ຈີນສັ່ງຫ້າມ “ອາຫານທະເລແຊ່ແຂງ” ຈາກອິນໂດເນເຊຍ ຫລັງກວດພົບເຊື້ອໂຄວິດ-19
ສຳນັກຂ່າວບລູມເບິກ ລາຍງານວ່າ: ບໍລິສັດ ພີ. ທີ. ປຸຕຣີອິນດາ (Pt putrid indah) ເຊິ່ງເປັນບໍລິສັດສົ່ງອອກສິນຄ້າທະເລແປຮູບລາຍໃຫຍ່ຂອງອິນໂດເນເຊຍ ຜະເຊີນບັນຫາໃຫຍ່ ພາຍຫລັງທາງການຈີນກວດພົບເຊື້ອໄວຣັສໂຄໂຣນາໃນຊີ້ນປາແຮເທລແຊ່ແຂງ ເຮັດໃຫ້ກົມພາສີ-ອາກອນຂອງຈີນສັ່ງໂຈະການນຳເຂົ້າຜະລິດຕະພັນສັດນ້ຳຈາກບໍສັດດັ່ງກ່າວທັນທີເປັນເວລາ 1 ອາທິດ.
ໂດຍຈາກການກວດສອບອາຫານທະເລແຊ່ແຂງທັງໝົດປະມານ 500.000 ຕົວຢ່າງ ພົບຈຳນວນ 6 ຕົວຢ່າງທີ່ການທົດລອງເຊື້ອໄວຣັສໂຄໂຣນາມີຜົນເປັນບວກ. ຂະນະທີ່ທາງບໍລິສັດຍັງເມີນເສີຍບໍ່ໄດ້ອອກມາຊີ້ແຈງໃດໆ.
ກ່ອນໜ້ານີ້ ລັດຖະບານຈີນໄດ້ສັ່ງຫ້າມການນຳເຂົ້າຜະລິດຕະພັນອາຫານທະເລແປຮູບ ລວມທັງຊີ້ນສັດແຊ່ແຂງເຊັ່ນ: ກຸ້ງຈາກເອກົວດໍ ແລະ ປີກໄກ່ຈາກເບຣຊິນ ພາຍຫລັງກວດພົບເຊື້ອໄວຣັສໂຄວິດ-19.
ທັງນີ້ ນັບແຕ່ເດືອນມິຖຸນາເປັນຕົ້ນມາ ລັດຖະບານຈີນໄດ້ດຳເນີນມາດຕະການກວດສອບຜະລິດຕະພັນອາຫານທະເລ ແລະ ພາຊະນະນຳເຂົ້າຈາກຕ່າງປະເທດຢ່າງເຂັ້ມງວດ ເຮັດໃຫ້ພົບທີ່ມາຂອງເຊື້ອໄວຣັສໂຄວິດ-9 ຫລາຍເທື່ອ.
ລາຍງານລະບຸວ່າ: ໃນວັນທີ 19 ກັນຍາຜ່ານມາ, ກະຊວງກິດຈະການນາວີ ແລະ ປະມົງຂອງອິນໂດເນເຊຍ ຊີ້ແຈງວ່າ: ອິນໂດເນເຊຍຍັງສາມາດສົ່ງອອກອາຫານທະເລໄປຈີນໄດ້ ໂດຍທາງການຈີນໄດ້ໂຈະສິນຄ້ານຳເຂົ້າຈາກບໍລິສັດ ພີ. ທີ. ປຸຕຣີອິນດາເທົ່ານັ້ນ ແລະ ບໍ່ໄດ້ຫ້າມນຳເຂົ້າສິນຄ້າທະເລແປຮູບຈາກບໍລິສັດອື່ນຂອງອິນໂດເນເຊຍ ໂດຍຈີນຖືເປັນຈຸດໝາຍປາຍທາງສຳຄັນທີ່ສຸດໃນການສົ່ງອອກອາຫານທະເລຂອງອິນໂດເນເຊຍ.
ໂດຍມີການສົ່ງອອກຫລາຍກວ່າ 168.300 ໂຕນ ໃນປີ 2019 ມູນຄ່າຫລາຍກວ່າ 240 ລ້ານໂດລາ ຕາມສະຖິຕິການຄ້າຂອງອິນໂດເນເຊຍ ສົ່ງຜົນໃຫ້ທາງການອິນໂດເນເຊຍຕ້ອງເລັ່ງກວດສອບໃບຮັບຮອງດ້ານສຸຂະອະນາໄມຈາກຜູ້ສົ່ງອອກທີ່ໄດ້ຮັບຜົນກະທົບຈາກການໂຈະການນຳເຂົ້າຈາກຈີນ.
