ຫວຽດນາມ ຈະໄດ້ຮັບຜົນປະໂຫຍດຈາກສັນຍາ EVFTA ເລີ່ມແຕ່ວັນທີ 1 ສິງຫາ
ຖະແຫຼງການຂອງຄະນະກຳມະການເອີລົບໄດ້ຢັ້ງຢືນວ່າ ສັນຍາການຄ້າເສລີສະຫະພາບເອີລົບ(EU) – ຫວຽດນາມ (EVFTA) ເຊິ່ງແມ່ນສັນຍາການຄ້າຮອບດ້ານທີ່ສຸດ ໂດຍ EU ໄດ້ເຊັນກັບປະເທດກຳລັງພັດທະນານັ້ນ ແມ່ນມີຜົນສັກສິດນັບແຕ່ວັນທີ 1 ສິງຫາເປັນຕົ້ນໄປ.
ຖະແຫຼງການທີ່ໄດ້ປະກາດອອກໄປໃນວັນທີ 31 ກໍລະກົດ, ທ່ານນາງປະທານຄະນະກຳມະການເອີລົບ Ursula von der leyen ໃຫ້ຮູ້ວ່າ ປັດຈຸບັນ ເສດຖະກິດເອີລົບພວມຕ້ອງການທຸກກາລະໂອກາດເພື່ອຟື້ນຟູກຳລັງແຮງພາຍຫຼັງວິກິດການຈາກໂລກລະບາດ Covid – 19. ສັນຍາການຄ້າສະບັບຕ່າງໆ, ຕົວຢ່າງຄື: ສັນຍາທີ່ມີຜົນສັກສິດກັບຫວຽດນາມໃນວັນທີ 1 ສິງຫານັ້ນ, ຈະນຳມາໃຫ້ບັນດາບໍລິສັດຂອງເອີລົບກ່ຽວກັບກາລະໂອກາດໄດ້ສຳຜັດກັບຕະຫຼາດທີ່ຫາກໍ່ພົ້ນເດັ່ນ ແລະ ສ້າງວຽກເຮັດງານທຳໃຫ້ຊາວເອີລົບ.
ຕາມນັ້ນແລ້ວ, ບັນດາປະເພດສິນຄ້າຕົ້ນຕໍຂອງຫວຽດນາມຈະໄດ້ຮັບຜົນປະໂຫຍດຈາກສັນຍາສະບັບນີ້. ຕາມສະຫະສະມາຄົມປຸງແຕ່ງ ແລະ ສົ່ງອອກສິນໃນນ້ຳຫວຽດນາມແລ້ວ, ການສົ່ງອອກສິນໃນນ້ຳຈາກຫວຽດນາມ ໄປຍັງ EU ພວມຢືນຢູ່ຕໍ່ໜ້າກາລະໂອກາດອັນໃຫຍ່ຫຼວງ, ເມືື່ອວິສາຫະກິດສາມາດສຳຜັດກັບຕະຫຼາດບໍລິໂພກອຸປະໂພກສິນໃນນ້ຳຂະໜາດໃຫຍ່ ດ້ວຍລະດັບການບໍລິໂພກອຸປະໂພກສະເລ່ຍບັນລຸ 22,03 ກິໂລກຼາມ/ຄົນ, ສູງກ່ວາ 5,34 ກິໂລກຼາມເມື່ອທຽບໃສ່ລະດັບສະເລ່ຍຂອງໂລກ.
ສຳລັບຂະແໜງໄມ້, ປັດຈຸບັນ EU ແມ່ນຕະຫຼາດນຳເຂົ້າຜະລິດຕະພັນໄມ້ໃຫຍ່ອັນດັບທີ 2 ໃນໂລກ, ເຖິງວ່າ ຫວຽດນາມ ແມ່ນ 1 ໃນຈຳນວນ 5 ປະເທດ ປຸງແຕ່ງ, ສົ່ງອອກໄມ້ໃຫ່ຍທີ່ສຸດກໍ່ຕາມ ແຕ່ວົງເງິນສົ່ງອອກໄປຍັງ EU ຍັງຈຳກັດຢູ່, ກວມເອົາພຽງແຕ່ກ່ວາ 1% ຂອງຄວາມຕ້ອງການນຳເຂົ້າຜະລິດຕະພັນໄມ້ທັງໝົດ ໃນແຕ່ລະປີຂອງຕະຫຼາດເອີລົບນີ້.
