ສະຖານະການອະຫິວາຢູ່ເຢເມນ ຮຸນແຮງທີ່ສຸດເປັນປະຫວັດສາດ
ລາຍງານຂອງອົງການອະນາໄມໂລກລະບຸວ່າ: ສະຖານະການການແຜ່ລະບາດຂອງພະຍາດອະຫິວາຢູ່ເຢເມນ ຢູ່ໃນລະດັບຮ້າຍແຮງທີ່ສຸດໃນໂລກ ໂດຍພົບຜູ້ຕິດເຊື້ອເພີ່ມວັນລະ 5.000 ຄົນ ແລະ ຈຳນວນຜູ້ເສຍຊີວິດມີຫລາຍກວ່າ 1.300 ຄົນ ນັບແຕ່ເດືອນເມສາເປັນຕົ້ນມາ.
+ ອົງການອະນາໄມໂລກສົ່ງວັກແຊງ ປ້ອງກັນອະຫິວາໃຫ້ເຢເມນ 1 ລ້ານຂະໜານ
+ ເຢເມນຜະເຊີນວິກິດຄົນອຶດຫິວ-ອະຫິວາລະບາດໜັກ
ສຳນັກຂ່າວຕ່າງປະເທດລາຍງານຈາກນະຄອນເຈນີວາ ປະເທດສະວິດ ໃນວັນທີ 25 ມິຖຸນານີ້ວ່າ: ອົງການອະນາໄມໂລກ (WHO) ອອກຖະແຫລງການໃນວັນທີ 24 ມິຖຸນາວ່າ: ຈຳນວນຜູ້ຕິດເຊື້ອພະຍາດອະຫິວາຢູ່ເຢເມນນັບແຕ່ທ້າຍເດືອນເມສາຜ່ານມາເພີ່ມຂຶ້ນເປັນຫລາຍກວ່າ 200.000 ຄົນແລ້ວ ຫລື ໂດຍສະເລ່ຍຄືຈະມີຜູ້ຕິດເຊື້ອເພີ່ມຈຳນວນວັນລະປະມານ 5.000 ຄົນ ເຊິ່ງຖ້າປ່ອຍໃຫ້ສະຖານະການເປັນແບບນີ້ຕໍ່ໄປ ທ່າອ່ຽງຜູ້ຕິດເຊື້ອພະຍາດອະຫິວາຢູ່ເຢເມນອາດເພີ່ມເປັນ 300.000 ຄົນພາຍໃນເດືອນສິງຫານີ້, ສ່ວນຈຳນວນຜູ້ເສຍຊີວິດໃນປັດຈຸບັນມີຢ່າງໜ້ອຍ 1.310 ຄົນ.
ທັງນີ້, WHO ປະກາດໃນອາທິດຜ່ານມາວ່າ: ຈະມີການສົ່ງວັກແຊງປ້ອງກັນພະຍາດອະຫິວາຈຳນວນ 1 ລ້ານຂະໜານໄປເຢເມນ ແລະ ການສົ່ງເຈົ້າໜ້າທີ່ລົງພື້ນທີ່ເຄາະປະຕູເຮືອນ ເພື່ອໃຫ້ຄວາມຮູ້ແກ່ປະຊາຊົນກ່ຽວກັບການບໍລິໂພກນ້ຳສະອາດ ແລະ ການຈັດຫານ້ຳສະອາດທີ່ຖືກສຸຂະລັກສະນະ. ເຖິງຢ່າງໃດກໍຕາມ, ລະບົບນ້ຳປະປາຢູ່ເຢເມນໄດ້ຮັບຄວາມເສຍຫາຍຢ່າງໜັກ ນັບແຕ່ເກີດສົງຄາມກາງເມືອງໃນເດືອນມີນາ 2015 ລະຫວ່າງກຸ່ມກະບົດຮູຕີ ເຊິ່ງຍັງຢຶດຄອງນະຄອນຫລວງຊານາໄວ້ໄດ້ຢ່າງໜຽວແໜ້ນ ກັບກອງກຳລັງພັນທະມິດອາຣັບ ນຳໂດຍອາຣັບບີ ຊາອຸດິດ ຍິ່ງເປັນປັດໄຈສົ່ງຜົນໃຫ້ສະຖານະການການແຜ່ລະບາດຂອງພະຍາດອະຫິວາຢູ່ເຢເມນເຂົ້າຂັ້ນຮ້າຍແຮງທີ່ສຸດໃນໂລກ.
