​ໂນ​ອຶນ ! ພາຍຸຮ່າໃຫຍ່​ເຂົ້າບ້ານ​ທຳລາຍ​ທຸກ​ສິ່ງ​ຢ່າງ​ທີ່​ຂວາງ​ໜ້າ

​ໂນ​ອຶນ ! ພາຍຸຮ່າໃຫຍ່​ເຂົ້າບ້ານ​ທຳລາຍ​ທຸກ​ສິ່ງ​ຢ່າງ​ທີ່​ຂວາງ​ໜ້າ - 555 63 - ​ໂນ​ອຶນ ! ພາຍຸຮ່າໃຫຍ່​ເຂົ້າບ້ານ​ທຳລາຍ​ທຸກ​ສິ່ງ​ຢ່າງ​ທີ່​ຂວາງ​ໜ້າ
​ໂນ​ອຶນ ! ພາຍຸຮ່າໃຫຍ່​ເຂົ້າບ້ານ​ທຳລາຍ​ທຸກ​ສິ່ງ​ຢ່າງ​ທີ່​ຂວາງ​ໜ້າ - Untitled design - ​ໂນ​ອຶນ ! ພາຍຸຮ່າໃຫຍ່​ເຂົ້າບ້ານ​ທຳລາຍ​ທຸກ​ສິ່ງ​ຢ່າງ​ທີ່​ຂວາງ​ໜ້າ

ໂດຍ: ທິດ​ກໍ່າ

ສັງ​ເກດ​ເຫັນ​ໄດ້​ວ່າ: ການ​ມາ​ຂອງ​ພາຍຸ​ແຕ່ລະ​ປີມັນ​ຈະ​ບໍ່​ຄື​ກັນ ​ແລະ ຊື່​ກໍ​ຕ່າງ​ກັນ​ເຊັ່ນ: ​ໃນ​ທ້າຍ​ລະດູຝົນ​ຂອງ​ປີ​ນີ້​ມັນ​ມີ​ຊື່ວ່າ “​ໂນ​ອຶນ” ​ເປັນ​ພາຍຸ​ທີ່​ຮ້າຍ​ແຮງ​ແຊງ​ໜ້າ​ພາຍຸ​ອື່ນ​ໆ​ໃນ​ແຕ່ລະ​ປີ ​ແລະ ນັບ​ມື້ຮຸນ​ແຮງ​ຮ້າຍ​ກາດ​ຂຶ້ນ​ເລື້ອຍໆ. ອັນ​ສາ​ເຫດ​ກໍ​ຍ້ອນ​ວ່າ​ມັນ​ມີ​ຄວາມ​ໄວ​ເຖິງ 80 ຫາ 100 ກິ​ໂລ​ແມັດ​ຕໍ່​ຊົ່ວ​ໂມງ. ຖ້າ​ເຮົາ​ຈະ​ມາ​ປຽບທຽບ​ໃສ່​ລົດ​ທີ່​ແລ່ນ​ໃນ​ຖະໜົນ​ຫົນທາງ​ສາຍ​ຫລັກໆ​ຢູ່​ບ້ານ​ເຮົາ​ກໍ​ໝາຍ​ຄວາມ​ວ່າ​ເທົ່າ​ກັນ​ເປະ​ເລີຍ. ຍ້ອນ​ຄວາມ​ໄວ​ຂອງ​ພາຍຸ​ດັ່ງກ່າວ​ຈຶ່ງ​ເຮັດ​ໃຫ້​ທຸກ​ສິ່ງ​ທຸກ​ຢ່າງ​ທີ່​ຂວາງ​ໜ້າ​ຕ້ອງ​ພັງ​ທະລາ​ຍ​ເດຍລະດາດ​ໄປ​ຕາມໆ​ກັນ​ຢ່າງ​ຮາບ​ຄາບ,​ ​ແມ້​ແຕ່​ເສົາ​ໄຟຟ້າ​ກໍ​ຫັກ, ຄົນ​ຍ່າງ, ຂີ່​ລົດຖີບ, ຂີ່​ລົດຈັກ, ລົດ​ໃຫຍ່​ກໍ​ແມ່ນ​ຈັ້ງທ່າ​ບໍ່​ຢູ່ ຫລືວ່າ ລົ້ມປິ້ນພິກ​ຂວ້ຳພິກ​ຫງາຍ. ນອກຈາກ​ນີ້ ຕົ້ນ​ໄມ້​ໃບ​ຫຍ້າ, ​ເຄື່ອງ​ປູກ​ຂອງ​ຝັງ ຕະຫລອດ​ຮອດ​ເຮືອນ​ຊາຍ​ບ້ານ​ຊ່ອງ, ສິ່ງ​ສາທາລະນະ​ຈຳນວນ​ຫລວງຫລາຍ​ແມ່ນ​ຖືກ​ເພພັງ​ຈົນ​ນັບ​ບໍ່​ຖ້ວນ. ນີ້​ຄື​ຄວາມ​ອັນຕະລາຍ​ຮ້າຍ​ກາດ​ຂອງ​ພາຍຸ “​ໂນ​ອຶນ” ​ເຊິ່ງ​ເຫັນ​ແລ້ວ​ມັນ​ກໍ​ເປັນຕາ​ໜ່າຍ ​ແລະ ໜ້າ​ຢ້ານ​ກົວ​ທີ່​ສຸດ.

ຈາກ​ຄວາມ​ເປັນ​ອັນຕະລາຍ​ຮ້າຍ​ກາດ ​ແລະ ມີ​ຜົນ​ກະທົບ​ຮ້າຍ​ແຮງ​ຂອງ​ພາຍຸ​ຊະນິດ​ນີ້, ຜ່ານ​ການ​ຕິດຕາມ​ແຫລ່ງຂ່າວ​ຄາວ​ເຫັນ​ວ່າ​ທາງ​ເພື່ອນ​ບ້ານ​ເຮົາ ສສ ຫວຽດນາມ ​ແມ່ນ​ມີ​ການ​ເສຍ​ຫາຍ​ຢ່າງ​ໜັກໜ່ວງ ຈົນ​ເຖິງ​ຂັ້ນ​ໄດ້​ຍົກຍ້າຍ​ປະຊາຊົນ​ໜີ​ໄພ​ຫລາຍ​ກວ່າ 1 ລ້ານ​ຄົນ. ນອກຈາກ​ນັ້ນ ສິ່ງ​ສາທາລະ​ນຸປະ​ໂພ​ກກໍ​ຖືກ​ລົມພາຍຸ​ໂນ​ອຶນ​ພັດ​ຖະຫລົ່ມ​ເສຍ​ຫາຍ​ຈົນ​ນັບ​ບໍ່​ຖ້ວນ. ບັນດາ​ແຂວງ​ທີ່​ຖືກ​ຜົນ​ກະທົບ​ຮ້າຍ​ແຮງ​ທີ່​ສຸດ​ກໍ​ແມ່ນ​ແຂວງ​ກວາງ​ບິງ, ກວາງ​ຈິ ​ແລະ ​ເທີ່​ທຽນ-​ເຫວ້ ຈົນ​ເຖິງ​ຂັ້ນ​ໄດ້​ສັ່ງ​ປິດ​ໂຮງຮຽນ ລວມທັງ​ຫາດ​ຊາຍ​ຝັ່ງ​ທະ​ເລ​ທ່ອງ​ທ່ຽວ​ຕ່າງໆ​ກໍ​ປິດ​ເປັນ​ການ​ຊົ່ວຄາວ. ​ແຫ​ລ່ງຂ່າວ​ຍັງ​ບອກ​ວ່າ ​ເພື່ອ​ຊ່ວຍ​ເຫລືອ​ປະຊາຊົນ​ຜູ້​ທີ່​ຖືກ​ຜົນ​ກະທົບ, ລັດຖະບານ​ຫວຽດນາມ​ໄດ້​ສັ່ງ​ໃຫ້​ກຳລັງ​ທະຫານ​ປະຈຳ​ພາກ ​ແລະ ທະຫານ​ຊາຍ​ແດນຫລາຍ​ກວ່າ 250.000 ຄົນ​ເຂົ້າຊ່ວຍ​ເຫລືອ​ປະຊາຊົນ​​ໃນ​ພື້ນທີ່​ທີ່​ຖືກ​ຜົນ​ກະທົບ ທັງ​ນ້ຳຖ້ວມ ທັງ​ລົມ​ພັດ​ຢ່າງ​ເປັນ​ການ​ໃຫຍ່.

