ກະຊວງການຕ່າງປະເທດຈັດພິທີເອົາທຸງຊາດລາວ ແລະ ທຸງອາຊຽນຂຶ້ນສູ່ຍອດເສົາສະຫລອງວັນສ້າງຕັ້ງອາຊຽນ ຄົບຮອບ 53 ປີ

ເຊົ້າວັນທີ 4 ສິງຫານີ້ ທີ່ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ ລັດຖະມົນຕີຕ່າງປະເທດ ໄດ້ເປັນປະທານໃນພິທີເອົາທຸງຊາດລາວ ແລະ ທຸງອາຊຽນຂຶ້ນສູ່ຍອດເສົາ ເນື່ອງໃນໂອກາດສະເຫຼີມສະຫຼອງວັນຄົບຮອບ 53 ປີ ແຫ່ງການສ້າງຕັ້ງອາຊຽນ (8 ສິງຫາ 1967 – 8 ສິງຫາ 2020) ແລະ ວັນຄົບຮອບ 23 ປີ ທີ່ ສປປ ລາວ ເຂົ້າເປັນສະມາຊິກອາຊຽນ (23 ກໍລະກົດ 1997 – 23 ກໍລະກົດ 2020) ​ໂດຍ​ການເຂົ້າຮ່ວມຂອງບັນດາລັດຖະມົນຕີທັງສາມເສົາຄໍ້າປະຊາຄົມອາຊຽນ ​ແລະ ເອກອັກຄະລັດຖະທູດປະເທດສະມາຊິກອາຊຽນ ປະຈຳ ສປປ ລາວ ​ເຂົ້າຮ່ວມ​ນຳ​ດ້ວຍ.

ໃນພິທີ, ທ່ານລັດຖະມົນຕີ ສະເຫຼີມໄຊ ກົມມະສິດ ໄດ້ຢໍ້າເຖິງຜົນສຳເລັດຂອງອາຊຽນໃນໄລຍະ 53 ປີຜ່ານມາ ອັນໄດ້ປະກອບສ່ວນສຳຄັນ ເຂົ້າໃນການສ້າງສັນຕິພາບ, ສະຖຽນລະພາບ ແລະ ຄວາມວັດທະນາຖາວອນ ໃນພາກພື້ນ ແລະ ໃນໂລກ. ໄດ້ສືບຕໍ່ຮັດແໜ້ນການພົວພັນຮ່ວມມືລະຫວ່າງປະເທດສະມາຊິກອາຊຽນດ້ວຍກັນ ກໍຄືກັບປະເທດຄູ່ຮ່ວມເຈລະຈາ ແລະ ຄູ່ຮ່ວມມືພາຍນອກອາຊຽນ ບົນພື້ນຖານຫຼັກການທີ່ກຳນົດໄວ້ໃນກົດບັດອາຊຽນ, ສົນທິສັນຍາໄມຕີຈິດ ແລະ ການຮ່ວມມື (TAC) ແລະ ບົນຫຼັກການແຫ່ງການຢູ່ຮ່ວມກັນໂດຍສັນຕິ; ເຄົາລົບເອກະລາດ, ອະທິປະໄຕ, ຜືນແຜ່ນດິນອັນຄົບຖ້ວນ, ການບໍ່ແຊກແຊງເຂົ້າໃນວຽກງານພາຍໃນຂອງກັນ ແລະ ກັນ; ແກ້ໄຂບັນຫາໂດຍສັນຕິວິທີ, ຫຼັກການຄວາມເປັນເອກະສັນ, ຕ່າງຝ່າຍຕ່າງມີຜົນປະໂຫຍດ ແລະ ອີງໃສ່ຄວາມຫຼາກຫຼາຍຂອງປະເທດສະມາຊິກ ທີ່ເອີ້ນວ່າ “ວິຖີທາງຂອງອາຊຽນ” (ASEAN Way).

