ຜົນກອງປະຊຸມລັດຖະບານປະຈໍາເດືອນມິຖຸນາ

- advert banner 728 90 728x90 - ຜົນກອງປະຊຸມລັດຖະບານປະຈໍາເດືອນມິຖຸນາ

ກອງປະຊຸມລັດຖະບານສະໄໝສາມັນປະຈໍາເດືອນມິຖຸນາ 2017 ໄດ້ຈັນຂຶ້ນໃນວັນທີ 22-23 ມິຖຸນານີ້, ໂດຍການເປັນປະທານຂອງທ່ານນາຍົກລັດຖະມົນຕີ ທອງລຸນ ສີສຸລິດ. ກອງປະຊຸມໄດ້ຄົ້ນຄວ້າ ແລະ ພິຈາລະນາຫລາຍບັນຫາສໍາຄັນຄື: ຮັບຟັງການລາຍງານກ່ຽວກັບສະພາບພົ້ນເດັ່ນຂອງພາກພື້ນ ແລະ ສາກົນ, ວຽກງານປ້ອງກັນຊາດ-ປ້ອງກັນຄວາມສະຫງົບ ແລະ ການແກ້ໄຂບັນຫາຫຍໍ້ທໍ້ໃນສັງຄົມ, ຮັບຟັງການລາຍງານການຈັດຕັ້ງປະຕິບັດແຜນຈັດເກັບລາຍຮັບ-ລາຍຈ່າຍປະຈຳງວດ 2 ຂອງປີ 2017, ຜົນການລົງກວດກາການນໍາເຂົ້າພາຫະນະທີ່ບໍ່ຖືກຕ້ອງ ແລະ ປັບປຸງບັນດາດໍາລັດວິສາຫະກິດ ແລະ ສະພາບການຄຸ້ມຄອງອັດຕາແລກປ່ຽນ, ການກະກຽມໃຫ້ແກ່ການຊຸກຍູ້ການຜະລິດລະດູຝົນ ແລະ ມາດຕະການຄຸ້ມຄອງການລັກລອບນຳສັດຈາກຕ່າງປະເທດ ແລະ ສົ່ງເສີມການຜະລິດພາຍໃນໃຫ້ແຂງແຮງ, ຟັງລາຍງານກ່ຽວກັບການຈັດຕັ້ງປະຕິບັດຄຳສັ່ງເລກທີ 15/ນຍ ກ່ຽວກັບການແກ້ໄຂບັນຫາໄມ້ໃນໄລຍະຜ່ານມາ ແລະ ບາງນະໂຍບາຍ, ມາດຕະການຈັດຕັ້ງປະຕິບັດໃຫ້ມີປະສິດທິຜົນໃນຕໍ່ໜ້າ, ປະກອບຄຳເຫັນໃສ່ເອກະສານວຽກງານຄຸ້ມຄອງ ແລະ ພັດທະນາທີ່ດິນໃນໄລຍະໃໝ່ ເພື່ອສະເໜີຄະນະບໍລິຫານງານສູນກາງພັກພິຈາລະນາອອກເປັນມະຕິ, ການຈັດຕັ້ງປະຕິບັດກົດໝາຍ ແລະ ນິຕິກໍາທີ່ກ່ຽວຂ້ອງເພື່ອຄຸ້ມຄອງຮ້ານກິນດື່ມ ແລະ ຮ້ານບັນເທິງຢູ່ໃກ້ສະຖານທີ່ການສຶກສາ ແລະ ໂຮງໝໍໃນທົ່ວປະເທດ. ພ້ອມທັງປຶກສາຫາລືແຜນການສ້າງ ແລະ ປັບປຸງກົດໝາຍທີ່ຈະນຳເຂົ້າພິຈາລະນາໃນກອງປະຊຸມສະພາແຫ່ງຊາດເທື່ອທີ 4 ຂອງສະພາແຫ່ງຊາດຊຸດທີ VIII ແລະ ຕໍ່ສະພາບການຈັດຕັ້ງປະຕິບັດແຜນງົບປະມານແຫ່ງລັດນັ້ນກອງປະຊຸມໄດ້ແນະນໍາໃຫ້ພາກສ່ວນກ່ຽວຂ້ອງເອົາໃຈໃສ່ສູ້ຊົນບຸກບືນຜ່ານຜ່າ ເພື່ອເຮັດໃຫ້ເສດຖະກິດມີຄວາມເຂັ້ມແຂງ ແລະ ກັບຄືນສູ່ສະພາບປົກກະຕິໂດຍໄວ, ສືບຕໍ່ຈັດເກັບລາຍຮັບເຂົ້າງົບປະມານໃຫ້ໄດ້ຄົບຖ້ວນຕາມກໍານົດເວລາ, ມີຄວາມໂປ່ງໃສ ເພື່ອຫລຸດຜ່ອນຊ່ອງຫວ່າງການຮົ່ວໄຫລຂອງງົບປະມານ, ກໍານົດມາດຕະການໃນການສຶກສາອົບຮົມ, ໄປຄຽງຄູ່ກັບການຊຸກຍູ້ສົ່ງເສີມຫົວໜ່ວຍທຸລະກິດໃນການລົງທຶນ, ໃນນັ້ນ ຕ້ອງໄດ້ມີການຕິດຕາມກວດກາຄຸນນະພາບ ແລະ ປະສິດທິຜົນໃນການລົງທຶນຂອງໂຄງການຕ່າງໆຢ່າງຄັກແນ່, ອັນສໍາຄັນຮອດທ້າຍປີນີ້ການຈັດເກັບລາຍຮັບເຂົ້າງົບປະມານຕ້ອງໃຫ້ໄດ້ຕາມແຜນ ຫລື ລື່ນແຜນວາງໄວ້, ໃຫ້ເອົາໃຈໃສ່ແກ້ໄຂສະພາບຄ່ອງຂອງທະນາຄານໂດຍໄວ, ພ້ອມທັງເອົາໃຈໃສ່ດຶງດູດ ແລະ ລະດົມເງິນຕາຕ່າງປະເທດຈາກປະຊາຊົນໃຫ້ມາເຂົ້າສູ່ລະບົບທະນາຄານຫລາຍຂຶ້ນ ເປັນຕົ້ນ: ການລະດົມເງິນຝາກ.

