ທຸກ​ມະຕິ​ຮັບຮອງ​ໃນ​ສະພາ​ຢ່າ​ໃຫ້​ເປັນ​ໝັນ

ທຸກ​ມະຕິ​ຮັບຮອງ​ໃນ​ສະພາ​ຢ່າ​ໃຫ້​ເປັນ​ໝັນ - 555 11 - ທຸກ​ມະຕິ​ຮັບຮອງ​ໃນ​ສະພາ​ຢ່າ​ໃຫ້​ເປັນ​ໝັນ
ທຸກ​ມະຕິ​ຮັບຮອງ​ໃນ​ສະພາ​ຢ່າ​ໃຫ້​ເປັນ​ໝັນ - AGL banner - ທຸກ​ມະຕິ​ຮັບຮອງ​ໃນ​ສະພາ​ຢ່າ​ໃຫ້​ເປັນ​ໝັນ

ທິດ​ກໍ່າ

ດັ່ງ​ທີ່​ຮູ້​ກັນ​ແລ້ວ​ວ່າ, ກອງ​ປະຊຸມ​ສະ​ໄໝ​ສາມັນ​ເທື່ອ​ທີ 9 ຂອງ​ສະພາ​ແຫ່ງ​ຊາດ​ຊຸດ​ທີ VIII ຫາ​ກໍ​ປິດ​ລົງ​ໃນ​ວັນ​ທີ 2 ກໍລະກົດ 2020 ທີ່​ຜ່ານ​ມາ​ນີ້​ເອງ. ກອງ​ປະຊຸມ​ດັ່ງກ່າວ​ໄດ້​ໃຊ້​ເວລາ​ພຽງ 7 ວັນ ພາຍ​ໃຕ້​ການ​ຊີ້​ນຳ-ນຳພາ​ຂອງ​ຄະນະ​ປະຈຳ​ສະພາ​ແຫ່ງ​ຊາດ. ກອງ​ປະຊຸມ​ຄັ້ງນີ້​ໄດ້​ມີ​ມະຕິ​ຮັບຮອງ​ເອົາ​ຫລາຍ​ບັນຫາ​ເຊັ່ນ: ບົດ​ລາຍ​ງານ​ຂອງ​ລັດຖະບານ​ກ່ຽວ​ກັບ​ການຈັດຕັ້ງປະຕິບັດ​ແຜນ​ພັດທະນ​າ​ເສດຖະກິດ-ສັງຄົມ, ​ແຜນ​ງົບປະມານ​ແຫ່ງ​ລັດ 5 ​ເດືອນ, ທິດ​ທາງ​ວຽກ​ງານ​ຈຸດ​ສຸມ 6 ​ເດືອນ​ທ້າຍ​ປີ 2020, ຟັງ​ການ​ຕອບ​ຄຳ​ຖາມ 4 ກະຊວງ​ຄື: ກະຊວງ​ແຜ​ນການ ​ແລະ ການ​ລົງທຶນ, ກະຊວງ​ການ​ເງິນ, ກະຊວງ​ກະສິກຳ ​ແລະ ປ່າ​ໄມ້, ກະຊວງ​ແຮງ​ງານ ​ແລະ ສະຫວັດດີ​ການ​ສັງຄົມ ​ໃນ​ຄວາມ​ຮັບຜິດຊອບ​ຂອງ​ຂະ​ແໜງ​ການ​ຕົນ, ຮັບຮອງ​ເອົາ​ການ​ປັບປຸງ​ບາງ​ມາດຕາ​ຂອງ​ກົດໝາຍ​ຈຳນວນ 5 ສະ​ບັບ ນັບ​ທັງ​ມາດ​ຕະການ​ທາງ​ອອກ​ທີ່​ຈະ​ເຮັດ​ໃຫ້​ເງິນ​ກີບ​ລາວ​ແຂງ​ຄ່າ​ຄົງ​ຕົວ​ຫລາຍ​ຂຶ້ນ, ຮັບຮອງ​ເອົາ​ບົດ​ລາຍ​ງານ​ຜົນ​ການ​ຕິດຕາມ​ກວດກາ​ຂອງ​ຄະນະ​ປະຈຳ​ສະພາ​ແຫ່ງ​ຊາດ​ກ່ຽວ​ກັບ​ການ​ຄຸ້ມ​ຄອງ, ການ​ສຳ​ຫລວດ ​ແລະ ການຂຸດ​ຄົ້ນ​ແຮ່​ທາດ, ຫີນ​ແຮ່ ​ແລະ ຫີນ​ຜາ, ບັນຫາ​ເລື່ອງ​ໄຟຟ້າ​ທີ່​ຍັງ​ເປັນ​ກະ​ແສ​ສັງຄົມ​ມາ​ຢ່າງ​ຍາວ​ນານ ​ແລະ ບັນຫາ​ອື່ນໆ​ທີ່​ພົວພັນ​ເຖິງ​ຊະ​ຕາ​ກຳ​ຂອງ​ຊາດ​ໃນ​ປັດຈຸບັນ ​ແລະ ອະນາຄົດ. ນອກຈາກ​ບັນຫາ​ທີ່​ກ່າວ​ມາ​ນີ້​ແລ້ວ ຍັງ​ມີ​ຄຳ​ຊັກ​ຖາມ​ຫລາຍ​ບັນຫາ​ຂອງ​ຜູ້​ແທນ​ສະພາ​ແຕ່ລະ​ເຂດ​ເລືອກ​ຕັ້ງ ພ້ອມ​ມີ​ຄຳ​ຕອບ​ຈາກ​ຂະ​ແໜງ​ການ​ທີ່​ກ່ຽວຂ້ອງ ນັບ​ທັງ​ການ​ໃຫ້​ຄຳ​ເຫັນ​ຕົງ​ປະ​ເດັນ​ຂອງ​ທ່ານ​ນາຍົກລັດຖະມົນຕີຕໍ່​ຄຳ​ຊັກ​ຖາມ ​ແລະ ຄວາມ​ຂັດຂ້ອງ​ສົນ​ໃຈ​ຂອງ​ບັນດາ​ຜູ້​ແທນ​ສະພາ​ທີ່​ໄດ້​ເຂົ້າຮ່ວມ​ໃນ​ກອງ​ປະຊຸມຄັ້ງນີ້.

​ແນວ​ໃດ​ກໍ​ຕາມ, ຜ່ານ​ການ​ຕິດຕາມ​ນັບ​ແຕ່​ຕົ້ນຈົນ​ຈົບ ຖື​ວ່າ​ໃນ​ກອງ​ປະຊຸມ​ສະ​ໄໝ​ສາມັນ​ເທື່ອ​ທີ 9 ຂອງ​ສະພາ​ແຫ່ງ​ຊາດ​ຊຸດ​ທີ VIII ​ແມ່ນ​ເຕັມ​ໄປ​ດ້ວຍ​ບັນຍາກາດ​ຟົດຟື້ນ ​ແລະ ສ້າງສັນ. ບັນຫາ​ທີ່​ໂດດ​ເດັ່ນ​ກາຍ​ເປັນປະ​ເດັນ​ສຳຄັນ​ອີກ​ຢ່າງ​ໜຶ່ງ​ກໍ​ແມ່ນ​ເລື່ອງ​ການ​ປັບ​ຄ່າ​ກະ​ແສ​ໄຟຟ້າ​ຄືນ​ໃໝ່ ​ເພາະ​ຜ່ານ​ມາ​ເຫັນ​ວ່າ​ຂະ​ແໜງ​ການ​ດັ່ງກ່າວ​ຍັງ​ບໍ່​ທັນ​ກະຕຸກ​ຊຸກຍູ້ ​ແລະ ສົ່ງ​ເສີມ​ເສດຖະກິດ​ຂອງ​ປະ​ເທດ​ໄດ້​ດີ​ເທົ່າ​ທີ່​ຄວນ. ຖື​ໄດ້​ວ່າ​ນັບ​ຈາກ​ນີ້​ເປັນຕົ້ນ​ໄປ​ຮອດ​ກອງ​ປະຊຸມ​ອີກ​ຮອບ​ໜ້າ ຫລື​ວ່າ ​ໃນ​ທ້າຍ​ປີ​ນີ້ ​ຫລື ຕົ້ນປີໜ້າ​ຈົນ​ແກ່ຍາວ​ໄປ​ຮອດ​ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ​ຂອງ​ພັກ​ຄັ້ງທີ XI