​ແນວ​ລາວ​ສ້າງ​ຊາດ​ຄັນ​ທຸງ​ແຫ່ງ​ຄວາມ​ສາມັກຄີ​ປອງ​ດອງ

ໂດຍ: ທິດ​ກໍ່າ

​ເມື່ອ​ກ່າວ​ເຖິງ​ມູນ​ເຊື້ອຄວາມ​ເປັນ​ມາ​ແຫ່ງ​ຄວາມ​ສາມັກຄີ​ປອງ​ດອງຂອງ​ແນວ​ລາວ​ສ້າງ​ຊາດ​ຕ້ອງ​ຢ້ອນ​ຄືນ​ໄປ​ໃນ​ອະດີດຕະການ​ຜ່ານ​ມາ ​ແລ້ວ​ຈຶ່ງ​ມາ​ເບິ່ງ​ໃນ​ປັດຈຸບັນ ​ແລະ ຫລິງ​ໄປ​ໃນ​ອະນາຄົດ. ກ່ອນ​ໜ້າ​ນີ້​ຫລາຍ​ຮ້ອຍ​ປີ, ປະ​ເທດ​ລ້ານ​ຊ້າງ​ທີ່​ກວ້າງ​​ໃຫຍ່​ໄພສານ​ຂອງ​ພວກ​ເຮົາ​ໄດ້​ເຊື່ອມ​​ໂຊມ, ​ແຕກ​ແຫງ ​ແລະ ຈິບຫາຍ​ວາຍ​ວອດ ຍ້ອນ​ບໍ່​ມີ​ຄວາມ​ສາມັກຄີ​ປອງ​ດອງ​ກັນ​ພາຍ​ໃນ​ຊາດ. ສະພາບ​ດັ່ງກ່າວ​ແມ່ນ​ເລີ່​ມມີ​ມາ​ນັບ​ແຕ່​ສົມ​ເດັດ ພຣະ​ເຈົ້າ ສຸຣິຍະ​ວົງສາ ທຳ​ມິ​ກະລາດ ​ໄດ້​ຊິ້ນພະ​ຊົນ (ຕາຍ) ​ໃນ​ປີ 1960 ລວມອາຍຸ​ຂອງ​ເພິ່ນ​ໄດ້ 82 ພັນ​ສາ ຂຶ້ນຄອງ​ລາດ​ໄດ້​ນານ​ເຖິງ 57 ປີ.

ຈາກ​ນັ້ນມາ ​ແຕ່ລະ​ເຈົ້າກໍ​ເລີ່​ມມີ​ການ​ຂັດ​ແຍ່ງ, ​ແຕກ​ແຫງ, ຫາ​ວິທີ​ປອງ​ຮ້າຍ​ຂ້າ​ກັນ ​ເພື່ອ​ຍາດ​ແຍງ​ຂຶ້ນຄອງ​ອຳນາດ, ສຸດ​ທ້າຍ​ມາ ປະ​ເທດ​ລ້ານ​ຊ້າງ​ກໍ​ຖືກ​ຕັດ​ແບ່ງ​ອອກ​ເປັນ 3 ກົກ (3 ອານາຈັກ) ຄື: ອານາຈັກ​ຫລວງ​ພະ​ບາງ, ວຽງ​ຈັນ ​ແລະ ຈຳປາ​ສັກ. ​ເມື່ອ​ເຫັນ​ປະ​ເທດ​ລ້ານ​ຊ້າງ​ຕົກ​ຢູ່​ໃນ​ຊາຕາກຳ​ລົງ​ຄ້ອຍ​ ປະ​ເທດ​ສະຫຍາມ​ກໍ​ຫາ​ວິທີ​ຍຸ​ແຍ່, ບຽດບຽນ, ​ແບ່ງ​ແຍກ ​ແລ້ວ​ກໍ​ສວຍ​ໂອກາດ​ບຸກຍຶດຕີ​ເອົາ​ປະ​ເທດ​ລ້ານ​ຊ້າງ​ເປັນ​ຫົວ​ເມືອງ​ຂຶ້ນ ​ເຊິ່ງຍາວ​ນານ​ເຖິງ 114 ປີ.

