ເດືອນ​ກັນຍາ​ຫັນ​ໜ້າ​ເຂົ້າສູ່​ການ​ຮໍ່າຮຽນ

ເດືອນ​ກັນຍາ​ຫັນ​ໜ້າ​ເຂົ້າສູ່​ການ​ຮໍ່າຮຽນ - 555 - ເດືອນ​ກັນຍາ​ຫັນ​ໜ້າ​ເຂົ້າສູ່​ການ​ຮໍ່າຮຽນ
ເດືອນ​ກັນຍາ​ຫັນ​ໜ້າ​ເຂົ້າສູ່​ການ​ຮໍ່າຮຽນ - Untitled design - ເດືອນ​ກັນຍາ​ຫັນ​ໜ້າ​ເຂົ້າສູ່​ການ​ຮໍ່າຮຽນ

ໂດຍ: ທິດ​ກໍ່າ

ການ​ເປີດ​ສົກຮຽນ​ໃໝ່ 2020-2021 ​ໄດ້​ເລີ່​ມຂຶ້ນ​ແລ້ວ. ຕາມ​ປົກກະຕິ​ການ​ເປີດ​ສົກຮຽນ​ໃໝ່​ຂອງ​ຊັ້ນປະຖົມ ​ແລະ ມັດທະຍົມ​ແມ່ນວັນ​ທີ 1 ​ເດືອນກັນຍາ ຫລື​ວ່າ ​ເດືອນ 9 ປີ 2020 ນີ້​ເອງ. ປີ​ນີ້​ວັນ​ທີ 1 ກັນຍາ ພໍດີ​ຖືກ​​ເປະ​ກັບ​ວັນ​ອັງຄານ ​ແນ່ນອນ​ຖ້າ​ບໍ່​ມີ​ໂຣກ​ໂຄ​ວິດ-19 ມາ​ອາ​ລະວາ​ດ ການ​ຮໍ່າຮຽນ​ຂອງ​ລູກ​ຫລານ​ເຮົາ​ໃນ​ສົກຮຽນ​ປີ​ນີ້​ກໍ​ອາດ​ຈະ​ບໍ່​ມີ​ການ​ປ່ຽນ​ແປງ. ​ແຕ່​ວ່າ​ແນວ​ໃດ​ກໍ​ດີ, ​ເພື່ອ​ເປັນ​ການ​ປ້ອງ​ກັນ​ບໍ່​ໃຫ້​​ພະຍາດ​ໂຄ​ວິດ-19 ມາ​ລະບາດ​ຊ້ຳ​ເຕີມ​ທຸກ​ສະ​ຖາ​ບັນ​ການ​ສຶກສາ​ຕ້ອງ​ມີ​ວິທີ​ການ​ປ້ອງ​ກັນ​ສະກັດ​ກັ້ນ ​ແລະ ມີ​ກາ​ນຄັດ​ກອງ​ຢ່າງ​ລະອຽດ​ເດັດຂາດ ​ເພາະ​ເຊື້ອພະຍາດ​ໂຄ​ວິດ-19 ມັນ​ຍັງ​ບໍ່​ທັນ​ໄດ້​ໜີ​ຈາກ​ໂລກ​ໃບ​ນີ້​ໄປ​ຢ່າງ​ຂາດ​ຕົວ, ຕ່າງ​ແຕ່​ວ່າ​ທຸກ​ປະ​ເທດ​ໃນ​ໂລກ​ໃຜ​ກໍ​ມີ​ວິທີ​ປ້ອງ​ກັນ ​ແລະ ອອກ​ແຮງ​ຕ້ານ​ພໍ​ໃຜ​ພໍ​ມັນ. ຫລ້າ​ສຸດ ມາ​ຮອດ​ວັນ​ທີ 27 ສິງຫາ ມີ​ຄົນ​ທົ່ວ​​ໂລກ​ຕິດ​ເຊື້ອ​ໂຄ​ວິດ-19 ​ເຖິງ 24 ລ້ານ​ກວ່າ​ຄົນ​ແລ້ວ ​ໃນ​ນີ້​ໄດ້​ເສຍ​ຊີວິດ​ໄປ​ແລ້ວ 8 ​ແສນ​ກວ່າ​ຄົນ ​ແລະ ປິ່ນປົວ​ໃຫ້ຫາ​ຍດີ 16 ລ້ານ​ກວ່າ​ຄົນ. ສ່ວນ​ປະ​ເທດ​ລາວ​ຂອງ​ພວກ​ເຮົາ​ຍັງ​ຢູ່​ໃນ​ສະຖິຕິ​ເກົ່າ ຄື​ມີ​ຜູ້​ຕິດ​ເຊື້ອທັງ​ໝົດ​ພຽງ 22 ຄົນ ​ແລະ ມາ​ຮອດ​ປັດຈຸບັນ​ໄດ້​ປິ່ນປົວ​ໃຫ້ຫາ​ຍດີ​ທັງ​ໝົດທຸກ​ຄົນ​ແລ້ວ.

