ໂຢຄະ ມີຄຸນປະໂຫຍດຕໍ່ສຸຂະພາບຫລາຍກວ່າທ່ານຄິດ

ການດູແລສຸຂະພາບເປັນສິ່ງທີ່ຈຳເປັນ ແຕ່ເຮົາບໍ່ຄ່ອຍໄດ້ສົນໃຈດູແລສຸຂະພາບກັນພໍປານໃດ ໂດຍສ່ວນຫລາຍຈະອ້າງເຫດຜົນງ່າຍໆວ່າບໍ່ມີເວລາ ເຊິ່ງມື້ໜຶ່ງຮ່າງກາຍຂອງເຮົາກໍຈະຊຸດໂຊມ, ເກີດການເຈັບປ່ວຍ ແລະ ຕ້ອງເສຍຄ່າໃຊ້ຈ່າຍໃນການປິ່ນປົວອີກຫລວງຫລາຍ ດັ່ງນັ້ນ ເຮົາຈຶ່ງແນະນຳໂຢຄະເພື່ອສຸຂະພາບ ການຫລິ້ນໂຢຄະນັ້ນບໍ່ຍາກດັ່ງທີ່ຄິດ ບາງເທື່ອກໍສາມາດຝຶກເອງ ແລະ ຮຽນໂຢຄະໄດ້ດ້ວຍຕົນເອງຕາມຄລິບວີດີໂອໂຢຄະ ຫລື ຈະໄປສູນອອກກຳລັງກາຍໃກ້ເຮືອນທ່ານກໍໄດ້.

ການຫລິ້ນໂຢຄະ ຕ້ອງອາໄສຄວາມສະໝໍ່າສະເໝີໃນການຝຶກຝົນຄືກັນກັບການຫລິ້ນກິລາອື່ນໆ ເພື່ອຄວາມພ້ອມ ແລະ ການປັບໂຕຂອງຮ່າງກາຍ ແນະນຳວ່າຄວນຫລິ້ນຢ່າງໜ້ອຍອາທິດລະ 2 – 3 ມື້. ສ່ວນເວລາໃນການຫລິ້ນປະມານເທື່ອລະ 90 ນາທີ ຈະເປັນຕອນເຊົ້າ ຫລື ຕອນແລງກໍຂຶ້ນຢູ່ກັບຄວາມສະດວກຂອງແຕ່ລະຄົນ ແລະ ສິ່ງສຳຄັນໂຢຄະເປັນອີກວິທີທີ່ຈະຊ່ວຍໃຫ້ທ່ານຮູບຮ່າງງາມສົມສ່ວນ ແລະ ຍັງເໝາະສົມກັບຄົນທຸກເພດທຸກໄວ ໂດຍສະເພາະຄົນທີ່ມີບັນຫາຢູ່ຂໍ້ຕີນ ໂຢຄະຈຶ່ງເປັນອີກຄຳຕອບຂອງຜູ້ທີ່ຢາກຫລຸດຄວາມຕຸ້ຍ ແລະ ມີສຸຂະພາບດີໄປພ້ອມໆກັນ.

  • ຂໍ້ດີຂອງການຫລິ້ນໂຢຄະ ມີດັ່ງນີ້ :
  1. ເລືອດລົມໄຫລວຽນສະດວກ, ເຮັດໃຫ້ຜິວພັນສົດໃສ, ຫລຸດອາການຖ່າຍຍາກ ຈຶ່ງດີຕໍ່ສຸຂະພາບຜິວໂດຍກົງ.
  2. ຊ່ວຍຄາຍເສັ້ນ ເຮັດໃຫ້ຍ່າງໄປມາຄ່ອງແຄ້ວ ມີບຸກຄະລິກກະພາບທີ່ສະຫງ່າງາມ.
  3. ເຮັດໃຫ້ນອນຫລັບຝັນດີ, ຜ່ອນຄາຍ, ສິວຝ້າຈຶ່ງບໍ່ມາລົບກວນໃບໜ້າ.
  4. ໂຢຄະບາງທ່າຊ່ວຍໃຫ້ທ່ານມີກ້າມຊີ້ນທີ່ຮັດແໜ້ນ, ນຳ້ໜັກ.
  5. ໂຢຄະຍັງຊ່ວຍສ້າງຄວາມຫົດຢືດໃຫ້ຮ່າງກາຍ ຈຶ່ງບໍ່ມີອາການປວດຕາມຂໍ້.
  6. ມີຄວາມໝັ້ນໃຈໃນການເຮັດກິດຈະກຳຕ່າງໆຫລາຍຂຶ້ນ ເພາະໂຢຄະຊ່ວຍຝຶກທັງຮ່າງກາຍ ແລະ ຈິດໃຈໃຫ້ເຂັ້ມແຂງ ແລະ ມີຄວາມສຸກກັບສິ່ງອ້ອມໂຕ.
  7. ບໍ່ສ່ຽງຕໍ່ການເປັນຄວາມດັນສູງ ເພາະໂຢຄະເນັ້ນເລື່ອງການຫາຍໃຈ ຈຶ່ງສາມາດຄວບຄຸມການເອົາອົກຊີແຊນເຂົ້າສູ່ຮ່າງກາຍໄດ້ຢ່າງເປັນລະບົບ.
  8. ມີສະມາທິ, ​ຈິດໃຈສະຫງົບ, ບໍ່ຄິດຫລາຍ ທ່ານຈຶ່ງສາມາດເຮັດວຽກໄດ້ຢ່າງມີປະສິດທິພາບ.
  9. ໂຢຄະບາງທ່າສາມາດປິ່ນປົວອາການບາງຢ່າງໄດ້ ຖ້າເຮັດຢ່າງສະໝໍ່າສະເໝີ ແລະ ຖືກວິທີ ເຊັ່ນ : ອາການເສື່ອມສະມັດຕະພາບທາງເພດ, ການປວດທ້ອງນ້ອຍປະຈຳເດືອນ, ຫລຸດຜ່ອນອາການເຈັບຫົວ, ກະຕຸ້ນການເຮັດວຽກຂອງຕັບໃນຄົນປ່ວຍ ເປັນຕົ້ນ.

error: Alert: Content is protected !!