ຕ້ານ​ທຸກ​ຖ້ອຍ​ທຳນອງ​ໃສ່​ຮ້າຍ​ປ້າຍ​ສີ​ພວກ​ບໍ່​ຫວັງ​ດີ

ຕ້ານ​ທຸກ​ຖ້ອຍ​ທຳນອງ​ໃສ່​ຮ້າຍ​ປ້າຍ​ສີ​ພວກ​ບໍ່​ຫວັງ​ດີ - 555 65 - ຕ້ານ​ທຸກ​ຖ້ອຍ​ທຳນອງ​ໃສ່​ຮ້າຍ​ປ້າຍ​ສີ​ພວກ​ບໍ່​ຫວັງ​ດີ
ຕ້ານ​ທຸກ​ຖ້ອຍ​ທຳນອງ​ໃສ່​ຮ້າຍ​ປ້າຍ​ສີ​ພວກ​ບໍ່​ຫວັງ​ດີ - Untitled design - ຕ້ານ​ທຸກ​ຖ້ອຍ​ທຳນອງ​ໃສ່​ຮ້າຍ​ປ້າຍ​ສີ​ພວກ​ບໍ່​ຫວັງ​ດີ

ໂດຍ: ທິດ​ກໍ່າ

​ໃນ​ໂອກາດ​ກອງ​ປະຊຸມລັດຖະບານ​ສະ​ໄໝ​ສາມັນ​ປະຈຳ​ເດືອນ​ກັນຍາ 2020 ​ເຊິ່​ງ​ໄດ້​ຈັດ​ຂຶ້ນ​ໃນ​ວັນ​ທີ 17-18 ກັນຍາ ພາຍ​ໃຕ້​ການ​ເປັນ​ປະທານ​ຂອງ​ທ່ານ​ ນາຍົກລັດຖະມົນຕີ ທອງ​ລຸນ ສີ​ສຸ​ລິດ ​ໄດ້​ເນັ້ນໜັກ​ວ່າ: ​ໃຫ້​ທຸກ​ພາກ​ສ່ວນ​ມີ​ສະຕິ​ຕໍ່​ກົນອຸບາຍ​ມ້າງ​ເພ​ທຳລາຍ​ຂອງ​ກຸ່ມ​ຄົນ​ບໍ່​ຫວັງ​ດີ​ຕໍ່ ສປປ ລາວ ທັງ​ແນະນຳ​ໃຫ້​ສື່​ມວນ​ຊົນ​ລາວ​ຈົ່ງ​ເປັນ​ກະບອກ​ສຽງ​ທີ່​ແຫລມ​ຄົມ​ໃນ​ການ​ຕອບ​ຕ້ານ ​ແລະ ຕອບ​ໂຕ້​ການ​ອອກ​ຂ່າວ​ທີ່​ບໍ່​ມີ​ມູນ​ຄວາມ​ຈິງ ຫລື​ວ່າ ທຸກ​ແຫ​ລ່ງຂ່າວ​ທີ່​ມີ​ອະຄະຕິ​ຖ້ອຍ​ທຳນອງ​ໃສ່​ຮ້າຍ​ປ້າຍ​ສີ ສປປ ລາວ ຂອງ​ພວກ​ເຮົາ​ຢ່າງ​ບໍ່​ເວັ້ນ​ແຕ່​ລະ​ວັນ ​ແລະ ບໍ່​ຂາດ​ໄລຍະ.

ກໍ​ດັ່ງ​ພວກ​ເຮົາ​ຮູ້​ນຳ​ກັນ​ແລ້ວ​ວ່າ, ​ໃນ​ຍຸກ​ສະ​ໄໝ​ນີ້​ໃຜ​ຈະ​ເຮັດ​ຫຍັງ, ​ເວົ້າຫຍັງ, ຢູ່​ໃກ້, ຢູ່​ໄກ​ກັນ​ເປັນ​ຮ້ອຍ​ໂຍດ​ພັນ​ໂຍດ​ກໍ​ໄດ້​ຍິນ, ​ໄດ້​ຟັງ ​ແລະ ​ໄດ້​ຮູ້​ໄດ້​ເຫັນ​ກັນ​ຢ່າງ​ຊັດ​ເຈນ ຍ້ອນ​ວ່າ​ໃນ​ຍຸກ​ຫູ​ທິບ​ຕາ​ທິບ​ນີ້ ຂໍ້​ມູນ​ຂ່າວສານ​ມັນ​ໄວ​ກວ່າ​ຈະ​ຫລວດ ​ແລະ ອາວຸດ​ນິວ​ເຄຼຍ. ​ໃນ​ບັນດາ​ສື່​ຕ່າງໆ​ທີ່​ຄົນ​ເຮົາ​ພວມ​ນິຍົມ​ຊົມ​ຊອບ​ກັນ​ບໍລິ​ໂພ​ກຢ່າງ​ກວ້າງຂວາງ​ກໍ​ແມ່ນ​ທາງ​ລະບົບ​ສື່​ໃໝ່ ຫລື​ວ່າ ສື່​ອອນ​ລາຍ ບໍ່​ວ່າ​ຢູ່​ໃນ​ເຟສບຸກ, ຢູທູບ ຫລື​ວ່າ ທາງ​ໜັງສືພິມ, ວິທະຍຸ​, ​ໂທລະພາບ ກໍ​ລ້ວນ​ແລ້ວ​ແຕ່​ສະພາບ​ແວດ​ລ້ອມ ​ແລະ ​ເງື່ອນ​ໄຂ​ການ​ພັດທະນາ​ຂອງ​ສື່​ນັ້ນໆ.

