13 ສິງຫາ ວັນ​ສື່​ມວນ​ຊົນ​ລາວ

13 ສິງຫາ ວັນ​ສື່​ມວນ​ຊົນ​ລາວ - 555 20 - 13 ສິງຫາ ວັນ​ສື່​ມວນ​ຊົນ​ລາວ
13 ສິງຫາ ວັນ​ສື່​ມວນ​ຊົນ​ລາວ - AGL banner - 13 ສິງຫາ ວັນ​ສື່​ມວນ​ຊົນ​ລາວ

ໂດຍ: ທິດ​ກໍ່າ

ຍັງ​ອີກ​ບໍ່​ດົນ ວັນ​ສື່​ມວນ​ຊົນ​ລາວ ຄື​ວັນ​ທີ 13 ສິງຫາ ກໍ​ຈະ​ໄດ້​ໝູນວຽນມາ​ບັນຈົບ​ຄົບຮອບ​ອີກ​ວາລະ​ໜຶ່ງ. ປີ​ນີ້​ແມ່ນ​ມີ​ອາຍຸ​ຄົບຮອບ 70 ປີ​ພໍດີ (13/8/1950–13/8/2020). ຕະຫລອດ​ໄລຍະ 70 ປີ​ແຫ່ງ​ການ​ກຳ​ເນີ​ດ​ເຕີບ​ໃຫຍ່ ​ແລະ ຂະຫຍາຍຕົວ ສື່​ມວນ​ຊົນ​ລາວ​ໄດ້​ເຮັດ​ໜ້າ​ທີ່​ຕາມ​ພາລະ​ກຳ​ປະຫວັດສາດ​ຂອງ​ຕົນ​ຢ່າງ​ໃຫຍ່​ຫລວງ. ອັນ​ສຳຄັນ​ກວ່າ​ໝູ່​ແມ່ນ​ເປັນ​ກະບອກ​ສຽງ​ຂອງ​ພັກ ​ແລະ ລັດຖະບານ​ໃນ​ການ​ໂຄສະນາ​ປຸກລະດົມ, ຂົນຂວາຍ​ມະຫາຊົນ​ເຂົ້າຮ່ວມ​ການ​ປະຕິວັດ​ຊາດ​ປະຊາທິປະ​ໄຕ ​ແລະ ​ໃນ​ພາລະກິດ​ສ້າງສາ​ພັດທະນາ​ປະ​ເທດ​ຊາດ​ໃນ​ໄລຍະ​ໃໝ່. ​ໃນ​ຍຸກ​ສົງຄາມ​ຮຸກ​ຮານ​ ສື່​ມວນ​ຊົນ​ລາວ​ໄດ້​ເຮັດ​ທຸກ​ສິ່ງ​ທຸກ​ຢ່າງ​ເພື່ອ​ປະກອບສ່ວນ​ໃນ​ພາລະກິດ​ປະຕິວັດ ​ໂດຍ​ເລີ່​ມຈາກ​ການ​ຂຽນ​ໃບ​ຂ່າວ, ​ໃຊ້​ຮູບ​ການ​ປຸກລຸກ​ຂົນຂວາຍ, ​ໂຄສະນາ​ທາງ​ເລິກ, ທາງ​ກວ້າງ ​ເພື່ອ​ດູດ​ດຶ​ງ​ເອົາ​ມະຫາຊົນ​ເຂົ້າຮ່ວມ​ການ​ປະຕິວັດ​ຈົນ​ກ້າວ​ໄປ​ເຖິງ​ມີ​ໜັງສືພິມ​ແນວ​ລາວ​ອິດສະຫລະ​ເກີດ​ຂຶ້ນ, ຈາກ​ນັ້ນກໍ​ໄດ້​ປ່ຽນ​ຊື່​ມາ​ເປັນ​ໜັງສືພິມ​ແນວ​ລາວ​ຮັກ​ຊາດ, ມີ​ວິທະຍຸ​ກະຈາຍສຽງ, ມີ​ສື່​ສິ່ງ​ພິມ​ຕ່າງໆ ​ເພື່ອ​ສະໜອງ​ຂໍ້​ມູນ​ຂ່າວສານ​ໃຫ້​ປະຊາຊົນ​ບັນດາ​ເຜົ່າ​ໄດ້​ຮັບ​ຮູ້ ​ແລະ ​ເຂົ້າ​ໃຈ​ຕໍ່​ແນວທາງ​ການ​ປະຕິວັດ​ຊາດ​ປະຊາທິປະ​ໄຕ​ຢ່າງ​ກວ້າງຂວາງ.

