​ໂຄ​ວິດ-19 ຈະ​ພາ​ໃຫ້​ເຮົາ​ດຳລົງ​ຊີວິດ​ແບບ​ໃໝ່

​ໂຄ​ວິດ-19 ຈະ​ພາ​ໃຫ້​ເຮົາ​ດຳລົງ​ຊີວິດ​ແບບ​ໃໝ່ - 555 52 - ​ໂຄ​ວິດ-19 ຈະ​ພາ​ໃຫ້​ເຮົາ​ດຳລົງ​ຊີວິດ​ແບບ​ໃໝ່
​ໂຄ​ວິດ-19 ຈະ​ພາ​ໃຫ້​ເຮົາ​ດຳລົງ​ຊີວິດ​ແບບ​ໃໝ່ - Untitled design - ​ໂຄ​ວິດ-19 ຈະ​ພາ​ໃຫ້​ເຮົາ​ດຳລົງ​ຊີວິດ​ແບບ​ໃໝ່

ໂດຍ: ທິດ​ກໍ່າ

ດັ່ງ​ພວກ​ເຮົາ​ໄດ້​ເຫັນ ​ແລະ ຮັບ​ຮູ້​ນຳ​ກັນ​ແລ້ວ​ວ່າ ນັບ​ແຕ່​ເດືອນ​ທັນວາ 2019 ​ເປັນຕົ້ນມາ​ຮອດ​ປັດຈຸບັນ ​ເຊື້ອ​ໄວຣັສສາຍ​ພັນ​ໃໝ່​ໂຄ​ວິດ-19 ​ໄດ້​ປາກົດ​ຕົວ​ຂຶ້ນມາ​ໃໝ່ ​ແລະ ​ໄດ້​ທຳລາຍ​ຊີວິດ​ອິນ​ຊີ​ຂອງ​ຊາວ​ໂລກ​ໄປ​ແລ້ວ​ເກືອບ 1 ລ້ານ​ຄົນ. ຈົນ​ມາ​ຮອດ​ປັດຈຸບັນ ກໍ​ຍັງ​ບໍ່​ທັນ​ມີ​ທ່າ​ຫລຸດຜ່ອນ ​ແລະ ມະ​ຫັບ​ມະຫາຍ​ໄປ​ຈາກ​ໂລກ​ໃບ​ນີ້​ອີກ​ເລີຍ. ອັນ​ທີ່​ໜ້າ​ເປັນ​ຫ່ວງ ​ແລະ ວິຕົກ​ກັງວົນ​ທີ່​ສຸດ​ກໍ​ຄື ມີ​ຫລາຍ​ປະ​ເທດ​ທີ່​ຖືກ​ຜົນ​ກະທົບ​ໄດ້​ມີ​ຜູ້​ຕິດ​ເຊື້ອປິ່ນປົວ​ໃຫ້ຫາ​ຍດີ​ໄປ​ແລ້ວ​ກໍ​ກັບ​ມາ​ຕິດ​ເຊື້ອຄືນ​ອີກ. ຍິ່ງ​ໄປ​ກວ່າ​ນັ້ນ ມີ​ຫລາຍ​ປະ​ເທດ​ເຖິງ​ວ່າ​ມີ​ມາດ​ຕະການ​ຕ້ານ ​ແລະ ສະກັດ​ກັ້ນຢ່າງ​ສຸດ​ຂັ້ນສຸດ​ຂີດ ​ແຕ່​ກໍ​ຍັງ​ມີ​ຜູ້​ຕິດ​ເຊື້ອ​ເພີ່ມ​ຂຶ້ນອີກ​ຈຳນວນ​ຫລວງຫລາຍ ​ເຊັ່ນ​ຢູ່​ປະ​ເທດ​ອ້ອມ​ຂ້າງ​ເຮົາ​ກໍ​ໄດ້​ແກ່​ຈີນ ​ແລະ ມຽນມາ. ສະ​ເພາະ​ມຽນມາ​ເອງ​ໃນ​ມື້ດຽວ​ໄດ້​ມີ​ຜູ້​ຕິດ​ເຊື້ອ​ເຖິງ 