ມີ​ແຕ່​ຂະ​ແໜງ​ການ​ກ່ຽວຂ້ອງ​ຕ້ອງ​ໄດ້​ສຸມ​ໃສ່​ບຸກທະລຸ​ນຳ​ເອົາ​ບັນດາ​ມະຕິ​ຕ່າງໆ​ທີ່​ໄດ້​ຮັບຮອງ​ໃນ​ສະພາ​ໄປ​ຈັດຕັ້ງປະຕິບັດ​ໃຫ້​ເກີດ​ດອກ​ອອກ​ຜົນ​ເປັນອັນ​ສູງ​ສຸດ. ທັງ​ນີ້​ກໍ​ເພື່ອ​ບໍ່​ຢາກ​ໃຫ້​ບັນດາ​ມະຕິ ​ແລະ ​ແຜນ​ງານ​ຕ່າງໆ​ທີ່​ໄດ້​ຮັບຮອງ​ກາຍ​ເປັນ​ຄຳ​ພີ ​ແລະ ທິດ​ສະ​ດີ​ຄ້າງ​ຄາ​ຢູ່​ນຳ​ໂຕະ​ຕັ່ງ, ຄາ​ນຳ​ການ​ເວລາ ​ແລະ ຂອດ​ລະຫວ່າງ​ກາງ​ໃນ​ການຈັດຕັ້ງປະຕິບັດ. ​ເວົ້າ​ແຈ້ງ​ກໍ​ຄື​ບັນຫາ​ທຸກ​ສິ່ງ​ຢ່າງ​ທີ່​ໄດ້​ຮັບຮອງ​​ໄປ​ແລ້ວນັ້ນ ຈະ​ຕ້ອງ​ໄດ້​ຖືກ​ລົງມື​ປະຕິບັດ​ຢ່າງ​ຈິງ​ຈັງ​ທັນ​ເວລາ ທັງ​ມີ​ປະສິດທິ​ຜົນ. ນອກຈາກ​ນັ້ນ ທາງ​ເບື້ອງສະພາ​ແຫ່ງ​ຊາດ ​ແລະ ສະພາ​ຂັ້ນ​ແຂວງ​ກໍ​ຕ້ອງ​ໄດ້​ຮ່ວມ​ກັນ​ເຢີ​ກ ​ເພື່ອ​ໃຫ້​ແຜນ​ພັດທະນາ​ເສດຖະກິດ-ສັງຄົມ​ປີ 2020 ​ເປັນ​ໄປ​ຕາມ​ຄາດໝາຍ​ທີ່​ວາງ​ໄວ້.

​ໃນ​ຜ່ານ​ມາ, ບັນຫາ​ການຈັດຕັ້ງຜັນ​ຂະຫຍາຍ​ບັນດາ​ມະຕິ​ຕ່າງໆ​ທີ່​ໄດ້​ຮັບຮອງ​ຈາກ​ສະພາ​ໄປ​ແລ້ວ ບາ​ງຢ່າງ​ມັນ​ໄປ​ຄາ​ຢູ່​ນຳ​ຂອດ​ລະຫວ່າ​ງກາງ ​ແລະ ຜູ້​ເຮັດ​ຕົວ​ຈິງ ນັບ​ທັງ​ການ​ພົວພັນ​ເຊື່ອມ​ໂຍງ​ກັບ​ຂະ​ແໜງ​ການ​ອື່ນໆ​ທີ່​ບໍ່​ທັນ​ກົມກຽວ ພ້ອມ​ກັນ​ເຢີ​ກ, ທັງ​ມີ​ອັນ​ຂ້ອງໆ​ຄາ​ນຳ​ປັດ​ໄຈ, ​ເງື່ອນ​ໄຂ ​ແລະ ສະພາບ​ແວດ​ລ້ອມ ຈຶ່ງ​ເຮັດ​ໃຫ້​ຫລາຍ​ບັນຫາ​ບໍ່​ຖືກ​ຈັດຕັ້ງປະຕິບັດ​ຢ່າງ​ມີ​ຜົນ​ສັກສິດ​ຢູ່​ຂັ້ນຮາກ​ຖານ. ບາງ​ທ້ອງ​ຖິ່ນ​ປ່ອຍປະ​ໃຫ້​ປະຊາຊົນ​ເຮັດ​ຕາມ​ມີ​ຕາມ​​ເກີດ, ສະມາຊິກ​ສະພາ​ຂັ້ນສູນ​ກາງ ​ແລະ ຂັ້ນ​ແຂວງ​ລົງ​ກວດກາ​ຊຸກຍູ້​ບໍ່​ທົ່ວ​ເຖິງ ຍ້ອນ​ຄາ​ນຳ​ງົບປະມານ, ພະນັກງານ​ກໍ່ສ້າງ​ຮາກ​ຖານ​ກໍ​ສວຍ​ໂອກາດ​ຫາ​ຜົນ​ປະ​ໂຫຍ​ດສ່ວນ​ຕົວ, ຫາ​ວິທີ​ບີບ​ບັງຄັບ​ປັບ​ໄໝ​ປະຊາຊົນ​ເກີນ​ກວ່າ​ເຫດ, ຝືນ​ລະບຽບ​ກົດໝາຍ. ກົງກັນຂ້າມ​ລາຍ​ໄດ້​ຈາກ​ການ​ເສຍ​ພັນທະ​ປັບ​ໄໝ​ຕ່າງໆ​ແທນ​ທີ່​ຈະ​ເຂົ້າລັດ ສຸດ​ທ້າຍ​ມັນ​ກໍ​ໄປ​ໂຮມ​ຢູ່​ໃນ​ຖົງ​ຂອງ​ພະນັກງານ​ກໍ່ສ້າງ​ຮາກ​ຖານ. ຍິ່​ງ​ໄປ​ກວ່າ​ນັ້ນ ພະນັກງານ​ກໍ່ສ້າງ​ຮາກ​ຖານ​ຍັງ​ນຳ​ໃຊ້​ກົດ​ເຫລັກ​ທີ່​ບໍ່​ສອດຄ່ອງ​ກັບ​ກົດໝາຍ ບີບ​ບັງຄັບ​ປະຊາຊົນ​ເພື່ອ​ຫາ​ລາຍ​ໄດ້​​ແທນ​ທີ່​ຈະ​ນຳພາ​ເຂົາ​ສ້າງສາ​ພັດທະນາ​ທ້ອງ​ຖິ່ນ​ໃຫ້​ສາມາດ​ເພິ່ງ​ຕົນ​ເອງ ສ້າງ​ຄວາມ​ເຂັ້ມ​ແຂງ​ດ້ວຍ​ຕົນ​ເອງ ກ້າວ​ໄປ​ເຖິງ​ຄວາມ​ຮັ່ງມີ​ເຂັ້ມ​ແຂງ. ນອກຈາກ​ນັ້ນ​ແລ້ວ ​ແຜນ​ວຽກ​ທີ່​ທາງ​ຂັ້ນ​ເທິງ ກໍ​ຄື​ມະຕິ​ຕ່າງໆ​ຈາກ​ສູນ​ກາງ​ລົງ​ຫາ​ທ້ອງ​ຖິ່ນ​ບໍ່​ໄປ​ຮອດ​ໄປ​ເຖິງ​ປະຊາຊົນ, ຕ່າງ​ຄົນ​ຕ່າງ​ເຮັດ, ​ເຮັດ​ໄປ​ຕາມ​ຄວາມ​ສົມ​ສະ​ຄຶດ​ໃນ​ທ້ອງ​ຖິ່ນ​ໃຜ​ມັນ​ເຊັ່ນ: ຕັດ​ໄມ້​ທຳລາຍ​ປ່າ, ຫາ​ລ່າ​ເນື້ອ, ຊອດ​ປາ​ແບບ​ຈິບຫາຍ ​ແລະ ອື່ນໆ. ສຸດ​ທ້າຍ​ມາ ການ​ເວລາ​ປີ​ເດືອນ​ກໍ​ໝົດ ​ໄປ​ວຽກ​ອັນ​ເກົ່າ​ຍັງ​ບໍ່​ທັນ​ເຕື້ອງພັດ​ມີ​ວຽກ​ໃໝ່​ມາ​ທັບ​ຖົມ ຈຶ່ງ​ເຮັດ​ໃຫ້​ຄຸນ​ນະພາ​ບ, ປະສິດທິພາບ​ຂອງ​ໜ້າ​ວຽກ​ບໍ່​ເປັນ​ໄປ​ຕາມ​ຄາດໝາຍ. ສະຫລຸບ​​ແລ້ວ ບາງ​ແຜນ​ວຽກ​ທີ່​ຈະ​ພັດທະນາ​ທ້ອງ​ຖິ່ນ​ກໍ​ກາຍ​ເປັນ​ທິດ​ສະ​ດີ​ນ້ຳ​ເຕົ່າ​ເປົ່າ ຍ້ອນ​ຄົນ​ຜູ້​ປະຕິບັດ​ນັ້ນ​ເອງ, ຍ້ອນ​ການ​ເວລາ ​ແລະ ສະພາບ​ແວດລ້ອມ​ມັນ​ກໍ​ເລີຍ​ອືດ​ອາດ​ປານ​ດຶງ​ຂາ​ເຕົ່າ.

