ຢາກໃຫ້ສັງຄົມຕື່ນຕົວບໍລິໂພກສື່ພາຍໃນໃຫ້ຫລາຍຂຶ້ນ

ຢາກໃຫ້ສັງຄົມຕື່ນຕົວບໍລິໂພກສື່ພາຍໃນໃຫ້ຫລາຍຂຶ້ນ - Untitled design - ຢາກໃຫ້ສັງຄົມຕື່ນຕົວບໍລິໂພກສື່ພາຍໃນໃຫ້ຫລາຍຂຶ້ນ

(ລະນຶກວັນສ້າງຕັ້ງສື່ມວນຊົນ ແລະ ພິມຈຳໜ່າຍຄົບຮອບ 70 ປີ)

ໂດຍ: ຂ ຊານຸບານ

ປັດຈຸບັນນີ້ບໍ່ວ່າຢູ່ຕົວເມືອງໃຫຍ່ ແລະ ເຂດແຂວງຕ່າງໆ, ໄປໃສມາໃສ ໂດຍສ່ວນຫລາຍແລ້ວຈະເຫັນສັງຄົມເຮົາອ່ານ,ຟັງ ແລະ ເບິ່ງຜະລິດຕະພັນຂອງສື່ຕ່າງປະເທດຫລາຍກ່ວາ,ໂດຍສະເພາະແມ່ນລາຍການໂທລະພາບຂອງປະເທດຜູ້ຢູ່ໃກ້ຄຽງເຮົາເພາະມີພາສາຄຳເວົ້າເກືອບຮ້ອຍສ່ວນຮ້ອຍແມ່ນເຂົ້າໃຈກັນ, ມີບາງແຫ່ງຈົນເດັກນ້ອຍກໍສາມາດເວົ້າພາສາຂອງເຂົາໄດ້ ແລະ ຮ້າຍແຮງໄປກ່ວານັ້ນນັບທັງບ່ອນສາທາລະນະຊົນຕ່າງໆຄື: ໂຮງແຮມ, ເຮືອນພັກ, ຮ້ານອາຫານ ຕະຫລອດຮອດຄິວລົດເມ ແລະ ສະຫນາມບິນຕ່າງໆ, ຫລຽວເບິ່ງໂທລະທັດຫນ່ວຍໃດກໍເຫັນເປີດແຕ່ລາຍການຂອງຕ່າງປະເທດ, ຊຶ່ງຈະຫາເບິ່ງລາຍການຂອງໂທລະພາບລາວໄດ້ຍາກທີ່ສຸດ, ສິ່ງນີ້ກໍບໍ່ເຂົ້າໃຈວ່າແມ່ນຍ້ອນເຫດຜົນໃດ? ມັນຍ້ອນລາຍການຕ່າງໆຂອງສື່ພາຍໃນບໍ່ດູດດື່ມບໍ? ຫລືຍ້ອນຄ່ານິຍົມທີ່ຍັງບໍ່ສອດຄ່ອງ? ໃນຂະນະທີ່ປະເທດເຮົາພວມສຸມໃສ່ຈັດຕັ້ງຂະບວນການແຂ່ງຂັນຮັກຊາດ ແລະ ພັດທະນາຢູ່ນີ້, ແຕ່ການສົ່ງເສີມໃຫ້ສັງຄົມມີຄວາມຕື່ນຕົວເບິ່ງໂທລະພາບ,ຟັງວິທະຍຸກະຈາຍສຽງ ແລະ ອ່ານສື່ສິ່ງພິມຕ່າງໆ ຂອງກະໂຕບ້ານເມືອງເຮົາເອງພັດຍັງເຮັດໄດ້ຫນ້ອຍ, ແລ້ວຊິເອົາຫຍັງມາຮູ້, ມາເຂົ້າໃຈເພື່ອສະແດງອອກຄວາມມີນໍ້າໃຈຮັກປະເທດຊາດ, ບ້ານເກີດເມືອງນອນຂອງຕົນ.

ຕໍ່ບັນຫາດັ່ງກ່າວພວກເຮົາໄດ້ແລກປ່ຽນບົດຮຽນກັບແຂກຕ່າງປະເທດຜູ້ມາທ່ຽວລາວເຮົາ, ເຂົາເຈົ້າໃຫ້ທັດສະນະວ່າ: ເພື່ອຢາກຮູ້ປະເທດໃດຫນຶ່ງ, ຊຶ່ງກ່ອນອື່ນຫມົດພວກເຮົາຕ້ອງໄດ້ຮັບຂໍ້ມູນຂ່າວສານອັນຈຳເປັນຈາກປະເທດນັ້ນ, ນັບທັງລະບົບເສດຖະກິດ-ການເມືອງ, ວັດທະນະທຳ-ສັງຄົມ, ບັນຫາພູມສັນຖານ, ຮີດຄອງປະເພນີ ແລະ ກະໂຕແນວຄິດຈິດໃຈຂອງພົນລະເມືອງປະເທດນັ້ນ ແລະ ສິ່ງນີ້ຈະເອົາມາຈາກໃສຖ້າບໍ່ໄດ້ເບິ່ງ, ໄດ້ຟັງ ແລະ ໄດ້ອ່ານຜະລິດຕະພັນຈາກສື່ພາຍໃນຂອງປະເທດນັ້ນ.

