ກຸ່ມ ISIS ບຸກໂຈມຕີຄຸກຢູ່ອັບການິດສະຖານ ມີຜູ້ເສຍຊີວິດຢ່າງໜ້ອຍ 29 ຄົນ

ກຸ່ມ isis ບຸກໂຈມຕີຄຸກຢູ່ອັບການິດສະຖານ ມີຜູ້ເສຍຊີວິດຢ່າງໜ້ອຍ 29 ຄົນ - 41 - ກຸ່ມ ISIS ບຸກໂຈມຕີຄຸກຢູ່ອັບການິດສະຖານ ມີຜູ້ເສຍຊີວິດຢ່າງໜ້ອຍ 29 ຄົນ
ກຸ່ມ isis ບຸກໂຈມຕີຄຸກຢູ່ອັບການິດສະຖານ ມີຜູ້ເສຍຊີວິດຢ່າງໜ້ອຍ 29 ຄົນ - Untitled design - ກຸ່ມ ISIS ບຸກໂຈມຕີຄຸກຢູ່ອັບການິດສະຖານ ມີຜູ້ເສຍຊີວິດຢ່າງໜ້ອຍ 29 ຄົນ

Bloomberg ​ແລະ The Guardian ລາຍ​ງານ​ວ່າ: ກຸ່ມ ISIS ​ໄດ້​ບຸກ​ເຈົ້າ​ໂຈມ​ຕີ​ຄຸກ ​ເຊິ່ງຕັ້ງຢູ່​ທາງ​ຕາ​ເວັນ​ອອກ​ຂອງ​ປະ​ເທດ​ອັບ​ກາ​ນິດ​ສະຖານ ​ເຮັດ​ໃຫ້​ມີ​ຢ່າງ​ໜ້ອຍ 29 ຄົນ​ເສຍ​ຊີວິດ​ຈາກ​ເຫດການ​ປິດ​ລ້ອມ 20 ຊົ່ວ​ໂມງ​ຂອງ​ເຈົ້າໜ້າ​ທີ່ ​ໂດຍ​ແຫ​ລ່ງຂ່າວ​ລາຍ​ງານ​ວ່າ: ISIS ພະຍາຍາມ​ຈະ​ປົດ​ປ່ອຍ​ນັກ​ໂທດ​ຫລາຍ​ຮ້ອຍ​ຄົນ​ຢູ່​ໃນ​ຄຸກ​ໃຫ້​ເປັນ​ອິດສະຫລະ.

ກອງ​ກຳລັງ​ຂອງ​ອັບ​ກາ​ນິດ​ສະຖານ​ສາມາດ​ຄວບ​ຄຸມ​ສະຖານະ​ການ​ໄດ້​ໃນ​ຕອນ​ບ່າຍ​ຂອງ​ວັນ​ທີ 3 ສິງຫາ ​ໂດຍ​ຄຸກ​ດັ່ງກ່າວ​ມີ​ຊື່ວ່າ: Jalalabad ​ເຊິ່ງກັກ​ຂັງ​ນັກ​ໂທດ​ 1.800 ກວ່າ​ຄົນ.

Fawad Aman ​ໂຄສົກ​ຂອງ​ກະຊວງ​ປ້ອງ​ກັນ​ຄວາມ​ສະຫງົບ​ອັບ​ກາ​ນິດ​ສະຖານ ກ່າວ​ວ່າ: ກຸ່ມ​ກໍ່​ການ​ຮ້າຍ​ໄດ້​ເລີ່​ມບຸກ​ເຂົ້າ​ໂຈມ​ຕີ​ຄຸກ​ນັບ​ແຕ່​ຕອນ​ແລງ​ຂອງ​ວັນ​ທີ 2 ສິງຫາ​ຜ່ານ​ມາ ຫລັງ​ຈາກ​ມີ​ການວາງ​ລະ​ເບີດ Car Bomb ໜ້າ​ປະຕູ​ທາງ​ເຂົ້າ​ຄຸກ.

ຜູ້​ຄຸມ​ສາມາດ​ຈັບ​ກຸມ​ນັກ​ໂທດ​ກັບ​ມາ​ໄດ້​ຢ່າງ​ໜ້ອຍ 1.000 ຄົນ​ຫລັງ​ຈາກ​ພວກ​ເຂົາ​ພະຍາຍາມ​ຫລົບໜີ​ອອກ​ຈາກ​ຄຸກ ​ໂດຍ​ໄດ້​ຮັບ​ການ​ຊ່ວຍ​ເຫລືອ​ຈາກ ISIS ຂະນະ​ທີ່​ປະມານ 300 ຄົນ​ຫາຍ​ຕົວ​ໄປ.

Attaullah Khogiani ​ໂຄສົກ​ຂອງ​ແຂວງ Nangarhar ​ເຊິ່ງ​ເປັນ​ສະຖານ​ທີ່​ເກີດ​ເຫດ ກ່າວ​ວ່າ: ຜູ້​ເສຍ​ຊີວິດ​ຈາກ​ການ​ໂຈມ​ຕີຄັ້ງນີ້​ມີ​ທັງ​ພົນລະ​ເຮືອນ, ນັກ​ໂທດ ​ແລະ ກອງ​ກຳລັງ​ອັບ​ກາ​ນິດ​ສະຖານ​. ຂະນະ​ທີ່​ອີກ​ປະມານ 50 ຄົນ​ໄດ້​ຮັບ​ບາດ​ເຈັບ ​ເຊິ່ງບາງ​ຄົນ​ຢູ່​ໃນ​ອາການ​ສາກັດ.

ການ​ໂຈມ​ຕີຄັ້ງນີ້ ​ໄດ້​ເນັ້ນ​ເຖິງ​ຄວາມ​ທ້າ​ທາຍ​ດ້ານ​ຄວາມ​ປອດ​ໄພ​ລະດັບ​ສູງ​ສຸດ​ສຳລັບ​ປະ​ເທດ​ທີ່​ເກີດ​ສົງຄາມ​ໃນ​ເວລາ​ທີ່​ກອງ​ກໍາລັງ​ອາ​ເມ​ລິ​ກາ ​ແລະ ນາ​ໂຕ້​ໄດ້​ຖອນ​ຕົວ​ອອກ​ໄປ​ຈາກ​ປະ​ເທດ​ຕາມ​ຂໍ້​ຕົກລົງ ​ເພື່ອ​ສັນຕິພາບ​ຂອງ​ພວກ​ເຂົາ​ກັບ​ຜູ້ນຳ​ກຸ່ມ​ຕາ​ລີ​ບັນ ​ເຊິ່ງລົງ​ລາຍ​ເຊັນ​ເມື່ອ​ວັນ​ທີ 29 ກຸມພາ​ຜ່ານ​ມາ.

Jawid Kohistani ນັກວິ​ເຄາະ​ດ້ານ​ຄວາມ​ປອດ​ໄພ ​ເຊິ່ງອະດີດ​ເຄີຍ​ເປັນ​ເຈົ້າໜ້າ​ທີ່​ຂອງ​ກອງທັບ​ອັບ​ກາ​ນິດ​ສະຖານ ກ່າວ​ວ່າ: ນີ້​ເປັນ​ການ​ໂຈມ​ຕີ​ໜ່ວຍ​ງານ​ຂອງ​ລັດຖະບານ​ຄັ້ງໜຶ່ງ​ທີ່​ມີ​ຄວາມ​ຮຸນ​ແຮງ ​ແລະ ຫາ​ໄດ້​ຍາກ ​ໂດຍ​ກຸ່ມ ISIS ​ເຊິ່ງລວມທັງ​ການ​ໂຈມ​ຕີ​ໃນ​ໄລຍະ​ບໍ່​ເທົ່າ​ໃດ​ເດືອນ​ຜ່ານ​ມາ ສະ​ແດງ​ໃຫ້​ເຫັນ​ວ່າ​ກຸ່ມ​ກໍ່​ການ​ຮ້າຍ​ດັ່ງກ່າວ​ຈະ​ຂຶ້ນມາ​ເປັນ​ກຸ່ມ​ກໍ່​ຄວາມ​ບໍ່​ສະຫງົບ​ອັນ​ດັບ​ຕົ້ນໆ​ຂອງ​ປະ​ເທດ ​ແລະ ພາກພື້ນ​ແທນ​ກຸ່ມ​ຕາ​ລີ​ບັນ ​ແລະ ສົງຄາມ​ອາດ​ຍັງ​ບໍ່​ຈົບ.

