ຈົດ​ຈຳ​ລຳ​ລຶກບຸນຄຸນ​ພຣະ​ເຈົ້າ​ໄຊ​ຍະ​ເຊດ​ຖາ​ທິຣາດ

ຈົດ​ຈຳ​ລຳ​ລຶກບຸນຄຸນ​ພຣະ​ເຈົ້າ​ໄຊ​ຍະ​ເຊດ​ຖາ​ທິຣາດ - 555 21 - ຈົດ​ຈຳ​ລຳ​ລຶກບຸນຄຸນ​ພຣະ​ເຈົ້າ​ໄຊ​ຍະ​ເຊດ​ຖາ​ທິຣາດ
ຈົດ​ຈຳ​ລຳ​ລຶກບຸນຄຸນ​ພຣະ​ເຈົ້າ​ໄຊ​ຍະ​ເຊດ​ຖາ​ທິຣາດ - Untitled design - ຈົດ​ຈຳ​ລຳ​ລຶກບຸນຄຸນ​ພຣະ​ເຈົ້າ​ໄຊ​ຍະ​ເຊດ​ຖາ​ທິຣາດ

ໂດຍ: ທິດ​ກໍ່າ

ປີ 2020 ນັບ​ວ່າ​ເປັນ​ໜຶ່ງ ​ແລະ ທັງ​ເປັນ​ປີ​ນິມິດ​ໝາຍ​ຢ່າງ​ລົ້ນພົ້ນຂອງ​ຊາວ​ນະຄອນຫລວງ​ວຽງ​ຈັນ, ຊາວ​ແຂວງ​ບໍລິ​ຄຳ​ໄຊ, ຄຳ​ມ່ວນ, ສະຫວັນ​ນະ​ເຂດ, ສາລະ​ວັນ, ຈຳປາ​ສັກ, ​ເຊ​ກອງ ​ແລະ ອັດ​ຕະປື ຫລື ​ເວົ້າ​ໂດຍ​ລວມ​ແລ້ວ​ກໍ​ແມ່ນ​ປະຊາຊົນ​ບັນດາ​ເຜົ່າ​ຕາ​ມ​ເທສະ​ບານ​ເມືອງ, ​ເທສະ​ບານ​ແຂວງ, ນະຄອນ​ທີ່​ຂະ​ບວນລົດ​ແຫ່​ຮູບ​ຫລໍ່​ເໝືອນ​ຂອງ​ພຣະ​ເຈົ້າ​ໄຊ​ຍະ​ເຊດ​ຖາ​ທິຣາດ ພ້ອມ​ຊ້າງ​ເຜືອກ, ພຣະພຸດທະ​ຮູບ​ຈຳລອງ ​ເປັນຕົ້ນ​ແມ່ນ​ພຣະສຸກ, ພຣະ​ໃສ, ພຣະ​ເສີມ, ພຣະ​ແກ້ວ​ມໍ​ລະ​ກົດ ​ໄດ້​ແລ່ນ​ຜ່ານ​ຕາມ​ເສັ້ນທາງ ​ແລະ ຈຸດ​ພັກ​ແຕ່ລະ​ໄລຍະ​ໄດ້​ມີ​ມວນ​ຊົນ​ເຝົ້າລໍຄອຍ​ຕ້ອນຮັບ​ຂັບ​ສູ່​ແຫ່​ແຫນ​ຢ່າງ​ແໜ້ນໜາ​ໃນ​ສັດທາ​ພ້ອມ​ກັນ​ໄດ້​ຫວນ​ຄືນ​ຈົດ​ຈຳ​ລຳ​ລຶກບຸນ​ຄຸນ​ຂອງ​ພຣະ​ເຈົ້າ​ໄຊ​ຍະ​ເຊດ​ຖາ​ທິຣາດກະສັດ​ລາວ​ອົງ​ໜຶ່ງ​ທີ່​ມີ​ບຸ​ນຄຸນ​ຕໍ່​ປະ​ເທດ​ຊາດ​ບ້ານ​ເມືອງ​ຢ່າງ​ສຸດຊຶ້ງ.

