ນາວາສັກສິດ ຄອງແຊ໋ມເຮືອຍາວ 55 ສີພາຍ 3 ປີຊ້ອນ ທີ່ບຶງສາລະຄຳ

ທັບສີພາຍເຮືອ ສະໂມສອນ ນາວາສັກສິດ ຍັງຄົງຄອງຄວາມຍິ່ງໃຫຍ່ ໃນວົງການແຂ່ງຂັນຊ່ວງເຮືອຍາວ ສາມາດຄວ້າແຊ໋ມການແຂ່ງຂັນຊ່ວງເຮືອຍາວ ປະເພດ 55 ສີພາຍ ທີ່ບຶງສາລະຄຳ ເມືອງຫາດຊາຍຟອງ ນະຄອນຫຼວງວຽງຈັນ ໄປຄອງ 3 ປີຊ້ອນ ພ້ອມເງິນລາງວັນ 10 ລ້ານກີບ ຂະນະທີ່ ແຊ໋ມເຮືອກິລາ 12 ສີພາຍ ຕົກເປັນຂອງ ເຮືອອົງສາຟາມ ຈາກເມືອງວັງວຽງ ແຂວງວຽງຈັນ.

ການແຂ່ງຂັນຊ່ວງເຮືອ ທີ່ບຶງສາລະຄຳ ເມືອງຫາດຊາຍຟອງ ນະຄອນຫຼວງວຽງຈັນ ປະຈຳປີ 2020 ຈັດຂຶ້ນໃນລະຫວ່າງວັນທີ 8-9 ສິງຫານີ້, ໂດຍໃຫ້ກຽດມອບລາງວັນຂອງທ່ານ ບຸນເພັງ ສີນະວົງພອນ ເຈົ້າເມືອງຫາດຊາຍຟອງ, ທ່ານ ຖາວອນ ສີຫາມາຍາ ຮອງເຈົ້າເມືອງຫາດຊາຍຟອງ ແລະ ທ່ານ ສົມພອນ ສອນດາລາ ຫົວໜ້າພະແນກສຶກສາສາທິການ ແລະ ກິລາ ນະຄອນຫລວງວຽງຈັນ, ມີຄະນະນຳ, ຄູຝຶກ, ສີພາຍເຮືອແຕ່ລະພາກສ່ວນ ພ້ອມດ້ວຍພໍ່ແມ່ປະຊາຊົນຊາວເມືອງຫາດຊາຍຟອງ ກໍຄື ຊາວນະຄອນຫຼວງວຽງຈັນ ເຂົ້າຮ່ວມຊົມ ແລະ ເຊຍຢ່າງຫຼວງຫຼາຍ.

ການແຂ່ງຂັນຊ່ວງເຮືອ 2 ປະເພດໃນຄັ້ງນີ້ ໂດຍສະເພາະເຮືອຍາວ ປະເພດ 55 ສີພາຍ ມີເຮືອເຂົ້າຮ່ວມຊີງໄຊ 8 ພາກສ່ວນ ແບ່ງອອກເປັນ 2 ກຸ່ມ ແຕ່ລະກຸ່ມແຂ່ງຂັນພົບກັນໝົດຄັດເອົາທີ 1-2 ຜ່ານເຂົ້າຮອບຕໍ່ໄປ ປະກອບມີ: ກຸ່ມ ເອ ທິດາສາຍແວວ 2, ນາວາສັກສິດ 1 (ແຊ໋ມເກົ່າ), ໜຸ່ມສາລະວັນ ແລະ ນາວາສັກສິດ 2.  ສ່ວນກຸ່ມ ບີ ພອນພະແກ້ວ, ສາລະວັນ (ເຈົ້າແມ່ມັງກອນ), ທິດາສາຍແວວ 1 ແລະ ຟາມກາບຊ້ອນ.

