ເປີດນຳໃຊ້ສະຖານີວິທະຍຸເພື່ອການພັດທະນາເມືອງນາກາຍ

ພິທີເປີດການນຳໃຊ້ ແລະ ອອກອາກາດຂອງສະຖານີວິທະຍຸເພື່ອການພັດທະນາເມືອງນາກາຍ ແຂວງຄຳມ່ວນ ໄດ້ຈັດຂຶ້ນຢ່າງເປັນທາງການໃນວັນທີ 25 ກັນຍານີ້, ໂດຍການເຂົ້າຮ່ວມຂອງທ່ານ ໂອໄດ ສຸດາພອນ, ເຈົ້າແຂວງຄຳມ່ວນ, ທ່ານ ສະຫວັນຄອນ ຣາຊມຸນຕີ, ຮອງລັດຖະມົນຕີ ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ.

ເພື່ອແນໃສ່ຮັບປະກັນໃຫ້ປະຊາຊົນຢູ່ເຂດຫ່າງໄກຊອກຫຼີກໄດ້ເຂົ້າເຖິງຂໍ້ມູນຂ່າວສານໃນດ້ານຕ່າງໆດີຂຶ້ນ ແລະ ຊຸມຊົນຈະສາມາດມີສ່ວນຮ່ວມໃນການຕັດສິນໃຈເພື່ອພັດທະນາຊຸມຊົນກໍຄືຊ່ວຍປັບປຸງຄຸນນະພາບຊີວິດຂອງເຂົາເຈົ້າໃຫ້ດີຂຶ້ນ.

ສະຖານີວິທະຍຸດັ່ງກ່າວນີ້ໄດ້ຮັບການປັບປຸງ ແລະ ຍົກລະດັບກຳລັງສົ່ງຂຶ້ນເປັນ 1 ກິໂລວັດ ໂດຍການຮ່ວມມືລະຫ່ວາງອົງການ ສປຊ ແລະ ກະຊວງ ຖວທ, ເຊິ່ງແມ່ນໂຄງການ ສສປວ ເປັນຜູ້ຈັດຕັ້ງປະຕິບັດ, ພາຍໃຕ້ການຊີ້ນໍາກວດກາຈາກ ກົມສື່ມວນຊົນ ໂດຍໄດ້ຮັບທຶນສະໝັບສະໝູນຈາກອົງການສະຫະປະຊາຊາດເພື່ອການພັດທະນາປະຈຳລາວ (ສປຊ) ແລະ ບໍລິສັດໄຟຟ້ານໍ້າເທີນ 2 ເປັນມູນຄ່າ 200.000 ໂດລາສະຫະລັດ. ໃນນັ້ນ ບໍລິສັດໄຟຟ້ານໍ້າເທີນ 2 ປະມານ 60% ແລະ ອົງການ ສປຊ 40% ໂດຍໄດ້ເລີ່ມປະຕິບັດມາແຕ່ປີ 2019.