ບາງທັດສະນະຂອງຜູ້ເຮັດວຽກງານສື່ຕໍ່ວັນສ້າງຕັ້ງຕົນເອງຄົບຮອບ 70 ປີ

ເນື່ອງ​ໃນ​ໂອ​ກາດວັນ​ສື່ມວນ​ຊົນ​ ແລະ ​​ການພິມ​ຈຳ​ໜ່າຍ ​ຄົບ​ ຮອ​ບ 70 ປີ (13/8/1950-13/8/2020), ນັກຂ່າວ ໜັງສືພິມ ລາວພັດທະນາ ພວກເຮົາໄດ້ສຳພາດຫົວໜ້າບັນນາທິການ ໜັງສືພິມ ປ້ອງກັນຄວາມສະຫງົບ, ກ່ຽວກັບມູນເຊື້ອ ແລະ ຜົນງານຕ່າງໆທີ່ໜັງສືພິມຂອງຕົນຍາດມາໄດ້ໃນການໂຄສະນາປຸກລະດົມກຳລັງປ້ອງກັນຄວາມສະຫງົບປະກອບສ່ວນເຂົ້າໃນວຽກງານປົກປັກຮັກສາ ແລະ ສ້າງສາປະເທດຊາດຂອງພວກເຮົາວ່າ:

ບົດບາດຂອງສື່ກຳລັງ ປ້ອງກັນຄວາມສະຫງົບແມ່ນໄດ້ສຸມໃສ່ເຜີຍແຜ່ແນວທາງນະໂຍບາຍພັກ-ລັດຜ່ານສື່ຕ່າງໆຂອງຕົນລົງສູ່ຖັນແຖວກຳລັງປະກອບອາວຸດໃຫ້ກວ້າງຂວາງ ແລະ ທົ່ວເຖິງ, ໂດຍສະເພາະແມ່ນໂຄສະນາເຜີຍແຜ່ຂໍ້ມູນຜົນສຳເລັດກ່ຽວກັບການພັດທະນາເສດຖະກິດ-ສັງຄົມຂອງປະເທດ. ໃນນີ້ກໍປະກອບມີວຽກງານປ້ອງກັນຄວາມສະຫງົບ, ຄອບຄົວຕົວແບບ, ວຽກດີຄົນເດັ່ນ ແລະ ອື່ນໆ. ເນື່ອງໃນໂອກາດວັນທີ່ມີຄວາມໝາຍສຳຄັນນີ້ທ່ານໄດ້ໃຫ້ທັດສະນະຕໍ່ສື່ວ່າ: “ຈົ່ງພ້ອມກັນເອົາໃຈໃສ່ເຮັດວຽກງານຂອງຕົນໃຫ້ຮັບປະກັນ, ວ່ອງໄວ, ຖືກຕ້ອງຊັດເຈນ ແລະ ລົງເຖິງປະຊາຊົນ”.

ທ່ານ ນາງ ມິ່ງແກ້ວ ຈັນທະວົງສີ ຕາງໜ້າສື່ໂທລະພາບແຫ່ງຊາດລາວ ໃຫ້ຮູ້ວ່າ: ໂທລະພາບແຫ່ງຊາດລາວ ເປັນສື່ໜຶ່ງທີ່ເປັນກະບອກສຽງສຳຄັນໃນການຮັບໃຊ້ ແລະ ເຜີຍແຜ່ແນວທາງນະໂຍບາຍຂອງພັກ-ລັດ, ລົງສູ່ສັງຄົມໄດ້ຮັບຮູ້ແລ້ວ ຍັງໄດ້ນຳເອົາແນວຄິດຈິດໃຈຂອງປະຊາຊົນມານຳສະເໜີ ຫລື ແຈ້ງຕໍ່ຂັ້ນເທິງເພື່ອເຫັນໄດ້ອັນດີອັນອ່ອນ ແລະ ພ້ອມກັນປັບປຸງແກ້ໄຂ, ໝາຍວ່າເປັນຂົວຕໍ່ລະຫວ່າງພັກ-ລັດ ແລະ ປະຊາຊົນອີກດ້ວຍ.

ທ່ານ ແກ້ວອຸດອນ ພົມມະສານ ຫົວໜ້າບັນນາທິການ ຂ່າວເວັບໄຊແຂວງບໍລິຄຳໄຊ ໃຫ້ຮູ້ວ່າ: ວຽກງານສື່ມວນຊົນແຂວງ ແມ່ນມີຄວາມສຳຄັນຍິ່ງ ໃນການນຳເອົາແນວທາງນະໂຍບາຍມະຕິຕໍ່ຄຳສັ່ງຂອງພັກ ແລະ ລະບຽບກົດໝາຍຂອງລັດລົງສູ່ປະຊາຊົນໃຫ້ເຂົ້າໃຈ ແລະ ເຊື່ອມຊຶມ ເພື່ອພ້ອມກັນຜັນຂະຫຍາຍຈັດຕັ້ງປະຕິບັດໃຫ້ມີປະສິດທິຜົນ, ເຊິ່ງເປັນທ່າແຮງໜຶ່ງກະຕຸກຊຸກຍູ້ການພັດທະນາທ້ອງຖິ່ນເຕີບໃຫຍ່ຂະຫຍາຍຕົວ.

 

  • 1093 Posts
  • 0 Comments
iLike/LPN/20
error: Alert: Content is protected !!