ຫລິ້ນການພະນັນທາງອອນລາຍຈິບຫາຍຊັບສິນ

ໂດຍ: ທິດກໍ່າ

​ໃນ​ຂະ​ບວນວິວັດ​ຂອງ​ໂລກ​ທີ່​ພວມ​ນັບ​ມື້ມີ​ການ​ພັດທະນາ​ກ້າວ​ໄປ​ຢ່າງ​ບໍ່​ຢຸດ​ຢັ້ງ, ມີ​ຫລາຍ​ອັນ​ຫລາຍ​ຢ່າງ​​ໄດ້​ມີ​ການ​ພັດທະນາ​ປ່ຽນ​ແປງ​ໄປ​ຕາມ​ຍຸກຕາມ​ສະ​ໄໝ, ບໍ່​ວ່າ​ໃນ​ດ້ານ​ວັດຖຸ ​ແລະ ຈິດ​ໃຈ​ຂອງ​ຄົນ​ເຮົາ. ອາດ​ເວົ້າ​ໄດ້​ວ່າ ຕະຫລອດ​ສັບພະ​ສິ່ງ​ທີ່​ດຳລົງ​ຄົງ​ຕົວ​ບົນ​ໂລກ​​ໃບ​ນີ້​ກໍ​ລ້ວນ​ແລ້ວ​ແຕ່​ມີ​ການ​ປ່ຽນ​ແປງ ​ແລະ ການ​ພັດທະນາ​ລ້ຳຍຸກ​ທັນ​ສະ​ໄໝ​ໄປ​ເລື້ອຍໆ. ປາກົດການ​ທີ່​ລ້ຳໜ້າ​ປ່ຽນ​ແປງ​ໂດດ​ເດັ່ນ​ໄວວາ​ທີ່​ສຸດ​ໃນ​ຍຸກ​ປັດຈຸບັນ​ຢ່າງ​ໜຶ່ງ​ກໍ​ແມ່ນ​ທາງ​ດ້ານ​ວິທະຍາສາດ, ​ເຕັກ​ໂນ​ໂລ​ຊີ ​ແລະ ບັນດາ​ຂໍ້​ມູນ​ຂ່າວສານ, ສື່​ຕ່າງໆ​ທີ່​ວ່ອງ​ໄວ​ທັນ​ໃຈ​ຫລາກ​ຫລາຍ​ແງ່​ມຸມ​ທີ່​ມວນ​ມະນຸດ​ພວມ​ແຂ່ງຂັນ​ກັນ​ພັດທະນາ. ສ່ວນວ່າ​ການ​ພັດທະນາ​ທາງ​ດ້ານ​ຈິດ​ໃຈ​ຂອງ​ຄົນ​ເຮົາ​ກໍ​ບົນ​ພື້ນຖານ ທັງ​ອັນ​ດີ ​ແລະ ອັນ​ຮ້າຍ​ໄປ​ຕາມ​ສະພາວະ​ອັດຕະວິ​ໄສ ​ແລະ ພາວະ​ວິ​ໄສ​ຂອງ​ຄົນ​ເຮົາ​ຢ່າງ​ບໍ່​ຂາດ​ໄລຍະ. ສະຫລຸບ​ແລ້ວ ທຸກ​ສິ່ງ​ທຸກ​ຢ່າງ​ບໍ່​ວ່າຄວາມ​ຈະ​ເລີ​ນທາງ​ດ້ານ​ວັດຖຸ ​ແລະ ຈິດ​ໃຈ​ມັນ​ກໍ​ມີ​ທັງ​ອັນຕັ້ງໜ້າ ​ແລະ ຫຍໍ້​ທໍ້, ມີ​ທັງ​ອັນ​ດີ ອັນ​ບໍ່​ດີ ​ແລະ ຂີ້ກະ​ເຕິ​ະ​ເຮິະຮ້າຍ ​ເຊິ່ງສິ່ງ​ເຫລົ່ານັ້ນ​ເອີ້ນ​ວ່າ​ປາກົດການ​ຫຍໍ້​ທໍ້​ໃນ​ສັງຄົມ​ນັ້ນ​ເອງ.

