບ​ແຕ່​ປີ 1961-2018 ​ເກີດ​ຝົນຕົກ​ໜັກ​ຢູ່​ຈີນ​ເພີ່ມ​ຂຶ້ນ ​ແລະ ​ເພີ່ມ​ຂຶ້ນຢ່າງ​ເຫັນ​ໄດ້​ຊັດ​ນັບ​ແຕ່​ກາງ​ທົດ​ສະ​ວັດ​ທີ 1990.

ຂະນະ​ທີ່​ອິນ​ເດຍ ​ເຊິ່ງຢູ່​ໃນ​ລະດູ​ມໍ​ລະ​ສຸມ ​ແລະ ຜະ​ເຊີນ​ກັບ​ນ້ຳຖ້ວມ​ໜັກ​ບໍ່​ຕ່າງ​ຈາກ​ຈີນ ກະຊວງ​ວິທະຍາສາດ​ໂລກ​ເຜີຍ​ຜົນ​ການ​ສຶກສາ​ກ່ຽວ​ກັບ​ວິ​ກິດ​ສະພາບ​ອາກາດ ພົບ​ວ່າ​ສະພາບ​ໂລກ​ຮ້ອນ​ຈະ​ສົ່ງ​ຜົນ​ໃຫ້​ອິນ​ເດຍມີ​ຝົນຕົກ​ໜັກ, ຖືກ​ພາຍຸ​ໄຊ​ໂຄນ​ພັດ​ຖະຫລົ່ມ ​ແລະ ​ແຫ້ງ​ແລ້ງ​ຫລາຍ​ຂຶ້ນ ຕະຫລອດ​ທົດ​ສະ​ວັດນີ້ ຫລື ຮອດ​ປີ 2100.

ນອກຈາກ​ນີ້ ຍັງ​ຄາດ​ວ່າ​ພາຍ​ໃນ​ປີ 2100 ອຸນຫະພູມ​ຂອງ​ອິນ​ເດຍຈະ​ເພີ່ມ​ຂຶ້ນອີກ​ປະມານ 4,4 ອົງສາ.

​ແຕ່​ກໍລະນີ​ຂອງ​ອິນ​ເດ​ຍອາດ​ແຕກ​ຕ່າງ​ຈາກ​ປະ​ເທດ​ອື່ນ​ຄື ອຸນຫະພູມ​ທີ່​ສູງ​ຂຶ້ນຈະ​ເຮັດ​ໃຫ້​ບາງ​ພື້ນທີ່​ມີ​ຄວາມ​ແຫ້ງ​ແລ້ງ. ຂະນະ​ທີ່​ພື້ນທີ່​ສ່ວນ​ຫລາຍ​ພົບ​ທັງ​ຝົນ ​ແລະ ພາຍຸ​ໄຊ​ໂຄນ.

​ເຖິງ​ຢ່າງ​ໃດ​ກໍ​ດີ, ທ່ານ ຊົງ​ຫລຽນ​ຊຸນ ນັກ​ອຸຕຸນິຍົມ​ວິທະຍາ​ຈາກ​ສູນ​ສະພາບ​ອາກາດ​ແຫ່ງ​ຊາດ​ຈີນ ​ເຜີຍ​ວ່າ: ​ເຮົາ​ບໍ່​ສາມາດ​ສະຫລຸບ​ໄດ້​ວ່າ ​ເຫດການ​ສະພາບ​ອາກາດ​ປ່ຽນ​ແປງ​ເຫດການ​ໃດ​ເຫດການ​ໜຶ່ງ​ເກີດ​ຈາກ​ການ​ປ່ຽນ​ແປງ​ຂອງ​ສະພາບ​ອາກາດ​ໂດຍ​ກົງ ​ແຕ່​ຈາກ​ການ​ເຝົ້າຕິດຕາມ​ມາ​ໄລຍະ​ໜຶ່ງ ສະພາບ​ໂລກ​ຮ້ອນ​ເຮັດ​ໃຫ້​ສະພາບ​ອາກາດ​ປ່ຽນ​ແປງ​ເກີດ​ຂຶ້ນ​ເລື້ອຍໆ ​ແລະ ຮຸນ​ແຮງ​ຂຶ້ນ.

ໂລກຮ້ອນຂຶ້ນ ສັນຍານເຕືອນຂອງໄພພິບັດຮຸນແຮງ - lattana banner 1 - ໂລກຮ້ອນຂຶ້ນ ສັນຍານເຕືອນຂອງໄພພິບັດຮຸນແຮງ
ໂລກຮ້ອນຂຶ້ນ ສັນຍານເຕືອນຂອງໄພພິບັດຮຸນແຮງ -    AD conten website - ໂລກຮ້ອນຂຶ້ນ ສັນຍານເຕືອນຂອງໄພພິບັດຮຸນແຮງ
ໂລກຮ້ອນຂຶ້ນ ສັນຍານເຕືອນຂອງໄພພິບັດຮຸນແຮງ - lattana banner - ໂລກຮ້ອນຂຶ້ນ ສັນຍານເຕືອນຂອງໄພພິບັດຮຸນແຮງ
error: Alert: ເນື້ອຫາຂ່າວມີລິຂະສິດ !!