​ ​ແຕ່​ວ່າ​ແນວ​ໃດ​ກໍ​ຕາມ, ​ໃນ​ແຫ​ລ່ງສື່​ຕ່າງໆ​ນັ້ນ ມັນ​ກໍ​ມີ​ຫລາຍ​ຮູບ​ຫລາຍ​​ແບບ, ຫລາກ​ຫລາຍ​ສີສັນ, ມີ​ທັງ​ອັນ​ຈົບ​ອັນ​ງາມ ມີ​ທັງ​ອັນ​ກ້າວໜ້າ​, ຫຍໍ້​ທໍ້ ​ແລະ ຂີ້ກະ​ເຕິະ​ເຮິະຮ້າຍ​ ສຸດ​ແລ້ວ​ບຸກຄົນ, ກຸ່ມ​ຄົນ​ຜູ້​ທີ່​ມີ​ຈັນ​ຍາ​ບັນ ​ແລະ ບໍ່​ມີ​ຈັນ​ຍາ​ບັນ​ບໍລິ​ໂພ​ກ​ ເວົ້າ​ແຈ້ງ​ຖື​ວ່າ​ສື່ມວນ​ຊົນ​ເປັນ​ກະບອກ​ສຽງ​ອັນ​ສັກສິດ​ຂອງ​ຊົນ​ຊັ້ນ, ຂອງ​ຊາດ​ນັ້ນໆ ​ແລະ ທັງ​ຮັບ​ໃຊ້​ຜົນ​ປະ​ໂຫຍ​ດ ​ແລະ ປົກ​ປ້ອງ​ຜົນ​ປະ​ໂຫຍ​ດຂອງ​ຊາດ, ຂອງ​ຊົນ​ຊັ້ນນັ້ນຢ່າງ​ຫລີກ​ລ່ຽງບໍ່​ໄດ້. ​ເພາະສະນັ້ນ ບໍ່​ວ່າ​ຊົນ​ຊັ້ນ​ໃດ, ຊາດ​ໃດ, ກຸ່ມ​ຄົນ​ໃດ, ພັກ​ໃດ​ກຳ​ອຳນາດ ກໍ​ລ້ວນ​ແລ້ວ​ແຕ່​ອາ​ໄສ​ສື່​ມວນ​ຊົນ​ເປັນ​ກະບອກ​ສຽງ​ອັນ​ແຫລມ​ຄົມ ​ເພື່ອ​ຕອບ​ຕ້ານ ​ແລະ ຕອບ​ໂຕ້​ຝ່າຍ​ປໍ​ລະ​ປັກ​ທີ່​ຈະ​ເຂົ້າມາ​ບຸກລຸກ​ທຳລາຍ​ຄວາມ​ສະຫງົບ​ສຸກ​ຂອງ​ບ້ານ​ເມືອງ. ​ໃນ​ປະຫວັດສາດ​ຂອງ​ຊາດ​ລາວ​ພວກ​ເຮົາ​ຍຸກ​ອະດີດຕະການ ກໍ​ເຄີຍ​ມີ​ຫລາຍ​ເຈົ້າ, ຫລາຍ​ພັກຫລາຍ​ພວກ, ມີ​ຄວາມ​ຂັດ​ແຍ່ງ​ກັນ​ມາ​ ຈົນ​ວ່າ​ປະ​ເທດຊາດ​ບ້ານ​ເມືອງ​ຕົກ​ຢູ່​ໃນ​ສະພາວະ​ທຸກ​ຍາກ​ລຳບາກ ​ແລະ ລະ​ອິດ​ລະ​ອ້ຽວ​ທີ່​ສຸດ. ຕົວຢ່າງ​ໃນ​ຍຸກ​ລ້ານ​ຊ້າງ​ກໍ​ຍາດ​ຊີງ​ກັນ​ເປັນ​ໃຫຍ່, ​ໃຜ​ກໍ​ຢາກ​ເປັນ​ເຈົ້າ ສຸດ​ທ້າຍ​ມາ​ສັດຕູ​ພາຍ​ນອກ​ກໍ​ເຂົ້າມາ​ແຊກ​ແຊງ​ບຽດ​ຍຶດຮຸກ​ຮານ ​ແລ້ວ​ເອົາ​ເປັນ​ຫົວ​ເມື​ອງຂຶ້ນຕັ້ງຫລາຍ​ຮ້ອຍ​ປີ ຈົນ​ປະ​ເທດ​ຊາດ​ບ້ານ​ເມືອງ​ຖືກ​ຕັດ​ຮອນ​ເສຍ​ຫາຍ​ໄປ​ຈົນ​ມາ​ເຖິງ​ທຸກ​ວັນ​ນີ້. ຕໍ່​ມາ​ໃນ​ຍຸກ​ຝຣັ່ງ ​ແລະ ອາ​ເມ​ລິ​ກາ​ເຂົ້າມາ​ຮຸກ​ຮານ​ກໍ​ມີ​ຫລາຍ​ພັກ​ຫລາຍ​ຝ່າຍ​ຍາດ​ແຍ່ງ ​ແລະ ຂັດ​ແຍ້​ງກັນ ​ເພື່ອ​ຂາດ​ຊີງ​ອຳນາດ, ອັນ​ສາ​ເຫດ​ກໍ​ຍ້ອນ​ວ່າ ພວກ​ອິດ​ທິກຳລັງ​ລ່າ​ເມືອງ​ຂຶ້ນ​ໄດ້​ຕົວະ​ຍົວະ​ໃຫ້​ຄົນ​ລາ​ວ​ເຮົາ​ບໍ່​ເຂົ້າ​ໃຈ​ກັນ, ຂ້າ​ກັນ​ຈົນ​ວ່າ​ມີ​ການ​ຕໍ່ສູ້​ປະຕິວັດ​ເກີດ​ຂຶ້ນ ກາຍ​ເປັນ​ສົງຄາມ​ທີ່​ຍືດ​ເຍື້ອຍາວ​ນານ, ​ແຕ່​ວ່າ​ດ້ວຍ​ແນວທາງ​ອັນ​ຖືກຕ້ອງ ​ແລະ ມະນຸດສະທຳ ​ເພື່ອ​ປະຊາຊົນ​ ຝ່າຍ​ກຳລັງ​ປະຕິວັດ​ຊາດ​ປະຊາທິປະ​ໄຕ​ກໍ​ໄດ້​ຮັບ​ໄຊຊະນະ​ຢ່າງ​ຖ້ວມ​ທົ້ນ​ໃນ​ປີ 1975 ​ແລະ ສາມາດ​ຂັບ​ໄລ່​ໄຖ​ຫົວ​ພວກ​ຈັກກະພັດ​ຜູ້​ຮຸກ​ຮານ ພ້ອມ​ລູກ​ແຫ​ລ່ງຕີນ​ມື​ທີ່​ນິຍົມ​ຊົມ​ຊອບ​ພວກ​ເຂົາ​ໜີ​ໄປ​ຕະ​ເຫລີ​ດ​ເປີດ​ເປີງ​ຈົນ​ມາ​ເຖິງ​ປັດຈຸບັນ​ນີ້.