​ໃນ​ສະພາບ​ສັງຄົມ​ມະນຸດ​ເຮົາ​ໃນ​ປັດຈຸບັນ ສິ່ງ​ທີ່​ໜ້າ​ເປັນ​ຫ່ວງ​ອີກ​ຢ່າງ​ໜຶ່ງ​ ກໍ​ຄື​ບັນດາ​ປາກົດການ​ຫຍໍ້​ທໍ້​ຕ່າງໆ​ທີ່​ມັນ​ໄດ້​ເກີດ​ຂຶ້ນ ​ແລະ ມີ​ຜົນ​ກະທົບ​ຕໍ່​ສັງຄົມ, ກົດໝາ​ຍບ້ານ​ເມືອງ​ບໍ່​ໜ້ອຍ ກໍ​ຄື​ບັນຫາ “ຫລິ້ນການ​ພະນັນ​ທາງ​ສື່​ອອນ​ລາຍ” ທີ່​ເປັນ​ຫົນທາງ​ເສື່ອ​ມອັນຕະລາຍ ​ແລະ ພວມ​ທ້າ​ທາຍ​ສັງຄົມ​ບ້ານ​ເມືອງ​ເຮົາ​ຫລາຍ​ສົມຄວນ ​ເປັນຕົ້ນກໍ​ແມ່ນ​ການ​ຫລິ້ນຫວຍ, ທວາຍ​ເລກ, ການ​ພະນັນ​ບານ, ພະນັນ​ມວຍ ​ແລະ ວິທີ​ຫລອກ​ຕົວະ​ຍົວະ​ເອົາ​ເງິນ​ຄົນ​ອື່ນ​ຢ່າງ​ໂກ້ໆ, ຕາ​ໃສໆ ​ເຮັດ​ໃຫ້​ຜູ້​ຫລິ້ນຕິດ ​ແລະ ມັກ​ຫລົງ​ໄຫລ ສຸດ​ແລ້ວ​ແຕ່​ພວກ​ສວຍ​ໂອກາດ​ຈະ​ພາກັນ​ຄິດ ​ແລະ ພາກັນ​ເຮັດ. ​ເມື່ອ​ຕັ້ງ​ໂຈດ​ກັນ​ວ່າ ການ​ຫລິ້ນການ​ພະນັນ​ທາ​ງສື່​ອອນ​ລາຍ​ມີ​ຄວາມ​ອັນຕະລາຍ​ຫຍັງ​ແດ່ ? ມັນ​ກໍ​ມີ​ຫລາຍ​ປະການ​ເຊັ່ນ: ອັນ​ທີ​ໜຶ່ງ​ກໍ​ຄື​ຜິດ​ກົດໝາຍ ທັງ​ຜູ້​ຂາຍ ​ແລະ ຜູ້​ຫລິ້ນ, ຕ້ອງ​ໄດ້​ຖື​ກປັບ​ໄໝ​ໃສ່​ໂທດ​ໃນ​ເມື່ອ​ກໍລະນີ​ມັນ​ມາ​ເຖິງ. ອັນ​ສອງ​ມາ​ເສຍ​ວັດຖຸ​ຊັບ​ສິນ​, ​ເງິນ​ຄຳ​ເສຍ​ຫາຍ, ຊິ້ນ​ເນື້ອປະດາ​ຕົວ, ​ເປັນ​ໜີ້​ເປັນ​ສິນ​ຄຸມ​ເຄືອ​ເກາະ​ຫ້ອຍ, ມີ​ບາງ​ຄົນ​ກໍ​ຈົນ​ເຖິງ​ຂັ້ນຕ້ອງ​ໄດ້​ຂາຍ​ເຮືອນ​ຊານບ້ານ​ຊ່ອງ, ຂາຍ​ດິນ​ດອນ​ຕອນ​ຫຍ້າ ຍ້ອນ​ຫລິ້ນການ​ພະນັນ. ອັນ​ສາມ​ມາ​ກໍ​ເປັນ​ການ​ສ້າງ​ຄວາມ​ບໍ່​ສະຫງົບ​ສຸກ​ໃນ​ສັງຄົມ​ບ້ານ​ເມືອງ ອັນ​ເປັນ​ການ​ບໍ່​ຈົບ​ບໍ່​ງາມ ຫລື ​ເກີດ​ເຫດ​ອັນ​ບໍ່​ດີ​ຕາມ​ມາ​ເຊັ່ນ: ຂ້າ​ກັນ, ຍິງ​ກັນ​ຕາຍ, ອາ​ລະວາ​ດຜິດ​ຖຽງ​ກັນ, ຜົວ​ເມຍ​ລູກ​ເຕົ້າຜິດ​ກັນ ຫລື ຢ່າ​ຮ້າງ​ກັນ​ມາ​ຫລາຍ​ຕໍ່​ຫລາຍ.