270 ກວ່າ​ຄົນ. ​ເບິ່ງ​ໄປ​ທາງ​ທະວີບ​ເອີຣົບ ປະ​ເທດ​ຝຣັ່ງ​ໄດ້​ທຳລາຍ​ສະຖິຕິ​ມື້ດຽວ​ມີ​ຜູ້​ຕິດ​ເຊື້ອ​ໂຄ​ວິດ-19 ​ເຖິງ 1 ໝື່ນ​ກວ່າ​ຄົນ. ສ່ວນ ສປປ ລາວ ຂອງ​ພວກ​ເຮົາ​ກໍ​ເກີດ​ມີ​ກໍລະນີ​ຜູ້​ຕິດ​ເຊື້ອ​ເພີ່ມ​ຂຶ້ນ​ເໝືອນ​ກັນ ຄື​ເພີ່ມ​ຕື່ມ​ອີກ 3 ຄົນ ​ແລະ ຍັງ​ໄຄ​ແດ່​ແຕ່​ວ່າ​ມັນ​ບໍ່​ໄດ້​ຕິດ​ແປດ​ໄປ​ໃສ່​ກັນ​ແບບ​ຊະຊາຍ​ລາມ​ພະ​ລາມ​ຈົວ ຍ້ອນ​ພວກ​ເຮົາ​ເຂັ້ມຂົ້ນ​ໃນ​ການ​ຄັດ​ກອງ​ຢ່າງ​ຈິງ​ຈັງ ​ແລະ ​ເຂັ້ມງວດ.

​ ​ແຕ່​ແນວ​ໃດ​ກໍ​ດີ, ​ເຮົາ​ເຫັນ​ວ່າ​ສະ​ເພາະ​ຜູ້​ຕິດ​ເຊື້ອ​ໂຄ​ວິດ-19 ຢູ່​ລາວ​ເຮົາ​ນັ້ນລ້ວນ​ແລ້ວ​ນຳ​ມາ​ຈາກ​ທາງ​ນອກ​ເຂົ້າ​ໃນ​ປະ​ເທດ. ໝາຍວ່າ​ຜູ້​ຕິດ​ໄດ້​ນຳ​ເຊື້ອພະຍາດ​ໂຄ​ວິດ-19 ຈາກ​ປະ​ເທດ​ທີ່​ມີ​ການລະບາດ​ເຂົ້າມາ​ປະ​ເທດ​ລາວ​ເຮົາ. ດັ່ງ​ລາຍ​ສຸດ​ທ້າຍ​ຜູ້​ຕິດ​ເຊື້ອ​ແມ່ນ​ນັກ​ກິລາ​ກອງທັບ ມາ​ຈາກ​ປະ​ເທດຣັດ​ເຊຍ ​ໃນ​ໂອກາດ​ໄປ​ຮ່ວມ​ແຂ່ງຂັນ​ກິລາ​ລົດ​ຕັງ​ທີ່​ປະ​ເທດຣັດ​ເຊຍ ​ເຊິ່ງຫາ​ກໍ​ສຳ​ເລັດ​ລົງ​ເມື່ອ​ບໍ່​ດົນ​ມາ​ນີ້. ​ເມື່ອ​ເປັນ​ດັ່ງ​ສະພາບ​ທີ່​ກ່າວ​ມາ​ນີ້ ຈຶ່ງ​ສາມາດ​ເວົ້າ​ໄດ້​ວ່າ ​ເຊື້ອພະຍາດ​ໂຄ​ວິດ-19 ຍັງ​ບໍ່​ມີ​ທ່າ​ທີ​ຫລຸດຜ່ອນ ​ແລະ ມະ​ຫັບ​ມະຫາຍ​ໄປ​ຈາກ​ພວກ​ເຮົາ. ກົງກັນຂ້າມ ຍິ່ງ​ນັບ​ມື້ມີ​ຜູ້​ຕິດ​ເຊື້ອ​ເພີ່ມ​ຂຶ້ນຢູ່​ຫລາຍ​ປະ​ເທດ ອັນ​ໄດ້​ສ້າງ​ຄວາມ​ວິຕົກ​ກັງວົນ​ໃຫ້​ມວນ​ມະນຸດ​ທີ່​ອາ​ໄສ​ຢູ່​ບົນ​ຜືນ​ແຜ່ນດິນ​ຂອງ​ໜ່ວຍ​ໂລກ​ໃບ​ນີ້. ອີກ​ສິ່ງ​ໜຶ່ງ​ທີ່​ໜັກໜ່ວງ ​ແລະ ມີ​ຜົນ​ກະທົບ​ຫລາຍ​ທີ່​ສຸດ ກໍ​ຄື​ນັບ​ແຕ່​ມີ​ພະຍາດ​ໂຄ​ວິດ-19 ​ໄດ້​ແຜ່​ລະບາດ​ໃນ​ທົ່ວ​ໂລກ ​ໄດ້​ເຮັດ​ໃຫ້​ເສດຖະກິດ-ສັງຄົມ​ຂອງ​ໂລກ ​ແລະ ​ແຕ່ລະ​ປະ​ເທດ​ຫລຸດ​ຖອຍ, ປະ​ເທດ​ຊາດ​ຕ້ອງ​ເສຍ​ລາຍ​ຮັບ​ຢ່າງ​ມະຫາສານ​ຍ້ອນ​ປິດ​ປະ​ເທດ​ ​ໃນ​ບໍ່​ອອກ​ນອກ​ບໍ່​ເຂົ້າ, ການທ່ອງທ່ຽວ-ການ​ບໍລິການ​ໂຮງ​ແຮມ, ຮ້ານ​ອາຫານ ​ແລະ ​ເກືອບ​ທຸກຂະ​ແໜງ​ທຸລະ​ກິດ​ຕ້ອງ​ຢຸດ​ສະ​ງັກ. ສຳລັບ ສປປ ລາວ ພວກ​ເຮົາ​ທີ່​ຍັງ​ເປັນ​ປະ​ເທດ​ດ້ອຍ​ພັດທະນາ​ທາງ​ດ້ານ​ເສດຖະກິດ, ພວມ​ເລັ່ງສ້າງສາ​ພັດທະນາ​ປະ​ເທດ​ຊາດ​ໃຫ້​ຫລຸດ​ພົ້ນອອກ​ຈາກ​ຄວາມທຸກ​ຍາກ ​ແລະ ດ້ອຍ​ພັດທະນາ​ກໍ​ຍິ່ງ​ມີ​ຜົນ​ກະທົບ​ຊ້ຳຕື່ມ ທັງ​ກົດ​ໜ່ວງ​ແກ່ຍາວ​ໄປ​ອີກ​ໄລຍະ​ໜຶ່ງ​ກວ່າ​ຈະ​ຟື້ນຕົວ​ຂຶ້ນມາ​ໄດ້​ໃນ​ອະ​ນາ​ຄົດ​ຕໍ່​ໄປ. ຈາກ​ຕົວ​ເລກ​ທີ່​ສະ​ແດງ​ໃຫ້​ເຫັນ​ຢ່າງ​ຈະ​ແຈ້ງ​ກໍ​ຄື ນັບ​ແຕ່​ເກີດ​ມີ​ບັນຫາ​ວິ​ກິດ​ຈາກ​ໂຄ​ວິດ-19 ລາວ​ເຮົາ​ຕ້ອງ​ສູນ​ເສຍ​ລາຍ​ຮັບ​ຈາກ​ການທ່ອງທ່ຽວ​ເຖິງ 500 ກວ່າ​ລ້ານ​ໂດ​ລາ​ສະຫະລັດ. ນອກຈາກ​ນັ້ນ ການ​ຄ້າ​ການ​ບໍລິການ, ຮ້ານ​ອາຫານ, ​ໂຮງ​ແຮມ​ຫລາຍ​ແຫ່ງ​ຖືກ​ປິດ​ຍ້ອນ​ນັກ​ທ່ອງ​ທ່ຽວ​ຈາກ​ຕ່າງປະ​ເທດ​ບໍ່​ສາມາດ​ເຂົ້າມາ​ທ່ອງ​ທ່ຽວ​ໃນ​ລາວ​ໄດ້.

