ຊັບພະຍາກອນ​ທຳ​ມະ​ຊາດ​ເປັນສົມ​ບັດ​ວົງ​ຄະນາ​ຍາດ​ແຫ່ງ​ຊາດ

ຊັບພະຍາກອນ​ທຳ​ມະ​ຊາດ​ເປັນສົມ​ບັດ​ວົງ​ຄະນາ​ຍາດ​ແຫ່ງ​ຊາດ - 555 50 - ຊັບພະຍາກອນ​ທຳ​ມະ​ຊາດ​ເປັນສົມ​ບັດ​ວົງ​ຄະນາ​ຍາດ​ແຫ່ງ​ຊາດ
ຊັບພະຍາກອນ​ທຳ​ມະ​ຊາດ​ເປັນສົມ​ບັດ​ວົງ​ຄະນາ​ຍາດ​ແຫ່ງ​ຊາດ - AGL banner - ຊັບພະຍາກອນ​ທຳ​ມະ​ຊາດ​ເປັນສົມ​ບັດ​ວົງ​ຄະນາ​ຍາດ​ແຫ່ງ​ຊາດ

ໂດຍ:ທິດ​ກໍ່າ

​ເມື່ອ​ເອີ່ຍ​ເຖິງຊັບພະຍາກອນ​ທຳ​ມະ​ຊາດ​ຢູ່​ປະ​ເທດ​ລາວ​ເຮົາ, ທິດ​ກໍ່າ​ຍັງ​ຄິດ​ເຫັນ​ຄຳ​ເວົ້າຂອງ​ລຸງ ພູມີ ວົງ​ວິຈິດ ຕອນ​ສະ​ໄໝ​ໄດ້​ຮຽນ​ການ​ເມືອງ​ໃນ​ເອກະສານ​ປະ​ເທ​ດລາວ​ສວຍ​ງາມ ​ແລະ ຮັ່ງມີ. ບາງ​ຕອນ​ທ່ານ​ໄດ້​ກ່າວ​ວ່າ: ປະ​ເທດ​ລາວ​ເຮົາ​ສວຍ​ງາມ​ ​ແລະ ຮັ່ງມີ, ປະຊາຊົນ​ລາວ​ມີ​ມູນ​ເຊື້ອຕໍ່ສູ້​ພິລະ​ອາດ​ຫານ, ດຸ​ໝັ່ນ​ຂະຫຍັນ​ພຽນ, ຕື່ນ​ເດິກ​ລຸກ​ເຊົ້າ, ​ໄປ​ຢຽບ​ໝາ ມາ​ຢຽບ​ຂຽດ, ພາກັນ​ນັ່ງ​ຢູ່​ເທິງ​ກອງ​ເງິນ​ກອງ​ຄຳ. ​ແຕ່​ປະຊາຊົນ​ລາວ​ພັດ​ຍັງ​ທຸກ​ຍາກ​ຂາດ​ເຂີນ, ​ເສື້ອຂາດ​ໜ້າ​ຜ້າ​ຂາດ​ຫລັງ, ອຶດ​ຢູ່​ອຶດ​ກິນ, ຊ້ຳບໍ່​ໜຳ ພັດ​ເປັນ​ຫົວ​ເມືອງ​ຂຶ້ນຂອງ​ສັກ​ດີ​ນາ ​ແລະ ຈັກກະພັດ​ຕ່າງ​ດ້າວ​ທີ່​ເຂົ້າມາ​ຮຸກ​ຮານ, ຍາດ​ຊີງ​ເອົາ​ປະ​ເທດ​ລາວ​ເປັນ​ຫົວ​ເມືອງ​ຂຶ້ນ. ​ເພາະສະນັ້ນ ປະຊາຊົນ​ລາວ​ຈຶ່ງ​ທຸກ​ຍາກ​ລຳບາກ​ດ້ອຍ​ພັດທະນາ​ລ້າ​ຫລັງ​ມາ​ຫລາຍ​ເຊັ່ນ​ຄົນ.