​ 6 ​ເດືອນ​ຕົ້ນປີ 2020 ມີ​ພົນລະ​ເຮືອນ 1.282 ຄົນ​ຖືກ​ຂ້າ ​ແລະ ອີກ 2.176 ຄົນ​ໄດ້​ຮັບ​ບາດ​ເຈັບ​ຈາກ​ເຫດການ​ທີ່​ກ່ຽວຂ້ອງ​ກັບ​ການ​ກໍ່​ຄວາມ​ບໍ່​ສະຫງົບ​ພາຍ​ໃນ​ພື້ນທີ່ ​ໂດຍ​ສະຫະ​ປະຊາ​ຊາດ (United Nations) ອ້າງ​ວ່າ: 58% ຂອງ​ຈຳນວນ​ຜູ້​ເສຍ​ຊີວິດ​ຈາກ​ກຸ່ມ​ຕາ​ລີ​ບັນ ​ແລະ ISIS.

ກຸ່ມ isis ບຸກໂຈມຕີຄຸກຢູ່ອັບການິດສະຖານ ມີຜູ້ເສຍຊີວິດຢ່າງໜ້ອຍ 29 ຄົນ - Wave100S AD to Website 2020 0 - ກຸ່ມ ISIS ບຸກໂຈມຕີຄຸກຢູ່ອັບການິດສະຖານ ມີຜູ້ເສຍຊີວິດຢ່າງໜ້ອຍ 29 ຄົນ

ຫລ້າ​ສຸດກຸ່ມ​ຕາ​ລີ​ບັນ ​ເຊິ່ງມີ​ອຳນາດ​ຄວບ​ຄຸມ ຫລື ​ແຂ່ງຂັນ​ຫລາຍ​ກວ່າ​ເຄິ່ງໜຶ່ງ​ຂອງ​ປະ​ເທດ ​ໄດ້​ອອກ​ມາ​ປະຕິ​ເສດ​ຄວາມ​ຮັບຜິດຊອບ​ໃນ​ການ​ໂຈມ​ຕີຄັ້ງນີ້ ຜ່ານ​ຖະ​ແຫລ​ງການ​ທາງ​ອີ​ເມລ ​ໂດຍ​ກ່າວ​ວ່າ: ຜູ້ນຳ​ຂອງ​ກຸ່ມ​ໄດ້​ປະກາດ​ຢຸດ​ຍິງ​ເປັນ​ໄລຍະ​ເວລາ 3 ວັນ ​ເລີ່​ມ​ແຕ່​ວັນ​ທີ 31 ກໍລະກົດ​ຜ່ານ​ມາ ​ໃນ​ເທດສະການ Eid al-Adha.

ການ​ໂຈມ​ຕີ​ຄຸກ​ຄັ້ງນີ້​ເກີດ​ຂຶ້ນພຽງ​ມື້ດຽວ ຫລັງ​ຈາກ​ຜູ້ນຳ​ລະດັບ​ອາວຸ​ໂສ​ຂອງ ISIS ຖືກ​ກອງ​ກຳລັງ​ອັບ​ກາ​ນິດ​ສະຖານ​ຢູ່​ແຂວງ Nangarhar ​ເຊິ່ງຢູ່​ຕິດ​ກັບ​ຊາຍ​ແດນ​ຂອງ​ປາ​ກິດ​ສະຖານ ທີ່​ເປັນ​ສຳນັກງານ​ໃຫຍ່​ຂອງ​ກຸ່ມ ISIS ​ແລະ ​ເກີດ​ຂຶ້ນພຽງ 3 ມື້ຫລັງ​ຈາກ Ashraf Ghani ປະທານາທິບໍດີ​ຂອງ​ອັບ​ກາ​ນິດ​ສະຖານ ​ໄດ້​ປະກາດ​ຈະ​ປົດ​ປ່ອຍ​ນັກ​ໂທດ 500 ຄົນ​ຂອງ​ກຸ່ມ​ຕາ​ລີ​ບັນ​ອອກ​ຈາກ​ການ​ກັກ​ຂັງ ​ເພື່ອ​ສົ່ງ​ສັນຍານ ​ແລະ ​ເປີດ​ໂອກາດ​ໃຫ້​ມີ​ການ​ເຈລະຈາ​ທີ່​ດີ​ຕໍ່​ກັນ​ໃນ​ອະນາຄົດ.

