ສື່​ມວນ​ຊົນ​ລາວ​ຕ້ອງ​ຫ້າວຫັນ​ທັນ​ຍຸກ

ສື່​ມວນ​ຊົນ​ລາວ​ຕ້ອງ​ຫ້າວຫັນ​ທັນ​ຍຸກ - 555 26 - ສື່​ມວນ​ຊົນ​ລາວ​ຕ້ອງ​ຫ້າວຫັນ​ທັນ​ຍຸກ
ສື່​ມວນ​ຊົນ​ລາວ​ຕ້ອງ​ຫ້າວຫັນ​ທັນ​ຍຸກ - Untitled design - ສື່​ມວນ​ຊົນ​ລາວ​ຕ້ອງ​ຫ້າວຫັນ​ທັນ​ຍຸກ

ໂດຍ: ທິດ​ກໍ່າ

ການສະ​ເຫລີ​ມສະຫລອງ​ວັນ​ສ້າງຕັ້ງສື່​ມວນ​ຊົນ​ລາວ ຄົບຮອບ 70 ປີ (13/8/1950-13/8/2020) ຫາ​ກໍ​ຜ່ານ​ພົ້ນ​ໄປ​ບໍ່ພໍ​ເທົ່າ​ໃດ​ວັນ. ຖື​ວ່າ​ປີ​ນີ້​ເປັນ​ການສະ​ເຫລີ​ມສະຫລອງ​ໃຫຍ່​ໂຕ​ພໍ​ສົມຄວນ ຍ້ອນ​ວ່າ​ມີ​ອາຍຸ​ຄົບຮອບ 70 ປີ. ​ໂອກາດ​ງານ​ໂຮມ​ຊຸມນຸມ​ສະ​ເຫລີ​ມສະຫລອງ​ຄັ້ງນີ້, ທ່ານນາຍົກລັດຖະມົນຕີ ທອງ​ລຸນ ສີ​ສຸ​ລິດ ກໍ​ໄດ້​ເປັນ​ກຽດ​ເຂົ້າຮ່ວມ ​ແລະ ມີ​ຄຳ​ເຫັນ​ຝາກ​ໄວ້​ນຳ​ວົງ​ການ​ສື່​ມວນ​ຊົນ​ລາວ ກໍ​ຄື​ນັກ​ສື່​ມວນ​ຊົນ​ພວກ​ເຮົາ​ທັງຫລາຍວ່າ: “ສື່ມວນຊົນແມ່ນເປັນຜູ້ປາກອອກແສງ, ຜູ້ທີ່ແທງເຖິງໃຈ, ຜູ້ສະດຸ້ງໄວເມື່ອໄດ້ອ່ານ, ຜູ້ທີ່ກ້າຜ່ານອຸປະສັກ, ຜູ້ທີ່ຮັກຄວາມຈິງ, ຜູ້ທີ່ຍິງຖືກເປົ້າ”, ສ່ວນຄຳຂວັນອື່ນໆທີ່ເປັນສາຍານາມແຕ່ໃດມາ ຄື: ສື່ມວນຊົນເປັນກະບອກສຽງຂອງຊົນຊັ້ນ ຫລືວ່າ ເປັນກະບອກສຽງຂອງຊາດ, ຂອງພັກ ແລະ ລັດຖະບານນັ້ນມັນກໍຍັງມີຄວາມໝາຍຕະຫລອດການ ນັບແຕ່ສະໄໝການຕໍ່ສູ້ກູ້ຊາດຈົນມາຮອດຍຸກສ້າງສາ ແລະ ພັດທະນາປະເທດຊາດ.