​ແນວ​ໃດ​ກໍ​ດີ, ​ໃນ​ໂອກາດ​ເປີດ​ສົກຮຽນ​ໃໝ່​ປີ​ນີ້ ທ່ານ​ລັດຖະມົນຕີ​ກະຊວງ​ສຶກສາ​ທິການ ​ແລະ ກິລາ ທ່ານ ນາງ ​ແສງ​ເດືອນ ຫລ້າ​ຈັນທະ​ບູນ ກໍ​ໄດ້​ຖະ​ແຫລ​ງຂ່າວ​ຕໍ່​ສື່​ມວນ​ຊົນ​ວ່າ: ສຳລັບ​ສົກຮຽນ​ປີ​ນີ້​ຈະ​ຖື​ເອົາ​ວັນ​ທີ 1 ກັນຍາ 2020 ​ເປັນ​ວັນ​ເປີດ​ສົກຮຽນ​ໃໝ່​ເໝືອນ​ດັ່ງ​ປີຜ່ານມາ. ສົກຮຽນ​ປີ​ນີ້ ຜູ້​ບໍລິຫານ​ການ​ສຶກສາ ​ແລະ ຄູ​ອາຈານ​ທັງຫລາຍ​ຈະ​ຕ້ອງ​ໄດ້​ທົບ​ທວນຄືນ​ກ່ຽວ​ກັບ​ຮູບ​ແບບ​ການ​ຮຽນ-ການ​ສອນ ຈະ​ປ່ຽນ​ຫຍັງ​ແດ່ ​ແລະ ອັນ​ໃດ​​ແດ່ ​ເພື່ອ​ໃຫ້​ກາຍ​ເປັນຄວາມ​ຊິນ​ເຄີຍ​ໃນ​ການ​ດຳລົງ​ຊີວິດ​ປະຈຳ​ວັນ​ແບບ​ໃໝ່ (New Normal) ​ແລະ ຈະ​ນຳ​ໃຊ້​ເຕັກ​ໂນ​ໂລ​ຊີ​ເຂົ້າມາ​ຊ່ວຍ​ການ​ສິດສອນ​ແນວ​ໃດ ​ເພື່ອ​ໃຫ້​ເກີດ​ປະ​ໂຫຍ​ດສູງ​ສຸດ ​ໂດຍ​ສະ​ເພາະ​ແມ່ນ​ການ​ພັດທະນາ​ວິຊາ​ຊີບ​ຄູ. ນອກຈາກ​ນີ້ ທາງ​ກະຊວງ​ສຶກສາ​ທິການ ​ແລະ ກິລາ ຈະ​ໄດ້​ຈັດ​ພິມ ​ແລະ ​ແຈກ​ຢາຍ​ປຶ້ມ​ແບບຮຽນ​ໃຫ້​ພຽງພໍ.

