ສະຫລຸບບັນຫາໜ້າສົນໃຈທົ່ວໂລກວັນທີ 11 ສິງຫາ 2020

  1. Hassan Diab ນາຍົກລັດຖະມົນຕີ​ແຫ່ງ​ປະ​ເທດ​ເລ​ບາ​ນອນ ​ແລະ ຄະນະ​ລັດຖະບານ​ທັງ​ໝົດ​ຂອງ​ທ່ານປະກາດ​ລາ​ອອກ​ທ່າມກາງ​ກຸ່ມ​ຜູ້​ປະ​ທ້ວງ​ທີ່​ໜາ​ແໜ້ນ ​ແລະ ທະວີ​ຄວາມ​ຮຸນ​ແຮງ​ຂຶ້ນ ຫລັງ​ຈາກ​ພວກ​ທ່ານ​ບໍ່​ເອົາ​ໃຈ​ໃສ່​ທີ່​ຈະ​ຮັບຜິດຊອບ​ຕໍ່​ເຫດ​ລະ​ເບີດ ​ເຊິ່ງ​ເກີດ​ຂຶ້ນຢູ່​ເມືອງ​ເບຣຸດ.

ລາຍ​ງານ​ຫລ້າ​ສຸດ​ລະບຸ​ວ່າ: ມີ​ຜູ້​ເສຍ​ຊີວິດ 200 ກວ່າ​ຄົນ ທີ່​ກວດ​ພົບ​ໃນ​ຂະນະ​ນີ້ ​ແລະ ອີກ​ຫລາຍ​ພັນ​ຄົນ​ໄດ້​ກາຍ​ເປັນ​ຄົນ​ບໍ່​ມີ​ເຮືອນ​ຢູ່ ​ເນື່ອງ​ຈາກ​ແຮງ​ລະ​ເບີດ​ໄດ້​ທຳລາຍ​ເຮືອນ​ຂອງ​ພວ​ກ​ເຂົາ​ໄປ​ຈົນ​ໝົດ.

​ເມື່ອ​ມີ​ການຈັດຕັ້ງລັດຖະບານ​ຊຸດ​ໃໝ່ ຄາດ​ວ່າ​ຫລາຍ​ຝ່າຍ​ຈະ​ຕ້ອງ​ຄຳນຶງ​ເຖິງ​ຄວາມ​ຄຽດ​ແຄ້ນ​ຢ່າງ​ສຸດຊຶ້ງຂອງ​ຊາວ​ເລ​ບາ​ນອນ​ທີ່​ມີ​ຕໍ່​ການ​ທຸ​ຈະລິດ ​ແລະ ການ​ບໍລິການ​ແກ້​ໄຂ​ທີ່​ຜິດພາດ​ໃນ​ປະ​ເທດ.

  1. ລາຍ​ງານ​ຜູ້​ຕິດ​ເຊື້ອ COVID-19 ​ເກືອບ​ຮອດ 20 ລ້ານ​ຄົນ​ແລ້ວ​ໃນ​ວັນ​ທີ 10 ສິງຫາ​ຜ່ານ​ມາ ​ໂດຍ​ອາ​ເມ​ລິ​ກາ, ​ເບຣຊິນ ​ແລະ ອິນ​ເດຍລວມກັນ​ມີ​ອັດຕາ​ຜູ້​ຕິດ​ເຊື້ອຫລາຍ​ກວ່າ 50% ຈາກ​ທົ່ວ​ໂລກ. ຂະນະ​ທີ່​ຜູ້​ເສຍ​ຊີວິດ​ທັງ​ໝົດ​ມີ​ຢ່າງ​ໜ້ອຍ 730.000 ຄົນ.