ຕ້ານ​ທຸກ​ຖ້ອຍ​ທຳນອງ​ໃສ່​ຮ້າຍ​ປ້າຍ​ສີ​ພວກ​ບໍ່​ຫວັງ​ດີ - Wave100S AD to Website 2020 0 - ຕ້ານ​ທຸກ​ຖ້ອຍ​ທຳນອງ​ໃສ່​ຮ້າຍ​ປ້າຍ​ສີ​ພວກ​ບໍ່​ຫວັງ​ດີ

ຕະຫລອດ 40 ກວ່າ​ປີ, ປະ​ເທດ​ຊາດ​ບ້ານ​ເມືອງ​ຂອງ​ພວກ​ເຮົາ​ໄດ້​ມີ​ເອກະລາດ, ປະຊາທິປະ​ໄຕ ​ແລະ ອິດສະຫລະພາບ ພວມ​ເລັ່ງສ້າງສາ​ພັດທະນາ​ບ້ານ​ເມືອງ​ພາຍ​ໃຕ້​ການ​ນຳພາ​ຂອງ​ພັກ​ປະຊາຊົນ​ປະຕິວັດ​ລາວ ​ໄດ້​ເຮັດ​ໃຫ້​ປະ​ເທດ​ຊາດບ້ານ​ເມືອງ​ເດີນ​ໜ້າ ​ແລະ ກ້າວ​ໄປ​ຢ່າງ​ບໍ່​ຢຸດ​ຢັ້ງ. ສິ່ງ​ທີ່ຢັ້ງຢືນ​ໃຫ້​ເຫັນ​ເຖິງ​ສີສັນ​ຂອງ​ລະບອບ​ສັງຄົມ​ນິຍົມ​ອັນ​ໃໝ່ ​ແລະ ຈະ​ແຈ້ງ​ຢູ່​ໃນ​ປະ​ເທດ​ເຮົາ ກໍ​ຄື​ປະ​ເທດ​ຊາດ​ມີ​ຄວາມ​ສະຫງົບ​ອົບ​ອຸ່ນ, ບໍ່​ມີ​ຄວາມ​ຂັດ​ແຍ່ງ​ໃນ​ສັງຄົມ​ບ້ານ​ເມືອງ, ບໍ່​ມີ​ເສິກ​ສົງຄາມ​​ເໝືອນ​ດັ່ງ​ເມື່ອ​ກ່ອນ, ປະຊາຊົນ​ບັນດາ​ເຜົ່າ​ຍຸ​ທາງ​ສ້າງສາ​ພັດທະນາ​ຊີວິດການເປັນຢູ່ຂອງ​ເຂົາ​ເຈົ້າ​ໃຫ້​ດີ​ຂຶ້ນນັບ​ມື້. ບົດບາດ​ຂອງ​ປະ​ເທດ​ລາວ​ຂອງ​ພວກ​ໄດ້​ເຊື່ອມ​ໂຍງ ​ແລະ ກ້າວ​ເຂົ້າກັບ​ສາກົນ ​ແລະ ກັບ​ໂລກ​ສະ​ໄໝ​​ໄດ້​ຢ່າງ​ລົງ​ຕົວ.

ຍ້ອນ​ສີສັນ​ຂອງ​ສັງຄົມ​ລາວ​ຍຸກ​ໃໝ່​ທີ່​ພວມ​ມີ​ການ​ປ່ຽນ​ແປງ ​ແລະ ພັດທະນາ​ດີ​ຂຶ້ນນັ້ນ, ພວກ​ອິດ​ທິກຳລັງ​ປໍ​ລະ​ປັກ​ທີ່ຍັງ​ມີ​ອະຄະຕິ ​ແລະ ຄວາມ​ອາ​ຄາດ​ບາດໝາງ ຍາມ​ໃດ​ພວກ​​ເຂົາ​ກໍ​ບໍ່​ປະລະ​ກົນອຸບາຍ​ມ້າງ​ເພ​ທຳລາຍ ສປປ ລາວ ຂອງ​​ເຮົາ​ຢ່າງ​ບໍ່​ເວັ້ນ​ແຕ່​ລະ​ວັນ. ພວກ​ທີ່​ມັກ​ເວົ້າວ່າ​ໃສ່​ຮ້າຍ​ປ້າຍ​ສີ​ໃຫ້ ສປປ ລາວ ຫລາຍ​ກວ່າ​ໝູ່​ກໍ​ແມ່ນ​ຄົນ​ລາວ​ຈຳນວນ​ໜຶ່ງ​ທີ່​​ໄດ້​ໂຕນ​ໜີ​ໄປ​ຢູ່​ຕ່າງປະ​ເທດ ​ເຊິ່ງ​ເອີ້ນ​ວ່າ “ລາວ​ນອກ” ​ແຕ່​ລະ​ວັນ​ເຂົາ​ໄດ້​ປ່ອຍ​ຂ່າວ​ສາລະພັດ​ຢ່າງ​ໃສ່​ຮ້າຍ​ປ້າຍ​ສີ​ວ່າ ລາວ​ເປັນ​ຫົວ​ເມືອງ​ຂຶ້ນຂອງ​ຈີນ, ຂອງ​ຫວຽດນາມ, ບຸດ​ໜຶ່ງ​ພັດ​ວ່າ ຈີນ​ຍຶດ​ເຂື່ອນ​ລາວ, ຊອກ​ຫາ​ບ່ອນ​ຂີ້ກະ​ເຕິະ​ເຮິະຮ້າຍ​ໃນ​ສັງຄົມ​ແລ້ວ​ກໍ​ມາ​ວິຈານ​ວ່າ ສປປ ລາວ ບໍ່​ມີ​ປະຊາທິປະ​ໄຕ, ​ເປັນ​ອຳນາດ​ຜະ​ເດັດ​ການ, ຂົ່ມ​ເຫັງ​ປະຊາຊົນ, ບໍ່​ສ້າງ​ບໍ່​ສາ ​ແລະ ອື່ນໆ​ສາລະພັດ​ຢ່າງ​ໂດຍ​ຮູ້​ເທົ່າ​ບໍ່​ເຖິງ​ການ ​ແລະ ຈົງ​ໃຈ​ຫາ​ເລື່ອງ​ໃສ່​ຮ້າຍ​ປ້າຍ​ສີ​ກັນ. ຍິ່ງ​ໄປ​ກວ່າ​ນັ້ນ, ພວກ​ເຂົາ​ຍັງ​ຕັ້ງອົງ​ກອນ​ຕ່າງໆ​ຢູ່​ຕ່າງ​ແດນ​ແລ້ວ​ປິ່ນ​ປາຍ​ກະບອກ​ສຽງ​ຜ່ານ​ທາງ​ເຟສບຸກ, ຢູທູບ​ວ່າ​ຈະ​ມາ​ຍຶດອຳນາດ ​ແລະ ນຳ​ເອົາລະ​ບອບ​ປະຊາທິປະ​ໄຕ​ແບບ​ລາຊາ​ນັ້ນຄືນ​ມາ​ປົກຄອງ​ລາວ ວ່າ​ຊັ້ນ ! ​ແຕ່​ໃນ​ຄວາມ​ເປັນ​ຈິງ​ແລ້ວ ​ເລື່ອງ​ການ​ສູ້​ຢັນ​ກັນ​ໃນ​ການ​ບໍລິຫານ​ປົກຄອງ​ບ້ານ​ເມືອງ​ນັ້ນ, ປະຫວັດສາດ​ໄດ້​ພິສູດ​ໃຫ້​ເຫັນ​ແລ້ວ ​ແລະ ​ໄດ້​ເຮັດ​ເສິກ​ກັນ​ມາ​ແລ້ວ​ໃນ​ຍຸກ​ສົງຄາມ​ເຢັນ​ບໍ່​ຈຳ​ເປັນ​ຕ້ອງ​ມາ​ອ້າງ. ຈຶ່ງ​ຂໍ​ໃຫ້​ພວກ​ເຮົາ​ທຸກ​ຄົນ​ທີ່​ເປັນ​ຊາດ​ລາວ, ຄົນ​ລາວ​ທີ່​ຮັກ​ຊາດ​ບ້ານ​ເມືອງ ບໍ່​ວ່າ​ຢູ່​ໃກ້ ຫລື ​ໄກ​ບໍລິ​ໂພ​ກຂ່າວ​ຢ່າງ​ມີ​ສະຕິ ​ແລະ ພິຈາລະນາ​ຢ່າງ​ຖ້ວນ​ຖີ່ ​ເພາະ​ຍຸກ​ນີ້​ກ້າວ​ເຂົ້າສູ່​ຍຸກ​ພະ​ເຈົ້າອະຣິຍະ​ເມດ​ໄຕຣ ​ເປັນ​ເຈົ້າປົກຄອງ​ບ້ານ​ເມືອງ​ແລ້ວ !.

ຕ້ານ​ທຸກ​ຖ້ອຍ​ທຳນອງ​ໃສ່​ຮ້າຍ​ປ້າຍ​ສີ​ພວກ​ບໍ່​ຫວັງ​ດີ - WhatsApp Image 2020 05 27 at 5 - ຕ້ານ​ທຸກ​ຖ້ອຍ​ທຳນອງ​ໃສ່​ຮ້າຍ​ປ້າຍ​ສີ​ພວກ​ບໍ່​ຫວັງ​ດີ
ຕ້ານ​ທຸກ​ຖ້ອຍ​ທຳນອງ​ໃສ່​ຮ້າຍ​ປ້າຍ​ສີ​ພວກ​ບໍ່​ຫວັງ​ດີ - WhatsApp Image 2020 05 27 at 5 - ຕ້ານ​ທຸກ​ຖ້ອຍ​ທຳນອງ​ໃສ່​ຮ້າຍ​ປ້າຍ​ສີ​ພວກ​ບໍ່​ຫວັງ​ດີ
error: Alert: ເນື້ອຫາຂ່າວມີລິຂະສິດ !!