ຄາດວ່າຈະມີ ນັກກິລາຖີບລົດ 500 ກວ່າຄົນ ເຂົ້າຮ່ວມຊີງຂັນປະທານສູງກາງແນວລາວສ້າງຊາດ 8 ສິງຫານີ້ ສະຫຼອງ ຄົບຮອບ 70 ປີ

ສະຫະພັນລົດຖີບແຫ່ງຊາດລາວ ໄດ້ຫ້າງຫາກະກຽມຈະຈັດການແຂ່ງຂັນກິລາຖີບລົດປະເພດເສືອໝອບ 3 ຮຸ່ນ ຄື: ຮຸ່ນໂອເພັນ, ຮຸ່ນອາຍຸ 39 ປີລົງມາ ແລະ ຮຸ່ນອາຍຸ 40 ປີຂຶ້ນໄປ ຊີງຂັນປະທານສູນກາງແນວລາວສ້າງຊາດ ແລະ ຂະບວນຂີ່ລົດຖີບສາມັກຄີເພື່ອສຸຂະພາບ,ແນ່ໃສ່ສ້າງຂະບວນການສະເຫຼີມສະຫຼອງວັນສ້າງຕັ້ງ ແນວລາວສ້າງຊາດຄົບຮອບ 70 ປີ (13 ສິງຫາ 1950-13 ສິງຫາ 2020) ຄາດວ່າລາຍການດັ່ງກ່າວຈະມີນັກກິລາຖີບລົດຊາວລາວ ກໍຄື ຊາວນະຄອນຫຼວງວຽງຈັນ ເຂົ້າຮ່ວມເຖິງ 500 ຄົນ ເລີ່ມລົງທະບຽນແຕ່ວັນທີ 31 ກໍລະກົດນີ້ ເປັນຕົ້ນໄປ ແລະ ປິດຮັບສະໝັກໃນວັນທີ 8 ສິງຫານີ້

ທ່ານ ກາບຊ້ອນ ສຸວັນນະຣາຊ໌ ເລຂາທິການສະຫະພັນລົດຖີບແຫ່ງຊາດລາວ ແຈ້ງໃຫ້ຊາບວ່າ: ໃນວັນທີ 8 ສິງຫານີ້ ສະຫະພັນລົດຖີບແຫ່ງຊາດ ຈະໄດ້ສົມທົບກັບ ສູນກາງແນວລາວສ້າງຊາດ ຈະໄດ້ຈັດການແຂ່ງຂັນກິລາລົດຖີບປະເພດເສືອໝອບ 3 ຮຸ່ນ ຊີງຂັນປະທານສູນກາງແນວລາວສ້າງຊາດ ແລະ ຂະບວນຂີ່ລົດຖີບສາມັກຄີເພື່ອສຸຂະພາບ ແນໃສ່ສ້າງຂະບວນການສະເຫຼີມສະຫຼອງວັນສ້າງຕັ້ງ ແນວລາວສ້າງຊາດຄົບຮອບ 70 ປີ

ໄດ້ກຳນົດເສັ້ນທາງຈຸດປ່ອຍທີ່ເດີນພຣະທາດຫຼວງ ໄປໂຄ້ງທີ່ປະຕູໄຊ ເມືອງຈັນທະບູລີ ເພື່ອມຸ້ງໜ້າໄປຕາມເສັ້ນທາງ 13 ໃຕ້ ເມືອງໄຊເຊດຖາ ແລະ ເມືອງໄຊທານີ ກ່ອນຈະໂຄ້ງເຂົ້າເສັ້ນທາງ 450 ປີ ໄປຕາມເສັ້ນທາງເມືອງໄຊເຊດຖາ ຫາ ເມືອງຫາດຊາຍຟອງ ໄປໂຄ້ງສາມແຍກບ້ານທ່ານາແລງ ເມືອງຫາດຊາຍຟອງ ກັບຄືນເສັ້ນທາງເດີມ ດ້ວຍໄລຍະທາງ 70 ກິໂລແມັດ ທັງ 3 ຮຸ່ນດັ່ງກ່າວ ຄາດວ່າຈະມີນັກກິລາເຂົ້າຮ່ວມຊີງໄຊ ເຖິງ 100 ກວ່າຄົນ ແລະ ຜູ້ໜຶ່ງຕ້ອງລົງສະໝັກເພື່ອເສຍຄ່າທຳນຽມຜູ້ລະ 1 ແສນກີບ ພ້ອມທັງໄດ້ຮັບເສື້ອຟຣີຜູ້ລະ 1 ຜືນ ພ້ອມອາຫານເຊົ້າ ແລະ ສວຍ ກຳນົດລົງທະບຽນລະຫວ່າງວັນທີ 31 ກໍລະກົດ ຫາ 5 ສິງຫານີ້.​