​ໄປ​ຄຽງ​ຄູ່​ກັນນັ້ນ, ນັກ​ສື່​ມວນ​ຊົນ​ລາວ​ໃນ​ຍຸກ​ສົງຄາມ​ສ່ວນ​ໃຫຍ່​ກໍ​ໄດ້​ໃກ້ຊິດຕິດ​ແທດ, ກິ້ງ​ເກືອກລື​ເລືອ​ກັບ​ສະໜາມຮົບ​ຕົວ​ຈິງ ທັງ​ໄດ້​ຜະ​ເຊີນ​ໜ້າ​ສູ້​ຮົບ​ກັບ​ສັດຕູ​ຢ່າງ​ເອົາ​ເປັນ​ເອົາ​ຕາຍ​ໃນ​ສະໝໍລະພູມ​ຕ່າງໆ ຈຶ່ງ​ເຮັດ​ໃຫ້​ໝາກຜົນ​ຂອງ​ວຽກ​ງານ​ສື່​ມວນ​ຊົນ​​ໃນ​ສະ​ໄໝ​ນັ້ນ​ໄດ້​ຮັບ​ຜົນ​ຕາມ​ຄວາມ​ຮຽກຮ້ອງ​ຕ້ອງການ. ບັນດາ​ບົດ​ຂ່າວ, ບົດ​ຄວາມ, ບົດ​ວິ​ເຄາະ, ວິຈານ​ທີ່​ໄດ້​ກະຈາຍ​ອອກ​ທາງ​ວິທະຍຸ, ໜັງສືພິມ, ອອກ​ໃນ​ສື່​ສິ່ງ​ພິມ​ຕ່າງໆ​ຂອງ​ແນວ​ລາວ​ຮັກ​ຊາດ​ລ້ວນ​ແລ້ວ​ແຕ່​ສະ​ແດງ​ໃຫ້​ເຫັນ​ເຖິງ​ໂທດ​ກຳ​ຂອງ​ສັດຕູ​ຜູ້​ຮຸກ​ຮານ, ສ້າງ​ຄວາມ​ຄຽດ​ແຄ້ນ​ໂດຍ​ກົງ​ຕໍ່​ປະຊາຊົນ​ຜູ້​ທີ່​ຖືກ​ກົດ​ຂີ່​ຂູດ​ຮີດ. ​ເນື່ອງ​ຈາກ​ວ່າ​ກະ​ແສ​ຟອງ​ຂອງ​ການ​ປະຕິວັດ​ສົມທົບ​ກັບ​ການ​ປຸກລະດົມ, ​ໂຄສະນາ​ໃນ​ສື່​ມວນ​ຊົນ​ໃນ​ທຸກ​ຮູບ​ແບບ ຈຶ່ງ​ເຮັດ​ໃຫ້​ປະຊາຊົນ​ບັນດາ​ເຜົ່າ​ເຂົ້າຮ່ວມ​ການ​ປະຕິວັດ​ຢ່າງ​ກວ້າງຂວາງ ​ແລະ ​ໄດ້​ຮັບ​ໄຊຊະນະ​ເປັນ​ກ້າວໆ​ມາຈົນ​ຮອດ​ປີ 1975 ຈຶ່ງ​ສາມາດ​ປົດ​ປ່ອຍ​ໄດ້​ໃນ​ທົ່ວ​ປະ​ເທດ. ຈາກ​ໝາກຜົນ​ທີ່​ໄດ້​ກ່າວ​ມານັ້ນ ຖື​ເປັນ​ໄຊຊະນະ​ລວມຂອງ​ການ​ປະຕິວັດ​ລາວ ​ແລະ ສ່ວນ​ໜຶ່ງ​ກໍ​ແມ່ນ​ຍ້ອນ​ການ​ປະກອບສ່ວນ​ໃນ​ພາລະກິດ​ຂອງ​ສື່​ມວນ​ຊົນ​ລາວ​ທີ່​ໄດ້​ເຮັດ​ໜ້າ​ທີ່​ຕາມ​ພາລະ​ບົດບາດ​ທີ່​ການ​ປະຕິວັດ​ໄດ້​ມອບ​ໝາຍ​ໃຫ້.