​ໃນ​ຫລາຍ​ປີຜ່ານມາ, ທິດ​ກໍ່າ​ເຄີຍ​ເຫັນ​ຄົນ​ຮັກ​ແພງ​ກັນ (ບໍ່​ຂໍ​ເອີ່ຍ​ຊື່) ຕິດ​ການ​ພະນັນ​ບານ​ຫລາຍ​ຮ້ອຍ​ລ້ານ ​ເຈົ້າໜີ້​ຕາມ​ລ້າ​ຫາ​ ສຸດ​ທ້າຍ​ມາ​ບໍ່​ມີ​ທາງ​ອອກ​ເລີຍ​ໄປ​ຜູກ​ຄໍ​ຕາຍ. ສ່ວນ​ລາຍ​ທີ​ສອງ​ມາ​ໄດ້​ມີ​ຂ່າວ​ດັງ​ຈາກ​ປະ​ເທດ​ເພື່ອ​ນບ້ານ (​ໄທ) ຫວ່າງ​ບໍ່​ເຫິງ​ມາ​ນີ້​ວ່າ ພະ​ເອກ​ຊື່​ດັງ​ໄດ້​ຢ່າ​ຮ້າງ​ກັບ​ເມຍ​ຍ້ອນ​ເມຍ​ໄປ​ຕິດ​ການ​ພະນັນ​ທາງ​ອອນ​ລາຍ​ມີ​ໜີ້​ສິນ​ຫລາຍ​ແສນ​ຫລາຍ​ລ້ານ. ຍາມ​ຮັກ​ກັນ​ມາ​ຜົວ​ກໍ​ໄດ້​ສັ່ງສອນ​ເວົ້າວ່າ ​ແລະ ບາງ​ຄັ້ງຜົວ​ຕ້ອງ​ໄປ​ໃຊ້​ໜີ້​ໃຫ້. ​ແຕ່​ໃນ​ເມື່ອ​ຄວາມ​ຊັງ​ມັນ​ມາ​ແລ່ນ​ກຸ້ມ​ທົນ​ບໍ່​ໄຫວ ສອງຜົວ​ເມ​ຍກໍ​ແຍກ​ທາງ​ຄົນ​ລະ​ເສັ້ນ. ນີ້​ລະ​ຄື​ຊາຕະ​ກຳ​ຂອງ​ຄົນ​ຕິດ​ການ​ພະນັນ​ທາງ​ອອນ​ລາຍ ບໍ່​ວ່າ​ຢູ່​ບ້ານ​ເພິ່ນ​ບ້ານ​ໂຕ.

