ລັດຖະສະພາຍີ່ປຸ່ນລົງຄະແນນເລືອກທ່ານ ໂຍຊິຮິເດະ ຊູງະ ເປັນນາຍົກລັດຖະມົນຕີຄົນໃໝ່ຕາມຄາດໝາຍ

ສະພາ​ຜູ້​ແທນ​ລາຊະ​ດອນ​ແຫ່ງ​ສະພາ​ໄດ​ເອດ​ແຫ່ງ​ຊາດ​ຂອງ​ຍີ່ປຸ່ນລົງ​ຄະ​ແນນ​ສຽງ​ເລືອກ​ທ່ານ ​ໂຍຊິ​ຮິ​ເດະ ຊູ​ງະ ຫົວໜ້າ​ພັກ​ລິ​ເບີຣັສ ​ເດ​ໂມ​ເຄຣຕິກ (LDP) ​ເປັນ​ນາຍົກລັດຖະມົນຕີຄົນທີ 99 ຢ່າ​ງ​ເປັນ​ທາງ​ການ ​ແທນ​ທ່ານ ຊິນ​ໂຊ ອ​າ​ເບະ ທີ່​ລາ​ອອກ​ຈາກ​ຕຳ​ແໜ່​ງ​ໄປ​ກ່ອນ​ໜ້າ​ນີ້​ດ້ວຍ​ເຫດຜົນ​ດ້ານ​ສຸຂະພາບ.

ທ່ານ ຊູ​ງະ ອາຍຸ 71 ປີ ​ເປັນ​ພັນທະ​ມິດ​ໃກ້ຊິດ​ຂອງ​ທ່ານ ອາ​ເບະ ​ເຊິ່ງທ່ານ​ຈະ​ສືບ​ຕໍ່​ວຽກ​ທີ່​ຍັງ​ບໍ່​ລຸ​ລ່ວງ​ຂອງ​ນາຍົກລັດຖະມົນຕີຄົນກ່ອນ ລວມທັງ​ນະ​ໂຍບາຍ​ເສດຖະກິດ​ແບບ “ອາ​ເບະ​ໂນມິກ” ທີ່​ເນັ້ນການ​ປະຕິ​ຮູບ ​ແລະ ກະ​ຕຸ້ນ​ເສດຖະກິດ ລວມທັງ​ການ​ໃຊ້​ນະ​ໂຍບາຍ​ການ​ເງິນ​ແບບ​ຜ່ອນຄາຍ​ໃນ​ໄລຍະ​ຍາວ.

​​ເຊົ້າວັນ​ທີ 16 ກັນຍາ​ນີ້, ທ່ານ ອາ​ເບະ ຈັດ​ກອງ​ປະຊຸມ​ຄະນະ​ລັດຖະບານ​ຄັ້ງສຸດ​ທ້າຍ ​ແລະ ກ່າວ​ຕໍ່​ນັກ​ຂ່າວ​ວ່າ: ທ່ານ​ພູມ​ໃຈ​ໃນ​ຜົນສຳ​ເລັດ​ໃນ​​ໄລຍະ​ທີ່​ນັ່ງ​ຕັ່ງ​ນາຍົກລັດຖະມົນຕີ​ເກືອບ 8 ປີຜ່ານມາ ​ໂດຍ​ທ່ານ ຊູ​ງະ ຈະ​ມາ​ຮັບ​ໜ້າ​ທີ່​ຕໍ່ ພ້ອມ​ພາລະກິດ​ຮີບ​ດ່ວນ ​ແລະ ຄວາມ​ທ້າ​ທາຍ​ໃນ​ການ​ກອບ​ກູ້​ເສດຖະກິດ​ຈາກ​ສະພາບ​ຫລຸດ​ຖອຍ ຫລັງ GDP ຍີ່ປຸ່ນ​ຫລຸດ​ລົງ​ເປັນ​ປະຫວັດສາດ​ເຖິງ 28,1% ​ໃນ​ໄຕ​ມາດ 2 ຈາກ​ຜົນ​ກະທົບ​ຂອງ​ໂຄ​ວິດ-19 ທີ່​ດຶງ​ການ​ບໍລິ​ໂພ​ກ ​ແລະ ການ​ສົ່ງ​ອອກ​ຫລຸດ​ລົງ​ຢ່າງ​ໜັກ.

ນອກຈາກ​ບັນຫາ​ເສດຖະກິດ​ແລ້ວ, ຍີ່ປຸ່ນ​ຍັງ​ຜະ​ເຊີນ​ບັນຫາ​ສັງຄົມ​ຜູ້​ອາຍຸ​ສູງ ​ແລະ ອັດຕາ​ການ​ເກີດ​ຕໍ່າ ​ໂດຍ​ປັດຈຸບັນ​ປະຊາກອນ​ເກືອບ 1 ​ໃນ 3 ຂອງ​ປະ​ເທດ​ມີ​ອາຍຸ​ເກີນ 65 ປີ.

ຫລັງ​ຈາກ​ລັດຖະສະພາ​ລົງ​ຄະ​ແນນ​ເລືອກ​ແລ້ວ, ທ່ານ ຊູ​ງະ ຈະ​ຈັດຕັ້ງຄະນະ​ລັດຖະບານ​ຊຸດ​ໃໝ່ ​ແລະ ຈະ​ມີ​ພິທີ​ຮັບຮອງ​ຄະນະ​ລັດຖະບານ​ໃໝ່​ຂອງ​ທ່ານ ຊູ​ງະ ​ໂດຍ​ສົມ​ເດັດ​ພະ​ຈັກກະພັດ​ດິນາຣຸຮິ​ໂຕະ ທີ່​ພະຣາດຊະ​ວັງ​ພີຣຽວຕໍ່​ໄປ.

ຈາກ​ເວລາ​ທີ່​ເຫລືອ​ພຽງ 1 ປີ​ກ່ອນ​ໝົດ​ວາລະ​ດຳ​ລົງ​ຕຳ​ແໜ່​ງ​ໃນ​ຖານະ​ຫົວໜ້າ​ພັກ LDP ​ຄາດໝາຍ​ວ່າ​ທ່ານ ຊູ​ງະ ອາດ​ຕັດສິນ​ໃຈ​ຍຸບ​ສະພາ​ເພື່ອ​ຈັດການ​ເລືອກ​ຕັ້ງ​ໃໝ່​ກ່ອນ​ກຳນົດ​ພາຍ​ໃນ​ປີ​ນີ້ ​ເພື່ອ​ດຶງ​ຄະ​ແນນ​ສຽງ ​ແລະ ສ້າງ​ຖານ​ອຳນາດ​ທາງ​ການ​ເມືອງ​ໃນ​ກົນລະຍຸດ​ຊຸກຍູ້​ການ​ປະຕິ​ຮູບ​ເສດຖະກິດ​ຕໍ່​ໄປ.

No comments yet! You be the first to comment.

Leave a Reply

Your email address will not be published.

This site uses Akismet to reduce spam. Learn how your comment data is processed.

error: Alert: Content is protected !!