ຄວາມ​ຢ້ານ​ກົວ​ຂອງ​ມັນ​ຄື ​ໄວຣັສຊະນິດ​ນີ້​ໃຊ້​ເວລາ​ພຽງ 6 ​ເດືອນ​ເພື່ອ​ແຜ່​ລະບາດ​ໄປ​ສູ່​ຄົນ 10 ລ້ານ​ຄົນ​ທົ່ວ​ໂລກ ນັບ​ແຕ່​ມີ​ລາຍ​ງານ​ຜູ້​ຕິດ​ເຊື້ອຄົນ​ທຳ​ອິດ​ຢູ່​ເມືອງ​ອູ່​ຮັນ ​ແລະ ສິ່ງ​ທີ່​ໜ້າ​ຕົກ​ໃຈ​ໄປ​ກວ່າ​ນັ້ນ ຄື​ໄວຣັສ​ໄດ້​ໃຊ້​ເວລາ​ພຽງ 43 ວັນ​ຫລັງ​ຈາກ​ນັ້ນ​ໃນ​ການ​ແຜ່​ລະບາດ​ເພີ່ມ​ຂຶ້ນ​ເປັນ 2 ​ເທົ່າ ​ເຊິ່ງ​ເຮັດ​ໃຫ້​ມີ​ຜູ້​ຕິດ​ເຊື້ອ 20 ລ້ານ​ຄົນ​ທົ່ວ​ໂລກ.

  1. McDonald ​ໄດ້​ຟ້ອງ​ຮ້ອງ Steve Easterbrook ອະດີດ CEO ຂອງ​ບໍລິສັດ ​ໂດຍ​ເນື່ອງ​ມາ​ຈາກ​ຄະດີ​ກ່ອນ​ໜ້າ​ນີ້​ທີ່ Easterbrook ຂີ້​ຕົວະ​ຕໍ່​ຄະນະ​ບໍລິຫານ​ກ່ຽວ​ກັບ​ການ​ພົວພັນ​ໃນ​ທາງ​ຊູ້​ສາວ​ກັບ​ພະນັກງານ 3 ຄົນ ​ແລະ ​ໄດ້​ອະນຸມັດ​ເງິນ​ທຶນ​ຂອງ​ບໍລິສັດ​ໃຫ້​ແກ່​ພະນັກງານ​ຄົນ​ໜຶ່ງ​ຂອງ​ບໍລິສັດ​ມູນ​ຄ່າ​ຫລາຍ​ພັນ​ລ້ານ​ໂດ​ລາ.

ບໍລິສັດ​ໄດ້​ຕົກລົງ​ຈະ​ເລີກ​ຈ້າງ Easterbrook ​ໃນ​ເດືອນ​ພະຈິກ​ຜ່ານ​ມາ ​ແລະ ການ​ຟ້ອງ​ຮ້ອງ​ໃນ​ຄັ້ງນີ້ ​ເພື່ອ​ຮຽກ​ຄືນ​ເງິນ​ຈຳນວນ 40 ລ້ານ​ໂດ​ລາ ທີ່​ຕ້ອງ​ຊົດ​ເຊີຍ​ໃຫ້​ແກ່​ລາວ ​ເນື່ອງ​ຈາກ​ຕອນ​ນັ້ນບໍລິສັດ​ໄດ້​ໄລ່​ລາວ​ອອກ​ໂດຍ​ລົງ​ບັນທຶກ​ວ່າ: “ບໍ່​ມີ​ສາ​ເຫດ” ​ເຊິ່ງຕາມ​ກົດໝາຍ​ແລ້ວ​ຕ້ອງ​ຈ່າຍ​ຄ່າ​ຊົດ​ເຊີຍ​ເບື້ອງຕົ້ນ​ໃຫ້​ແກ່​ພະນັກງານ​ທີ່​ຈ້າງ​ອອກ.

  1. Marriott International ​ເຄືອ​ຂ່າຍ​ທຸລະ​ກິດ​ໂຮງ​ແຮມ​ຕ່າງປະ​ເທດ​ໃຫຍ່​ທີ່​ສຸດ​ໃນ​ໂລກ ​ໄດ້​ລາຍ​ງານ​ຜົນ​ຂາດທຶນ​ສູງ​ກວ່າ​ການ​ຄາດ​ຄະ​ເນ​ສຳລັບ​ໄຕ​ມາດ​ທີ 2 ຂອງ​ປີ​ນີ້ ​ໂດຍ​ຂາດທຶນ 234 ລ້ານ​ໂດ​ລາ. ຂະນະ​ທີ່​ໃນ​ໄລຍະ​ເວລາ​ດຽວ​ກັນ​ຂອງ​ປີ 2019 ພວກ​ເຂົາ​ມີ​ຜົນ​ກຳ​ໄລ​ສຸດທິ 232 ລ້ານ​ໂດ​ລາ.