ຢາກໃຫ້ສັງຄົມຕື່ນຕົວບໍລິໂພກສື່ພາຍໃນໃຫ້ຫລາຍຂຶ້ນ - Wave100S AD to Website 2020 0 - ຢາກໃຫ້ສັງຄົມຕື່ນຕົວບໍລິໂພກສື່ພາຍໃນໃຫ້ຫລາຍຂຶ້ນ

ມີເພື່ອນຮ່ວມງານໃນອາຊີບສື່ຈຳນວນຫນຶ່ງສ່ອງແສງມາວ່າ: ບໍ່ຮູ້ວ່າແມ່ນຍ້ອນຫຍັງ, ຊຶ່ງມີຫລາຍບໍລິສັດມາລົງທຶນເຮັດໂທລະພາບໃຊ້ສາຍ(ເຄເບິນທີວີ) ຢູ່ບາງຕົວເມືອງໃຫຍ່ຂອງປເທດເຮົາ, ແຕ່ກໍຍັງຈຳກັດການນຳເອົາລາຍການໂທລະພາບຂອງລາວເຮົາເຂົ້າໃນ ລະບົບ ໂທລະພາບດັ່ງກ່າວ, ໄດ້ຍິນວ່າຖ້າຢາກເອົາລາຍໃດໜຶ່ງເຂົ້າກໍ່ຕ້ອງເສຍຄ່າບໍລິການເປັນຈຳນວນບໍ່ຫນ້ອຍ, ຂະນະທີ່ໂທລະພາບດັ່ງກ່າວກໍເພື່ອຕອບສະຫນອງຄວາມຕ້ອງການຂອງພົນລະເມືອງລາວເອງ, ຈຸດນີ້ຂະແຫນງມະຫາພາກຄວນເບິ່ງຄືນ ວ່າເຮົາຄວນຈະມີມາດຕະການແນວໃດເພື່ອໃຫ້ຜູ້ປະກອບການດັ່ງກ່າວນຳເອົາລາຍການໂທລະພາບພາຍໃນເຂົ້າຫລາຍທໍ່ໃດຍິ່ງດີ, ກໍ່ດັ່ງທ່ານລັດຖະມົນຕີວ່າການກະຊວງຖະແຫລ່ງຂ່າວ, ວັດທະນະທຳ ແລະ ທ່ອງທ່ຽວໄດ້ໂອ້ລົມ ແນະນຳວຽກງານສື່ໃນມື້ຈັດພິທີສະເຫລີມສະຫລອງວັນສື່ມວນຊົນແຫ່ງຊາດ 13 ສິງຫາ ວ່າ: ເພື່ອຢາກເຮັດໃຫ້ສື່ຂອງພວກເຮົາມີບົດບາດສູງ ເດັ່ນຂຶ້ນຕື່ມໃນສັງຄົມ, ພວກເຮົາຈະຕ້ອງໄດ້ເພີ່ມທະວີການປະສານສົມທົບກັບສື່ພາກ ເອກະຊົນໃຫ້ມີຄວາມຫນັກແຫນ້ນກ່ວາເກົ່າເພື່ອພ້ອມກັນເຮັດຫນ້າທີ່ໂຄສະນາເຜີຍແຜ່ແນວທາງນະໂຍບາຍຂອງພັກ ແລະ ລະບຽບກົດຫມາຍຂອງ ລັດ ລົງສູ່ປະຊາຊົນໃຫ້ກ້ວາງຂວາງ ແລະ ທົ່ວເຖິງ, ສາມາດຕອບສະຫນອງຂໍ້ມູນ ຂ່າວສານ ແລະ ສາລະຫນ້າຮູ້ຕ່າງໆ ໄດ້ດີຂຶ້ນ ແລະ ຄຽງຄູ່ກັນນັ້ນກໍຕ້ອງ ອອກແຮງກະຕຸກຊຸກຍູ້ ແລະ ສົ່ງເສີມການນຳໃຊ້ຜະລິດຕະພັນສື່ພາຍໃນ ໃຫ້ແຂງແຮງກ່ວາເກົ່າ.

ຢາກໃຫ້ສັງຄົມຕື່ນຕົວບໍລິໂພກສື່ພາຍໃນໃຫ້ຫລາຍຂຶ້ນ - WhatsApp Image 2020 05 27 at 5 - ຢາກໃຫ້ສັງຄົມຕື່ນຕົວບໍລິໂພກສື່ພາຍໃນໃຫ້ຫລາຍຂຶ້ນ
ຢາກໃຫ້ສັງຄົມຕື່ນຕົວບໍລິໂພກສື່ພາຍໃນໃຫ້ຫລາຍຂຶ້ນ - WhatsApp Image 2020 05 27 at 5 - ຢາກໃຫ້ສັງຄົມຕື່ນຕົວບໍລິໂພກສື່ພາຍໃນໃຫ້ຫລາຍຂຶ້ນ
error: Alert: ເນື້ອຫາຂ່າວມີລິຂະສິດ !!