ນີ້​ຄື​ຊາຕາກຳ​ຂອງ​ປະ​ເທດ​ລ້ານ​ຊ້າງ​ໃນ​ຍຸກ​ຕອນ​ປາຍ​ຫາຍ​ຍານະ. ຍັງ​ບໍ່​ພຽງ​ແຕ່​ເທົ່າ​ນັ້ນ, ​ເຈົ້າອານຸວົງ​ທີ່​ເປັນ​ເຊື້ອກະສັດ​ວຽງ​ຈັນ​ລ້ານ​ຊ້າງ​ຫາ​ກໍ​ມີອາຍຸພຽງ 13 ປີ​ກໍ​ຖືກ​ຈັບ​ໄປ​ເປັນ​ຕົວ​ປະກັນ​ຢູ່​ກຸງ​ເທບ. ພາຍຫລັງ​ໃຫຍ່​ຂຶ້ນມາ​ອາຍຸ 20 ປີ ຈຶ່ງ​ໄດ້​ມີ​ໂອກາດ​ຄືນ​ມາ​ປົກຄອງ​ອານາຈັກ​ວຽງ​ຈັນ​ໃນ​ປີ 1804. ​ໃນ​ໄລຍະ​ປົກຄອງ​ອານາຈັກ​ວຽງ​ຈັນ​ລ້ານ​ຊ້າງ​ຢູ່​ນັ້ນ, ​ເພິ່ນ​ເຫັນ​ຄວາມ​ລຳບາກ​ກາກ​ກຳ​ຂອງ​ປະຊາຊົນ​ລາວ​ຈຳນວນ​ຫລວງຫລາຍ​ທີ່​ຖືກ​ກວາດ​ຕ້ອນ​ໄປ​ເປັນ​ສະ​ເລີຍ​ເສິກ ຖືກ​ກົດ​ຂີ່​ຂູດ​ຮີດ​ເຮັດ​ວຽກ​ສາລະພັດ​ຢ່າງ​ຈົນ​ເຫລືອ​ອົດ​ເຫລືອ​ທົນ​. ຕໍ່​ສະພາບ​ດັ່ງກ່າວ​ຈຶ່ງ​ເກີດ​ມີ​ແນວ​ຄິດ​ຄຽດ​ແຄ້ນ​ຄິດ​ຢາກ​ປົດ​ປ່ອຍ​ແຜ່ນດິນ​ລາວ​ອອກ​ຈາກ​ການ​ເປັນ​ຫົວ​ເມືອງ​ຂຶ້ນຂອງ​ສະຫຍາມ ​ເພື່ອ​ຫາ​ວິທີ​ນຳ​ເອົາ​ຄົນ​ລາວ​ທີ່​ຖືກ​ກວາດ​ຕ້ອນ​ໄປ​ແລ້ວນັ້ນກັບ​ຄືນ​ມາ​ຢູ່​ບ້ານ​ເກີດ​ເມືອງ​ນອນ. ​ເຫດການ​ຕໍ່​ມາ​ຈຶ່ງ​ໄດ້​ຊັກ​ຊວນ​ບັນດາ​ເຈົ້າທັງ​ສາມ​ອານາຈັກ​ມາ​ປະຊຸມ​ກັນ​ແບບ​ລັບໆ ​ເພື່ອ​ພ້ອມ​ກັນ​ສາມັກຄີ​ຕີ​ສະຫຍາມ​ໃຫ້​ປະ​ເທດ​ລ້ານ​ຊ້າງ​ໄດ້​ມີ​ເອກະລາດ, ອິດ​ສະຫລະ​ພາບ ​ແລ້ວ​ກໍ​ນຳ​ເອົາ​ພົນລະ​ເມືອງ​ລາວ​ທີ່​ຖືກ​ກວາດ​ຕ້ອນ​ໄປ​ນັ້ນກັບ​ຄືນ​ມາ​ປະ​ເທດ.

