ເຈົ້າແຂວງສະຫວັນນະເຂດເນັ້ນບໍລິສັດຜູ້ຮັບເໝົາ ກໍ່ສ້າງຊົນລະປະທານເມືອງໄຊພູທອງໃສ່ໃຈຄຸນນະພາບ

​ໂຄງການ​ປັບປຸງ-ຍົກ​ລະດັບ​ລະບົບ​ຊົນລະປະທານ​ຄັນທະ​ຈານ ​ເມືອງ​ໄຊ​ພູ​ທອງ ​ແຂວງ​ສະຫວັນ​ນະ​ເຂດ ​ເຊິ່ງ​ເປັນ​ໜຶ່ງ​ໃນ​ໂຄງການ​ຍ່ອຍ​ຂອງ​ການ​ພັດທະນາ​ໂຄງ​ລ່າງ​ພື້ນຖານ​ກະສິກຳ​ຕາມ​ແລວ​ເສດຖະກິດ​ຕາ​ເວັນ​ອອກ-ຕາ​ເວັນ​ຕົກ (​ໂຄງການ ພຄກ) ​ເຊິ່ງ​ແມ່ນ​ບໍລິສັດ ຈະ​ເລີ​ນ​ໄຊ ກໍ່ສ້າງ-ສ້​ອມ​ແປງ​ຊົນລະປະທານ​ ​ເປັນ​ຜູ້​ຮັບ​ເໝົາ​ກໍ່ສ້າງ ​ແລະ ສ້ອມ​ແປງ ​ເຊິ່ງ​ໄດ້​ເລີ່​ມລົງມື​ກໍ່ສ້າງແຕ່​ກາງ​ເດືອນ​ພະຈິກ 2019 ​ເປັນຕົ້ນມາ ​ແລະ ມາ​ຮອດ​ປັດຈຸບັນ​ແມ່ນ​ສຳ​ເລັດ​ໄປ​ແລ້ວ​ເກືອບ 50%.

ໃນ​ໂອກາດ​ທ່ານ​ເຈົ້າ​ແຂວງ​ສະຫວັນ​ນະ​ເຂດ ທ່ານ ສັນຕິພາບ ພົມວິຫານ ລົງ​ຕິດຕາມ​ເບິ່ງ​ໂຄງການ​ກໍ່ສ້າງ​ຊົນລະປະທານ​ຄັນທະ​ຈານ ​ເມື​ອງ​ໄຊ​ພູ​ທອງ ສະໜອງ​ນ້ຳ​ໃຫ້​ແກ່​ເນື້ອທີ່​ການ​ຜະລິດ​ກະສິກຳ​ຂອງ​ປະຊາຊົນ​ເມືອງ​ດັ່ງກ່າວ ​ເຊິ່ງ​ໄດ້​ຮັບ​ລາຍ​ງານ​ຈາກບໍລິສັດ​ຜູ້​ຮັບ​ເໝົາ​ວ່າ: ມາ​ຮອດ​ປັດຈຸບັນ​ສຳ​ເລັດ​ແລ້​ວປະມານ 50% ພາຍຫລັງ​ດຳ​ເນີນ​ມາ​ແຕ່​ເດືອນ​ພະຈິກ 2019 ຜ່ານ​ມາ ​ໃນ​ມູນ​ຄ່າ​ເກືອບ 2 ລ້ານ​ໂດ​ລາ​ສະຫະລັດ ປະກອບ​ມີ​ວຽກ​ກໍ່ສ້າງ ​ແລະ ຕິດຕັ້ງຈັກສູບນ້ຳ 2 ​ເຄື່ອງ, ວຽກ​ກໍ່ສ້າງ​ທໍ່​ສົ່ງ​ນ້ຳ, ອ່າງ​ຜ່ອນ​ນ້ຳ​ໃນ​ຫົວ​ງານ​ທີ 1 ​ໃຫ້​ສາມາ​ສະໜອງ​ນ້ຳ​ໃສ່​ເນື້ອທີ່ການ​ຜະລິດ​ນາ​ແຊງ​ໄດ້ 351 ​ເຮັກຕາ, ຫົວ​ງານ​ທີ 2 ​ແມ່ນ​ຢູ່​ບ້ານ​ດອນ​ຖ້ຳ​ເງິນ ​ເຊິ່ງມີໜ້າ​ວຽກ​ຄື: ກໍ່ສ້າງ​ເຮືອນ​ຈັກສູບນ້ຳ, ຈັດ​ຊື້ ​ແລະ ຕິດຕັ້ງຈັກສູບນ້ຳ, ກໍ່ສ້າງ​ທໍ່​ສົ່ງ​ນ້ຳ, ອ່າງ​ຜ່ອນ​ເພື່ອ​ໃຫ້​ສະໜອງ​ນ້ຳ​ເຮັດ​ນາ​ແຊງ​ໃຫ້​ໄດ້ 76 ​ເຮັກຕາ. ວຽກ​ລະບົບ​ຄອງ​ເໝືອງ ຈຳນວນ 18 ​ເສັ້ນ ຍາວ 12.610 ​ແມັດ ​ແລະ ທໍ່​ສົ່ງ​ນ້ຳ ຍາວ 920 ​ແມັດ ​ໂດຍ​ທ່ານ​ເຈົ້າ​ແຂວງ​ໄດ້​ເນັ້ນ​ໃຫ້​ບໍລິສັດ​ຜູ້​ຮັບ​ເໝົາ​ເຮັດ​ສຳ​ເລັດ​ຕາມ​ແຜນ ​ແລະ ຮັບປະກັນ​ໃຫ້​ມີ​ຄຸນ​ນະພາ​ບ​ໃນ​ການ​ນຳ​ໃຊ້​ງານ.

error: Alert: Content is protected !!