​ໄປ​ຄຽງ​ຄູ່​ກັນນັ້ນ, ກໍ​ພ້ອມ​ກັນ​ສືບ​ຕໍ່​ປະຕິບັດ​ມາດ​ຕະການ​ປ້ອງ​ກັນ​ຄວບ​ຄຸມ ​ແລະ ​ແກ້​ໄຂ​ການລະບາດ​ຂອງ​ເຊື້ອພະຍາດ​ໂຄ​ວິດ-19 ຢ່າງ​ເຂັ້ມງວດ. ຮຽກຮ້ອງ​ໃຫ້​ສະ​ຖາ​ບັນ​ການ​ສຶກສາທຸກ​ແຫ່ງ​ຈົ່ງ​ກຽມ​ຄວາມ​ພ້ອມ​ດ້ານ​ບຸກຄະລາ​ກອນ, ຈັດການ​ດ້ານ​ສຸຂະ​ສຶກສາ​ໃຫ້​ແກ່​ຜູ້​ບໍລິຫານ-ຄູ​ອາຈານ ​ແລະ ນັກຮຽນ​ນັກ​ສຶກສາ​ປະຕິບັດ​ມາດ​ຕະການ​ຮັກສາ​ໄລຍະ​ຫ່າງ, ​ໃສ່​ຜ້າ​ອັດ​ປາກ, ອັດ​ດັງ, ສົ່ງ​ເສີມ​ການ​ລ້າງ​ມື​ໃຫ້​ເປັນ​ປົກກະຕິ ​ໃຫ້​ກາຍ​ເປັນນິ​ໃສ ​ແລະ ວັດທະນະທຳ​ແບບ​ໃໝ່​ໃນ​ຍຸກ​ໂລກາ​ພິວັດ. ສຸດ​ທ້າຍ​ທ່ານ​ລັດຖະມົນຕີ​ສຶກສາ ຍັງ​ໄດ້​ຮຽກຮ້ອງ​ມາ​ຍັງ​ຜູ້​ບໍລິຫານ​ການ​ສຶກສາ, ຄູ-ອາຈານ, ລູກ​ຫລານ​ນັກຮຽນ, ນັກ​ສຶກສາ ຕະຫລອດ​ຮອດ​ພໍ່​ແມ່​ຜູ້​ປົກຄອງ ​ແລະ ທົ່ວ​ສັງຄົມ ຈົ່ງ​ພ້ອມ​ກັນ​ສຸມ​ທຸກ​ສະຕິ​ປັນຍາ​ສ້າງ​ທ່າ​ແຮງ​ຂອງ​ຕົນ ​ເພື່ອ​ເຂົ້າຮ່ວມ ​ແລະ ປະກອບສ່ວນ​ຕໍ່​ວຽກ​ງານ​ສຶກສາ, ສ້າງ​ສະພາບ​ແວດ​ລ້ອມ​ຕາມ​ທິດ​ຮຽນ​ຮູ້ຕະຫລອດ​ຊີວິດ, ມີ​ຄຸນ​ນະພາ​ບ, ມີ​ຄວາມ​ເທົ່າ​ທຽມ ​ແລະ ປະຊາຊົນ​ບັນດາ​ເຜົ່າ ບໍ່​ວ່າ​ເຂົາ​ເຈົ້າຈະ​ຢູ່​ບ່ອນ​ໃດ​ໃນ ສປປ ລາວ ກໍ​ສາມາດ​ເຂົ້າ​ເຖິງ​ໄດ້.

ເດືອນ​ກັນຍາ​ຫັນ​ໜ້າ​ເຂົ້າສູ່​ການ​ຮໍ່າຮຽນ - Wave100S AD to Website 2020 0 - ເດືອນ​ກັນຍາ​ຫັນ​ໜ້າ​ເຂົ້າສູ່​ການ​ຮໍ່າຮຽນ

​ແນວ​ໃດ​ກໍ​ຕາມ, ຖື​ວ່າການ​ເປີດ​ສົກຮຽນ​ປີ​ນີ້​ຕ້ອງ​ເປັນ​ໄປ​ຕາມ​ວາລະ ​ເພື່ອ​ອະນາຄົດ​ຂອງ​ປະ​ເທດ​ຊາດ ກໍ​ຄື​ອະນາຄົດ​ຂອງ​ລູກ​ຫລານ​ຜູ້​ທີ່​ຈະ​ເປັນ​ຊັບພະຍາກອນ​ອັນ​ປະ​ເສີດ​ຂອງ​ຊາດ​ໃນ​ອະນາຄົດ. ​ໃນ​ຄວາມ​ເປັນ​ຈິງ​ແລ້ວ ນັບ​ແຕ່​ປະ​ເທດ​ເຮົາ​ມີ​ໂຄງການ​ປັບປຸງ​ລະບົບ​ການ​ສຶກສາ​ໃນ​ສິບ​ກວ່າ​ປີ​ມາ​ນີ້ ​ເຫັນ​ວ່າ​ຄຸນ​ນະພາ​ບການ​ຮຽນ-ການ​ສອນ​ຂອງ​ຄູ-ອາຈານ, ນັກຮຽນ​ນັກ​ສຶກສາ​ນັບ​ມື້ດີ​ຂຶ້ນ​ເທື່ອ​ລະ​ກ້າວ ສິ່ງ​ທີ່​ສະ​ແດງ​ອອກ​ໃຫ້​ເຫັນ​ຢ່າງ​ຈະ​ແຈ້ງ​ກໍ​ຄື ສາມາດ​ໄປ​ທຽບ​ຖານ​ກັບ​ພາກພື້ນ ​ແລະ ສາກົນ​ໄດ້ ​ເປັນຕົ້ນ​ໃນ​ເວລາ​ໄປ​ຮ່ວມ​ແຂ່ງຂັນ​ສອບ​ເສັງ​ໃນ​ສາຂາ​ວິຊາ​ຕ່າງໆ​ໃນ​ລະດັບ​ພາກພື້ນ ​ແລະ ສາກົນ​ກໍສາມາດ​ຍາດ​ໄດ້​ຄະ​ແນນດີ​ມີ​ລາງວັນ​ມາ​ໃຫ້​ຕົນ​ເອງ ​ແລະ ​ເປັນ​ໃບ​ໜ້າ​ໃບ​ຕາ​ຂອງ​ປະ​ເທດ​ຊາດ. ຄາດ​ວ່າ​ໃນ​ສົກຮຽນ​ປີ​ນີ້​ຖ້າ​ບໍ່​ມີ​ໄພພິບັດ​ທາງ​ທຳ​ມະ​ຊາດ ​ແລະ ​ໂຣຄາ​ພະຍາດ​ມາ​ຂົ່ມຂູ່ ການ​ສຶກສາ​ຮໍ່າຮຽນ​ຂອງ​ລູກ​ຫລານ​ເຮົາ​ກໍ​ອາດ​ຈະ​ດຳ​ເນີນ​ໄປ​ໂດຍ​ປົກກະຕິ ​ແລະ ມີ​ຜົນສຳ​ເລັດ​ຕາມ​ແຜນ​ທີ່​ຄາດໝາຍ​ໄວ້.

