ເກີດເຫດລະເບີດໃຫ່ຍຢູ່ໜ້າເຮືອນແຄມທາງ ໃນຮ່າໂນ້ຍ

ສຳນັກຂ່າວ congan ຫວຽດນາມ, ວັນທີ 10 ສິງຫານີ້ໃຫ້ຮູ້ວ່າ: ເກີດເຫດລະເບີດໃຫ່ຍໃນນະຄອນຫຼວງຮ່າໂນ້ຍ ເຮັດໃຫ້ອາຄານ 4 ຊັ້ນໄດ້ຮັບຄວາມເສຍຫາຍ, ງ່າໄມ້ຫັກທັບລົດທີ່ກຳລັງແລ່ນຢູ່ໃນຖະໜົນ, ຜູ້ຂັບລົດລອດຕາຍແບບວຸດວິດ.

ລາຍງານຂ່າວເບື້ອງຕົ້ນໃຫ້ຮູ້ວ່າ: ເວລາ 9:10 ນາທີ ຂອງວັນທີ 10 ສິງຫານີ້, ໄດ້ເກີດເຫດລະເບີດໃຫ່ຍຢູ່ທີ່ເຮືອນເລກທີ 531 ຖະໜົນ ກີມມາ, ຄຸ້ມຫງອກແຄງ ນະຄອນຮ່າໂນ້ຍ.

ໃນຂະນະນັ້ນມີຜູ້ຄົນສັນຈອນໄປມາຢ່າງຫຼວງຫຼາຍ, ແຮງລະເບີດໄດ້ເຮັດໃຫ້ເຮືອນຫຼັງທີ່ເກີດລະເບີດນັ້ນຖືກພັງທະລາຍ, ເຮັດໃຫ້ງ່າໄມ້ຫັກລົງທັບຖະໜົນ, ລົດລາງພາຫະນະທີ່ສັນຈອນໄປມາໃນທ້ອງຖະໜົນ, ປະຕູແກ້ວຂອງເຮືອນຖືກປິວອອກໄປທັບໃສ່ລົດທີ່ກຳລັງແລ່ນຢູ່ກາງທາງ, ຄົນຂັບລົດລອດຕາຍແບບວຸດວິດ.

ການລະເບີດຄັ້ງນີ້ໄດ້ເຮັດໃຫ້ 2 ຄົນທີ່ຢູ່ໃນເຮືອນຫຼັງດັ່ງກ່າວຖືກໄຟລວບໄໝ້ ແລະ ໄດ້ຮັບການສົ່ງໂຮງໝໍທັນທີ ແລະ ເຮັດໃຫ້ເສັ້ນທາງຖືກຕິດຂັດຢ່າງໜັກເປັນຫຼາຍຊົ່ວໂມງກ່ອນທີ່ຈະລະບາຍໄດ້.

ໃນເບື້ອງຕົ້ນເຈົ້າໜ້າທີ່ຄາດວ່າເຫດລະເບີດອາດເກີດມາຈາກບັ້ງແກ໊ດແຕກ. ເຈົ້າຂອງຂ້າງບ້ານ ຜູ້ເຫັນເຫດການເລົ່າວ່າ:ຕາມທຳມະດາແລ້ວເຮືອນຫຼັງນັ້ນຂາຍເຂົ້າໜຽວສຸກ ແລະ ຂາຍນໍ້າຊາຢູ່ຕາມແຄມທາງຄົນຍ່າງ, ຈຶ່ງມີຜູ້ຄົນເຂົ້າມາໃຊ້ບໍລິການຫຼາຍ. ແຕ່ໄລຍະນີ້ຍ້ອນພະຍາດໂຄວິດ-19 ລະບາດໜັກ, ຄົນສ່ວນຫຼາຍແມ່ນມາຊື້ເອົາໄປກິນຢູ່ເຮືອນ, ຖ້າບໍ່ດັ່ງນັ້ນຈະມີຜູ້ຮັບເຄາະຫຼາຍກວ່ານີ້.

ສະຫຼຸບຄວາມແລ້ວ, ບໍ່ມີຜູ້ເສຍຊີວິດຈາກເຫດລະເບີດຄັ້ງນີ້. ສ່ວນສາເຫດຂອງການເກີດເຫດລະເບີດເຈົ້າໜ້າທີ່ຍັງສືບສວນສອບສວນຢູ່.

ຂ່າວ: ລູກເມືອງພວນ.

error: Alert: Content is protected !!