ຜ່ານ​ການ​ປຶກສາ​ຫາລື ​ເຈົ້າຊີວິດ​ຫລວງ​ພະ​ບາງບໍ່​ເຫັນ​ດີ ທັງ​ໄປ​ເຂົ້າຂ້າງ​ກັບ​ຝ່າຍ​ສະຫຍາມ​ຫວັງ​ຢາກ​ຄອງ​ອຳນາດ​ບາດ​ໃຫຍ່ ​ໃນ​ທີ່​ສຸດ​ເຈົ້າອານຸ ກໍ​ຕັດສິນ​ໃຈ​ເຮັດ​ເສິກ​ກັບ​ສະຫຍາມ​ໃຫ້​ສົມ​ກັບ​ຄວາມ​ຄຽດ​ແຄ້ນ ສຸດ​ທ້າຍ​ມາ​ກໍ​ປະລາ​ໄຊ​ຈົນ​ສະ​ຫຍາມ​ຂ້າ​ລ້າງ​ໂຄດ​ຂອງ​ກະສັດ​ລ້ານ​ຊ້າງ​ວຽງ​ຈັນ​ຈົນ​ກ້ຽງ. ສະຫຍາມ​ໄດ້​ປົກຄອງ​ແຜ່ນດິນ​ລ້ານ​ຊ້າງ​ມາ​ຈົນ​ເຖິງ​ສົງຄາມ​ໂລກ​ຄັ້ງທີ​ສອງ ຝຣັ່ງກັບ​ອັງກິດ​ໃຜ​ກໍ​ຍາດ​ກັນ​ເປັນ​ເຈົ້າ ​ເພື່ອ​ເອົາ​ປະ​ເທດ​ໄທ​ກັບປະ​ເທດ​ລາວ​ເປັນ​ຫົວ​ເມື​ອງຂຶ້ນ. ສູ້​ກັນ​ໄປມາ ປະ​ເທດ​ລາວ​ລ້ານ​ຊ້າງ​ເລີຍ​ຖື​ກສະຫຍາມ​ກັບ​ຝຣັ່ງ​ແບ່ງປັນ​ກັນ​ປົກຄອງ​ ​ໂດຍ​ຖື​ເອົາ​ແມ່ນ້ຳຂອງ​ເປັນ​ຊາຍ​ແດນ ​ເບື້ອງຂວາ​ໃຫ້​​ເປັນ​ຂອງ​ໄທ ​ເບື້ອງຊ້າຍ​ເປັນ​ຂອງຝຣັ່ງ. ​ເພາະສະນັ້ນ ຄຳ​ວ່າ​ ອີສານ​ໃນ​ປັດຈຸບັນ ​ໄດ້​ຕົກ​ເປັນ​ຂອງ​ໄທ​ປົກຄອງ​ຈົນ​ມາ​ເຖິງ​ທຸກ​ວັນ​ນີ້.

ສ່ວນ​ລາວ​ຝັ່ງ​ຊ້າຍ​ໄດ້​ຖືກ​ຝຣັ່ງປົກຄອງ​ສືບ​ຕໍ່​ກັນ​ມາ​ຫລາຍ​ປີ ຈົນ​ແກ່ຍາວ​ມາ​ຮອດ​ຍຸກ​ອາ​ເມ​ລິ​ກາ​ເຂົ້າມາ​ແທນ. ​ເຫດ​ການບ້ານ​ເມືອງ​ໄດ້​ຜັນ​ແປ​ຍ້ອນ​ມີ​ຂະ​ບວນການ​ຕໍ່ສູ້​ຂອງ​ບຸກຄົນ ​ແລະ ກຸ່ມ​ຄົນ​ທີ່​ຮັກ​ຊາດ​ຮັກ​ແຜ່ນດິນ. ຜູ້​ເດັ່ນໆ​ໃນ​ປະຫວັດສາດ​ກໍ​ເລີ່​ມ​ແຕ່​ພໍ່​ກະ​ດວດ, ອົງ​ແກ້ວ​ກົມມະ​ດຳ, ​ເຈົ້າຟ້າ​ປັດ​ໄຈ ຕໍ່​ໃສ່​ແນວ​ລາວ​ອິດສະຫລະ, ​ແນວ​ລາວ​ຮັກ​ຊາດ ພາຍ​ໃຕ້​ການ​ນຳພາ​ຂອງ​ພັກ​ປະຊາຊົນປະຕິວັດ​ລາວ ຈຶ່ງ​ສາມາດ​ປົດ​ປ່ອຍປະ​ເທດ​ຊາດ​ອອກ​ຈາກ​ເງື່ອມມື​ຂອງ​ຈັກກະພັດ ​ແລະ ລູກ​ແຫ​ລ່ງຕີນ​ມື​ຈົນ​ມາ​ຮອດ​ປີ 1975 ຈຶ່ງ​ສາມາດ​ປົດ​ປ່ອຍປະ​ເທດ​ຊາດ​ໄດ້​ຢ່າງ​ສົມບູນ.