​ເຖິງ​ຢ່າງ​ໃດ​ກໍ​ດີ, ອີງ​ໃສ່​ສະພາບ​ຄວາມ​ເປັນ​ຈິງ​ຂອງ​ປະ​ເທດ ​ແລະ ສິ່ງ​ທ້າ​ທາຍ​ຢູ່​ພາຍ​ໃນ ​ແລະ ພາຍ​ນອກ​ພວກ​ເຮົາ​ຍັງ​ຕ້ອງ​ຜະ​ເຊີນ​ຕໍ່​ອຸປະສັກ​ຫລາຍ​ຢ່າງ ​ເປັນຕົ້ນ​ໄພພິບັດ​ທຳ​ມະ​ຊາດ, ​ໂຣກລະບາດ ​ແລະ ສິ່ງ​ຫຍໍ້​ທໍ້​ຕ່າງໆ​ໃນ​ຂົງ​ເຂດ​ການ​ສຶກສາ ກໍ​ຄື​ການ​ຮຽນ-ການ​ສິດສອນ​ຂອງ​ຄູ​ອາຈານ ​ແລະ ນັກຮຽນ​ນັກ​ສຶກສາ​ໃນ​ທົ່ວ​ປະ​ເທດ. ສິ່ງ​ສຳຄັນ​ອີກ​ອັນ​ໜຶ່ງ​ທີ່​ຄວນ​ໄດ້​ເອົາ​ໃຈ​ໃສ່​ນັ້ນ ກໍ​ຄື​ນະ​ໂຍບາຍ​ຕໍ່​ຄູ​ອາຈານ​ທີ່​ພວມ​ຕັ້ງໜ້າ​ບຸກທະລຸ​ໃນ​ພາລະກິດ​ຂອງ​ຕົນ. ຖ້າ​ຊີວິດ​ການ​ເປັນ​ຢູ່​ຂອງ​ຄູ​ອາຈານ​ຂາດໆ​ເຂີນໆ ປາກົດການ​ຫຍໍ້ທໍ້​ພາຍ​ໃນ​ມັນ​ຍ່ອມ​ເກີດ​ຂຶ້ນ, ປະສິດທິພາບ ​ແລະ ປະສິດທິ​ຜົນ​ຂອງ​ການ​ຮຽນ​ການ​ສອນ​ກໍ​ຍ່ອມ​ບໍ່​ເປັນ​ໄປ​ຕາມ​ຄາດໝາຍ​ທີ່​ໄດ້​ວາງ​ໄວ້.

ເດືອນ​ກັນຍາ​ຫັນ​ໜ້າ​ເຂົ້າສູ່​ການ​ຮໍ່າຮຽນ - WhatsApp Image 2020 05 27 at 5 - ເດືອນ​ກັນຍາ​ຫັນ​ໜ້າ​ເຂົ້າສູ່​ການ​ຮໍ່າຮຽນ
ເດືອນ​ກັນຍາ​ຫັນ​ໜ້າ​ເຂົ້າສູ່​ການ​ຮໍ່າຮຽນ - WhatsApp Image 2020 05 27 at 5 - ເດືອນ​ກັນຍາ​ຫັນ​ໜ້າ​ເຂົ້າສູ່​ການ​ຮໍ່າຮຽນ
error: Alert: ເນື້ອຫາຂ່າວມີລິຂະສິດ !!