ພໍ​ຕົກ​ມາ​ໃນ​ຍຸກ​ສ້າງສາ ​ແລະ ພັດທະນາ​ປະ​ເທດ​ຊາດ ສື່​ມວນ​ຊົນ​ລາວ​ເຮົາ​ຍິ່ງ​ໄດ້​ຮັບ​ການ​ພັດທະນາ​ຢ່າງ​ກ້າວ​ໄກ ​ແລະ ຮອບດ້ານ, ມີ​ການ​ຂະຫຍາຍຕົວ​ທາງ​ດ້ານ​ປະລິມານ ​ແລະ ຄຸນ​ນະພາ​ບຢ່າງ​ເຫັນ​ປະຈັກ​ຕາ ​ແລະ ກວ້າງຂວາງ​ທີ່​ສຸດ. ສິ່ງ​ເສດ​ເຫລົ່ານັ້ນ​ໄດ້​ສະ​ແດງ​ອອກ​ຄື: ວິທະຍຸ​ກະຈາຍສຽງ​ເພີ່ມ​ຂຶ້ນຫລາຍ​ທົບ​ເທົ່າ ນັບ​ແຕ່​ຂັ້ນສູນ​ກາງ​ຈົນ​ຮອດ​ທ້ອງ​ຖິ່ນ, ທຸກ​ແຂວງ​ໄດ້​ມີ​ສະຖານີ​ວິທະຍຸ-​ໂທລະພາບ​ຂອງ​ຕົນ, ບາງ​ເມືອງ​ກໍ​ມີ​ສະຖານີ​ວິທະຍຸ, ຂັ້ນບ້ານ​ກໍ​ມີ​ລະບົບ​​ໂທ​ລະ​ໂຄ່ງ, ໜັງສືພິມ ​ແລະ ສື່​ສິ່ງ​ພິມ​ຕ່າງໆ​ກໍ​ໄດ້​ເພີ່ມ​ຂຶ້ນຢ່າງ​ວ່ອ​ງ​ໄວ. ປັດຈຸບັນ​ຈຳນວນ​ໜັງສືພິມ​ລາຍ​ວັນ, ວາລະສານ​ຕ່າງໆ​ໃນ​ທົ່ວ​ປະ​ເທດ​ມີ​ເຖິງ 100 ກວ່າ​ຊະນິດ. ນອກຈາກ​ນັ້ນ ຈຳນວນ​ບຸກຄະລາ​ກອນ​ທີ່​ເຮັດ​ວຽກ​ກ່ຽວ​ກັບ​ສື່​ມວນ​ຊົນ​ກໍ​ໄດ້​ເພີ່ມ​ຂຶ້ນຕາມ​ຄວາມ​ຮຽກຮ້ອງ​ຕ້ອງການ​ແຕ່ລະ​ໄລຍະ. ​ໄປ​ຄຽງ​ຄູ່​ກັນນັ້ນ ທາງ​ດ້ານ​ພາຫະນະ​ຮັບ​ໃຊ້, ວັດຖຸ​ອຸປະກອນ​ທີ່​ທັນ​ສະ​ໄໝ​ກໍ​ໄດ້​ຖືກ​ນຳ​ໃຊ້​ເຂົ້າ​ໃນ​ພາລະກິດ​ຂອງ​ສື່​ມວນ​ຊົນ​ຢ່າງ​ຫລວງຫລາຍ ​ແລະ ກວ້າງຂວາງ.

13 ສິງຫາ ວັນ​ສື່​ມວນ​ຊົນ​ລາວ - Wave100S AD to Website 2020 0 - 13 ສິງຫາ ວັນ​ສື່​ມວນ​ຊົນ​ລາວ

​ໃນ​ສະພາບ​ປັດຈຸບັນ, ອີງ​ຕາມ​ສະພາບ​ການ​ປ່ຽນ​ແປງ​ຂອງ​ໂລກ​ທີ່​ນັບ​ມື້ກ້າວໜ້າ​ທັນ​ສະ​ໄໝ ບໍ່​ວ່າ​ໃນ​ດ້ານ​ບຸກຄະລາ​ກອນ, ​ເຕັກ​ໂນ​​ໂລ​ຊີ ​ແລະ ພາຫະນະ​ການ​ຜະລິດ​ສື່​ມວນ​ຊົນ​ລາວ​ໄດ້​ຫັນປ່ຽນ​ຈາກ​ລະບົບ​ອານາ​ລົກ​ມາ​ເປັນ​ດີ​ຈີ​ຕອນ, ຫັນປ່ຽນ​ຈາກ​ລະບົບ​ສື່​ເກົ່າ​ມາ​ເປັນອັນ​ໃໝ່ ​ເປັນຕົ້ນ​ແມ່ນ​ສື່​ອອນ​ລາຍ​ທີ່​ພວມ​ມີ​ການ​ພັດທະນາ​ໄປ​ຕາມ​ຍຸກ​ຕາມ​ສະ​ໄໝທີ່​ວ່ອງ​ໄວ​ທັນ​ໃຈ ​ແລະ ກວ້າງຂວາງ. ​ເພາະສະນັ້ນ ຈຶ່ງ​ຖື​ໄດ້​ວ່າ ຕະຫລອດ​ໄລຍະ 70 ປີ​ແຫ່ງ​ການ​ກຳ​ເນີ​ດ​ເຕີບ​ໃຫຍ່ ​ແລະ ຂະຫຍາຍຕົວ ສື່​ມວນ​ຊົນ​ລາວ​ໄດ້​ປະກອບສ່ວນ​ຢ່າງ​ໃຫຍ່​ຫລວງ​ໃນ​ພາລະກິດ​ການ​ປະຕິວັດ​ປົດ​ປ່ອຍ​ຊາດ ​ແລະ ພາລະກິດ​ສ້າງສາ​ພັດທະນາ​ປະ​ເທດ​ຊາດ​ຈົນ​ມາ​ຮອດ​ປັດຈຸບັນ.