ນອກຈາກ​ນີ້ ລັດຖະບານ​ຍັງ​ໄດ້​ປົດ​ປ່ອຍ​ນັກ​ໂທດຂອງ​ຕາ​ລີ​ບັນ​ອີກ 4.600 ຄົນ​ຈາກ​ນັກ​ໂທດ​ທັງ​ໝົດ 5.000 ຄົນ ​ເພື່ອ​ແລກ​ກັບ​ກອງ​ກຳລັງ​ຂອງ​ອັບ​ກາ​ນິດ​ສະຖານ 1.000 ຄົນ.

​ໂດຍ​ລວມ​ແລ້ວ ກຸ່ມ​ຕາ​ລີ​ບັນ ​ແລະ ລັດຖະບານ​ອັບ​ກາ​ນິດ​ສະຖານ​ຫວັງ​ຈະ​ຮັກສາ​ຄວາມ​ສະຫງົບ ​ແລະ ສັນຕິພາບ ລວມທັງ​ຈະ​ມີ​ການ​ເຈລະຈາ​ເພື່ອ​ຕົກລົງ​ກັນ​ໃນ​ມໍ່​ໆ​ນີ້ ຖື​ເປັນ​ການສິ້ນສຸດ​ສົງຄາມ 19 ປີ ​ເຊິ່ງຜົນ​ການ​ເຈລະຈາ​ອາດ​ຈະ​ອອກ​ມາ​ໃນ​ຮູບ​ແບບ​ຂອງ​ລັດຖະບານ​ປະສົມ​ ຄື​ໃຫ້​ທັງ 2 ຝ່າຍ​ມີ​ອຳນາດ​ໃນ​ການ​ບໍລິຫານ​ປະ​ເທດ.

​ແຕ່​ເຖິງ​ຢ່າງ​ໃດ​ແລ້ວ ຍັງ​ມີ​ກອງ​ກຳລັງ​ຂອງ ISIS ອີກ​ປະມານ 2.200 ຄົນ​ທີ່​ຍັງ​ປະຕິບັດ​ການ​ກໍ່​ຄວາມ​ບໍ່​ສະຫງົບ​ຢູ່​ພາຍ​ໃນ​ປະ​ເທດ ຫລັງ​ຈາກ​ພວກ​ເຂົາ​ຖືກ​ກຳຈັດ​ຢ່າງ​ຮຸນ​ແຮງ​ຈາກ​ພາກ​ລັດ ​ແລະ ກຸ່ມ​ຕາ​ລີ​ບັນ​ຢູ່​ແຂວງ Nuristan ​ແລະ Kunar ​ໃນ​ໄລຍະ​ຫລາຍ​ປີຜ່ານມາ.

ກຸ່ມ isis ບຸກໂຈມຕີຄຸກຢູ່ອັບການິດສະຖານ ມີຜູ້ເສຍຊີວິດຢ່າງໜ້ອຍ 29 ຄົນ - WhatsApp Image 2020 05 27 at 5 - ກຸ່ມ ISIS ບຸກໂຈມຕີຄຸກຢູ່ອັບການິດສະຖານ ມີຜູ້ເສຍຊີວິດຢ່າງໜ້ອຍ 29 ຄົນ
ກຸ່ມ isis ບຸກໂຈມຕີຄຸກຢູ່ອັບການິດສະຖານ ມີຜູ້ເສຍຊີວິດຢ່າງໜ້ອຍ 29 ຄົນ - WhatsApp Image 2020 05 27 at 5 - ກຸ່ມ ISIS ບຸກໂຈມຕີຄຸກຢູ່ອັບການິດສະຖານ ມີຜູ້ເສຍຊີວິດຢ່າງໜ້ອຍ 29 ຄົນ
error: Alert: ເນື້ອຫາຂ່າວມີລິຂະສິດ !!