ເຈົ້າໜ້າທີ່ຢູ່ສີລັງກາ ເລັ່ງນຳຈັບ “ແມວຂົນຢາ” ໂຕນຄຸກ

ສີ​ລັງກາ​ເລັ່ງຄົ້ນຫາ “​ແມວ” ໜີ​ອອກ​ຈາກ​ຄຸກ ຫລັງ​ຖືກ​ກັກ​ຂັງ​ໂທດ​ຖານ​ຂົນ​ຢາ​ເສບ​ຕິດ ​ເຜີຍ ​ເປັນ​ຂໍ້​ມູນ​ສຳຄັນ​ເພື່ອ​ຂະຫຍາຍ​ຜົນ​ທາງ​ຄະດີ.

ສຳນັກ​ຂ່າວ​ຊິນ​ຮົວລາຍ​ງານ​ວ່າ: ​​ໃນ​ວັນ​ທີ 3 ສິງຫາ​ນີ້, ສື່​ທ້ອງ​ຖິ່ນ​ຂອງ​ສີ​ລັງກາ​ລາຍ​ງານ​ວ່າ: “​ແມວ” ​ເຊິ່ງຖືກ​ກັກ​ຂັງ​ຂໍ້​ຫາ​ຂົນ​ຢາ​ເສບ​ຕິດ​ເຂົ້າ​ໄປ​ໃນ​ຄຸກ​ Welikada Prison ຢູ່​ນະຄອນຫລວງ​ໂຄ​ລຳ​ໂບ ​ເມືອງ​ຫລວງ​ຂອງ​ປະ​ເທດ ​ໄດ້​ຫລົບໜີ​ອອກ​ຈາກ​ຄຸກ​ທີ່​ມີ​ເຈົ້າໜ້າ​ທີ່​​ເຝົ້າຍາມ​ຢ່າງ​ໜາ​ແໜ້ນ ຫລັງ​ຖືກ​ຈັບ​ກຸມ​ໄດ້​ພຽງ​ບໍ່​ເທົ່າ​ໃດ​ມື້.

ໜັງສືພິມ​ Aruna ອ້າງ​ເຈົ້າໜ້າ​ທີ່​ຍາມ​ຄຸກວ່າ: ​ໃນ​ວັນ​ທີ 1 ສິງຫາ ​ເຈົ້າໜ້າ​ທີ່​ຮັກສາ​ຄວາມ​ປອດ​ໄພ​ຂອງ​ຄຸກ ກວດ​ພົບ​ວ່າ​ແມວ​ໂຕ​ນີ້​ມີ​ຖົງ​ປລາສຕິກ​ຂະໜາດ​ນ້ອຍ​ມັດ​ຢູ່​ອ້ອມ​ຄໍ ​ເຊິ່ງພາຍ​ໃນ​ບັນຈຸ​ເຮ​ໂຣອິນ​ເກືອບ 2 ກຣາມ, ຊິ​ມກາດ 2 ອັນ ​ແລະ ຊິ​ບໜ່ວຍ​ຄວາມ​ຈຳ ​ໂດຍ​ຜົນ​ການ​ສືບສວນ​ພົບ​ວ່າ​ແມວ​ໂຕ​ນີ້​ລັກລອບ​ຂົນ​ຢາ​ເສບ​ຕິດ ​ແລະ ສິ່ງ​ຕ້ອງ​ຫ້າມ​ເຂົ້າ​ຄຸກ​ເວ​ລິ​ກາ​ດາ.

​ແມວ​ໂຕ​ດັ່ງກ່າວ​ຈຶ່ງ​ຖືກ​ກັກ​ຂັງ​ຢູ່​ຄຸກ ​ເພື່ອ​ສືບສວນ​-ສອບ​ສວນ​ຫາ​ເຈົ້າຂອງ​ຕໍ່​ໄປ, ​ແຕ່​ພັດ​ຫລົບໜີ​ອອກ​ມາ​ໄດ້​ໃນ​ວັນ​ທີ 2 ສິງຫາ, ທາງ​ການ​ທ້ອງ​ຖິ່ນ​ຈຶ່ງ​ເລີ່​ມພາລະກິດ​ໄລ່​ລ່າ​ເພື່ອ​ນຳ​ຈັບ​ມັນ​ກັບ​ມາ ​ໂດຍ​ເຈົ້າໜ້າ​ທີ່​ຝ່າຍ​ສືບສວນ​ເຊື່ອ​ວ່າ: ​ແມວ​ໂຕ​ນີ້​ຖືກ​ໃຊ້​ເປັນ​ຜູ້​ລັກລອບ​ຂົນ​ສົ່ງ​ສິ່ງ​ຜິດ​ກົດໝາຍ​ເປັນ​ປະຈຳ.

error: Alert: Content is protected !!