ຈາກ​ສັດທາ​ທີ່​ເຮັດ​ໃຫ້​ເກີດ​ມີ​ກິດຈະກຳ​ດີໆ​ມີ​ຄວາມ​ໝາຍ​ຄັ້ງນີ້​ກໍ​ແມ່ນ​ພາຍ​ໃຕ້​ການ​ຊີ້​ນຳ​ເຫັນ​ດີ​ຮ່ວມ​​ໄມ້​ຮ່ວມ​ມື​ຈາກ​ພັກ ​ແລະ ລັດຖະບານ, ພິ​ເສດ​ກໍ​ແມ່ນ​ທ່ານ ຈູມ​ມະ​ລີ ​ໄຊ​ຍະ​ສອນ ອະດີດ​ປະທານ​ປະ​ເທດ​ແຫ່ງ ສປປ ລາວ ພ້ອມ​ສູນ​ກາງ​ອົງການ​ພຸດທະ​ສາສະໜາ​ສຳພັນ​ແຫ່ງ​ປະ​ເທດ​ລາວ, ອົງການ​ແນວ​ລາວ​ສ້າງ​ຊາດ, ກະຊວງ​ຖະ​ແຫລ​ງຂ່າວ, ວັດທະນະທຳ ​ແລະ ທ່ອງ​ທ່ຽວ, ບໍລິສັດ​ວັງ​ຕັດ​ຜູ້​ອຸປະຖຳ​ຫລັກ ຕະຫລອດ​ຜູ້​ມີ​ຈິດ​ໃຈ​ໃສ​ສັດທາ​ເປັນ​ເຄົ້າ.

​ເທົ່າ​ທີ່​​ໄດ້​ເຫັນ ​ແລະ ຕິດຕາມ​ພາບ​ຄວາມ​ຮູ້ສຶກ​ໃນ​ສັດທາ​ຂອງ​ຊາວ​ລາວ ກໍ​ຄື​ຊາວ​ພຸດ​ທະ​ບໍລິສັດ​ທັງຫລາຍ​ເຫັນ​ວ່າງ​ານຄັ້ງນີ້​ເປັນ​ງານ​ຍິ່ງ​ໃຫຍ່​ອາ​ລັງກາ​ນທີ່​ບໍ່​ທັນ​ເຄີຍ​ມີ​ມາ​ໃນ​ປະຫວັດສາດ​ຂອງ​ຊາດ​ລາວ​ຄົນ​ລາວ​ເຮົາ​ໃນ​ຍຸກ​ຜ່ານ​ມາ​ກໍ​ຄື​ໃນ​ປັດຈຸບັນ ​ເພາະວ່າ​ກວ່າ​ຈະ​ເກີດ​ມີ​ສັດທາ​ອັນ​ແຮງ​ກ້າ​ຍິ່ງ​ໃຫຍ່​ຂະໜາດ​ນີ້​ມັນ​ຕ້ອງ​ມີ​ການ​ລົງທຶນ​ລົງ​ຮອນ​ມະຫາສານ ​ແລະ ມີນ້ຳ​ໃຈ​ເສຍສະຫລະ​ຢ່າງ​ລົ້ນ​ເຫລືອ, ມີ​ການຈັດຕັ້ງຊີ້​ນຳ-ນຳພາ​ທີ່​ໃຫຍ່​ໂຕ​ຈິງ​ຈັງ ​ແລະ ຜ່ານ​ຫລາຍ​ຂັ້ນຕອນ ຈຶ່ງ​ເກີດ​ມີ​ຮູບ​ປະ​ທຳ​ອອກ​ມາ​ຄື​ແນວ​ນີ້. ​ແຕ່​ສິ່ງ​ທີ່​ປາກົດ​ເຫັນ​ປະຈັກ​ຕາ, ຄວາມ​ມີ​ສັດທາ, ຄວາມ​ຮ່ວມ​ໄມ້​ຮ່ວມ​ມື​ຈາກ​ອຳນາດ​ການ​ປົກຄອງ, ພຣະສົງ​ອົງຄະ​ເຈົ້າ ​ແລະ ມວນ​ຊົນ​ຊາວ​ພຸດ​ທະ​ບໍລິສັດ​ທັງຫລາຍ​ແຕ່ລະ​ທ້ອງ​ຖິ່ນ​ເຫັນ​ວ່າ​ມັນ​ພິລຶກ​ກຶກ​ກື​ເໝືອນ​ດັ່ງ​ເກີດ​ປະຕິ​ຫານ​ພາຍ​​ໃນ​ຈິດ​ໃຈ​ຂອງ​ຊາວ​ລາວ ກໍ​ຄື​ຊາວ​ພຸດ​ເຮົາ​ທົ່ວ​ປະ​ເທດ. ອີກ​ປະການ​ໜຶ່ງ ມັນ​ກໍ​ຄ້າຍຄື​ປະຕິ​ຫານ​ຂອງ​ພຣະ​ເຈົ້າ​ໄຊ​ຍະ​ເຊດ​ຖາ​ທິຣາດນັ້ນ​ເອງ.

ຈົດ​ຈຳ​ລຳ​ລຶກບຸນຄຸນ​ພຣະ​ເຈົ້າ​ໄຊ​ຍະ​ເຊດ​ຖາ​ທິຣາດ - Wave100S AD to Website 2020 0 - ຈົດ​ຈຳ​ລຳ​ລຶກບຸນຄຸນ​ພຣະ​ເຈົ້າ​ໄຊ​ຍະ​ເຊດ​ຖາ​ທິຣາດ

​ເມື່ອ​ຕັ້ງ​ໂຈດ​ກັນ​ວ່າ, ​ເປັນ​ຫຍັງ​ຈຶ່ງ​ມີ​ໂຄງການ​ຫລໍ່​ສົມ​ເດັດ​ພຣະ​ເຈົ້າ​ໄຊ​ຍະ​ເຊດ​ຖາ​ທິຣາດ, ຫລໍ່​ຊ້າງ​ເຜືອກ​ງາ​ນິນ, ຫລໍ່​ພຣະສຸກ, ພຣະ​ເສີມ ​ແລະ ພຣະ​ໃສ​ຈຳລອງ​ນີ້​ຂຶ້ນມາ ​ແລ້ວ​ເອົາ​ໄປ​ປະດິດສະຖານ​ຢູ່​ແຂວງ​ອັດ​ຕະປື ? ຄຳ​ຕອບ​ໂຈດ​ກໍ​ຄື ຍ້ອນ​ພຣະ​ເຈົ້າ​ໄຊ​ຍະ​ເຊດ​ຖາ​ທິຣາດມີ​ຜົນງານ ​ແລະ ຄຸນງາມຄວາມດີ​ຕໍ່​ປະ​ເທດ​ລ້ານ​ຊ້າງ ​ເປັນຕົ້ນ​ເພິ່ນ​ໄດ້​ສ້າງ​ພຣະອົງ​ຕື້ຢູ່​ວຽງ​ຈັນ ​ແລະ ສີ​ຊຽງ​ໃໝ່, ບູລະນະ​ປະຕິສັງຂອນ​ພະທາດ​ອີງ​ຮັງ, ພະທາດ​ສີ​ໂຄດ​ຕະບອງ, ທາດ​ພະນົມ, ສ້າງ​ພະທາດ​ສີ​ສອງ​ຮັກ​ເພື່ອ​ເປັນ​ຫລັກ​ຊາຍ​ແດນ​ລະຫວ່າງ​ລ້ານ​ຊ້າງ ​ແລະ ຢູ່​ດົງ​ພະຍາ​ໄຟ​ແຂວງ​ເລີຍ​ໃນ​ປັດຈຸບັນ. ພາຍຫລັງ​ສ້າງ​ສຳ​ເລັດ​ແລ້ວ​ກໍ​ພາກັນ​ອະທິຖານ​ວ່າ ລ້ານ​ຊ້າງ​ກັບ​ສະຫຍາມ​ບໍ່​ຄວນ​ລົບ​ລາ​ຂ້າ​ຟັນ​ກັນ, ​ໃຫ້​ຮັ​ກ​ແພງ​ເຊິ່ງກັນ ​ແລະ ກັນ, ​ໃຫ້​ເປັນ​ບ້ານ​ໄພ້​ເມືອງ​ເຂີຍ, ​ເປັນ​ບ້ານ​ແກ່ວ​ເມືອງ​ດອງ, ​ໄປ​ພຸ້ນ​ກິນ​ປາມາ​ພີ້​ກິນ​ເຂົ້າ, ບໍ່​ໂລບ​ລ້ຽວຄິດ​ຄົດ​ທໍລະ​ຍົດ​ຕໍ່​ກັນ ຂໍ​ໃຫ້​ສິ່ງ​ສັກສິດ​ເປັນ​ພະຍານ, ​ໃຜ​ບໍ່​ສັດ​ຊື່​ຂໍ​ໃຫ້​ມີ​ອັນ​ເປັນ​ໄປ, ​ເຂົ້າປ່າ​ໃຫ້​ເສືອ​ຂົບ, ລົງ​ນ້ຳ​ໃຫ້​ເງືອກ​ກິນ, ​ເດີນ​ໃຫ້​ຟ້າຜ່າ. ອັນ​ທີ່​ສຳຄັນ​ທີ່​ສຸດ ພຣະ​ເຈົ້າ​ໄຊ​ເຊດ​ຖາ​ເພິ່ນ​ຫລົງ​ໄຫລ​ໃນ​ສິນ​ທຳ, ທັງ​ມີ​ຍຸດທະວິທີ​ສິລະ​ປະຍຸດ​ໃນ​ການ​ສູ້​ຮົບ. ​ໃນ​ຍຸກ​ພະມ້າ​ເຂົ້າມາ​ຮຸກ​ຮານ ​ເພິ່ນ​ສາມາດ​ຕອບ​ຕ້ານ-ຕອບ​ໂຕ້ ​ແລະ ຮັກສາ​ປະ​ເທດ​ລ້ານ​ຊ້າງ​ໄວ້​ໄດ້​ຢ່າງ​ໝັ້ນຄົງ.

ນອກຈາກ​ນັ້ນ ​ເພິ່ນ​ກໍ​ມີ​ວິ​ໃສ​ທັດ​ອັນ​ກວ້າງ​ໄກ​ໃນ​ການ​ພັດທະນາ​ສ້າງສາ​ບ້ານ​ເມືອງ ​ເປັນຕົ້ນ​ໄດ້​ຍ້າຍ​ນະຄອນຫລວງ​ຈາກ​ຊຽງ​ທອງ​ມາຕັ້ງຢູ່​ວຽງ​ຈັນ​ດ້ວຍ​ສາ​ເຫດ​ທີ່​ວ່າ: ຊຽງ​ທອງ ຫລື​ວ່າ ຫລວງ​ພະ​ບາງ ຕັ້ງຢູ່​ໃກ້​ກັບ​ສັດຕູ ຄື​ປະ​ເທດ​ພະມ້າ. ອີກ​ປະການ​ໜຶ່ງ ຍ້ອນ​ຊຽງ​ທອງ​ມີ​ພູຜາ​ຫລາຍ ບໍ່​ເໝາະ​ສົມ​ແກ່​ການ​ຜະລິດ​ກະສິກຳ​ຈຶ່ງ​ໄດ້​ຍ້າຍ​ນະຄອນຫລວງ​ມາຕັ້ງຢູ່​ວຽງ​ຈັນ ​ເພາະ​ມີ​ທົ່ງ​ຮາບ​ທົ່ງພຽງ​ຢ່າງ​ກວ້າງຂວາງ, ​ເໝາະ​ແກ່​ການ​ປູກຝັງ, ລ້ຽງສັດ ​ແລະ ວຽງ​ຈັນ​ກໍ​ມີ​ທີ່​ຕັ້ງຢູ່​ຈຸດ​ຍຸດ​ທະ​ສາດ​ໃຈກາງ​ຂອງ​ປະ​ເທດ​ລ້ານ​ຊ້າງ. ສ່ວນວ່າ​ຊ້າງ​ເຜືອກ​ນັ້ນກໍ​ເປັນ​ຊ້າງ​ປະຈຳ​ຕົວ​ຂອງ​ເພິ່ນ​ໃຊ້​ເປັນ​ພາຫະນະ​ໄປ​ມາ​ສູ້​ເສິກ​ສົງຄາມ​ຕໍ່ສູ້​ກັບ​ສັດຕູ​ຕ່າງ​ຊາດ​ທີ່​ເຂົ້າມາ​ຮຸກ​ຮານ. ກ່ຽວ​ກັບ​ພຣະສຸກ, ພຣະ​ເສີມ, ພຣະ​ໃສ​ນັ້ນ ​ເປັນ​ພຣະຕົວ​ແທນ​ລູກ​ສາວ​ຂອງ​ເພິ່ນ ​ເພາະ​ເຈົ້າ​ໄຊ​ຍະ​ເຊດ​ຖາ​ທິລາດ​ມີ​ລາຊະ​ທິດາ (ລູກ​ສາວ) 3 ພະ​ອົງ​ຄື: ຍານາງ​ສຸກ, ຍານາງ​ໃສ ​ແລະ ຍານາງ​ເສີມ ຈຶ່ງ​ໄດ້​ສ້າງ​ພຣະຂຶ້ນມາ ​ເພື່ອ​ເປັນ​ການ​ທຳບຸນ​ທັງ​ເປັນ​ສິລິ​ມຸງຄຸນ​ເພາະ​ເຈົ້າ​ໄຊ​ຍະ​ເຊດ​ຖາ​ທິລາດ​ມີ​ຄວາມ​ເຫລື້ອມ​ໃສ​ໃນ​ພະ​ພຸດທະ​ສາສະໜາ​ເປັນ​ຢ່າງ​ມາກ. ປັດຈຸບັນ ພຣະສຸກ​ຍັງ​ຈົມ​ນ້ຳຢູ່​ເວີນ​ສຸກ, ພຣະ​ໃສ​ຢູ່​ວັດ​ໂພ​ໄຊ​ໜອງ​ຄາຍ, ພຣະ​ເສີມ​ນັ້ນຢູ່​ກຸງ​ເທບ ຍ້ອນ​ເກີດ​ເສິກ​ສົງຄາມ​ສະຫຍາມ​ໄດ້​ເຂົ້າມາ​ປຸ້ນ​ສະດົມ​ເຜົາ​ຜານ​ເມືອງ​ວຽງ​ຈັນ​ຈົນ​ຮາບ​ກ້ຽງ​ແລ້ວ​ກໍ​ເອົາ​ວັດຖຸ​ຊັບ​ສິນ, ຂອງ​ມີຄ່າ, ​ເຄື່ອງ​ຄ້ຳຂອງ​ຄູນ​ໄປ​ຈົນ​ກ້ຽງ. ພຣະ​ແກ້ວ​ກໍ​ຢູ່​ກຸງ​ເທບ, ພຣະສຸກ​ໃນ​ເວລາ​ເອົາ​ໄປ​ບັງ​ເອີນ​ແພ​ໄຫລ​ນ້ຳ​ແຕກ​ຈຶ່ງ​ຈົມ​ນ້ຳ. ສ່ວນ​ພຣະ​ເສີມ​ກັບ​ພຣະ​ໃສ​ແມ່ນ​ສາມາດ​ເອົາ​ໄປ​ໄດ້ ປະຫວັດສາດ​ຈຶ່ງ​ຊ້ຳຮອຍ​ມາ​ຮອດ​ທຸກ​ວັນ​ນີ້.

