ສະຫລຸບບັນຫາໜ້າສົນໃຈທົ່ວໂລກວັນທີ 21 ສິງຫາ 2020

ສະຫລຸບບັນຫາໜ້າສົນໃຈທົ່ວໂລກວັນທີ 21 ສິງຫາ 2020 - AGL banner - ສະຫລຸບບັນຫາໜ້າສົນໃຈທົ່ວໂລກວັນທີ 21 ສິງຫາ 2020
  1. Steve Bannon ອະດີດ​ຫົວໜ້າ​ຝ່າຍ​ບໍລິຫານດ້ານ​ການ​ປຸກລະດົມ​ຫາ​ສຽງ​ຂອງ​ປະທານາທິບໍດີ ​ໂດນັລ ທຣຳ ​ເຊິ່ງຕໍ່​ມາ​ໄດ້​ກາຍ​ເປັນ​ນັກ​ຍຸດ​ທະ​ສາດ​ຂອງ​ທຳນຽບຂາວ ຖືກ​ຟ້ອງ​ໃນ​ຂໍ້​ຫາ​ສໍ້​ໂກງ ​ໂດຍ​​ໄອ​ຍະ​ການ​ຂອງ​ລັດຖະບານ​ກາງ.

Bannon ​ແລະ ໝູ່​ອີກ 3 ຄົນ ສາມາດ​ລະດົມ​ທຶນ​ໄດ້​ຫລາຍ​ກວ່າ 25 ລ້ານ​ໂດ​ລາ​ສະຫະລັດ ຈະ​ໂຄງການ​ເພື່ອ​ສະໜັບສະໜູນ​ກຳ​ແພງ​ຊາຍ​ແດນ​​​ແມັກ​ຊິກ​ທີ່​ທ່ານ ທຣຳ ສະ​ເໜີ. ຂະນະ​ທີ່ ​ໄອ​ຍະ​ການ​ກ່າວ​ຫາ​ວ່າ: ພວກ​ເຂົາ​ໄດ້​ຮັບ​ຜົນ​ປະ​ໂຫຍ​ດ​ເປັນ​ການ​ສ່ວນ​ຕົວ ​ແລະ ປົກ​ປິດ​ການ​ກະທຳ​ຂອງ​ພວກ​ເຂົາ ​ໂດຍ​ການ​​ໂຍກ​ຍ້າຍ​ເງິນ​ຜ່ານ Shell Company* ​ແລະ ອົງການ​ບໍ່​ສະ​ແຫວ​ງຫາ​ຜົນ​ກຳ​ໄລ ​ເຊິ່ງຄວບ​ຄຸມ​ໂດຍ Bannon.

*ໝາຍ​ເຖິງ​ບໍລິສັດ​ທີ່​ບໍ່​ມີ​ສິນ​ຊັບ ຫລື ການ​ດຳ​ເນີນ​ງານ​ເປັນ​ຂອງ​ຕົນ​ເອງຢ່າງ​ຈະ​ແຈ້ງ ສ່ວນ​ຫລາຍ​ເປັນ​ບໍລິສັດ​ທີ່​ສ້າງ​ໄວ້​ຫລອກໆ ​ເພື່ອ​ໂຍກ​ຍ້າຍ ຫລື ​ເຊື່ອງ​ເງິນ.

  1. ສານ​ລັດຖະບານ​ກາງ​ແຫ່ງ​ອາ​ເມ​ລິ​ກາ ​ໄດ້​ຕັດສິນ​ວ່າການ​ສອບ​ສວນ​ທາງ​ດ້ານ​ການ​ເງິນ​ຂອງທ່ານ ທຣຳ ຈະ​ສາມາດ​ດຳ​ເນີນ​ຕໍ່​ໄປ​ໄດ້ ​ໂດຍ​ໄອ​ຍະ​ການ​ປະຈຳ​ເມືອງ Manhattan ກຳລັງ​ສະ​ແຫວ​ງຫາ​ຂໍ້​ມູນ​ກ່ຽວ​ກັບ​ການ​ຈ່າຍ​ເງິນ​ກ້ອງ​ໂຕະ​ທີ່​ທ່ານ ທຣຳ ຖືກ​ກ່າວ​ຫາ.