ພ້ອມນີ້, ທ່ານລັດຖະມົນຕີຍັງໄດ້ແຈ້ງຜົນສໍາເລັດຂອງກອງປະຊຸມສຸດຍອດອາຊຽນ ຄັ້ງທີ 36 ແລະ ກອງປະຊຸມກ່ຽວຂ້ອງຜ່ານມາ ພາຍໃຕ້ການເປັນປະທານຂອງ ສສ ຫວຽດນາມ (ແບບທາງໄກ) ຊຶ່ງເຫັນວ່າໃນໄລຍະເກືອບໜຶ່ງປີຜ່ານມາ, ເຖິງແມ່ນວ່າສະພາບການພາກພື້ນ ແລະ ສາກົນ ກຳລັງຜະເຊີນກັບໄພພິບັດທຳມະຊາດ ກໍຄືການແຜ່ລະບາດຂອງພະຍາດໂຄວິດ-19 ອັນເປັນໄພຂົ່ມຂູ່ ແລະ ສົ່ງຜົນກະທົບໜັກໜ່ວງຕໍ່ສຸຂະພາບ, ການພັດທະນາເສດຖະກິດ-ສັງຄົມ, ສະຖຽນລະພາບ ແລະ ຄວາມໝັ້ນຄົງຂອງພາກພື້ນ ແລະ ຂອງໂລກ, ແຕ່ສະມາຊິກອາຊຽນ ແລະ ປະເທດຄູ່ຮ່ວມ ກໍຍັງສືບຕໍ່ມີຄວາມສາມັກຄີ ແລະ ສາມາດຈັດຕັ້ງປະຕິບັດບັນດາຂໍ້ລິເລີ່ມ, ມາດຕະການ ແລະ ແຜນງານ/ໂຄງການຮ່ວມມືໃນ 3 ເສົາຄ້ຳປະຊາຄົມອາຊຽນ ໄດ້ຮັບຜົນສຳເລັດເປັນກ້າວໆມາ: ໄດ້ສ້າງຕັ້ງກອງທຶນອາຊຽນ ເພື່ອຮັບມືກັບການແຜ່ລະບາດຂອງພະຍາດ ໂຄວິດ-19; ສ້າງຕັ້ງຄັງແຮອຸປະກອນການແພດສຸກເສີນອາຊຽນ; ແລະ ການຮ່າງແຜນພື້ນຟູເສດຖະກິດຮອບດ້ານ ຫຼັງໂຄວິດ-19 ສິ້ນສຸດ.

ພ້ອມນີ້, ທ່ານລັດຖະມົນຕີ ສະເຫຼີມໄຊ ຍັງໄດ້ເນັ້ນວ່າ: ຕະຫລອດໄລຍະ 23 ປີ ທີ່ ສປປລາວ ໄດ້ເຂົ້າເປັນສະມາຊິກອາຊຽນ, ສປປ ລາວ ໄດ້ເຂົ້າຮ່ວມຢ່າງຕັ້ງໜ້າ ແລະ ເປັນເຈົ້າການສູງໃນຂະບວນການລວມຂອງອາຊຽນ ອັນໄດ້ເຮັດໃຫ້ບົດບາດ ຂອງ ສປປ ລາວ ໃນພາກພື້ນ ແລະ ສາກົນ ນັບມື້ພົ້ນເດັ່ນຂຶ້ນ. ສະເພາະຂົງເຂດເສດຖະກິດ, ເຂດການຄ້າເສລີ ແລະ ການລົງທຶນ ອາຊຽນ ແລະ ອາຊຽນ ກັບ ບັນດາປະເທດຄູ່ເຈລະຈາ ກໍໄດ້ປະກອບສ່ວນອັນສຳຄັນໃນການເຮັດການຄ້າ ແລະ ການລົງທຶນຢູ່ປະເທດເຮົາຂະຫຍາຍຕົວໃນຈັງຫວະສູງຂຶ້ນຢ່າງຕໍ່ເນື່ອງ.

ສຸດທ້າຍ, ທ່ານລັດຖະມົນຕີ ໄດ້ຢືນຢັນເຖິງຄວາມໝາຍໝັ້ນ ຂອງ ສປປ ລາວ ທີ່ຈະສືບຕໍ່ເຂົ້າຮ່ວມໃນຂະບວນການລວມຂອງອາຊຽນຢ່າງສະເໝີຕົ້ນສະເໝີປາຍ ເພື່ອສາມາດບັນລຸໄດ້ການສ້າງປະຊາຄົມອາຊຽນ ໃນປີ 2025 ແລະ ໄດ້ສະແດງຄວາມຂອບໃຈຕໍ່ການຊ່ວຍເຫຼືອ, ສະໜັບສະໜູນ ແລະ ຮ່ວມມືຂອງບັນດາປະເທດສະມາຊິກອາຊຽນ ແລະ ປະເທດຄູ່ເຈລະຈາກໍ່ຄືຄູ່ຮ່ວມມືພາຍນອກອາຊຽນ ທີ່ໄດ້ເຮັດໃຫ້ ສປປ ລາວ ສາມາດປະຕິບັດຄວາມໝາຍໝັ້ນຂອງຕົນໃນຖານະປະເທດສະມາຊິກຕະຫຼອດໄລຍະ 2 ທົດສະວັດຜ່ານມາໄດ້ຢ່າງເຕັມສ່ວນ, ມີປະສິດທິພາບສູງ ແລະ ນໍາເອົາຜົນປະໂຫຍດສູງສຸດມາສູ່ ສປປ ລາວ.

error: Alert: Content is protected !!