​ໂຄ​ວິດ-19 ຈະ​ພາ​ໃຫ້​ເຮົາ​ດຳລົງ​ຊີວິດ​ແບບ​ໃໝ່ - Wave100S AD to Website 2020 0 - ​ໂຄ​ວິດ-19 ຈະ​ພາ​ໃຫ້​ເຮົາ​ດຳລົງ​ຊີວິດ​ແບບ​ໃໝ່

​ເຖິງ​ຢ່າງ​ໃດ​ກໍ​ດີ, ​ໃນ​ອະນາຄົດ​ຕໍ່ໜ້າ ​ໃນ​ເມື່ອ​ເຊື້ອພະຍາດ​ໂຄ​ວິດ-19 ຍັງ​ຈະ​ລອຍ​ນວນ ​ແລະ ຢັ່ງ​ຮາກ​ຢູ່​ນຳ​ພວກ​ເຮົາ​ຢ່າງ​ຍາວ​ນານ​ອີກ​ຕໍ່​ໄປ ທາງ​ອອກໍ​ຄື​ຕ້ອງ​ປັບ​ປ່ຽນ​ແບບ​ແຜນການ​ດຳລົງ​ຊີວິດ​ແບບ​ໃໝ່​ ​ເປັນຕົ້ນຕ້ອງ​ມີ​ສະຕິ​ໃນ​ການ​ປ້ອງ​ກັນ​ຊີວິດ​ອິນ​ຊີ​ຂອງ​ເຮົາ​ເອງ​ຫລາຍ​ຂຶ້ນ, ມີ​ການ​ປະຢັດ​ມັດທະຍັດ ທັງ​ຫລຸດຜ່ອນ​ການ​ໄປ​ຫລິ້ນ​ໄປ​ທ່ຽວ, ບໍ່​ໄປ​ວຸ້ນວາຍ​ກັບ​ສະຖານ​ທີ່​ທີ່​ມີ​ຄົນ​ແອ​ອັດ, ພະຍາຍາມ​ຢູ່​ໃນ​ໄລຍະ​ຫ່າງ, ໝັ່ນ​ປະຕິບັດ​ຕາມ​ຫລັກການ​ທີ່​ແພດ​ໝໍ​ໄດ້​ແນະນຳ, ໝັ່ນ​ອອກກຳລັງ​ກາຍ ​ແລະ ໝັ່ນ​ລ້າງ​ມື​ດ້ວຍ​ສະບູ ຫລື ນ້ຳຢາ, ຕິດຕາມ​ຂ່າວ​ຄາວ ​ແລະ ປະຕິບັດ​ການ​ແນະນຳ​ຂອງ​ຄະນະ​ສະ​ເພາະ​ກິດ​ແຫ່ງ​ຊາດ ກໍ​ຄື​ຂໍ້​ກຳນົດ​ກົດ​ບັນຍັດ​ຂອງ​ລັດຖະບານ​ວາງ​ອອກ. ສ່ວນວ່າ​ພັນທະ​ໜ້າ​ທີ່​ຂອງ​ທຸກ​ຄົນ​ຕໍ່​ປະ​ເທດ​ຊາດ​ບ້ານ​ເມືອງ​ນັ້ນກໍ​ຕ້ອງ​ມີ​ສ່ວນ​ຮ່ວມ​ຢ່າງ​ສະ​ເໝີ​ຕົ້ນສະ​ເໝີ​ປາຍ, ຮ່ວມ​ແຮງ​ຮ່ວມ​ໃຈ​ກັນ​ຢູ່​ອ້ອມ​ຂ້າງ​ພັກ ​ແລະ ລັດຖະບານ, ສູ້​ຊົນ​ປະຕິບັດ​ຕາມ​ແນວທາງ​ນະ​ໂຍບາຍ​ຂອງ​ພັກ ​ແລະ ລັດຖະບານ​ແຕ່ລະ​ໄລຍະ, ພ້ອມ​ກັນ​ຫັນ​ໜ້າ​ເຂົ້າການ​ຜະລິດ​ເສດຖະກິດ, ການ​ປູກ​ການ​ລ້ຽງ​ໃຫ້​ຫລາຍ, ພະຍາຍາມ​ກຸ້ມ​ຕົນ​ເອງ​ເພິ່ງ​ຕົນ​ເອງ​ທາງ​ດ້ານ​ສະບຽງ​ອາຫານ, ສົ່ງ​ເສີມ​ການ​ຜະລິດ​ພາຍ​ໃນ, ຊຸກຍູ້​ການ​ຜະລິດ​ຂະໜາດ​ນ້ອຍ-ຂະໜາດ​ກາງ​ໃຫ້​ຫລວງຫລາຍ​ກວ້າງຂວາງ​ບໍ່​ເພິ່ງ​ພາ​ເສດຖະກິດ​ຈາກ​ພາຍ​ນອກ​ຈົນ​ເກີນ​ເຫດ. ຈາກ​ນັ້ນ ພວກ​ເຮົາ​ຈຶ່ງ​ມີ​ຢູ່​ມີ​ກິນ ທັງ​ຍົກ​ສູງ​ນ້ຳ​ໃຈ​ລາວ​ທ່ຽວ​ລາວ​ໃຫ້​ຫລາຍ​ຂຶ້ນ. ອັນ​ສຳຄັນ​ທີ່​ສຸດ​ນັ້ນຕ້ອງ​ພ້ອມ​ກັນ​ພະຍາຍາມ​ຫລີກ​ລ່ຽງທີ່​ມາ​ຂອງ​ເຊື້ອພະຍາດ​ໂຄ​ວິດ-19 ​ໂດຍ​ສະ​ເພາະ​ແມ່ນ​ແຫ​ລ່ງທີ່​ມາ​ຈາກ​ບັນດາ​ປະ​ເທດ​ທີ່​ມີ​ເຊື້ອພະຍາດ​ໂຄ​ວິດ-19 ລະບາດ. ນີ້​ຄື​ສ່ວນ​ໜຶ່ງ​ໃນ​ການ​ປັບ​ປ່ຽນ​ແບບ​ແຜນ​ດຳລົງ​ຊີວິດ​ໃນ​ເງື່ອນ​ໄຂ​ທີ່​ໂລກ​ມີ​ການ​ປ່ຽນ​ແປງ​ ທັງ​ອັນ​ດີ ​ແລະ ອັນ​ຮ້າຍ.

​ໂຄ​ວິດ-19 ຈະ​ພາ​ໃຫ້​ເຮົາ​ດຳລົງ​ຊີວິດ​ແບບ​ໃໝ່ - WhatsApp Image 2020 05 27 at 5 - ​ໂຄ​ວິດ-19 ຈະ​ພາ​ໃຫ້​ເຮົາ​ດຳລົງ​ຊີວິດ​ແບບ​ໃໝ່
​ໂຄ​ວິດ-19 ຈະ​ພາ​ໃຫ້​ເຮົາ​ດຳລົງ​ຊີວິດ​ແບບ​ໃໝ່ - WhatsApp Image 2020 05 27 at 5 - ​ໂຄ​ວິດ-19 ຈະ​ພາ​ໃຫ້​ເຮົາ​ດຳລົງ​ຊີວິດ​ແບບ​ໃໝ່
error: Alert: ເນື້ອຫາຂ່າວມີລິຂະສິດ !!