ສ່ວນ​ສາ​ເຫດ​ທີ່​ເອົາ​ໄປ​ປະດິດສະຖານ​ຢູ່​ແຂວງ​ອັດ​ຕະປືນັ້ນ ກ່າວ​ກັນ​ວ່າ​ພຣະ​ເຈົ້າ​ໄຊ​ຍະ​ເສດ​ຖາ​ທິລາດ​ໄປ​ເສຍ​ຊີວິດ​ຢູ່​ແຂວງ​ອັດ​ຕະປື ຍ້ອນ​ຖືກ​ລອບ​ປົງ​ພຣະຊົນ ດັ່ງ​ຕຳນານ​ກ່າວ​ຂານ​ວ່າ​ຕາຍ​ຢ່າງ​ລຶກລັບ ​ແຕ່​ທາດ​ແທ້​ແມ່ນ​ຢູ່​ພາຍ​ໃນ​ເຊື້ອລາດ​ຊະ​ວົງ​​ເກີດ​ມີ​ຄວາມ​ຂັດ​ແຍ່ງ ​ແລ້ວ​ຫາ​ວິທີ​ຍົວະ​ປອງ​ຂ້າ​ເຈົ້າ​ໄຊ​ຍະ​ເຊດ​ຖາ​ຢູ່​ອັດ​ຕະປື​ໃນ​ຄະນະ​ໄປ​ລາດຊະ​ກິດ. ສະນັ້ນ ​ເພື່ອ​ຈາລຶກ​ບຸນຄຸນ ​ແລະ ຜົນງານ​ອັນ​ຍິ່ງ​ໃຫຍ່​ຂອງ​ກະສັດ​ອົງ​ນີ້​ທາງ​ການ​ເຮົາ​ຈຶ່ງ​ມີ​ໂຄງການ​ນີ້​ຂຶ້ນມາ ​ເພື່ອ​ໃຫ້​ລູກ​ຫລານ​ໄດ້​ສືບ​ຕໍ່​ສຶກສາຄົ້ນຄວ້າ​ຕໍ່​ໄປ​ທັງ​ເປັນ​ການ​ຈົດ​ຈຳ​ລຳ​ລຶກ, ​ເປັນ​ອານຸສອນ​ສະຖານ​ແຫ​ລ່ງທ່ອງ​ທ່ຽວ​ທາງ​ປະຫວັດ​ສາດ.

ຈົດ​ຈຳ​ລຳ​ລຶກບຸນຄຸນ​ພຣະ​ເຈົ້າ​ໄຊ​ຍະ​ເຊດ​ຖາ​ທິຣາດ - WhatsApp Image 2020 05 27 at 5 - ຈົດ​ຈຳ​ລຳ​ລຶກບຸນຄຸນ​ພຣະ​ເຈົ້າ​ໄຊ​ຍະ​ເຊດ​ຖາ​ທິຣາດ
ຈົດ​ຈຳ​ລຳ​ລຶກບຸນຄຸນ​ພຣະ​ເຈົ້າ​ໄຊ​ຍະ​ເຊດ​ຖາ​ທິຣາດ - WhatsApp Image 2020 05 27 at 5 - ຈົດ​ຈຳ​ລຳ​ລຶກບຸນຄຸນ​ພຣະ​ເຈົ້າ​ໄຊ​ຍະ​ເຊດ​ຖາ​ທິຣາດ
error: Alert: ເນື້ອຫາຂ່າວມີລິຂະສິດ !!