ສະຫລຸບຜົນສຳເລັດການຈັດຕັ້ງປະຕິບັດກິດຈະກຳປ້ອງກັນພະຍາດໂຄວິດ-19

ໃນວັນທີ 27 ສິງຫານີ້ ທີ່ນະຄອນຫລວງວຽງຈັນ, ໄດ້ສະຫລຸບຜົນສຳເລັດ ແລະ ຖອດຖອນບົດຮຽນໃນການຈັດຕັ້ງປະຕິບັດກິດຈະກຳປ້ອງກັນພະຍາດໂຄວິດ-19 ໂດຍເຂົ້າຮ່ວມຂອງ ທ່ານ ດຣ. ສີສະຫວາດ ສຸດທະນີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ແລະ ທ່ານ ໄມເຄີລ ຣອນນິ້ງ ຜູ້ຕາງໜ້າອົງການ USAID ປະຈຳລາວ ພ້ອມພາກສ່ວນກ່ຽວຂ້ອງເຂົ້າຮ່ວມ.

ບັນດາຜົນສຳເລັດຂອງໂຄງການປະກອບມີ: ການສ້າງຂີດຄວາມສາມາດ ຂອງສາຍດ່ວນແຫ່ງຊາດ ໃນການປະຕິບັດງານ 24 ຊົ່ວໂມງຕໍ່ມື້ ແລະ ສາມາດຮັບສາຍໄດ້ 100.000 ກວ່າສາຍ, ການຈັດຝຶກອົບຮົມໃຫ້ແກ່ພະແນກສາທາລະນະສຸກຂັ້ນແຂວງໄດ້ 33% ກ່ຽວກັບມາດຕະການປ້ອງກັນພະຍາດໂຄວິດ-19 ໃນສະຖານທີ່ ທີ່ບໍ່ແມ່ນສະຖານທີ່ສໍາລັບການຮັກສາທາງການແພດ ແຕ່ເປັນບ່ອນທີ່ມີຄວາມສ່ຽງສູງ (ສະຖານີລົດເມ ແລະ ຕະຫລາດ), ການປັບປຸງຂັ້ນຕອນໃນການກວດກັ່ນຕອງຢູ່ 16 ດ່ານຊາຍແດນ ແລະ ຕິດຕາມຈຸດສ່ຽງ ທີ່ມີການເຄື່ອນຍ້າຍຂອງປະຊາກອນ 30 ຈຸດໃນທົ່ວປະເທດ, ປະຖົມນິເທດໃຫ້ແກ່ຮ້ານຂາຍຢາເອກະຊົນຫລາຍກ່ວາ 2.500 ຮ້ານໃນທົ່ວປະເທດ ກ່ຽວກັບການກວດຊອກຫາກໍລະນີຜູ້ຕິດ ເຊື້ອພະຍາດໂຄວິດ-19 ແລະ ວິທີການນໍາສົ່ງຄົນເຈັບທີ່ຖືກຕ້ອງ, ຂະຫຍາຍຊ່ອງທາງການສື່ສານກ່ຽວກັບຄວາມສ່ຽງ ລວມທັງຊ່ອງທາງອອນລາຍ, ລະດົມເຄືອຂ່າຍອົງການຈັດຕັ້ງທາງສັງຄົມ ເພື່ອໃຫ້ເຂົ້າເຖິງຊຸມຊົນ, ຊົນນະບົດ ແລະ ຊົນເຜົ່າໃນທົ່ວປະເທດ, ລວມທັງແຈກໃບປິວ ກ່ຽວກັບການຫລຸດຜ່ອນຄວາມສ່ຽງໃນການຕິດເຊື້ອພະຍາດ-ໂຄວິດ ຈຳນວນ 50.000 ແຜ່ນໃນທົ່ວປະເທດ.

ໂອກາດນີ້, ທ່ານ ດຣ. ສີສະຫວາດ ສຸດທະນີລະໄຊ ກ່າວວ່າ: ໂຄງການນີ້, ໄດ້ຊ່ວຍເຮັດໃຫ້ຂະ ແໜງສາທາລະນະສຸກຂອງລາວ ໄດ້ຮັບຜົນສຳເລັດໃນເບື້ອງຕົ້ນ ໃນວຽກງານສະກັດກັ້ນ ແລະ ປ້ອງກັນການແຜ່ລະບາດພະຍາດໂຄວິດ-19, ພ້ອມກັນນັ້ນກໍໄດ້ສະແດງຄວາມຮູ້ບຸນຄຸນ ແລະ ຂອບໃຈມາຍັງສະ ຫະລັດອາເມລິກາ ໂດຍຜ່ານອົງການ USAID ທີ່ໃຫ້ການຊ່ວຍເຫລືອ ແລະ ສະໜັບສະໜູນໃນຄັ້ງນີ້, ເຊິ່ງເປັນການປະກອບທີ່ສຳຄັນ ເຂົ້າໃນວຽກງານປ້ອງກັນພະຍາດດັ່ງກ່າວ.

ທ່ານ ໄມເຄີລ ຣອນນິ້ງ ກ່າວວ່າ: ສະຫະລັດອາເມລິກາ ມີຄວາມພາກພູມໃຈທີ່ໄດ້ເຮັດວຽກຮ່ວມກັບ ແລະ ສະໜັບສະໜູນລັດຖະບານລາວ ໃນປ້ອງກັນການແຜ່ລະບາດຂອງພະຍາດໂຄວິດ-19, ພ້ອມຢືນຢັນຈະສືບຕໍ່ຢືນຄຽງຂ້າງ ແລະ ສະໜັບສະໜູນລັດຖະບານລາວ ໃນການປົກປ້ອງຊີວິດຂອງປະຊາຊົນລາວ ຈາກການລະບາດພະຍາດດັ່ງກ່າວໃນຕໍ່ໜ້າ​.​ ສະຫະລັດອາເມລິກາ, ໂດຍຜ່ານອົງການ USAID ແລະ ສູນຄວບຄຸມ ແລະ ປ້ອງກັນພະຍາດ ຂອງສະຫະລັດອາເມລິກາ ໄດ້ສະໜອງທຶນຊ່ວຍເຫລືອຫລາຍກວ່າ 7,5 ລ້ານໂດລາສະຫະລັດ ເພື່ອສະໜັບສະໜູນລັດຖະບານລາວ ໃນການຕ້ານ ແລະ ຄວບຄຸມການແຜ່ລະບາດຂອງພະຍາດໂຄວິດ-19 ຢູ່ ສປປ ລາວ. ໃນນີ້ປະກອບມີ ການສະໜອງອຸປະກອນຂອງຫ້ອງວິເຄາະ ແລະ ອຸປະກອນການແພດ, ການຊ່ວຍເຫລືອດ້ານວິຊາການ, ການສື່ສານກ່ຽວກັບຄວາມສ່ຽງ ແລະ ການຝຶກອົບຮົມໃຫ້ແກ່ພະນັກງານສາທາລະນະສຸກ ທີ່ຢູ່ແນວໜ້າຫລາຍພັນຄົນໃນທົ່ວປະເທດ.

 

error: Alert: Content is protected !!