ຂະນະທີ່ເຮືອກິລາ ປະເພດ 12 ສີພາຍ ມີເຮືອເຂົ້າຮ່ວມ 18 ລຳ ແບ່ງອອກເປັນ 8 ກຸ່ມ ແຕ່ລະກຸ່ມແຂ່ງຂັນພົບກັນໝົດຄັດເອົາທີ 1-2 ແຕ່ລະກຸ່ມຜ່ານເຂົ້າຮອບຕໍ່ໄປ ສຳລັບກຸ່ມ ເອ ປາໂຢກນຳໂຊກ, ໂຈ້ເດັນ, ທິດາວຽງຈັນ ແລະ ເທບພິສິດໄຊ1; ກຸ່ມ ບີ ອ້າຍໜຸ່ມໜ້າມັນຄົນຫຼາຍບ້ານ, ອົງສາຟາມ ແລະ ເພັດມີໄຊ 2; ກຸ່ມ ຊີ ນາວາສັກສິດ 2, ທິດາສາຍແວວ 3, ເພັດສາຍນໍ້າ 1 ແລະ ລໍ້າເລລີດນາວາ; ກຸ່ມ ດີ ເທບພອນໄຊ 2, ນາວາສັກສິດ 1 ແລະ ສາງທະນາແລ້ງ; ສາຍ ອີ ເທບທິດາສ້ອຍຟ້າ, ໂຕ້ໂນ້ເດັກດື້, ເທບພອນໄຊ 1 ແລະ ບ້ານແສນດິນ; ກຸ່ມ ເອັບ ເພັດສາຍຟ້າ, ເທບນາຄາ ແລະ ທິດາສາຍແວວ 1; ກຸ່ມ ຈີ ຍອດບໍລິການເລໂທ, ເຈົ້າແມ່ອໍລະໄທ, ນ້ອງທັບທິມ ແລະ ຕາໂລ້ນາວາ; ກຸ່ມ ເຮັດ (H) ທິດາສາຍແວວ 2, ບີເຄຣອນດ້າ ແລະ ເພັດມີໄຊ 1 ການແຂ່ງຂັນແມ່ນຈະຈັດຂຶ້ນໃນວັນທີ 8 ສິງຫາ 2020

ຜ່ານການແຂ່ງຂັນເຮືອຍາວ ປະເພດ 55 ສີພາຍ ຜົນປະກົດວ່າ: ອັນດັບ 1 ນາວາສັກສິດ ແລະ ກໍເປັນແຊ໋ມ 3 ສະໄໝ, ອັນດັບ 2 ເຈົ້າແມ່ແກ້ວມັງກອນ (ແຂວງສາລະວັນ) ຮອງແຊ໋ມ 2 ສະໄໝ ແລະ ອັນດັບ 3 ນາວາສັກສິດ 2. ສ່ວນເຮືອກິລາ 12 ສີພາຍ ອັນດັບ 1 ອົງສາຟາມ ເມືອງວັງວຽງ ແຂວງວຽງຈັນ (ສີພາຍບ້ານນາລ້ອງ), ອັນດັບ 2 ນາວາສັກສິດ, ອັນດັບ 3 ເພັດມີໄຊ (ບ້ານສີຖານໃຕ້) ແລະ ອັນດັບ 4 ນ້ອງທັບທິມ (ແຂວງສະຫວັນນະເຂດ). ນອກຈາກ ການແຂ່ງຂັນເຮືອ 2 ປະເພດດັ່ງກ່າວແລ້ວ ກໍຍັງມີການແຂ່ງຂັນເຮືອ ຄູ່ພິເສດ ປະເພດ 55 ສີພາຍ ລະຫວ່າງ ນາວາສັກສິດ ພົບກັບ ທິດາສາຍແວວ ຜົນປະກົດວ່າ ເປັນຝ່າຍເຮືອ ທິດາສາຍແວວ ເປັນຝ່າຍຊະນະ.

ຂ່າວໂດຍ: ສົງການ

 

error: Alert: Content is protected !!