ນະຄອນຄຸນໝິງ ມອບອຸປະກອບການແພດປ້ອງກັນໂຄວິດ-19 ໃຫ້ ນະຄອນຫລວງວຽງຈັນ

ພິທີມອບ-ຮັບອຸປະກອນການແພດ ເພື່ອປ້ອງກັນ ແລະ ຄວບຄຸມການແຜ່ລະບາດຂອງພະຍາດໂຄວິດ-19 ຈາກນະຄອນຄຸນໝິງ ແຂວງຢຸນໜານ ສປ ຈີນ ໃຫ້ພະແນກສາທາລະນະສຸກນະຄອນຫລວງວຽງຈັນ ​​ໄດ້​ມີ​ຂຶ້ນ​ໃນ​ວັນ​ທີ 16 ກັນຍາ​ນີ້ ທີ່​ນະຄອນຫລວງ​ວຽງ​ຈັນ ລະຫວ່າງ ທ່ານ ຈ່ຽງ ຈ້າຍຕຸ່ງ ເອກອັກຄະລັດຖະທູດ ສປ ຈີນ ປະຈໍາ ສປປ ລາວ ແລະ ທ່ານ ສິນລະວົງ ຄຸດໄພທູນ ເຈົ້າຄອງນະຄອນຫລວງວຽງຈັນ.

ອຸປະກອນການ​ຊ່ວຍ​ເຫລືອ​ດັ່ງກ່າວ​ປະກອບມີລົດກູ້ໄພ 1 ຄັນ, ເຄື່ອງຊ່ວຍຫາຍໃຈ 2 ເຄື່ອງ, ເຄື່ອງວັດແທກອຸນຫະພູມ 100 ເຄື່ອງ, ຜ້າອັດປາກໃຊ້ໃນການແພດ 20.000 ອັນ ແລະ ຜ້າອັດປາກ N95 500 ອັນ ລວມມູນຄ່າທັງໝົດ 95.000 ໂດລາສະຫະລັດ ​ເຊິ່ງຈະ​ໄດ້​ນຳ​ໃຊ້ເຂົ້າໃນວຽກງານສະກັດກັ້ນ ແລະ ຕ້ານການແຜ່ລະບາດຂອງພະຍາດໂຄວິດ-19 ​ໂດຍ​ສະ​ເພາະ​ແມ່ນ​ຈະ​ໄດ້ນຳໄປແຈກຢາຍໃຫ້ບັນດາໂຮງໝໍຕ່າງໆ​ໃນ​ນະຄອນຫລວງ.