ສຳລັບກົດກະຕິກາການແຂ່ງຂັນໃນ 3 ຮຸ່ນດັ່ງກ່າວ ຜູ້ເຂົ້າຮ່ວມແຂ່ງຂັນຕ້ອງໃຊ້ລົດ 2 ລໍ້ ປະເພດລົດກວກ ຫຼື ເສືອໝອບ ເທົ່ານັ້ນ ຫ້າມຕິດຕັ້ງແອໂຣບາທຸກສະນິດ, ທຸກຄົນຕ້ອງໃສ່ໝວກກັນກະທົບຕະຫຼອດການແຂ່ງຂັນ, ລົດເຊີວິດຂອງແຕ່ລະທີມ (ຖ້າມີ) ໃຫ້ຂັບຢູ່ຫຼັງ ນັກແຂ່ງ ແລະ ກຳມະການເທົ່ານັ້ນ ຫ້າມໃຫ້ນໍ້າແກ່ນັກກິລາໃນເວລາແຂ່ງຂັນຂັນເດັດຂາດ, ຜູ້ເຂົ້າຮ່ວມຕ້ອງຕິດປ້າຍ ແລະ ເບີ ຢູ່ເສື້ອ ແລະ ລົດທຸກຄັນ, ຕ້ອງມີເງື່ອນໄຂອາຍຸຕາມການກຳນົດ ແລະ ນັກກິລາອາຍຸຕໍ່າກວ່າ 18 ປີ ຕ້ອງໄດ້ຮັບຄວາມຍິນຍອມຈາກຜູ້ປົກຄອງ ເນື່ອງຈາກການແຂ່ງຂັນໄດ້ທາງສາທາລະນະທາງຫຼວງ. ດັ່ງນັ້ນ, ຜູ້ເຂົ້າຮ່ວມແຂ່ງຂັນຕ້ອງປະຕິບັດກົດຈາລະຈອນ  ແລະ ລະບຽບການແຂ່ງຂັນໃຫ້ເຂັ້ມງວດ ແລະ ຫ້າມດູດຮຸ່ນແຂ່ງຂັນອື່ນ ແລະ ລົດທຸກສະນິດ.

ສ່ວນຂະບວນຖີບລົດສາມັກຄີ ລົງທະບຽນຕອນເຊົ້າວັນທີ 8 ສິງຫາ 2020 ຈະໄດ້ຮັບເສື້ອຟຣີ 1 ຜືນ ພ້ອມກັບອາຫານເຊົ້າ ແລະ ສວຍເຊັ່ນກັນ ຄາດວ່າຈະມີນັກກິລາຖີບລົດສະໝັກຫຼິນເຂົ້າຮ່ວມ 400 ຄົນ ກຳນົດເສັ້ນທາງຈາກຈຸດເລີ່ມຕົ້ນເດີນພຣະທາດຫຼວງ ຖີບລົດໄປຕາມເສັ້ນທາງບ້ານໂພນສະອາດ, ບ້ານສາຍລົມ ແລະ ອອກເລາະເສັ້ນທາງແຄມຂອງໄປອານຸສາວະລີ ເຈົ້າຟ້າງຸ່ມ ແລ້ວໄປໂຄ້ງທີ່ 4 ແຍກ ວິທະຍາໄລເຕັກນິກ ລາວ-ເຢຍລະມັນ ມຸ້ງໜ້າໄປທາງທາດຂາວ ສີເມືອງ ແລະ ເລາະອອກຕາມເສັ້ນທາງ 3 ແສນໄທ ລ້ຽວຂວາຂຶ້ນທາງປະຕູໄຊ ແລະ ໄປທີ່ຈຸດເດີມ ເດີນພຣະທາດຫຼວງດ້ວຍໄລຍະທາງ 12 ກິໂລແມັດ.

ຂະນະທີ່ລາງວັນຊະນະເລີດໃນຮຸ່ນແຂ່ງຂັນ ທັງ 3 ຮຸ່ນດັ່ງກ່າວ ແມ່ນໄດ້ເທົ່າທຽມກັນໝົດ ທີ 1 ຈະໄດ້ຮັບເງິນລາງວັນ 7 ແສນກີບ, ທີ 2 ໄດ້ 5 ແສນກີບ, ທີ 3 ໄດ້ 3 ແສນກີບ, ທີ 4  ແລະ ທີ 5 ໄດ້ 1 ແສນກີບ, ໃນນັ້ນ ອັນດັບທີ 1 ຫາ ທີ 3 ຈະໄດ້ຮັບຫຼຽນທີ່ລະນຶກ 70 ປີ ຂອງແນວລາວສ້າງຊາດ ຖ້າຫາກທ່ານສົນໃຈຢາກຈະເຂົ້າຮ່ວມກິດຈະກຳດັ່ງກ່າວສາມາດຕິດຕໍ່ໄດ້ທີ່ເບີໂທ 020 99993666 ທ່ານ ກາບຊ້ອນ ຫຼື ເບີໂທ 020 52873389 ທ່ານ ກິດສະໜາ.

ໂດຍ: ສົງການ

error: Alert: Content is protected !!