ຄ່າຄອງຊີບແພງຄ່າແຮງຕໍ່າ

ຄ່າຄອງຊີບແພງຄ່າແຮງຕໍ່າ - 555 62 - ຄ່າຄອງຊີບແພງຄ່າແຮງຕໍ່າ
ຄ່າຄອງຊີບແພງຄ່າແຮງຕໍ່າ - AGL banner - ຄ່າຄອງຊີບແພງຄ່າແຮງຕໍ່າ

ໂດຍ: ມຶກບໍ່ແຫ້ງ

ເວົ້າກັນວ່າສປປລາວແມ່ນໜຶ່ງໃນປະເທດທີ່ມີຄ່າຄອງຊີບແພງຫຼາຍຖ້າທຽບໃສ່ ບັນດາປະເທດອ້ອມຂ້າງໃນຂະນະທີ່ ຄ່າແຮງງານນັ້ນຍັງຕໍ່າຢູ່.

ເມື່ອທ້າຍອາທິດທີ່ຜ່ານມາຜູ້ຂຽນໄດ້ໄປຕະຫຼາດສົດແຫ່ງໜຶ່ງທີ່ຖືວ່າອ່າວຖືກກວ່າຕະຫຼາດແຫ່ງອື່ນໆ  ເພື່ອຊື້ອາຫານການກິນໄວ້ໃຫ້ກຸ້ມໜຶ່ງອາທິດສຳລັບຄອບຄົວນ້ອຍທີ່ມີສະມາຊິກ 3-4 ຄົນເຊິ່ງເຮັດໃຫ້ ມີຄວາມແປກໃຈຫຼາຍວ່າເປັນຫຍັງລາຄາອາຫານເພີ່ມສູງກວ່າແຕ່ກ່ອນຫຼາຍຊີ້ນໝູກິໂລລະ 45 ພັນກີບ, ປາທຳມະຊາດທີ່ໂຕອ່າວໃຫຍ່ແດ່ກໍແມ່ນ 45 ຫຼື 50 ພັນຂຶ້ນເມືອ, ບັນດາຜັກຫອມ, ພືດຜັກແລະໝາກໄມ້ ກໍບໍ່ໄດ້ຖືກເລີຍເຊິ່ງຜູ້ຂຽນໃຊເງິນເກືອບ 5​ ແສນກີບແຕ່ໄດ້ອາຫານພຽງແຕ່ໜ້ອຍດຽວເມື່ອທຽບໃສ່ ໄລຍະຫຼັງໆ.

ມີການສຳຫຼວດໜຶ່ງຂອງຕ່າງປະເທດເວົ້າວ່າສປປລາວມີຄ່າຄອງຊີບສູງເປັນອັນດັບສອງຂອງບັນດາປະເທດສະມາຊິກອາຊຽນຮອງຈາກປະເທດສິງກະໂປເທົ່ານັ້ນເຊິ່ງເມື່ອມາຊັ່ງຊາໃສ່ປະສົບການທີ່ເຄີຍເດີນທາງໄປຫຼາຍປະເທດໃນພາກພື້ນຜູ້ຂຽນກໍຄິດວ່າການສຳຫຼວດດັ່ງກ່າວນັ້ນໃກ້ຄຽງກັບຄວາມຈິງບໍ່ໜ້ອຍເລີຍ.

ເມື່ອເປັນເຊັ່ນນັ້ນຈຶ່ງມາຄິດໃສ່ ກຸ່ມຄົນໃນວົງກວ້າງຂອງສັງຄົມເຮົາໂດຍສະເພາະກຸ່ມທີ່ມີລາຍຮັບຂັ້ນຕໍ່າທີ່ມີເງິນເດືອນ1.1-1.2 ລ້ານກີບນັ້ນກໍຖືວ່າຢູ່ໃນເມືອງລຳບາກຫຼາຍຖ້າເຂົາເຈົ້າຫາກຕ້ອງລ້ຽງສະມາຊິກໃນຄອບຄົວ, ບໍ່ເວົ້າເຖິງການສຶກສາ, ບໍ່ເວົ້າເຖິງການປິ່ນປົວພະຍາດເທື່ອພຽງແຕ່ຊື້ອາຫານແລະທີ່ຜັກພາອາໄສກໍບໍ່ພຽງພໍແລ້ວແລະເງິນເດືອນໃນກຸ່ມນີ້ຂອງລາວຖືວ່າຈັດໃນກຸ່ມທີ່ຕໍ່າສຸດໃນອາຊຽນ.

ບໍ່ສະເພາະແຕ່ແຮງງານຂັ້ນຕໍ່າທີ່ວ່າມາພະນັກງານລັດທີ່ເງິນເດືອນ 1.5-2 ລ້ານກີບກໍຍັງຟືດເຄືອງຫຼາຍແລ້ວໃນຈຳນວນເງິນດັ່ງກ່າວຖ້າຫາກໄຈ້ແຍກອອກມາຕາມລາຍຈ່າຍປະຈຳວັນຂອງຄົວເຮືອນໜຶ່ງກໍຈະເຫັນວ່າຄວາມສະຖຽນລະພາບທາງການເງິນຂອງຄອບຄົວບອບບາງທີ່ສຸດແລະສ່ຽງຕໍ່ການເປັນໜີ້ສິນໃນເມື່ອມີເຫດຈຳເປັນຕ່າງໆ.