​ໃນ​ເດືອນ​ກໍລະກົດ​ຜ່ານ​ມາ, ສານ​ສູງ​ຂອງ​ອາ​ເມ​ລິ​ກາ​ ​ໄດ້​ປະຕິ​ເສດ​ຄຳ​ຮ້ອງ​ທີ່​ວ່າ: ປະທານາທິບໍດີ​ຂອງ​ປະ​ເທດ​ຈະ​ໄດ້​ຮັບ​ການ​ປ້ອງ​ກັນ​ຢ່າງ​ສົມບູນ​ຈາກ​ການ​ສືບສວນ-ສອບ​ສວນ​ໂດຍ​ຝ່າ​ຍນິຕິບັນຍັດ​ຂອງ​ປະ​ເທດ. ຂະນະ​ທີ່ ການ​ພິຈາລະນາ​ຄະດີ​ຄັ້ງ​ໃໝ່​ໄດ້​ກະທຳ​ໂດຍ​ປະຕິ​ເສດ​ຂໍ້​ຂັດ​ແຍ່ງ​ຫລ້າ​ສຸດ​ຂອງ​ທ່ານ ທຣຳ ທີ່​ວ່າ: ໝາຍ​ສານ​ດັ່ງກ່າວ​ເປັນ​ການ​ລ່ວງ​ລ້ຳ ​ແລະ ລະ​ເມີດ​ສິດທິ​ມະນຸດ​ຂອງ​ທ່ານ.

  1. Alibaba ​ເປີດ​ເຜີຍ​ລາຍ​ໄດ້​ຂອງ​ໄຕ​ມາດ​ທີ 2 ​ເພີ່ມ​ຂຶ້ນ 34% ​ເມື່ອ​ທຽບ​ໃສ່​ແຕ່ລະ​ປີ ສູ່​ລະດັບ 22.000 ລ້ານ​ໂດ​ລາ​ສະຫະລັດ ​ໂດຍ Daniel Zhang ປະທານ​ຂອງ​ບໍລິສັດ ກ່າວ​ວ່າ: ການ​ເພີ່ມ​ຂຶ້ນຂອງ​ການ​ຊື້​ເຄື່ອງ​ອອນ​ລາຍ​ໄດ້​ຮັບ​ແຮງ​ສະໜັບສະໜູນ​ຈາກ​ການລະບາດ​ຂອງ COVID-19.

​ເຖິງ​ຢ່າງ​ໃດ​ກໍ​ຕາມ, ພວກ​ເຂົາ​ກ່າວ​ອີກ​ວ່າ: Alibaba ກຳລັງ​ຕິດຕາມ​ນະ​ໂຍບາຍ​ການ​ຄ້າ​ຂອງ​ອາ​ເມ​ລິ​ກາ​ຢ່າງ​ລະມັດລະວັງ ​ເນື່ອງ​ຈາກ​ຄວາມ​ເຄັ່ງ​ຕຶງ​ລະຫວ່າງ​ທັງ 2 ປະ​ເທດ​ກຳລັງ​ເພີ່ມ​ຂຶ້ນຢ່າງ​ວ່ອງ​ໄວ ​ແລະ ຕໍ່​ເນື່ອງ.

  1. ຈຳນວນ​ຜູ້​ຂໍ​ຮັບ​ສະຫວັດດີ​ການ​ເບື້ອງຕົ້ນຂອງ​ອາ​ເມ​ລິ​ກາ ​ເພີ່ມ​ຂຶ້ນປະມານ 135.000 ຄົນ​ໃນ​ອາທິດ​ຫລ້າ​ສຸດ ສູ່​ລະດັບ 1,1 ລ້ານ​ຄົນ ຈາກ 971.000 ຄົນ​ໃນ​ອາທິດ​ກ່ອນ​ໜ້ານັ້ນ ​ເຊິ່ງຕົວ​ເລກ​ທີ່​ເພີ່ມ​ຂຶ້ນນີ້​ໄດ້​ເພີ່ມ​ການ​ປັ່ນ​ປ່ວນ​ໃຫ້​ແກ່​ຕະຫລາດ​ເລັກ​ໜ້ອຍ. ຂະນະ​ທີ່​ຕະຫລາດ​ຫຸ້ນ​ຊື້-ຂາຍ​ກັນ​​ໃນ​ລະດັບ​ສູງ​ສຸດ ​ແລະ ມີ​ການ​ຈ້າງ​ງານ​ເພີ່ມ​ຂຶ້ນ 1,8 ລ້ານ​ຕຳ​ແໜ່​ງ​ໃນ​ເດືອນ​ກໍລະກົດ​ຜ່ານ​ມາ.

ທາງ​ສະພາ​ຄອງ​ເກຣດ ​ແລະ ທຳນຽບຂາວ ​ໄດ້ລົ້ມ​ເຫ​ລວທີ່​ຈະ​ບັນລຸ​ຂໍ້​ຕົກລົງ​ເພື່ອ​ຂະຫຍາຍ​ໄລຍະ​ເວລາ​ຂອງ​ສະຫວັດດີ​ການ​ວ່າງ​ງານ ​ເຊິ່ງກຳລັງ​ຈະ​ໝົດ​ອາຍຸ​ໃນ​ມໍ່​ໆ​ນີ້. ຂະນະ​ທີ່ ຜົນ​ກະທົບ​ຈາກ​ການລະບາດ​ຂອງ COVID-19 ຍັງ​ຄົງ​ດຳ​ເນີນ​ຕໍ່​ໄປ.

ສະຫລຸບບັນຫາໜ້າສົນໃຈທົ່ວໂລກວັນທີ 21 ສິງຫາ 2020 - Wave100S AD to Website 2020 0 - ສະຫລຸບບັນຫາໜ້າສົນໃຈທົ່ວໂລກວັນທີ 21 ສິງຫາ 2020
  1. ປະ​ເທດ​ສະ​ວີ​ເດັນ​ໄດ້ລາຍ​ງານ​ຕົວ​ເລກ​ຜູ້​ເສຍ​ຊີວິດ​ຈາກ​ທຸກ​ສາ​ເຫດ​ໃນ​ຮອບ 6 ​ເດືອນ​ຜ່ານ​ມາ​ເປັນ​ຈຳນວນ​ສູງ​ທີ່​ສຸດ​ນັບ​ແຕ່​ປີ 1869 ​ເຖິງ​ວ່າ​ພວກ​ເຂົາ​ຈະ​ຢູ່​ຫ່າງ​ໄກ​ຈາກ​ສົງຄາມ​ຄັ້ງ​ໃຫຍ່ ​ແລະ ​ເຫດ​ນອງ​ເລືອດ​ມາ​ຕະຫລອດ​ທົດ​ສະ​ວັດ​ທີ 20.

​ແນວທາງ​ຂອງ​ພວກ​ເຂົາ​ທີ່​ເລືອກ​ຈະ​ບໍ່ Lockdown ປະ​ເທດ​ຫລັງ​ຈາກ​ມີ​ການລະບາດ​ຂອງ COVID-19 ​ເກີດ​ຂຶ້ນ​ເຮັດ​ໃຫ້​ສະ​ວີ​ເດັນ​ມີ​ຈໍານວນ​ຜູ້​ຕິດ​ເຊື້ອ ​ແລະ ຜູ້​ເສຍ​ຊີວິດ​ຫລາຍ​ກວ່າ​ປະ​ເທ​ດ​ໃກ້​ຄຽງ ​ໂດຍ​ຄັ້ງສຸດ​ທ້າຍ​ທີ່​ມີ​ຜູ້​ເສຍ​ຊີວິດ​ເປັນ​ຈຳນວນ​ຫລາຍ​ໃນ​ຮອບ​ເຄິ່ງປີ ກໍ​ຄື​ໃນ​ໄລຍະ​ທີ່​ປະ​ເທດ​ກຳລັງ​ຢູ່​ໃນ​ສະພາບ​ອຶດຫິວ.