​ແນວ​ໃດ​ກໍ​ຕາມ, ກ່ຽວ​ກັບ​ຄຳ​ຂວັນ​ທີ່​ຍ້ອງຍໍ, ຍົກຍ້ອງ ​ແລະ ​ໃຫ້​ຄວາມ​ສຳຄັນ​ຂອງ​ທ່ານ​ນາຍົກລັດຖະມົນຕີ ທອງ​ລຸນ ສີ​ສຸ​ລິດ ​ໄດ້​ກ່າວ​ມານັ້ນ ກໍ​ຍິ່ງ​ເພີ່ມ​ທະວີ​ບົດບາດ​ທາດ​ແທ້​ຂອງ​ວຽກ​ງານ​ສື່​ມວນ​ຊົນ​ໃຫ້​ສູງ​ເດັ່ນ​ຂຶ້ນ​ໃນ​ຍຸກ​ໃໝ່​ທັນ​ສະ​ໄໝ ຫລື​ວ່າ ​ໃນ​ຍຸກ​ທີ່​ມີ​ການ​ສ້າງສາ​ພັດທະນາ​ຢ່າງ​ວ່ອງ​ໄວ​ຄື​ດັ່ງ​ທຸກ​ວັນ​ນີ້. ພິ​ເສດ​ໃນ​ຄຳ​ຂວັນ​ທີ່​ທ່ານ​ນາຍົກ​ໄດ້​ກ່າວ​ມານັ້ນ ມັນ​ກໍ​ມີ​ຄວາມ​ໝາຍ​ແປນ​ທີ່​ພວກ​ເຮົາ​ເຈົ້າຂ້ອຍ​ນັກ​ສື່​ມວນ​ຊົນ​ທັງຫລາຍ​ທຸກ​ທ່ານ, ທຸກ​ຄົນ​ຕ້ອງ​ໄດ້​ຮັບ​ຮູ້​ເຖິງ​ບົດບາດ ​ແລະ ໜ້າ​ທີ່​ຂອງ​ຕົນ​ຢ່າງ​ຈະ​ແຈ້ງ ບໍ່​ຈຳ​ເປັນ​ຕ້ອງ​ໄດ້​ມາ​ອະທິບາຍ​ໄຈ້​ແຍກ​ແຈກ​ແຖມ​ແຕ່ລະ​ຄຳ​ສັບ​ໃນ​ປະ​ໂຫຍ​ກ​ແບບ​ກິໆ​ກີໆ​ອີກ​ຕໍ່​ໄປ. ​ເມື່ອ​ຕັ້ງ​ໂຈດ​ກັນ​ວ່າ ​ເພື່ອ​ເຮັດ​ໃຫ້​ວົງ​ການ​ສື່​ມວນ​ຊົນ​ເປັນ​ໄປ​ຕາມ​ຄຳ​ຂວັນ​ຍົກຍ້ອງ​ຂອງ​ທ່ານ​ນາຍົກລັດຖະມົນຕີກ່າວ ມານັ້ນ ພວກ​ເຮົາ​ຕ້ອງ​ເຮັດ​ແນວ​ໃດ ? ​ແນ່ນອນ​ມັນ​ກໍ​ຕ້ອງ​ມີ​ຫລາຍ​ປັດ​ໄຈ ​ແລະ ຫລາຍ​ເງື່ອນ​ໄຂ​ມາ​ກະທົບ ​ເປັນຕົ້ນດ້ານ​ໜຶ່ງ​ແມ່ນ​ທຶນຮອນ​ມາ​ປັບປຸງ​ແກ້​ໄຂ ​ແລະ ພັດທະນາ. ​ໃນ​ທຶນຮອນ​ທີ່​ກ່າວ​ມາ​ນີ້ ກ່ອນ​ອື່ນ​ກໍ​ຕ້ອງ​ແມ່ນ​ບຸກຄະລາ​ກອນ​ເປັນ​ກົກ ມີ​ທັງ​ຄວາມ​ຮູ້​ຄວາມ​ສາມາດ​ທາງ​ດ້ານ​ສື່​ແຕ່ລະ​ປະ​ເພດ​ຢ່າງ​ແນ່ນອນ ​ແລະ ຊຳນິ​ຊຳນານ. ດ້ານ​ສອງຕ້ອງມີ​ພື້ນຖານ​ວັດຖຸ​ເຕັກນິກ ​ແລະ ວັດຖຸ​ອຸປະກອນ​ຮັບ​ໃຊ້​ທີ່​ຈຳ​ເປັນ​ຢ່າງ​ພຽງພໍ​ຕາມ​ຄວາມ​ຮຽກຮ້ອງ​ຕ້ອງການ​ຂອງ​ວຽກ​ງານ ​ເພື່ອ​ສ້າງ​ເງື່ອນ​ໄຂ​ໃຫ້​ສື່​ມີ​ການ​ພັດທະນາ​ຕົນ​ເອງ​ໄປ​ຕິກໆ ຈາກ​ຍຸກ​ເກົ່າ​ກ້າວ​ໄປ​ສູ່​ຍຸກ​ໃໝ່, ຈາກ​ຍຸກ​ນີ້​ກ້າວ​ໄປ​ສູ່​ຍຸກ​ໜ້າ​ຢ່າງ​ບໍ່​ຢຸດ​ຢັ້ງ. ​ໃນ​ຄວາມ​ເປັນ​ຈິງ​ແລ້ວ ພາລະກິດ​ຂອງ​ສື່​ມວນ​ຊົນ​ມັນ​ກໍ​ມີ​ຫລາຍ​ຂົງ​ເຂດ ​ແລະ ມີ​ການ​ພົວພັນ​ເຊື່ອມ​ໂຍງ​ກັບ​ບັນດາ​ຂະ​ແໜງ​ການ​ອື່ນໆ​ຢ່າງ​ມີ​ຈັງຫວະ​ຈຶ່ງ​ຈະ​ເຮັດ​ໃຫ້​ສື່​ມີ​ການ​ພັດທະນາ​ກ້າວ​ໄປ​ໄກ. ສະ​ເພາະ​ພາລະກິດ​ການ​ສ້າງ​ບຸກຄະລາ​ກອນ​ຂອງ​ສື່​ກໍ​ຕ້ອງ​ໃຫ້​ມີ​ຫລາກ​ຫລາຍ​ສີສັນ, ​ເປັນ​ຄົນ​ທີ່​ມັກ​ຮັກ​ອາຊີບ, ມີ​ຄວາມ​ຮູ້​ຄວາມ​ສາມາດ​ທີ່​ແນ່ນອນ ທັງ​ດ້ານ​ປະລິມານ ​ແລະ ຄຸນ​ນະພາ​ບ. ການ​ສະໜອງ​ຂ່າວ​ຄາວ​ກໍ​ຕ້ອງ​ວ່ອງ​ໄວ​ທັນ​ໃຈ​ໄປ​ຕາມ​ສະພາວະ​ຄວາມ​ເປັນ​ຈິງ​ຂອງ​ສະພາບ​ການ ຫລື ​ເຫດການ​ທີ່​ມັນ​ເກີດ​ຂຶ້ນ​ແຕ່ລະ​ໄລຍະ. ຢາກ​ເຮັດ​ໄດ້​ຕາມ​ທີ່​ວ່າ​ນັ້ນ ມັນ​ກໍ​ຂຶ້ນກັບ​ຕົວ​ເຮົາ​ເອງ​ເປັນ​ຜູ້​ຕັດສິນ ​ແລະ ສ້າງ​ມັນ​ຂຶ້ນມາ ບົນ​ພື້ນຖານ​ປັດ​ໄຈ​ໃໝ່ໆ ​ແລະ ຮູບ​ປະ​ທຳ​ຢ່າງ​ຊັດ​ເຈນ. ຕົວຢ່າງ​ຕໍ່​ຄຳ​ຕຳ​ໜິຕິ​ຊົມ​ຂອງ​ຄົນ​ໃນ​ສັງຄົມ​ທົ່ວ​ໄປ​ໄດ້​ເວົ້າວ່າ: ສື່​ລາວ​ອອກ​ຂ່າວ​ຊັກ​ຊ້າ​ບໍ່​ທັນກິນ ບໍ່​ວ່າ​ໃນ​ໜັງສືພິມ, ວິທະຍຸ ​ແລະ ​ໂທລະພາບ ​ເຮັດ​ໃຫ້​ຄົນ​ທັງຫລາຍ​ບໍ່ຄ່ອຍສົນໃຈໃນການຕິດ ຕາມຂ່າວຄາວ. ອັນສອງມາກໍເປັນຂ່າວອັນເກົ່າທີ່ຄ້າຍຄືກັນ ສ່ວນຫລາຍເນັ້ນໜັກໃສ່ແຕ່ກອງປະຊຸມ, ຂ່າວງານລ້ຽງພົບປະສັງສັນ. ໃນທາງກົງກັນຂ້າມ ເວລາອອກຂ່າວເວົ້າຄວາມຈິງເຖິງປາກົດການຫຍໍ້ທໍ້ໄປ ແລ້ວ ພັດມີບັນຫາໄປກະທົບເຖິງຜູ້ໃຫຍ່ມີອຳນາດຂັດໃຈຍ້ອນຂາຍໜ້າເພິ່ນ, ເວົ້າຄວາມຈິງຫລາຍກໍ​ກາຍ​ເປັນຄວາມ​ບໍ່ພໍ​ໃຈ​ໃຫ້​ກັນ​ທວງ​ຖາມ​ເຖິງ​ສຳນັກ​ຂ່າວ, ຈົນ​ມີ​ຄຳ​ນາບ​ຂູ່​ອາ​ຄາດ​ບາດໝາງ​ ​ເຖິງ​ຂັ້ນຈົ່ມ​ວ່າ​ສິຮ້ອງ​ຟ້ອງ​ພວກ​ນັກ​ຂຽນ​ນັກ​ຂ່າວ ຫລື ບາງ​ກໍລະນີ​ ​ເພິ່ນ​ກໍ​ບໍ່​ເຫັນ​ຄວາມ​ສຳຄັນ​ກໍ​ບໍ່​ໃຫ້ການ​ຮ່ວມ​ມື ທັງ​ປິດ​ລັບ​ບໍ່​ໃຫ້​ເຜີຍ​ແຜ່​ໂຄສະນາ​ເຜີຍ​ແຜ່​ສິ່ງ​ທີ່​ດີ ​ແລະ ​ແກ້​ໄຂ​ສິ່ງ​ເຮິະຮ້າຍ.

