ຊາວແຂວງສະຫວັນະເຂດຕ້ອນຮັບຂະບວນແຫ່ຮູບຫຼໍ່ ພຣະເຈົ້າໄຊຍະເສດຖາທິຣາດ ດ້ວຍຈິດໃຈໃສສັດທາ

ຂະບວນເຄື່ອນຍ້າຍຮູບຫຼໍ່ ພຣະເຈົ້າໄຊຍະເສດຖາທິຣາດ ພ້ອມດ້ວຍຮູບ​ຫຼໍ່ຊ້າງ ແລະ ພະພຸດທະຮູບ ຈາກນະຄອນຫຼວງວຽງຈັນ ​ເພື່ອ​ໄປ​ປະດິດສະຖານແຂວງອັດຕະປື ໄດ້ເຄື່ອນຍ້າຍມາຮອດເທດສະບານແຂວງສະຫວັນນະເຂດ ໃນຕອນບ່າຍຂອງວັນທີ 29 ກໍລະກົດນີ້ ໂດຍມີການນຳພັກ-ລັດ ​ແລະ ມວນ​ຊົນ​ຊາວ​ແຂວງ​ດັ່ງກ່າວ​ເຂົ້າຮ່ວມ​ເປັນ​ຈຳນວນ​ຫລາຍ ​ເພື່ອຕ້ອນຮັບທີ່ວົງວຽນອາຊຽນ ຖະໜົນໄກສອນພົມວິຫານ​ ​ແລະ ​ແຫ່ໄປຕາມຖະໜົນຟ້າງຸ່ມ ເພື່ອໄປພັກຄືນທີ່ໜ້າສະໂມສອນຫ້ອງວາການປົກຄອງແຂວງສະຫັວນະເຂດ ​ແລະ ຈາກ​ນັ້ນ ກໍ​ມີ​ການ​ຮັບ​ຕ້ອນ​ຂອງການນຳ​ແຂວງ ພ້ອມ​ດ້ວຍ​ເຖົ້າ​ແກ່​ແນວ​ໂຮມ ​ແລະ ອອກ​ຕົນ​ຍາດ​ໂຍມຕາມຮີດຄອງປະເພນີລາວກໍມີເຫຼົ້າຂາວ, ຜ້າແພ, ໄກ່ຕົ້ມ ຂັນຫ້າ, ຫຼັງຈາກນັ້ນກໍຮ່ວມພິທີ​ທາງ​ສາສະໜາ.

ຂະບວນເຄື່ອນຍ້າຍແຫ່ຮູບຫຼໍ່ ພຣະເຈົ້າໄຊຍະເສດຖາທິຣາດ ພ້ອມດ້ວຍຊ້າງ ແລະ ພະພຸດທະຮູບ ເດີນທາງຈາກນະຄອນຫຼວງວຽງຈັນແຕ່ວັນທີ 27 ກໍລະກົດ, ໄດ້ພັກແຮມທີ່ແຂວງບໍລິຄຳໄຊ, ແຂວງຄຳມ່ວນ ແລະ ມາ​ໃນ​ມື້ນີ້, ວັນທີ 29 ກໍໄດ້ພັກແຮມທີ່ນະຄອນໄກສອນ ພົມວິຫານ ແຂວງສະຫວັນະເຂດ ເຊິ່ງໄດ້ມີການຄົບງັນຕາມປະເພນີ ທີ່ເດີ່ນຫ້ອງວ່າການປົກຄອງ​ເຊັ່ນ: ພິທີສູດປະລິຕະຄຸນ ຟັງທຳມະເທດສະໜາ, ນຸ່ງຂາວ ໄຫວ້ພະສູດມົນຕະຫຼອດທັງຄືນ ​ແລະ ​ຕໍ່​ມາ​ເຊົ້າວັນທີ 30 ກໍລະກົດນີ້ ກໍມີພິທີຕັກບາດຖວາຍທານ ຕໍ່ໜ້າຮູບຫຼໍ່ພຣະເຈົ້າໄຊຍະເຊດຖາທິຣາດ ໂດຍພະສົງ 39 ອົງ ຮ່ວມສູດໄຊຍັນໂຕ-ຫົດນໍ້າມົນ ສົ່ງຂະບວນແຫ່ອອກ​ຈາກ​​ແຂວງ​ສະຫວັນ​ນະ​ເຂດເພື່ອເຄື່ອນຍ້າຍໄປແຂວງຈໍາປາສັກ.