  1. ຫລັງ​ຈາກ​ຫລາຍ​ປີຜ່ານມາ​ກ່ຽວ​ກັບ​ເລື່ອງ​ຂອງ​ແຂກ​ທີ່​ຈັດ​ງານ​ສັງ​ສັນ ຈົນ​ມາ​ເຖິງ​ໄລຍະ​ທີ່​ມີ​ການລະບາດ​ຂອງ COVID-19 ​ເກີດ​ຂຶ້ນນີ້ ​ໄດ້​ເຮັດ​ໃຫ້ Airbnb ​ເຊິ່ງ​ເປັນ​ແພ​ລກຟອມ​ໃຫ້​ເຊົ່າ​ເຮືອນ​ຈຳ​ເປັນ​ຕ້ອງ​ຄວບ​ຄຸມ​ປະລິມານ​ລູກ​ຄ້າ​ຂອງ​ພວກ​ເຂົາ.

​ໂດຍ​ໃນ​ໄລຍະ​ຫລັງ​ຈາກ​ນີ້​ໄປ ຈຳນວນ​ຜູ້​ເຂົ້າພັກ​ພາຍ​ໃນ​ເຮືອນ​ຕ່າງໆ​ຈະ​ຕ້ອງ​ຖືກ​ຈຳກັດ​ຈຳນວນ​ບໍ່​ໃຫ້​ຫລາຍ​ເກີນ​ໄປ ລວມທັງ​ບໍລິສັດ​ຈະ​ເພີ່ມ​ຄວາມ​ເຂັ້ມງວດ ​ເພື່ອ​ຕໍ່ຕ້ານ​ການຈັດ​ງານ​ສັງ​ສັນ​ທີ່​ຜິດ​ກົດໝາຍ.

ນອກຈາກ​ນີ້ ​​ໃນ​ວັນ​ທີ 19 ສິງຫາ​ຜ່ານ​ມາ ພວກ​ເຂົາ​​ໄດ້​ຍື່ນ​ເອກະສານ​ຕໍ່​ໜ່ວຍ​ງານ​ເບິ່ງ​ແຍງ​ຂອງ​ອາ​ເມ​ລິ​ກາ ​ເພື່ອ​ສະ​ເໜີ​ຂາຍ​ຫຸ້ນ​ຕໍ່​ປະຊາຊົນ​ທົ່ວ​ໄປ​ເປັນຄັ້ງທຳ​ອິດ.

ສະຫລຸບບັນຫາໜ້າສົນໃຈທົ່ວໂລກວັນທີ 21 ສິງຫາ 2020 - lattana banner 1 - ສະຫລຸບບັນຫາໜ້າສົນໃຈທົ່ວໂລກວັນທີ 21 ສິງຫາ 2020
ສະຫລຸບບັນຫາໜ້າສົນໃຈທົ່ວໂລກວັນທີ 21 ສິງຫາ 2020 - lattana banner - ສະຫລຸບບັນຫາໜ້າສົນໃຈທົ່ວໂລກວັນທີ 21 ສິງຫາ 2020
ສະຫລຸບບັນຫາໜ້າສົນໃຈທົ່ວໂລກວັນທີ 21 ສິງຫາ 2020 -    AD conten website - ສະຫລຸບບັນຫາໜ້າສົນໃຈທົ່ວໂລກວັນທີ 21 ສິງຫາ 2020
error: Alert: ເນື້ອຫາຂ່າວມີລິຂະສິດ !!