ບໍລິສັດ​ລາຍ​ງານ​ວ່າ ລາຍ​ໄດ້​ຕໍ່​ຈຳນວນ​ຫ້ອງ​ທີ່​ມີ​ຢູ່​ຫລຸດ​ລົງ​ເຖິງ 84% ​ເມື່ອ​ທຽບ​ໃສ່​ແຕ່ລະ​ປີ. ຂະນະ​ທີ່​ປະທານ​ຂອງ​ບໍລິສັດ​ກຳລັງ​​ເບິ່ງ​ວ່າ: Demand ຕ່າງໆ​ເລີ່​ມຟື້ນຕົວ​ຂຶ້ນ ອັດຕາ​ການ​ເຂົ້າພັກ​ເພີ່ມ​ຂຶ້ນ​ໃນ​ແຕ່​ລະອາ​ທິດ​ນັບ​ແຕ່​ກາງ​ເດືອນ​ເມສາ.

​ເຖິງ​ຢ່າງ​ໃດ​ກໍ​ຕາມ, ການ​ຟື້ນຕົວຢ່າງ​ເຕັມ​ສ່ວນ​ຈະ​ຕ້ອງ​ໃຊ້​ເວລາ ​ເພື່ອ​ໃຫ້​ເກີດ​ຄວາມ​ຈະ​ແຈ້ງ.

  1. Royal Caribbean ບໍລິສັດ​​ໃຫ້​ເຊົ່າ​ເຮືອ​ສຳລານ​ສັນຊາດ​ອາ​ເມ​ລິ​ກາ ​ເຊິ່ງຄອງ​ອັດຕາສ່ວນ​ການ​ຕະຫລາດຂອງ​ທຸລະ​ກິດ​​ເຊົ່າ​ເຮືອ​ໂດຍສານ​ທົ່ວ​​ໂລກ 17% ​ໄດ້​ລາຍ​ງານ​ຜົນ​ຂາດທຶນ 1.600 ລ້ານ​ໂດ​ລາ ສຳລັບ​ໄຕ​ມາດ​ທີ 2 ຂອງ​ປີ​ນີ້ ຫລັງ​ຈາກ​ການລະບາດ​ໄດ້​ເຮັດ​ໃຫ້ການ​ເຊົ່າ​ເຮືອຂອງ​ບໍລິສັດ​ຕ້ອງ​ຢຸດ​ສະ​ງັກ ​ໂດຍ​ລາຍ​ໄດ້​ທັງ​ໝົດ​ຫລຸດ​ລົງ 94% ທຽບ​ໃສ່​ໄລຍະ​ດຽວ​ກັນ​ຂອງ​ປີ 2019.

​ເຖິງ​ຢ່າງ​​ໃດ​ກໍ​ຕາມ, ບໍລິສັດ​ກ່າວ​ວ່າ: ຍອດ​ການ​ຈອງ​ເຮືອ​ໃນ​ປີ 2021 ຍັງ​ແຂງ​ແຮງ ​ເຖິງ​ວ່າຄວາມ​ພະຍາຍາມ​ໃນ​ການ​ເປີດ​ປະ​ເທດ​ອີກ​ເທື່ອ​ໜຶ່ງ​ຂອງ​ສະຫະພາບ​ເອີຣົບ ຈະ​ເຄີຍ​ເຮັດ​ໃຫ້​ເກີດ​ການ​ແຜ່​ລະບາດ​ຂອງ COVID-19 ຈຳນວນ​ຫລາຍ​ຢູ່​ເຮືອ​ສຳລານ​ຂອງ​ບໍລິສັດ​ອື່ນ.

  1. ຈີນ​ປະກາດ​ຂວ້ຳບາດ​ເຈົ້າໜ້າ​ທີ່​ຂອງ​ອາ​ເມ​ລິ​ກາ 11 ຄົນ ​ເຊິ່ງປະກອບ​ດ້ວຍ​ສະມາຊິກ​ວຸດ​ທິສະພາ​ຄົນ​ສຳຄັນ​ເຊັ່ນ: Ted Cruz ​ແລະ Marco Rubio ​ເນື່ອງ​ຈາກ​ມາດ​ຕະການ​ທີ່​ຄ້າຍຄື​ກັນ ​ໂດຍ​ຝ່າຍ​ບໍລິຫານ​ຂອງ​ທ່ານ ທຣຳ ​ເຊິ່ງສັ່ງ​ຂວ້ຳບາດ​ເຈົ້າໜ້າ​ທີ່​ຂອງ​ຈີນ 11 ຄົນ ​ໃນ​ຂໍ້​ຫາ​ໃຫ້ການ​ສະໜັບສະໜູນ​ກົດໝາຍ​ຄວາມ​ໝັ້ນຄົງ​ແຫ່ງ​ຊາດສະບັບ​ໃໝ່​ທີ່​ເຂັ້ມງວດ​ພາຍ​ໃນ​ຮົງ​ກົງ.

ຂະນະ​ດຽວ​ກັນ Jimmy Lai ຜູ້​ປະກອບ​ການ​ສື່​ຝ່າຍ​ສະໜັບສະໜູນ​ປະຊາທິປະ​ໄຕ ​ແລະ ຜູ້​ບໍລິ​ຫານ​ຄົນ​ອື່ນໆ ຂອງ​ໜັງສືພິມ Apple Daily ​ເຊິ່ງ Lai ​ເປັນ​ເຈົ້າຂອງ​ຢູ່ ​ໄດ້​ຖືກ​ຈັບ​ກຸມ​ໂດຍ​ຕຳຫລວດ​ຮົງ​ກົງ ​ໃນ​ຂໍ້​ຫາ​ສົມຮູ້​ຮ່ວມ​ຄິດ​ກັບ​ຕ່າງປະ​ເທດ​ເພື່ອ​ຫວັງ​ທຳລາຍຄວາມ​ໝັ້ນຄົງ​ຂອງ​ເມືອງ.

  1. ​ເຮືອບິນ​ຮົບ​ຂອງ​ຈີນ ບິນ​ຜ່ານ​ເສັ້ນ​ແບ່ງ​ລະຫວ່າງ​ຈີນ​ແຜ່ນດິນ​​ໃຫຍ່ ​ແລະ ຊ່ອງ​ແຄບ ​ເຊິ່ງ​ແຍກ​ໄຕ້​ຫວັນ​ອອກ​ຈາກ​ຈີນ ​ແລະ ຖືກ​ກວດ​ຈັບ​ໄດ້​ໂດຍ​ກອງທັບ​ອາກາດ​ຂອງ​ໄຕ້​ຫວັນ ຖື​ເປັນ​ການບິນ​ຂ້າມ​ເສັ້ນຄັ້ງທີ 3 ນັບ​ແຕ່​ປີ 2016.

​ເຫດການ​ຄັ້ງນີ້​ເກີດ​ຂຶ້ນຫລັງ​ຈາກ Alex Azar ລັດຖະມົນຕີ​ດ້ານ​ສາທາລະນະ​ສຸກ​ຂອງ​ອາ​ເມ​ລິ​ກາ ​ໄດ້​ເດີນທາງ​ໄປ​ຢ້ຽມຢາມ​ໄຕ້​ຫວັນ ​ໂດຍ​ທ່ານ​ເປັນ​ເຈົ້າໜ້າ​ທີ່​ລະດັບ​ສູງ​ຄົນ​ທຳ​ອິດ​ທີ່​ເດີນທາງ​ໄປ​​ເກາະ​ແຫ່ງ​ນັ້ນ ນັບ​ແຕ່​ອາ​ເມ​ລິ​ກາຍ​ອມຮັບ​ສະຖານະ​ການ​ປົກຄອງ​ຕົນ​ເອງ​ຂອງ​ໄຕ້​ຫວັນ​ເມື່ອ​ປີ 1979.

error: Alert: Content is protected !!