ເສດຖີລຶກລັກສັ່ງຜະລິດ “ຜ້າປິດປາກແພງທີ່ສຸດໃນໂລກ” ລາຄາ 1,5 ລ້ານໂດລາສະຫະລັດ

ບໍລິສັດ​ເຄື່ອງ​ປະດັບ​ອິດສະ​ລາ​ແອນໄດ້ຮັບຄຳສັ່ງຊື້ໃຫ້ຜະລິດ “ຜ້າປິດປາກ-ດັງປ້ອງກັນໄວຣັສໂຄວິດ-19 ແພງທີ່ສຸດໃນໂລກ” ໂດຍຈະເປັນຜ້າປິດປາກຄຳທີ່ຝັງດ້ວຍເພັດ.

​Yvel ບໍລິສັດ​ເຄື່ອງ​ປະດັບ​ອິດສະ​ລາ​ແອນ​ກຳລັງ​ດຳ​ເນີນ​ການ​ຜະລິດ “ຜ້າ​ປິດ​ປາກປ້ອງ​ກັນ​ໄວຣັສ​ໂຄ​ວິດ-19 ​ແພງ​ທີ່​ສຸດ​ໃນ​ໂລກ” ​ໂດຍ​ຈະ​ເປັນ​ຜ້າ​ປິດ​ປາກຄຳ​ທີ່​ຝັງ​ດ້ວຍ​ເພັດ ລາຄາ 1,5 ລ້ານ​ໂດ​ລາ​ສະຫະລັດ.

Isaac Levy ນັກ​ອອກ​ແບບ​ເຄື່ອງ​ປະດັບ ກ່າວ​ວ່າ: ຜ້າ​ປິດ​ປາກ​ດັ່ງ​ກ່າວ​ຈະ​ເປັນ​ຜ້າ​ປິດ​ປາກ N99 ​ເຊິ່ງມີ​ປະສິດທິພາບ​ສູງ​ກວ່າ N95 ຜະລິດ​ຈາກ​ຄຳ​ຂາວ 18 ກະຣັດ ​ແລະ ປະດັບ​ດ້ວຍ​ເພັດ​ສີຂາວ ​ແລະ ດຳ 3.600 ​ເມັດ ຕາມ​ຄຳ​ຮ້ອງ​ຂໍ​ຂອງ​ຜູ້​ສັ່ງ​ຊື້.

Levy ກ່າວ​ວ່າ: ຜູ້​ຊື້ມີ​ຄວາມ​ຕ້ອງການ​ອີກ 2 ປະການ​ຄື: ຜ້າ​ປິດ​ປາກ​ນີ້​ຕ້ອງ​ສຳ​ເລັດ​ພາຍ​ໃນ​ປີ​ນີ້ ​ແລະ ອີກ​ປະການ​ໜຶ່ງ ຈະ​ຕ້ອງ​ເປັນ​ຜ້າ​ປິດ​ປາກ​ປ້ອງ​ກັນ​ໂຄ​ວິດ-19 ທີ່​ມີ​ລາຄາ​ແພງ​ທີ່​ສຸດ​ໃນ​ໂລກ ​ໂດຍ​ເງື່ອນ​ໄຂ​ສຸດ​ທ້າຍ​ນັ້ນ Levy ກ່າວ​ວ່າ: “​ເປັນ​ເລື່ອງ​ງ່າຍ​ທີ່​ສຸດ”.

Levy ປະຕິ​ເສດ​ຈະ​ລະບຸຜູ້​ຊື້ວ່າ​ເປັນ​ໃຜ ​ແຕ່​ເບື້ອງຕົ້ນ​ເປີດ​ເຜີຍ​ວ່າ: ​ເປັນ​ນັກທຸລະກິດ​ຊາວ​ຈີນ​ທີ່​ອາ​ໄສ​ຢູ່​ອາ​ເມ​ລິ​ກາ.

​ເຖິງ​ຢ່າງ​ໃດ​ກໍ​ຕາມ, ຈາກ​ນ້ຳໜັກ 270 ກຣາມ ​ເຊິ່ງໜັກ​ກວ່າ​ຜ້າ​ປິດ​ປາກ​ທົ່ວ​ໄປ​ເກືອບ 100 ​ເທົ່າ ​ເຮັດ​ໃຫ້ Levy ຄາດ​ວ່າ: ຜູ້​ຊື້ອາດ​ຈະ​ບໍ່​ເອົາ​ໄປ​ໃຊ້​ເປັນ​ເຄື່ອງ​ປະດັບ​ທີ່​ໃສ່​ໄດ້​ແທ້.

error: Alert: Content is protected !!