ມຽນມາສ້າງສະຖິຕິໃໝ່ ຕິດໂຄວິດ-19 ສູງເຖິງ 307 ຄົນໃນມື້ດຽວ ຕິດເຊື້ອສະສົມເກີນ 29,7 ລ້ານຄົນທົ່ວໂລກ

​ໃນ​ວັນ​ທີ 15 ກັນຍາ​ນີ້, ທາງ​ການ​ມຽນມາລາ​ຍງານ​ພົບ​ຜູ້​ຕິດ​ເຊື້ອ​ໂຄ​ວິດ-19 ​ເພີ່ມ 307 ຄົນ​ໃນ​ມື້ດຽວ ສູງ​ສຸດ​ນັບ​ແຕ່​ມີ​ການລະບາດ​ໃນ​ປະ​ເທດ​ເດືອນ​ມີນາ​ຜ່ານ​ມາ ຫລັງ​ມຽນມາ​ກຳລັງ​ຜະ​ເຊີນ​ການລະບາດ​ຮອບ​ໃໝ່ ​ເບື້ອງຕົ້ນຍັງ​ບໍ່​ມີ​ການ​ລະບຸ​ເຖິງ​ຕົ້ນຕໍ ຫລື ກຸ່ມ​ກ້ອນ​ຂອງ​ການ​ແຜ່​ລະບາດ ​ໂດຍ​ພື້ນທີ່​ມີ​ຜູ້​ຕິດ​ເຊື້ອສະ​ສົມ​ຫລາຍ​ທີ່​ສຸດ​ຢູ່​ມຽນມາ​ຄືຢາງ​ກຸ້ງ​ອະດີດ​ເມືອງ​ຫລວງ ​ແລະ ​ເມືອງ​ທ່າ​ທີ່​ສຳຄັນ​ຂອງ​ລັດຣະຄາຍ.

ຈາກ​ຈຳນວນ​ຜູ້​ຕິດ​ເຊື້ອສະ​ສົມ 882 ຄົນ​ໃນ​ວັນ​ທີ 31 ສິງຫາ​ຜ່ານ​ມາ ​ເພີ່ມ​ເປັນ 3.502 ຄົນ ຫລື ​ເພີ່ມ​ກວ່າ 3 ​ເທົ່າ​ໃນ​ໄລຍະ 2 ອາທິດ​ຜ່ານ​ມາ ​ໂດຍ​ທາງ​ການ​ມຽນມາ​ໄດ້​ເລັ່ງສ້າງ​ພື້ນທີ່​ກັກ​ຕົວ​ແຫ່ງ​ໃໝ່​ຢູ່​ບໍລິ​ເວນ​ສະໜາມ​ບານ​ເຕະ​ແຫ່ງ​ໜຶ່ງ​ໃນ​ຢາງ​ກຸ້ງ​ເພີ່ມ​ແລ້ວ ​ເພື່ອ​ຮັບ​ມື​ຈຳນວນ​ຜູ້​ຕິດ​ເຊື້ອ​ໃໝ່​ທີ່​ຄາດ​ວ່າ​ຈະ​ສູງ​ຂຶ້ນອີກ​ໃນ​ອະນາຄົດ. ນອກຈາກ​ມຽນມາ​ແລ້ວ ຟີ​ລິບ​ປິນ ​ແລະ ອິນ​ໂດ​ເນ​ເຊຍ​ຍັງ​ເປັນ​ປະ​ເທດ​ໃກ້​ຄຽງ​ໃນ​ພາກພື້ນອາ​ຊຽນທີ່​ກຳລັງ​ຜະ​ເຊີນ​ການລະບາດ​ຢ່າງ​ໜັກ​ໃນ​​ເວລາ​ນີ້.

ຫລ້າ​ສຸດ​ການ​ແຜ່​ລະບາດ​ຂອງ​ໂຄ​ວິດ-19 ຜ່ານ​ມາ​ດົນ​ກວ່າ 8 ​ເດືອນ​ແລ້ວ ທົ່ວ​ໂລກ​ມີ​ຜູ້​ຕິດ​ເຊື້ອສະ​ສົມ​ເກີນ 29,7 ລ້ານ​ຄົນ​ແລ້ວ (29.714.695 ຄົນ), ປິ່ນປົວ​ຫາຍ 21,5 ລ້ານ​ກວ່າ​ຄົນ (21.522.606 ຄົນ) ຫລື 2 ​ໃນ 3 ຂອງ​ຜູ້​ຕິດ​ເຊື້ອທັງ​ໝົດ, ​ເສຍ​ຊີວິດ​ແລ້ວ 938.388 ຄົນ ອັດຕາ​ການ​ເສຍ​ຊີວິດ​ປະມານ 3,2% ​ໂດຍ​ພົບ​ຜູ້​ຕິດ​ເຊື້ອ​ເພີ່ມ​ເກີນ​ມື້ລະ 1 ​ແສນ​ຄົນ​ຕິດ​ຕໍ່​ກັນ​ເຖິງ 112 ມື້ ນັບ​ແຕ່​ວັນ​ທີ 27 ພຶດສະພາ​ຜ່ານ​ມາ.

ອາ​ເມ​ລິ​ກາ​ຍັງ​ເປັນ​ປະ​ເທດ​ທີ່​ພົບ​ຜູ້​ຕິດ​ເຊື້ອສະ​ສົມ​ຫລາຍ​ທີ່​ສຸດ​ໃນ​ໂລກ (6.787.640 ຄົນ), ຂະນະ​ທີ່​ອິນ​ເດຍຢູ່​ອັນ​ດັບ​ສອງ (5.018.034 ຄົນ) ມີ​ຜູ້​ຕິດ​ເຊື້ອ​ເພີ່ມ 91.120 ຄົນ, ຕໍ່​ມາ​ແມ່ນ​ເບຣຊິນ (4.384.299 ຄົນ), ຣັດ​ເຊຍ (1.073.849 ຄົນ) ​ແລະ ​ເປຣູ (738.020 ຄົນ) ພົບ​ຜູ້​ຕິດ​ເຊື້ອ​ແລ້ວ​ຢ່າງ​ໜ້ອຍ 181 ຈາກ 193 ປະ​ເທດ​ທົ່ວ​ໂລກ ມີ​ພຽງ​ມາ​ເກົາ, ​ເກຣນາ​ດາ, ​ເຊ​ນຄິດ ​ແລະ ​ເນ​ວິສ ​ແລະ ນະຄອນ​ລັດ​ວາ​ຕິ​ກັນ​ເທົ່າ​ນັ້ນທີ່​ຜູ້​ຕິດ​ເຊື້ອ​ໂຄ​ວິດ-19 ທັງ​ໝົດ​ຫາຍ​ດີ ​ແລະ ຍັງ​ບໍ່​ພົບ​ຜູ້​ຕິດ​ເຊື້ອ​ໃໝ່​ເພີ່ມ.

No comments yet! You be the first to comment.

Leave a Reply

Your email address will not be published.

This site uses Akismet to reduce spam. Learn how your comment data is processed.

error: Alert: Content is protected !!