​ເວົ້າ​ເຖິງ​ການ​ພະນັນ​ແລ້ວ ບໍ່​ວ່າ​ແຕ່​ທາງ​ອອນ​ລາຍ, ວິທີ​ທາງ​ອື່ນໆ​ກໍ​ບໍ່​ດີ​ຈັກຢ່າງ ​ເພາະ​ມັນ​ເປັນ​ເສັ້ນທາງ​ເສື່ອ​ມ​ເສຍ​ໃຫ້​ແກ່​ບົດບາດ​ໜ້າ​ທີ່​ຂອງ​ຕົວ​ເຮົາ​ເອງ ທັງ​ເສຍ​ວັດຖຸ​ຊັບ​ສິນ​ທີ່​ເຮົາ​ຫາ​ມາ​ດ້ວຍ​ຄວາ​ມທຸກ​ຍາກ​ລຳບາກ. ສຸພາສິດ​ບູຮານ​ເພິ່ນ​ເຄີຍ​ສັ່ງສອນ​ເອົາ​ໄວ້​ວ່າ: ຜູ້​ໃດ​ຫລິ້ນການ​ພະນັນ​ແບບ​ຫລົ້ມຫົວ​ຈົມ​ທ້າຍ​ ຄື​ການ​ຂວ້ຳໝໍ້​ແກງ​ແລງ​ງາຍ​ຂອງ​ຄອບຄົວ​ຕົນ​ເອງ. ​ໃນ​ເງື່ອນ​ໄຂ​ສັງຄົມ​ບ້ານ​ເມືອງ​ເຮົາ​ພວມ​ເປີດ​ກວ້າງ​ການ​ສ້າງສາ​ພັດທະນາ​ ສິ່ງ​ຫຍໍ້​ທໍ້​ຕ່າງໆ​ມັນ​ຕາມ​ມາ​ເໝືອນ​ດັ່ງ​ຄົນ​ກັບ​ເງົາ, ຕ່າງ​ແຕ່​ວ່າ​ພວກ​ເຮົາ​ພາກັນ​ເລືອກ​ບໍລິ​ໂພ​ກ ​ແລະ ນຳ​ໃຊ້​ການ​ເວລາ​ໃຫ້​ມີ​ຜົນ​ປະ​ໂຫຍ​ດສູງ​ສຸດ​ສຳລັບ​ຊີວິດ​ທີ່​ເກີດ​ມາ​ຊາດ​ດຽວ. ​ໃນ​ເງື່ອນ​ໄຂ​ທີ່​ປະ​ເທດ​ຊາດ​ຂອງ​ພວກ​ເຮົາ​ພວມ​ພັດທະນາ, ​ແຕ່​ກໍ​ຍັງ​ມີ​ຫລາຍ​ອັນ​ມາ​ກະທົບ ​ເປັນຕົ້ນ​ແມ່ນ​ບັນຫາ​ວິ​ກິດ​ຍ້ອນ​ໂຣກລະບາດ, ​ໂຣຄາ​ພະຍາດ ​ໂດຍ​ສະ​ເພາະ​ເຊື້ອພະຍາດ​ໂຄ​ວິດ-19 ພວມ​ອາ​ລະວາ​ດລ້າງຜານ​ຊາວ​ໂລກ ປະ​ເທດ​ຊາດ​ຂອງ​ພວກ​ເຮົາ​ກໍ​ມີ​ຜົນ​ກະທົບ​ຢ່າງ​ຫລວງຫລາຍ. ນອກຈາກ​ນີ້ ກໍ​ຍັງ​ມີ​ໄພພິບັດ​ທາງ​ທຳ​ມະ​ຊາດ​ມາ​ທຳລາຍ​ລະບົບ​ເສດຖະກິດ-ສັງຄົມ​ຂອງ​ປະ​ເທດ​ໃນ​ແຕ່ລະ​ປີ​ຈຳນວນ​ບໍ່​ໜ້ອຍ. ​ເພາະສະນັ້ນ ຖ້າ​ພວກ​ເຮົາ​ຫລີກ​ລ່ຽງຈາກ​ອະບາຍ​ຍະ​ມຸກ​ທັງ​ປວງ​ໄດ້​ຫລາຍ​ເທົ່າ​ໃດ ພວກ​ເຮົາ​ກໍ​ມີ​ຄວາມສຸກ, ປະ​ເທດ​ຊາດ​ບ້ານ​ເມືອງ​ກໍ​ມີ​ຄວາມ​ສະຫງົບ​ປອດ​ໄພ ​ໄປ​ທາງ​ໃດ​ກໍ​ເຫັນ​ແຕ່​ສິ່ງ​ດີງາມ ຍ້ອນ​ມີ​ການ​ພັດທະນາ​ສ້າງສາ​ທາງ​ດ້ານ​ວັດຖຸ ​ແລະ ຈິດ​ໃຈ.

​ເພື່ອ​ຫລີກ​ລ່ຽງທີ່​ມາ​ຂອງ​ຄຳ​ວ່າ: “ຫລິ້ນການ​ພະນັນ​ທາງ​ອອນ​ລາຍ” ກົດໝາຍ​ຕ້ອງ​ເຂັ້ມຂຸ້ນ ນັບ​ທັງ​ຕົວ​ເຮົາ​ເອງ​ກໍ​ຕ້ອງ​ພະຍາຍາມ​ໜີ​ຫ່າງ ​ເພື່ອ​ປາສະຈາກ​ທາງ​ຈິບຫາຍ​ຂອງ​ຊັບ​ສິນ, ທາງ​ເສື່ອ​ມຂອງ​ຕົນ​ເອງ ​ແລະ ສັງຄົມ ​ເພື່ອ​ຄວາມ​ຈະ​ເລີ​ນຮັ່ງມີ​ຂອງ​ຊາດ​ຕ້ອງ​ໜີ​ຫ່າງ​ການ​ພະນັນ.

No comments yet! You be the first to comment.

Leave a Reply

Your email address will not be published.

This site uses Akismet to reduce spam. Learn how your comment data is processed.

error: Alert: Content is protected !!