ຈາກ​ຄຳ​ເວົ້າຂອງ​ຜູ້ນຳ​ເມື່ອ​ມາ​ປຽບທຽບ​ໃສ່​ຕົວ​ຈິງ​ປັດຈຸບັນ​ຈຶ່ງ​ຮູ້​ດີ​ວ່າ: ຊັບ​​ໃນ​ດິນ, ສິນ​​ໃນ​ນ້ຳທີ່​ກາຍ​ເປັນ​ຊັບພະຍາກອນ​ທຳ​ມະ​ຊາດ​ຢູ່​ລາວ​ເຮົາ​ນັ້ນມັນປາ​ກົດ​ວ່າ​ມີ​ຫລວງຫລາຍ ​ແລະ ອຸດົມສົມບູນ​ຄື​ເພິ່ນ​ເວົ້າອີ່ຫລີ. ນອກຈາກ​ນັ້ນ ບາງ​ທ້ອງ​ຖິ່ນ​ເຂດ​ແຂວງ​ຈົນ​ໄດ້​ມີ​ຄຳ​ຜະຫຍາ​ເຍີ້ຍ​ໃສ່​ກັນ​ກາຍ​ເປັນ​ກອນ​ຂັບ​ກອນ​ລຳ ຫລື​ວ່າ ​ເປັນ​ຄຳ​ພັງ​ເພີຍສອດ​ຫ້ອຍ​ໃນ​ຕຳນານ​ນິທານ​ພື້ນ​ແຜ່ນ​ມາ​ແຕ່​ສະ​ໄໝ​ປູ່ຍ່າຕານາຍ​ເຮົາ​ເຊັ່ນ: ຄຳ​ວ່າ: “ອັດ​ຕະປືປື້ງຂາຍ​ຄຳ​ແລກ​ໄກ່, ສາລະ​ວັນ​ຂີ້​ໄຮ້​ຂາຍ​ຊ້າງ​ແລກ​ກະບອງ”. ນອກຈາກ​ນັ້ນ ຍັງ​ມີ​ກອນ​ຂັບ​ກອນ​ລຳ​ອື່ນໆ​ຂອງ​ແຕ່ລະ​ທ້ອງ​ຖິ່ນ​ທີ່​ສະ​ແດງ​ໃຫ້​ເຫັນ​ເຖິງ​ຄວາມ​ອຸດົມສົມບູນ​ທາງ​ດ້ານ​ທຳ​ມະ​ຊາດ, ພູຜາ​ປ່າ​ໄມ້, ​ແມ່ນ້ຳລຳ​ເຊ ​ແລະ ບໍ່​ແຮ່​ທີ່​ມີ​ຫລວງຫລາຍ​ໃນ​ປະ​ເທດ​ລາວ. ທິດ​ກໍ່າ ຂໍ​ຍົກ​ເອົາ​ເລື່ອງ​ປ່າ​ໄມ້​ຢູ່​ບ້ານ​ເຮົາ​ໃນ​ສະ​ໄໝ​ກ່ອນ​ເປັນ​ປ່າ​ຕຶບໜາ, ຢູ່​ປ່າດົງ​ພົງ​ໄພ​ເຕັມ​ໄປ​ດ້ວຍ​ສັດປ່າ​ນາໆ​ຊະນິດ. ​ແຕ່​ມາ​ຮອດ​ຍຸກ​ນີ້ ປ່າຕຶບ​ດົງ​ໜາ​ໄດ້​ຖືກ​ດັບ​ສູນ​ໄປ​ເກືອບ​ໝົດ​ກ້ຽງ​ແລ້ວ. ສາ​ເຫດ​ຍ້ອນ​ມີ​ການ​ຕັດ​ໄມ້​ທຳລາຍ​ປ່າ​ຢ່າງ​ຊະ​ຊາຍຕະຫລອດ​ມາ. ສ່ວນ​ສັດປ່າ​ນັ້ນ​ເກືອບ​ວ່າ​ຖືກ​ປາບ​ປາມ​ດັບ​ສູນ​ຍ້ອນ​ຄົນ​ໃນ​ຊາດ​ພາກັນ​ໄປ​ຫາ​ລ່າ​ມາ​ເປັນ​ອາຫານ ​ແລະ ຂາຍ​ເປັນ​ສິນຄ້າ. ກ່າວ​ເຖິງ​ບໍ່​ເງິນ, ບໍ່​ຄຳ​ເທົ່າ​ທີ່​ໄດ້​ໄປ​ເຫັນ​ບໍ່​ໃຫຍ່ໆ​ທີ່​ມີ​ຊື່​ສຽງ​ໂດ່​ງດັງ​ພວມ​ຂຸດ​ຄົ້ນກໍ​ມີ​ບໍ່​ຄຳ​ພູ​ເບ້ຍ​ຢູ່​ເມືອງ​ອານຸວົງ ​ແຂວງ​ໄຊ​ສົມບູນ, ບໍ່​ຄຳ​ແສນ​ອຸດົມ ຢູ່​ເມືອງ​ຄຳ​ເກີດ ​ແຂວງ​ບໍລິ​ຄຳ​ໄຊ, ບໍ່​ຄຳ​ເຊ​ໂປ​ນ ​ເຂດ​ເມືອງ​ວິລະ​ບູລີ ​ແຂວງ​ສະຫວັນ​ນະ​ເຂດ ​ແລະ ຍັງ​ມີ​ບໍ່​ຄຳ, ບໍ່​ແກ້ວ, ບໍ່​ເພັດ​ນິນ​ຈິນດາ​ຢູ່​ທາງ​ແຂວງ​ບໍ່​ແກ້ວ, ຢູ່​ແຂວງ​ອັດ​ຕະປື ​ແລະ ບັນດາ​ແຂວງ​ອື່ນໆ​ຢ່າງ​ຫລວງຫລາຍ​ພາຍ​ມາກ. ​ໃນ​ບັນດາ​ບໍ່​ແຮ່​ເຫລົ່າ​ນີ້ ​ແມ່ນ​ພວມ​ຂຸດ​ຄົ້ນ ​ແລະ ​ໄດ້​ຂຸດ​ຄົ້ນ​ເອົາ​ແຮ່​ມາ​ຫລາຍ​ປີ​ເກືອບ​ໝົດ​ແລ້ວ, ​ແຕ່​ມາ​ເບິ່ງ​ປະ​ເທດ​ຊາດ​ກໍ​ຍັງ​ທຸກ​ຍາກ​ຢູ່, ​ເງິນ​ກີບ​ລາວ​ກໍ​ຍັງ​ອ່ອນ​ຄ່າ​ຢູ່. ສ່ວນວ່າ​ແມ່ນ້ຳລຳ​ເຊ​ກໍ​ມີ​ແຕ່​ເໜືອ​ເຖິງ​ໃຕ້, ​ແມ່ນ້ຳ​ໃຫຍ່ໆ​ທີ່​ເປັນ​ທ່າ​ແຮງ​ທາງ​ດ້ານ​ເສດຖະກິດ​ກໍ​ມີນ້ຳອູ, ນ້ຳຄານ, ນ້ຳງື່ມ, ນ້ຳງຽບ, ນ້ຳກະດິງ, ນ້ຳຫີນ​ບູນ, ນ້ຳ​ເທີນ, ​ເຊບັ້ງ​ໄຟ, ​ເຊບັ້ງຫຽງ, ​ເຊ​ໂດນ ​ແລະ ຍັງ​ມີ​ແມ່ນ້ຳສາຂາ​ປີກ​ຍ່ອຍ​ແມ່ນ້ຳ​ເຫລົ່າ​ນີ້​ຢ່າງ​ມາ​ກມາຍ. ບັນດາ​ແມ່ນ້ຳສາຍ​ຕ່າງໆ​ເທົ່າ​ທີ່​ມີ​ຢູ່​ປະ​ເທດ​ລາວ​ເຮົາ​ກໍ​ໄດ້​ສ້າງ​ເຂື່ອນ​ໄຟຟ້າ​ພະລັງ​ນ້ຳ​ໄປ​ແລ້ວ 60 ກວ່າ​ແຫ່ງ. ປັດຈຸບັນ​ພວມ​ຜະລິດ​ໄຟຟ້າ​ສົ່ງ​ຂາຍ​ຢູ່​ພາຍ​ໃນ ​ແລະ ຕ່າງປະ​ເທດ ຈົນ​ກາຍ​ເປັນ​ສາຍາ​ໝໍ້​ໄຟ​ອາ​ຊຽນ, ​ແຕ່​ໃນ​ທາງ​ກົງກັນຂ້າມ ຄ່າ​ໄຟຟ້າ​ທີ່​ເອົາ​ມາ​ຂາຍ​ບໍລິການ​ປະຊາຊົນ​ຄົນ​ລາວ​ເຮົາ​ຍັງ​ແພງ​ຈົນ​ເກີດ​ອົນລະຫົນ​ຈົ່ມ​ວ່າ​ຍ້ອນ​ການ​ບໍລິຫານ​ຈັດການ​ມີ​ບ່ອນ​ມືດ​ບ່ອນ​ແຈ້ງ. ສ່ວນວ່າ​ບັນຫາ​ສະພາບ​ດິນ​ດອນ​ຕອນ​ຫຍ້າ ມາ​ຮອດ​ປັດຈຸບັນ​ຍັງ​ເຫລືອ​ແຕ່​ເຂດ​ປ່າ​ສະຫງວນ, ​ເຫລືອ​ນັ້ນ​ແມ່ນ​ຖືກ​ຈັບຈອງ​ເປັນ​ກຳມະສິດ​ລວມໝູ່ ​ແລະ ບຸກຄົນ​ເປັນ​ສ່ວນ​ໃຫຍ່. ຜູ້​ມີ​ຫລາຍ​ເປັນ​ສອງ​ສາມ​ຮ້ອຍ​ເຮັກຕາ​ກໍ​ຂາຍ​ໃຫ້​ເປັນ​ກຳມະສິດ​ຂອງ​ນາຍ​ທຶນ, ຜູ້​ມີ​ໜ້ອຍ​ຂາຍ​ໜ້ອຍ, ຜູ້​ມີ​ຫລາຍ​ຂາຍ​ຫລາຍ​ຈົນ​ຮັ່ງມີ​ເປັນ​ເສດຖີ​ຍ້ອນ​ທຸລະ​ກິດ​ຂາຍ​ດິນ​ກໍ​ມີ. ບາງ​ກຸ່ມ, ບາງ​ຄົນ​ຊື້-ຂາຍ​ດິນ​ແລ້ວ​ປຸກ​ເຮືອນ​ເປັນ​ສິບ​ຫລັງ​ຊາວ​ຫລັງ​ເພື່ອ​ໄວ້​ຂາຍ ຫລື ​ໃຫ້​ຄົນ​ເຊົ່າ.

ຊັບພະຍາກອນ​ທຳ​ມະ​ຊາດ​ເປັນສົມ​ບັດ​ວົງ​ຄະນາ​ຍາດ​ແຫ່ງ​ຊາດ - Wave100S AD to Website 2020 0 - ຊັບພະຍາກອນ​ທຳ​ມະ​ຊາດ​ເປັນສົມ​ບັດ​ວົງ​ຄະນາ​ຍາດ​ແຫ່ງ​ຊາດ

​ແນວ​ໃດ​ກໍ​ດີ, ​ເມື່ອ​ຕັ້ງ​ໂຈດ​ກັນ​ວ່າ ບັນດາ​ຊັບພະຍາກອນ​ທຳ​ມະ​ຊາດ​ເຫລົ່າ​ນີ້​ມັນ​ເປັນ​ຊັບ​ສົມບັດ​ຂອງ​ວົງ​ຄະນາ​ຍາດ​ແຫ່ງ​ຊາດ ​ແຕ່​ເປັນ​ຫຍັງ​ຈຶ່ງ​ເກີດ​ມີ​ປາກົດການ​ແບບ​ນີ້ ? ຄຳ​ຕອບ​ໂຈດ​ກໍ​ຄື ມັນ​ຂຶ້ນກັບ​ການ​ບໍລິຫານ​ຈັດການ, ຖ້າ​ມີ​ການ​ຄຸ້ມ​ຄອງ​ທີ່​ດີ ຊັບພະຍາກອນ​ທຳ​ມະ​ຊາດ​ເຫລົ່າ​ນີ້​ຍ່ອມ​ເປັນ​ຂອງ​ວົງ​ຄະນາ​ຍາດ​ແຫ່ງ​ຊາດ, ທຸກ​ສິ່ງ​ທຸກ​ຢ່າງ​ຕ້ອງ​ຫັນ​ເອົາ​ມາ​ຮັບ​ໃຊ້​ຊາດ, ຮັບ​ໃຊ້​ປະຊາຊົນ ​ເພື່ອ​ຄວາມ​ຮັ່ງມີ​ຂອງ​ປະ​ເທດ​ຊາດ. ​ໃຫ້​ປະຊາຊົນ​ມີ​ຢູ່​ມີ​ກິນ ສາມາດ​ຫລຸດ​ພົ້ນອອກ​ຈາກ​ຄວາມທຸກ​ຍາກ ຍ້ອນ​ຊັບພະຍາກອນ​ທີ່​ມີ​ພາຍ​ໃນ​ປະ​ເທດ, ​ແຕ່​ເບິ່ງ​ແລ້ວ​ມັນ​ເປັນ​ບັນຫາ​ກັບ​ປີ້ນ​ໄປ​ຮັບ​ໃຊ້​ໃຫ້​ຜູ້​ມີ​ອຳນາດ, ຜູ້​ມີ​ເງິນ. ​ເພາະສະນັ້ນ ຜົນ​ປະ​ໂຫຍ​ດທີ່​ຈະ​ໄດ້​ມາ​ຈາກ​ຊັບ​ສິນ​ລວມຂອງ​ປະ​ເທດ​ເລີຍ​ໄປ​ຕົກ​ຢູ່​ໃນ​ກຳມື​ຂອງ​ພວກ​ສໍ້​ລາດ​ບັງ​ຫລວງ, ສໍ້​ຫລວງ​ບັງ​ລາດ. ຕົກ​ໄປ​ຢູ່​ນຳ​ພວກ​ໂກງ​ກິນ​ບ້ານ​ກິນ​ເມືອງ, ​ໂກງ​ປະຊາຊົນ ຈົນ​ມີ​ຜົນ​ກະທົບ​ຕາມ​ມາ​ຕໍ່​ຄວາມ​ຈະ​ເລີ​ນຂອງ​ຊາດ. ​ໃນ​ແຜນ​ພັດທະນາ​ເສດຖະກິດ​ຂອງ​ພັກ ​ແລະ ລັດຖະບານ​ໄດ້​ຄາດ​ຄະ​ເນ​ປີ 2020 ຕ້ອງ​ນຳພາ​ປະ​ເທດ​ຊາດ​ອອກ​ຈາກ​ຄວາມທຸກ​ຍາກ ​ແລະ ດ້ອຍ​ພັດທະນາ. ​ແຕ່​ກໍ​ບໍ່​ສາມາດ​ປະຕິບັດ​ໄດ້ ຈຶ່ງ​ສືບ​ຕໍ່​ແກ່ຍາວ​ໄປ​ຮອດ​ປີ 2024. ການ​ຄາດ​ຄະ​ເນ​ຈະ​ເປັນ​ໄປ​ຕາມ​ເປົ້າ ຫລື ບໍ່​ນັ້ນ ພວກ​ເຮົາ​ຕ້ອງ​ລໍຄອຍ​ກັນ​ຕໍ່​ໄປ ​ເພາະ​ເຖິງ​ວັນນັ້ນ ຊັບ​​ໃນ​ດິນ ສິນ​ໃນ​ນ້ຳ ກໍ​ໝົດ​ສ້ຽງ​ຈົນ​ກ້ຽງ​ເອີ​ດ​ເຕີ​ດ ຜູ້​ຮັບ​ເຄາະ​ຄື​ລູກ​ຫລານ​ຜູ້​ເກີດ​ໃໝ່​ໃຫຍ່​ລຸນ​ຈະ​ພາກັນ​ເປັນ​ທຸກ​ເພາະ​ຊັບ​ສິນ​ຂອງ​ປະ​ເທດ​ຄົນ​ຍຸກ​ນີ້​ພາກັນ​ຂາຍ​ກິນ​ໝົດ​ແລ້ວ.

ຊັບພະຍາກອນ​ທຳ​ມະ​ຊາດ​ເປັນສົມ​ບັດ​ວົງ​ຄະນາ​ຍາດ​ແຫ່ງ​ຊາດ -    AD conten website - ຊັບພະຍາກອນ​ທຳ​ມະ​ຊາດ​ເປັນສົມ​ບັດ​ວົງ​ຄະນາ​ຍາດ​ແຫ່ງ​ຊາດ
ຊັບພະຍາກອນ​ທຳ​ມະ​ຊາດ​ເປັນສົມ​ບັດ​ວົງ​ຄະນາ​ຍາດ​ແຫ່ງ​ຊາດ - lattana banner - ຊັບພະຍາກອນ​ທຳ​ມະ​ຊາດ​ເປັນສົມ​ບັດ​ວົງ​ຄະນາ​ຍາດ​ແຫ່ງ​ຊາດ
ຊັບພະຍາກອນ​ທຳ​ມະ​ຊາດ​ເປັນສົມ​ບັດ​ວົງ​ຄະນາ​ຍາດ​ແຫ່ງ​ຊາດ - lattana banner 1 - ຊັບພະຍາກອນ​ທຳ​ມະ​ຊາດ​ເປັນສົມ​ບັດ​ວົງ​ຄະນາ​ຍາດ​ແຫ່ງ​ຊາດ
error: Alert: ເນື້ອຫາຂ່າວມີລິຂະສິດ !!