ສື່​ມວນ​ຊົນ​ລາວ​ຕ້ອງ​ຫ້າວຫັນ​ທັນ​ຍຸກ - Wave100S AD to Website 2020 0 - ສື່​ມວນ​ຊົນ​ລາວ​ຕ້ອງ​ຫ້າວຫັນ​ທັນ​ຍຸກ

​ເຖິງ​ຢ່າງ​ໃດ​ກໍ​ດີ, ມາ​ຮອດ​ຍຸກ​ປັດຈຸບັນ​ນີ້ ​ເຫັນ​ວ່າ​ວົງ​ການ​ສື່​ມວນ​ຊົນ​ລາວ​ໄດ້​ມີ​ການ​ພັດທະນາ​ເຕີບ​ໃຫຍ່​ໄປ​ຫລາຍ​ສົມຄວນ​ແລ້ວ. ອັນ​ສຳຄັນ​ນອກຈາກ​ມີ​ໜັງສືພິມ, ວິທະຍຸ, ​ໂທລະພາບ​ນັບ​ແຕ່​ຂັ້ນສູນ​ກາງ​ລົງ​ຮອດ​ທ້ອງ​ຖິ່ນ​ແລ້ວ ຍັງ​ມີ​ສື່​ອອນ​ລາຍ​ທີ່​ເປັນ​ສື່​ໃໝ່​ຂອງ​ພາກ​ລັດ ​ແລະ ​ເອກະ​ຊົນ​ຢ່າງ​ກວ້າງຂວາງ. ສິ່ງ​ດັ່ງກ່າວ​ໄດ້​ຕອບ​ສະໜອງ​ຄວາມ​ຮຽກຮ້ອງ​ຕ້ອງການ​ໃຫ້​ສັງຄົມ​ບໍລິ​ໂພ​ກ​ໄດ້​ເປັນ​ຢ່າງ​ດີ. ປັດຈຸບັນ ວົງ​ການ​ສື່​ອອນ​ລາຍ​ເປັນ​ທີ່​ຍອມຮັບ ​ແລະ ​ເປັນ​ເປົ້າໝາຍ​ບໍລິ​ໂພ​ກຂອງ​ຄົນ​ໃນ​ທົ່ວ​ສັງຄົມ ກໍ​ຄື​ທົ່ວ​ໂລກ. ສິ່ງ​ສຳຄັນ​ພຽງ​ແຕ່​ວ່າ​ຜູ້​ບໍລິ​ໂພ​ກຈະ​ເລືອກ​ໃຊ້​ສື່​ແນວ​ໃດ, ປະ​ເພດ​ໃດ​ທີ່​ມີ​ຄຸນຄ່າ ​ແລະ ມີ​ຜົນ​ປະ​ໂຫຍ​ດ​ແກ່​ຕົນ​ເອງ ​ແລະ ປະ​ເທດ​ຊາດ.

ສື່​ມວນ​ຊົນ​ລາວ​ຕ້ອງ​ຫ້າວຫັນ​ທັນ​ຍຸກ - WhatsApp Image 2020 05 27 at 5 - ສື່​ມວນ​ຊົນ​ລາວ​ຕ້ອງ​ຫ້າວຫັນ​ທັນ​ຍຸກ
ສື່​ມວນ​ຊົນ​ລາວ​ຕ້ອງ​ຫ້າວຫັນ​ທັນ​ຍຸກ - WhatsApp Image 2020 05 27 at 5 - ສື່​ມວນ​ຊົນ​ລາວ​ຕ້ອງ​ຫ້າວຫັນ​ທັນ​ຍຸກ
error: Alert: ເນື້ອຫາຂ່າວມີລິຂະສິດ !!