ຜີສາດແດງແຊງຊະນະ ລາສ ລິນຊ໌ 2-1 ທະລຸເຂົ້າຮອບ 8 ທີມສຸດທ້າຍ ຢູໂຣປ້າລີກ

ການແຂ່ງຂັນເຕະບານ ຢູໂຣປ້າລີກ ລະດູການ 2019-20 ຮອບ 16 ທີມສຸດທ້າຍ ນັດທີ 2 ເມື່ອຄືນທີ່ຜ່ານມາ (5 ສິງຫາ 2020) ແມນເຊັດເຕີ ຢູໄນເຕັດ ເປີດບ້ານແຊງຊະນະ ລາສ ລິນຊ໌ ທີມອັນດັບສອງລີກສູງສຸດອັອສເຕຣຍ (ໂອຕຣິດ) 2-1 ເກມການແຂ່ງຂັນກັບເປັນທີມຢາມນຳກ່ອນຈາກ ຟີລິບ ວີຊິງເກີ້ ນາທີ 55′

ແຕ່ແມນຢູຍິງແຊງສອງປະຕູຈາກ ເຈັສຊີ້ ລິນກ໊າດ ນາທີ 57′ ແລະ ອ໋ອງໂທນີ້ ມາຊີຢາວ ຕົວສຳຮອງ ນາທີ 88′ ລວມຜົນສອງນັດ ແມນຢູ ຊະນະ 7-1 ຜ່ານເຂົ້າຮອບ 8 ທີມສຸດທ້າຍ ໄປພົບກັບ ໂຄເປັນຣາເກັນ ທີມແຊ້ມລີກດານມາກ ທີ່ເອົາຊະນະ ອິສຕັນບູລ ເບຊັກຊີເຮຍ ຈາກຕວກກີ້ ໃນນັດທີສອງ 3-0 ລວມຜົນສອງນັດຊະນະ 3-1.

#ສະຖິຕິທີ່ໜ້າສົນໃຈຫລັງເກມ ແມນຢູ ຊະນະ ລາສ ລິນຊ໌ 2-1

+ ເຈັສຊີ້ ລິນກ໊າດ ຍິງສອງນັດຕິດຕໍ່ກັນໃຫ້ແມນຢູຄັ້ງທຳອິດນັບຕັ້ງແຕ່ເດືອນທັນວາ ປີ 2018.

+ ແມນຢູ ບໍ່ເສຍໃຫ້ທີມຈາກໂອຕຣິດ 10 ນັດເມື່ອພົບກັນໃນບານເອີຣົບ.

+ ແມນຢູ ໃຊ້ນັກເຕະໝູນວຽນລົງສະໜາມໃນຢູໂຣປ້າລີກລະດູການນີ້ ລວມ 38 ຄົນ ຫລາຍສຸດໃນປະຫວັດສາດຂອງລາຍການນີ້ ຕໍ່ໜຶ່ງລະດູການ.

ຮອບ 8 ທີມ ແມນຢູ ພົບ ໂຄເປັນຣາເກັນ ຈະແຂ່ງຂັນຢູ່ສະໜາມກາງ RheinEnergieStadion ໃນເມືອງໂຄໂລນ ປະເທດເຢຍລະມັນ ຄືນວັນທີ 10 ສິງຫານີ້ ເວລາ 02:00.

ໄຮໄລ້ການແຂ່ງຂັນ ແມນຢູ 2-1 ລາສ ລິນຊ໌

https://youtu.be/Qrm4FwUWIsA