​ແນວ​ໃດ​ກໍ​ດີ, ການ​ມາ​ຂອງ​ພາຍຸ “​ໂນ​ອຶນ” ຄັ້ງນີ້, ສປປ ລາວ​ເຮົາ ກໍ​ມີ​ຜົນ​ກະທົບ​ເໝືອນ​ກັນ ​ເປັນຕົ້ນນັບ​ແຕ່​ແຂວງ​ພາກ​ກາງ​ລົງ​ໄປ​ຫາ​ພາກ​ໃຕ້​ເຊັ່ນ: ຄຳ​ມ່ວນ, ສະຫວັນ​ນະ​ເຂດ, ສາລະ​ວັນ, ຈຳປາ​ສັກ, ​ແຕ່​ວ່າ​ມີ​ຜົນ​ກະທົບໜ້ອຍ​ຫລາຍ​ແຕກ​ຕ່າງ​ກັນ ​ໂດຍສະ​ເພາະ​ແມ່ນ​ພື້ນທີ່​ຖືກ​ນ້ຳຖ້ວມ​ໃນ​ຫລາຍ​ບ້ານ, ຫລາຍ​ເມືອງ ​ແລະ ຫລາຍ​ທ້ອງ​ຖິ່ນ ​ແຕ່​ກໍ​ບໍ່​ຮ້າຍ​ແຮງ​ເໝືອນ​ດັ່ງ​ເພື່ອນ​ບ້ານ ສສ ຫວຽດນາມ.

​ໂນ​ອຶນ ! ພາຍຸຮ່າໃຫຍ່​ເຂົ້າບ້ານ​ທຳລາຍ​ທຸກ​ສິ່ງ​ຢ່າງ​ທີ່​ຂວາງ​ໜ້າ - Wave100S AD to Website 2020 0 - ​ໂນ​ອຶນ ! ພາຍຸຮ່າໃຫຍ່​ເຂົ້າບ້ານ​ທຳລາຍ​ທຸກ​ສິ່ງ​ຢ່າງ​ທີ່​ຂວາງ​ໜ້າ

ພາຍຸ​ໂນ​ອຶນ​ ​ເປັນ​ໄພພິບັດ​ທາງ​ທຳ​ມະ​ຊາດ​ທີ່​ຮ້າຍ​ແຮງ​ຢ່າງ​ໃຫຍ່​ຫລວງ​ສຳລັບ​ປີ​ນີ້ ມັນ​ປຽບ​ເໝືອນ​ຮ່າ​ເຂົ້າບ້ານ ​ແລະ ອາ​ລະວາ​ດທຸກ​ສິ່ງ​ຢ່າງ​ທີ່​ຂວາ​ງໜ້າ. ​ແຕ່​ຍັງ​ພໍ​ໄຄ ສປປ ລາວ ຂອງ​ພວກ​ເຮົາ​ຍັງ​ບໍ່​ມີ​ຜູ້​ໃດ​ເສຍ​ຊີວິດ​ຍ້ອນ. ຕົກ​ມາ​ຮອດ​ຊ່ວງ​ນີ້​ຍັງ​ຢູ່​ໃນ​ລະຫວ່າງ​ເດືອນ​ກັນຍາ 2020 ​ເປັນ​ເດືອນ 10 ລາວ​ແລ້ວ. ​ໄປ​ຮອດ​ເດືອນ​ຕຸລາ​ຂອງ​ປີ 2020 ກໍ​ຈະ​ກ້າວ​ເຂົ້າ​ເດືອນ 11 ລາວ ປີ 2563 ອັນ​ເປັນ​ໄລຍະ​ກ້າວ​ເຂົ້າຍາມໜາວ ​ແລະ ​ເປັນ​ລະດູ​ແລ້ງ ຄາດ​ວ່າ​ຟ້າ​ຝົນ​ມັນ​ກໍ​ອາດ​ຈະ​ຮ້ວຍ ​ແລະ ໝົດ​ໄປ​ຕາມ​ວັດ​ຕະຈັກ​ຂອງ​ດິນ​ຟ້າ​ອາກາດ, ​ແຕ່​ກໍ​ຍັງ​ບໍ່​ແນ່​ນອນ ​ເພາະ​ຕົກ​ມາ​ເຖິງ​ຍຸກ​ນີ້ ສະພາບ​ດິນ​ຟ້າ​ອາກາດ​ຂອງ​ໂລກ​ມັນ​ມີ​ການ​ປ່ຽນ​ແປງ​ໄປ​ຫລາຍ​ແລ້ວ. ຄາດກະ​ວ່າ​ຈາກ​ນີ້​ໄປ​ຮອດ​ເດືອນ​ຕຸລາ ຝົນ​ມັນ​ອາດ​ຈະ​ຕົກ​ຕື່ມ ​ແຕ່​ຈະໜ້ອຍ ຫລື ຫລາຍ, ຄ່ອຍ ຫລື ​ແຮງ​ນັ້ນ ບໍ່​ມີ​ໃຜ​ຄາດ​ເດົາ​ໄດ້​ລ່ວງ​ໜ້າ​ຢ່າງ​ຊັດ​ເຈນ ຈຶ່ງ​ຂໍ​ໃຫ້​ພວກ​ເຮົາ​ພ້ອມ​ກັນ​ຕິດຕາມ​ສະພາບ​ດິນ​ຟ້າ​ອາກາດ​ຈາກ​ອຸຕຸນິຍົມ​ ​ແລະ ອຸ​ທົກ​ກະສາ​ດຢ່າງ​ໃກ້ຊິດ. ​ແຕ່​ກໍ​ໝັ້ນ​ໃຈ​ຢ່າງ​ຍິ່ງ​ວ່າ ​ໃນ​ປີ 2020 ອາດ​ບໍ່​ຄື​ປີ 2017 ​ແລະ 2018 ຈົນ​ເຂື່ອນ​ເຊ​ປຽນ-​ເຊ​ນ້ຳນ້ອຍ​ແຕກ​ຢູ່​ເມືອງ​ສະໜາມ​ໄຊ ​ແຂວງ​ອັດ​ຕະປື ​ແລະ ນ້ຳຖ້ວມ 2 ​ແຂວງ​ພາກ​ກາງ ​ແລະ 4 ​ແຂວງ​ພາກ​ໃຕ້.

​ເຖິງ​ຢ່າງ​ໃດ​ກໍ​ດີ, ​ໃນ​ເງື່ອນ​ໄຂ​ທີ່​ໂລກ​ນັບ​ມື້ມີ​ກາ​ນປ່ຽນ​ແປງ​ ດິນ​ຟ້າ​ອາກາດ​ກໍ​ມີ​ການ​ປ່ຽນ​ແປງ​ໄປ​ໃນ​ທຸກ​ໄລຍະ. ຈາກ​ສາ​ເຫດ​ດັ່ງກ່າວ​ຈະ​ເຮັດ​ໃຫ້​ເກີດ​ໄພພິບັດ​ຕ່າງໆ​ທີ່​ບໍ່​ຄາດ​ຄິດ ​ເປັນຕົ້ນຮ້ອນ​ເກີນ​ໄປ, ໜາວ​ເກີນ​ໄປ, ​ເກີດ​ແຜ່ນດິນ​ໄຫວ, ​ເກີດ​ພາຍຸ ທັງ​ຝົນ​ທັງ​ລົມ ອັນ​ຈະ​ເຮັດ​ໃຫ້​ມີ​ຜົນ​ກະທົບ​ຢ່າງ​ໃຫຍ່​ຫລວງ​ຕໍ່​ຊີວິດ​ອິນ​ຊີ​ຂອງ​ຄົນ​ເຮົາ ​ແລະ ​ເສດຖະກິດ-ສັງຄົມ​ຂອງ​ປະ​ເທດ​ຊາດ. ​ເພາະສະນັ້ນ ຈຶ່ງ​ຂໍ​ໃຫ້​ທຸກ​ຄົນ​ມີ​ສະຕິ​ໃນ​ການ​ດຳລົງ​ຊີວິດ. ຄວາມ​ປອດ​ໄພ ​ແລະ ຄວາມ​ສັນຕິ​ສຸກ​ຂອງ​ສັງຄົມບ້ານ​ເມືອງ​ເປັນ​ຍອດ​ປາຖະໜາ​ຂອງ​ພວກ​ເຮົາ​ໃນ​ຍຸກ​ໂລກາ​ພິວັດ.

​ໂນ​ອຶນ ! ພາຍຸຮ່າໃຫຍ່​ເຂົ້າບ້ານ​ທຳລາຍ​ທຸກ​ສິ່ງ​ຢ່າງ​ທີ່​ຂວາງ​ໜ້າ - WhatsApp Image 2020 05 27 at 5 - ​ໂນ​ອຶນ ! ພາຍຸຮ່າໃຫຍ່​ເຂົ້າບ້ານ​ທຳລາຍ​ທຸກ​ສິ່ງ​ຢ່າງ​ທີ່​ຂວາງ​ໜ້າ
​ໂນ​ອຶນ ! ພາຍຸຮ່າໃຫຍ່​ເຂົ້າບ້ານ​ທຳລາຍ​ທຸກ​ສິ່ງ​ຢ່າງ​ທີ່​ຂວາງ​ໜ້າ - WhatsApp Image 2020 05 27 at 5 - ​ໂນ​ອຶນ ! ພາຍຸຮ່າໃຫຍ່​ເຂົ້າບ້ານ​ທຳລາຍ​ທຸກ​ສິ່ງ​ຢ່າງ​ທີ່​ຂວາງ​ໜ້າ
error: Alert: ເນື້ອຫາຂ່າວມີລິຂະສິດ !!