- new3 - ຜົນກອງປະຊຸມລັດຖະບານປະຈໍາເດືອນມິຖຸນາ

ສໍາລັບສະພາບການນໍາເຂົ້າລົດບໍ່ຖືກຕ້ອງ ແລະ ປອມແປງເອກະສານນັ້ນແມ່ນໃຫ້ສືບຕໍ່ຈັດຕັ້ງປະຕິບັດຕາມແຈ້ງການຫ້ອງວ່າການສໍານັກງານນາຍົກລັດຖະມົນຕີ ກ່ຽວກັບການແກ້ໄຂລົດນໍາເຂົ້າທີ່ບໍ່ຖືກຕ້ອງໃນຂອບເຂດທົ່ວປະເທດ. ນອກຈາກນີ້ ກໍຕ້ອງໄດ້ສືບຕໍ່ແກ້ໄຂຂັ້ນຂອດທີ່ເປັນສິ່ງອຸດຕັນຕໍ່ການຜະລິດຂອງປະຊາຊົນ, ໂດຍສະເພາະແມ່ນການສະໜອງເງິນກູ້, ການປູກ, ການລ້ຽງ, ການປັບປຸງສົ່ງເສີມ ແລະ ສະໜອງແນວພັນພືດ ແລະ ສັດ ໃຫ້ປະຊາຊົນ ເພື່ອເຮັດໃຫ້ການຜະລິດໄດ້ທັງດ້ານປະລິມານ ແລະ ຄຸນນະພາບ, ສາມາດສົ່ງອອກຂາຍພາຍໃນ ແລະ ຕ່າງປະເທດ, ສືບຕໍ່ຕິດຕາມກວດກາບັນດາໂຮງເລື່ອຍໂຮງຊອຍທີ່ມີຄໍາສັ່ງໃຫ້ເຊົາ ຫລື ຍຸບໄປແລ້ວນັ້ນເພື່ອບໍ່ໃຫ້ລັກລອບເຮັດອີກ, ໃຫ້ສືບຕໍ່ຍຸບເລີກບັນດາໂຮງງານທີ່ຍັງເຫລືອໃຫ້ສໍາເລັດໂດຍໄວ, ສໍາລັບການເກັບກູ້, ປະມູນຂາຍ ແລະ ນໍາໃຊ້ໄມ້ທີ່ຕັດແລ້ວນັ້ນແມ່ນໃຫ້ສືບຕໍ່ກວດກາ, ອອກນະໂຍບາຍ ແລະ ນິຕິກໍາຕື່ມ ເພື່ອແກ້ໄຂບັນຫາໃຫ້ຖືກຈຸດໃນການປະມູນ, ເຮັດໃຫ້ຖືກກັບນະໂຍບາຍ ແລະ ບໍ່ໃຫ້ມີຊ່ອງຫວ່າງ, ເອົາໃຈໃສ່ອໍານວຍຄວາມສະດວກໃຫ້ແກ່ຜູ້ປະມູນ ແລະ ຜູ້ຊື້, ໄປພ້ອມໆກັບການປາບປາມຜູ້ທີ່ລັກລອບຕັດ ແລະ ສົ່ງອອກໄມ້ທີ່ບໍ່ຖືກຕ້ອງຢ່າງເຂັ້ມງວດ.

- lattana 1 - ຜົນກອງປະຊຸມລັດຖະບານປະຈໍາເດືອນມິຖຸນາ
error: Content is protected !!