ທຸກ​ມະຕິ​ຮັບຮອງ​ໃນ​ສະພາ​ຢ່າ​ໃຫ້​ເປັນ​ໝັນ - Wave100S AD to Website 2020 0 - ທຸກ​ມະຕິ​ຮັບຮອງ​ໃນ​ສະພາ​ຢ່າ​ໃຫ້​ເປັນ​ໝັນ

​ເຖິງ​ຢ່າງ​ໃດ​ກໍ​ດີ, ​ເມື່ອ​ເວົ້າ​ເຖິງ​ແຜນ​ນະ​ໂຍບາຍ ກໍ​ຄື​ແຜນ​ວຽກ​ແຕ່​ລະ​ມະຕິ​ທີ່​ພັກ ​ແລະ ລັດຖະບານ​ວາງ​ອອກ​ນັ້ນ ​ເມື່ອ​ອ່ານ​ເບິ່ງ​ແລ້ວ​ມັນ​ປຽບ​ເໝືອນ​ຄຳ​ພີ​ວິ​ເສດ, ຖ້າ​ທຸກ​ຄົນ​ເຮັດ​ໄດ້​ແມ່ນ​ຈະ​ພາ​ປະ​ເທດ​ຊາດ​ຈະ​ເລີ​ນຮຸ່ງ​ເຮືອງ​ຢ່າງ​ບໍ່​ຕ້ອງ​ສົງ​ໄສ. ​ແຕ່​ມາ​ປຽບທຽບ​ໃສ່​ການຈັດຕັ້ງປະຕິບັດ​ແລ້ວ​ມັນ​ຊັກ​ຊ້າ​ເຢີ​ບໆ​ຢາ​ບໆ ຍ້ອນ​ວ່າ​ມີ​ຫລາຍ​ອັນ​ຫລາຍ​ຢ່າງ​ມາ​ກະທົບ. ອັນ​ສຳຄັນ​ແມ່ນ​ມັນ​ຝືນ​ກັບ​ຜົນ​ປະ​ໂຫຍ​ດສ່ວນ​ຕົວ​ ສຸດ​ທ້າຍ​ມາ​ຫລາຍ​ນະ​ໂຍບາຍ​ທີ່​ວາງ​ອອກ​ມັນ​ກໍ​ເລີຍ​ເປັນ​ໝັນ ​ແກ່ຍາວ​ຢູ່​ນຳ​ຄົນ​ຜູ້​ປະຕິບັດ ​ແລະ ​ໃນ​ຕູ້​ເອກະສານ.

ທຸກ​ມະຕິ​ຮັບຮອງ​ໃນ​ສະພາ​ຢ່າ​ໃຫ້​ເປັນ​ໝັນ - lattana banner 1 - ທຸກ​ມະຕິ​ຮັບຮອງ​ໃນ​ສະພາ​ຢ່າ​ໃຫ້​ເປັນ​ໝັນ
ທຸກ​ມະຕິ​ຮັບຮອງ​ໃນ​ສະພາ​ຢ່າ​ໃຫ້​ເປັນ​ໝັນ - lattana banner - ທຸກ​ມະຕິ​ຮັບຮອງ​ໃນ​ສະພາ​ຢ່າ​ໃຫ້​ເປັນ​ໝັນ
ທຸກ​ມະຕິ​ຮັບຮອງ​ໃນ​ສະພາ​ຢ່າ​ໃຫ້​ເປັນ​ໝັນ -    AD conten website - ທຸກ​ມະຕິ​ຮັບຮອງ​ໃນ​ສະພາ​ຢ່າ​ໃຫ້​ເປັນ​ໝັນ
error: Alert: ເນື້ອຫາຂ່າວມີລິຂະສິດ !!