ນ້ຳຕົກຕາດຕາຢຶກເສືອ ສູນລວມນ້ຳຕົກ ແລະ ຕາດນ້ອຍ-ໃຫຍ່

ນ້ຳຕົກຕາດຕາຢຶກເສືອ ເມືອງປາກຊ່ອງ ແຂວງຈຳປາສັກ ເປັນແຫລ່ງທ່ອງທ່ຽວທາງທຳມະຊາດໜຶ່ງ ທີ່ມີຄວາມສວຍສົດງົດງາມ, ອຸດົມສົມບູນໄປດ້ວຍແຫລ່ງນ້ຳທີ່ສວຍງາມ, ເປັນສະຖານທີ່ທ່ອງທ່ຽວທີ່ໄປວັນດຽວທ່ຽວຊົມບໍ່ທົ່ວ ເນື່ອງຈາກເປັນຈຸດສູນລວມນ້ຳຕົກ ແລະ ຕາດນ້ອຍ-ໃຫຍ່ ຫລາຍສາຍມາ ຮວມກັນຢູ່ຈຸດດຽວ.

ນ້ຳຕົກຕາດຕາຢຶກເສືອ ເປັນສະຖານທີ່ມະຫັດສະຈັນທີ່ທຳມະຊາດສ້າງຂຶ້ນ, ເກີດຈາກການມາບັນຈົບຂອງແມ່ນ້ຳ 3 ສາຍ, ເປັນຈຸດສູນລວມນ້ຳຕົກ ແລະ ຕາດນ້ອຍ-ໃຫຍ່ ຫລາຍສາຍມາຮວມກັນຢູ່ຈຸດດຽວ, ເຊິ່ງອ້ອມຮອບດ້ວຍ ນໍ້າຕົກ 8 ແຫ່ງ ໃນບໍລິເວນດຽວກັນ. ຜ່ານການສຳຫລວດ ໃນປັດຈຸບັນ ແມ່ນນ້ຳຕົກທີ່ມີຄວາມສູງແຕ່ 30-200 ແມັດ. ນອກຈາກນີ້ຢູ່ບໍລິເວນດັ່ງກ່າວ, ຍັງມີວັງນໍ້າທຳມະຊາດນ້ຳຂະໜາດໃຫຍ່ ທີ່ນັກທ່ອງທ່ຽວສາມາດລົງໄປສຳຜັດນ້ຳເຢັນໆ ທີ່ໄຫລມາຈາກພູພຽງບໍລິເວນໄດ້. ແຫລ່ງທ່ອງທ່ຽວດັ່ງກ່າວ ແມ່ນໄປທາງເລກທີ 16A ຫ່າງຈາກຕົວເມືອງປາກຊ່ອງ ຮອດເຂດຫ້ວຍກອງ ໄລຍະທາງ 34 ກິໄລແມັດ, ຈາກນັ້ນຈະມີທາງແຍກໄປຫາຕາດ ໄດ້ 2 ເສັ້ນທາງ ຄື: ຂຶ້ນມາແຕ່ເຂື່ອນເຊປຽນ-ເຊນໍ້ານ້ອຍ ແມ່ນໄລຍະທາງ 14 ກິໂລແມັດ ແລະ ຖ້າຈະລົງໄປທາງອັດຕະປື ກ່ອນຈະລົງຄ້ອຍເຊກະຕາມ ຈະມີທາງແຍກນໍ້າຕວດ ປະມານ 5 ກິໂລແມັດ ຮອດຕາດ.