ແຂວງຈຳປາສັກປະກາດເປັນແຂວງຈົບຊັ້ນມັດທະຍົມຕອນຕົ້ນບຳລຸງ

ແຂວງຈຳປາສັກໄດ້ປະກາດເປັນແຂວງຈົບຊັ້ນມັດທະຍົມຕອນຕົ້ນບຳລຸງຢ່າງເປັນທາງການໃນຕອນເຊົ້າວັນທີ 9 ກັນຍານີ້ ທີ່ນະຄອນປາກເຊ, ໂດຍການເຂົ້າຮ່ວມ ຂອງທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕິກະຊວງສຶກສາທິການ ແລະ ກິລາ, ທ່ານ ວິໄລວົງ ບຸດດາຄຳ ເຈົ້າແຂວງໆຈຳປາສັກ, ມີຜູ້ຕາງໜ້າບັນດາແຂວງພາກໃຕ້ແລະ ພະນັກງານຄູອາຈານເຂົ້າຮ່ວມຢ່າງຫຼວງ​ຫຼາຍ.

ໃນພິທີອັນສະຫງ່າລາສີ ທ່ານ ວິໄລວົງ ບຸດດາຄຳ ເຈົ້າແຂວງໆຈຳປາສັກໄດ້ມີຄຳປາໄສວ່າ: ໂດຍສືບຕໍ່ປະຕິບັດຄຳສັ່ງຂອງນາຍຍົກລັດຖະມົນຕິເລກທີ 06 /ນຍ ລົງວັນທີ 8 ສິງຫາ1992 ວ່າດ້ວຍການສືບຕໍ່ແກ້ໄຂບັນຫາການລົບລ້າງຄວາມບໍ່ຮູ້ໜັງສືຄືນໃໜ່.

ດັ່ງນັ້ນ, ກະຊວງສຶກສາທີການ ແລະກິລາໄດ້ປະສານສົມທົບກັບອົງການປົກຄອງທ້ອງຖິ່ນ ແລະຜູ້ບໍລິຫານການສຶກສາ ແລະກິລາແຕ່ລະຂັ້ນເປີດຂະບວນການຮຽນການສອນໃຫ້ປະຊາ​ຊົນບໍ່ຮູ້ໜັງສືໃນເກນອາຍຸ 15 – 45 ປີ ຢ່າງກວ້າງຂວາງໃນທົ່ວປະເທດ ແລະດ້ວຍຄວາມມຸ້ງໜັ້ນດັ່ງກ່າວຈິ່ງເຮັດໃຫ້ມີຜົນສຳເລັດເປັນກ້າວໆມາ.

ສະເພາະແຂວງຈຳປາສັກໄດ້ປະກາດລົບ​ລ້າງ​ຄວາມບໍ່ຮູ້ໜັງສືສຳລັບປະຊາຊົນທົ່ວແຂວງຢ່າງເປັນທາງການໃນປີ 1983 ແລະ ສືບຕໍ່ດຳເນີນການຮຽນ-ການສອນບຳລຸງໃນຊັ້ນປະຖົມສຶກສາໃຫ້ແກ່ປະຊາຊົນຢ່າງຕໍ່ເນື່ອງມາຮອດວັນທີ 3 ມີຖຸນາ 2011 ສາມາດປະກາດເປັນແຂວງຈົບຊັ້ນປະຖົມສຶກສ່ບຳລຸງ.

ພາຍຫຼັງທີ່ໄດ້ສຳເລັດການສຶກສາຈົບຊັ້ນປະຖົມບຳລຸງກໍໄດ້ສຶບຕໍ່ຍົກລະດັບການສຶກສາໃນຊັ້ນມັດທະຍົມຕົ້ນໃຫ້ແກ່ປະຊາຊົນໃນເກນອາຍຸ 15-35 ປີຢ່າງເປັນລະບົບຕໍ່​ເນື່ອງ​ດ້ວຍການມອບໜາຍຄວາມຮັບຜິດຊອບໃຫ້ເມືອງ,​ນະຄອນໄດ້ດຳເນີນການຈັດຕັ້ງການຮຽນ-ການສອນຕົວຈິງມາຮອດປີ 2019 ຈີງໄດ້ປະກາດ 9 ຕົວເມືອງ ແລະ1ນະ​ຄອນ ຈົບຊັ້ນມັດທິຍົມຕອນຕົ້ນບຳລຸງສຳລັບປະຊາຊົນ.​ເພື່ອເປັນການຢັ້ງຢື້ນຮັບຮອງແຂວງຈຳປາສັກຈົບຊັ້ນມັດທະຍົມຕອນຕົ້ນບຳລຸງສຳລັບປະຊາຊົນ,ຄະນະກຳມະການຂັ້ນແຂວງໄດ້ສະເໜີກະຊວງສຶກສາທິການ ແລະກິລາລົງມາປະເມີນ ເຊິ່ງໄດ້ກຳນົດເອົາ 5 ເມືອງເປົ້າໜາຍ ແລະ ເຫັນວ່າແຂວງຈຳປາສັກສາມາດຜ່ານຕາມເກມມາດຕະຖານສຳເລັດການຮຽນຈົບຫຼັກສູດ ຊັ້ນມັດທະຍົມຕອນຕົ້ນບຳລຸງ ມາຮອດວັນທີ 23 ມີຖຸນາ ຜ່ານມານີ້, ລັດຖະມົນຕິກະຊວງສຶກສາທິການ ແລະກິລາ ຈິ່ງໄດ້ອະນຸມັດອອກຂໍຕົກລົງສະບັບເລກທີ 2218/ສສກ ອະນຸມັດຮັບຮອງແຂວງຈຳປາສັກເປັນແຂວງຈົບຊັ້ນມັດທະຍົມຕອນຕົ້ນບຳລຸງທົ່ວແຂວງ.

ພາຍຫຼັງພິທີ, ລັດຖະມົນຕີກະຊວງສຶກສາທິການ ແລະກິລາ,ເຈົ້າແຂວງໆຈໍາປາສັກ ແລະບັນດາທ່ານການນໍາໄດ້ຮ່ວມພິທີຕັດແຖບຜ້າ,ເປີດປ້າຍ ແລະ ລັ່ນຄ້ອງ 9 ບາດ ເພື່ອເປັນສັນຍາລັກປະກາດແຂວງຈໍາປາສັກຈົບຊັ້ນມັດທະຍົມຕົ້ນບໍາລຸງຢ່າງເປັນທາງການ.

No comments yet! You be the first to comment.

Leave a Reply

Your email address will not be published.

This site uses Akismet to reduce spam. Learn how your comment data is processed.

error: Alert: Content is protected !!