ຄ່າຄອງຊີບແພງຄ່າແຮງຕໍ່າ - Wave100S AD to Website 2020 0 - ຄ່າຄອງຊີບແພງຄ່າແຮງຕໍ່າ

ຊໍ້າບໍ່ໜໍາເມື່ອມາພົບພໍ້ກັບ ການລະບາດຂອງພະຍາດໂຄວິດ-19 ທີ່ທຳລາຍລະບົບເສດຖະກິດຂອງໂລກກໍຄືຂອງສປປລາວເຮົາເພພັງໄປບໍ່ແມ່ນໜ້ອຍ, ປະຊາຊົນບໍ່ມີວຽກເຮັດງານທຳບໍ່ມີລາຍໄດ້ ເປັນຈຳນວນຫຼວງຫຼາຍເຊິ່ງເປັນສິ່ງທີ່ໜ້າເປັນຫ່ວງທີ່ສຸດ.

ພ້ອມນັ້ນຍ້ອນຂໍ້ຈຳກັດຕ່າງໆ ເນື່ອງຈາກການລະບາດພະຍາດໂຄວິດ-19 ນີ້ ເຮັດໃຫ້ເສດຖະກິດປະເທດຟືດເຄືອງຍົກຕົວຢ່າງການທ່ອງທ່ຽວທີ່ເປັນແຫຼ່ງລາຍຮັບໜຶ່ງທີ່ສຳຄັນຂອງສປປລາວແມ່ນກະທົບໜັກທີ່ສຸດເຊິ່ງ 6​ ເດືອນຕົ້ນປີນີ້ ນັກທ່ອງທ່ຽວຫຼຸດລົງຮອດ 60% ແລະຂະແໜງການອື່ນໆ ກໍກະທົບເຊັ່ນກັນນັ້ນກໍໝາຍວ່າລັດຖະບານເຮົາກໍມີລາຍໄດ້ໜ້ອຍແຕ່ຍັງມີໜີ້ສິນຫຼາຍເຊິ່ງເປັນເວລາທີ່ຫຍຸ້ງຍາກສຳລັບປະເທດເຮົາທີ່ສຸດ.

ເມື່ອເປັນເຊັ່ນນັ້ນພວກເຮົາຄວນເຮັດແນວໃດ? ທາງເລືອກໜຶ່ງທີ່ພວກເຮົາສາມາດເຮັດໄດ້ ກໍຄືການເພີ່ມພູມຜະລິດຜົນດ້ວຍຕົນເອງ. ຄົນລາວອາດຈະໂຊກດີທີ່ວ່າຍັງມີດິນກ້ວາງຂວາງປະຊາກອນຍັງບໍ່ຫຼາຍຍູທ່າງທຳການຜະລິດທີ່ເປັນມູນເຊື້ອພວກເຮົາໂດຍການໝູນໃຊ້ ດິນທີ່ອຸດົມສົມບູນ, ປຸ໋ຍທຳມະຊາດພໍໃຫ້ສາມາດຜະລິດອາຫານເຊິ່ງແບ່ງເບົາລາຍຈ່າຍຂອງຄອບຄົວ.

ລອງມະໂນພາບເບິ່ງຖ້າວ່າພວກເຮົາຢູ່ເມືອງຫຼວງຂອງປະເທດໃດໜຶ່ງໃນພາກພື້ນທີ່ພວກເຮົາບໍ່ມີຕອນດິນພໍປູກຝັງນັ້ນເມື່ອບໍ່ມີວຽກແລ້ວກໍຈະລຳບາກທີ່ສຸດໃນການດຳລົງຊີບຢູ່ໄດ້, ເພາະສະນັ້ນໃນທ່າມກາງທີ່ເຂົາຢາກໝາກແພງຄືແນວນີ້ ພວກເຮົາກໍຄວນພາກັນເພີ່ມທະວີການຜະລິດໃຫ້ຫຼາຍທີ່ສຸດ, ເມື່ອສິນຄ້າສົ່ງເຂົ້າຕະຫຼາດຫຼາຍກໍຍິ່ງຈະເຮັດໃຫ້ ລາຄາຖືກລົງ, ຄ່າຄອງຊີບຖືກລົງພວກເຮົາກໍຢູ່ໄດ້.

ຄ່າຄອງຊີບແພງຄ່າແຮງຕໍ່າ -    AD conten website - ຄ່າຄອງຊີບແພງຄ່າແຮງຕໍ່າ
ຄ່າຄອງຊີບແພງຄ່າແຮງຕໍ່າ - lattana banner - ຄ່າຄອງຊີບແພງຄ່າແຮງຕໍ່າ
ຄ່າຄອງຊີບແພງຄ່າແຮງຕໍ່າ - lattana banner 1 - ຄ່າຄອງຊີບແພງຄ່າແຮງຕໍ່າ
error: Alert: ເນື້ອຫາຂ່າວມີລິຂະສິດ !!