ນີ້​ຄື​ເຫດການ​ປະຫວັດສາດ​ຂອງ​ລາວ​ລ້ານ​ຊ້າງ ນັບ​ແຕ່​ປະ​ເທດ​ຊາດ​ເກີດ​ວິ​ກິດ​ອໍລະ​ຫົນ​ເປັນຕົ້ນມາ. ມາ​ຮອດ​ປັດຈຸບັນ, ດິນ​ລາວ, ຄົນ​ລາວ​ໄດ້​ເຮ່ຍຮວາຍ​ໄປ​ຕາມ​ເງື່ອນ​ໄຂ​ຍະຖາ​ກຳ​ຂອງ​ການ​ປ່ຽນ​ແປງ​ແຕ່​ລະ​ຍຸກ​ແຕ່​ລະສະ​ໄໝ ນັບ​ທັງ​ຢູ່​ປະ​ເທດ​ອ້ອມ​ຂ້າງ, ຢູ່​ພາກພື້ນ ​ແລະ ຢູ່​ໃນ​ໂລກ.

​ແນວ​ໃດ​ກໍ​ຕາມ, ມາ​ຮອດ​ຍຸກ​ສ້າງສາ ​ແລະ ພັດທະນາ​ປະ​ເທດ​ຊາດ, ປະ​ເທດ​ລາວ​ໃນ​ຍຸກ​ນີ້​ຍັງ​ເຫລືອ​ພຽງ 236.800 ຕາ​ກິ​ໂລ​ແມັດ ອົງການ​ແນວ​ລາວ​ສ້າງ​ຊາດ​ທີ່​ມີ​ຕົ້ນກຳ​ເນີ​ດ ​ແລະ ​ເຕີບ​ໃຫຍ່​ມາ​ຈາກ​ແນວ​ລາວ​ອິດສະຫລະ, ​ແນວ​ລາວ​ຮັກ​ຊາດ​ຈົ່ງ​ໄດ້​ກາຍ​ເປັນ​ຄັນ​ທຸງ​ແຫ່ງ​ຄວາມ​ສາມັກຄີ​ປອງ​ດອງ ​ເພື່ອ​ປົກ​ປັກ​ຮັກສາ​ແຜ່ນດິນ​ອັນ​ແສນ​ຮັກ ​ແລະ ຫວງ​ແຫນ​ຂອງ​ຕົນ​ນີ້​ໄວ້​ໃຫ້​ໝັ້ນຄົງ. ປະ​ເທດ​ລາວ, ​ແຜ່ນດິນ​ລາວ​ທີ່​ໄດ້​ຍາດ​ເອົາ​ມາ​ຈາກ​ເງື່ອມມື​ຂອງ​ສັດຕູ​ຍິ່ງ​ກວ່າ​ເວລາ​ໃດ​ໝົດ ຕ້ອງ​ພ້ອມ​ກັນ​ປົກ​ປັກ​ຮັກສາ​ໄວ້​ໃຫ້​ລູກ​ໃຫ້​ຫລານ​​ໄດ້​ສືບ​ທອດ​ໃນ​ອະນາຄົດ. ທຸກ​ຄົນ​ຈະ​ເຮັດ​ຫຍັງ​ລົງ​ໄປ​ຕ້ອງ​ຄຳນຶງ​ເບິ່ງ​ປະ​ເທດ​ຊາດ​​ເປັນ​ໃຫຍ່ ຢ່າ​ເຫັນ​ແກ່​ຜົນ​ປະ​ໂຫຍ​ດສ່ວນ​ຕົວ​ເປັນ​ຫລັກ. ຢ່າ​ພາກັນ​ກິນ​ບ້ານ​ກິນ​ເມືອງ​ຈົນ​ຫລ້ອນ​ຕູດ​ ສຸດ​ທ້າຍ​ມາ​ຊັບ​ສິນ​ໃນ​ຊາດ​ໝົດ, ​ໄມ້​ໝົດ, ດິນ​ໝົດ, ຊັບ​ໃນ​ດິນ ສິນ​ໃນ​ນ້ຳກໍ​ໝົດ ລູກ​ຫລານ​ເກີດ​ມາ​ລຸ້ນຫລັງ​ກໍ​ພາກັນ​ເປັນ​ທຸກ ຍ້ອນ​ຄົນ​ຍຸກ​ນີ້​ພາກັນ​ແຂ່ງຂັນ​ກັນ​ສໍ້​ລາດ​ບັງ​ຫລວງ.

error: Alert: Content is protected !!