​ເຖິງ​ຢ່າງ​ໃດ​ກໍ​ດີ, ອີງ​ໃສ່​ຄວາມ​ຮຽກຮ້ອງ​ຕ້ອງການ​ໃນ​ໄລຍະ​ໃໝ່​ຂອງການ​ປະຕິວັດ ກໍ​ຄືກ​ານສ້າງສາ​ພັດທະນາ​ປະ​ເທດ​ຊາດ, ວົງ​ການ​ສື່​ມວນ​ຊົນ​ລາວ​ຕ້ອງ​ໄດ້​ພ້ອມ​ກັນ​ອອກ​ແຮງ​ພັດທະນາ​ຕົນ​ເອງ​ໃຫ້​ທັນ​ຍຸກ​ທັນ​ສະ​ໄໝ. ອັນ​ສຳຄັນ​ທີ່​ສຸດ​ແມ່ນ​ການ​ຍົກ​ລະດັບ​ຂີດ​ຄວາມ​ສາມາດ ​ເພື່ອ​ຮັບ​ມື​ກັບ​ສະພາບ​ການ​ປ່ຽນ​ແປງ​ໃໝ່​ຂອງ​ສັງຄົມ ​ແລະ ຂອງ​ໂລກ​ຢ່າງ​​ໄວວາ. ທຸກ​ສິ່ງ​ທຸກ​ຢ່າງ​ກໍ​ເພື່ອ​ນຳ​ເອົາ​ແນວທາງ​ນະ​ໂຍບາຍ​ຂອງ​ພັກ ​ແລະ ລັດຖະບານ​ຫັນ​ເຂົ້າສູ່​ລວງ​ເລິກ​ຢູ່​ທ້ອງ​ຖິ່ນ​ຮາກ​ຖານ​ຢ່າງ​ແຂງ​ແຮງ, ສ້າງ​ບຸກຄະລາ​ກອນ​ທີ່​ເກັ່ງ, ມາດ​ຕະຖານ​​ເພື່ອ​ຮອງ​ຮັບ​ກັບ​ສະພາບ​ການ​ປ່ຽນ​ແປງ​ໃໝ່, ສ້າງ​ນັກ​ຊ່ຽວຊານ​ໃນ​ວົງ​ການ​ສື່​ໃຫ້​ຫລວງຫລາຍ​ກວ້າງຂວາງ ຈຶ່ງ​ຈະ​ສາມາດ​ຕອບ​ຕ້ານ-ຕອບ​ໂຕ້​ສິ່ງ​ອະກຸສົນ​ທີ່​ກຳລັງ​ຕີ​ຖອຍ, ​ເຊື່ອມ​ຕົວ​ຕໍ່​ອິດ​ທິພົນ​ຂອງ​ສື່​ມວນ​ຊົນ​ລາວ ກໍ​ຄື​ການ​ໃຊ້​ສົງຄາມ​ຈິດຕະສາດ​ຍຸ​ແຍ່​ໃຫ້​ເກີດ​ຄວາມ​ວຸ້ນວາຍ, ທັງ​ເປັນ​ການ​ແບ່ງ​ສັນ​ປັນ​ສ່ວນ​ຍາດ​ແຍ່ງ​ເອົາ​ກຳລັງ​ຄົນ​ລາວ​ໃຫ້​ຕົກ​ຢູ່​ໃນ​ຫລຸມ​ຂອງ​ສົງຄາມ​ຈິດ​ຕະສາດ.

13 ສິງຫາ ວັນ​ສື່​ມວນ​ຊົນ​ລາວ - lattana banner 1 - 13 ສິງຫາ ວັນ​ສື່​ມວນ​ຊົນ​ລາວ
13 ສິງຫາ ວັນ​ສື່​ມວນ​ຊົນ​ລາວ -    AD conten website - 13 ສິງຫາ ວັນ​ສື່​ມວນ​ຊົນ​ລາວ
13 ສິງຫາ ວັນ​ສື່​ມວນ​ຊົນ​ລາວ - lattana banner - 13 ສິງຫາ ວັນ​ສື່​ມວນ​ຊົນ​ລາວ
error: Alert: ເນື້ອຫາຂ່າວມີລິຂະສິດ !!