​ ຂໍ​ພຽງ​ແຕ່​ມີ​ວິຊາ​ຊີບ ບໍ່ມີວັດອົດຕາຍ ແຮ່ງນັບ​ມື້ຈະ​​ສົດ​ໃສ

​ ຂໍ​ພຽງ​ແຕ່​ມີ​ວິຊາ​ຊີບ ບໍ່ມີວັດອົດຕາຍ ແຮ່ງນັບ​ມື້ຈະ​​ສົດ​ໃສ - 5555 - ​ ຂໍ​ພຽງ​ແຕ່​ມີ​ວິຊາ​ຊີບ ບໍ່ມີວັດອົດຕາຍ ແຮ່ງນັບ​ມື້ຈະ​​ສົດ​ໃສ
​ ຂໍ​ພຽງ​ແຕ່​ມີ​ວິຊາ​ຊີບ ບໍ່ມີວັດອົດຕາຍ ແຮ່ງນັບ​ມື້ຈະ​​ສົດ​ໃສ - 174233 - ​ ຂໍ​ພຽງ​ແຕ່​ມີ​ວິຊາ​ຊີບ ບໍ່ມີວັດອົດຕາຍ ແຮ່ງນັບ​ມື້ຈະ​​ສົດ​ໃສ

​ໂດຍ: ທິດ​ກໍ່າ

ເມື່ອ​ເບິ່ງ​ພາບ​ລວມ​ໃນ​ການ​ສ້າງສາ​ພັດທະນາ​ປະ​ເທດ​ຊາດ​ຂອງ​ພວກ​ເຮົາ​ໃນ​ປັດຈຸບັນ​ນີ້ ​ເຫັນ​ວ່າຍັງ​ຄຶກຄັກ​ຕໍ່​ເນື່ອງ ​ແລະ ​ເບິ່ງ​ໄປ​ໃນ​ອະນາຄົດ​ກໍ​ຈະ​ນັບ​ມື້​ເດີນ​ໜ້າ​ຂະຫຍາຍຕົວ​ໄປ​ຢ່າງ​ບໍ່​ຢຸດຢັ້ງ. ​ໃນ​ສະພາບ​ປັດຈຸບັນ ​ເຖິງ​ວ່າ​ມີ​ໂຄ​ວິດ-19 ມາ​ກົດ​ໜ່ວງ​ທຳລາຍ​ເສດຖະກິດ-ສັງຄົມ​ຂອງ​ປະ​ເທດ ອັນ​ມີ​ຜົນ​ກະທົບ​ຢ່າງ​ໃຫຍ່​ຫລວງ, ​ແຕ່​ບັນຫາ​ການ​ສ້າງສາ​ພັດທະນາ​ກໍ​ຍັງ​ເດີນ​ໜ້າ​ໄປ​ຕິກໆ. ສິ່ງ​ທີ່​ເຫັນ​ກັບ​ຕາກໍ​ຄື​ບັນດາ​ໂຄງການ​ໃຫຍ່​ນ້ອຍ​ຕ່າງໆ​ເຊັ່ນ: ​ໂຄງການ​ກໍ່ສ້າງ​ເຂື່ອນ​ໄຟຟ້າ, ​ໂຄງການ​ພັດທະນາ​ເຂດ​ເສດຖະກິດ​ພິ​ເສດ,​ ​ເສດຖະກິດ​ສະ​ເພາະ​ແບບ​ກວມ​ລວມ ນັບ​ທັງ​ໂຄງການ​ສ້າງ​ທາງ​ລົດ​ໄຟ​ຄວາມ​ໄວ​ສູງ ລາວ-ຈີນ, ​ໂຄງການ​ສ້າງ​ທາງ​ດ່ວນ ​ແລະ ​ໂຄງການ​ອື່ນ​ໆ​ໃນ​ທົ່ວ​ປະ​ເທດ​ກໍ​ພວມ​ເລັ່ງລັດ​ພັດທະນາ​ໄປ​ຕາມ​ແຜນ​ພັດທະນາ​ເສດຖະກິດ-ສັງຄົມ​ຂອງ​ປະ​ເທດ. ຍ້ອນ​ບັນດາ​ໂຄງການ, ກິດຈະການ​ຕ່າງໆ​​ໄດ້​ເກີດ​ຂຶ້ນຢ່າງ​ຫລວງຫລາຍ ​ແລະ ກວ້າງຂວາງ​ໃນ​ທົ່ວ​ປະ​ເທດ ຈຶ່ງ​ກໍ່​ໃຫ້​ເກີດ​ມີ​ໂຮງ​ຈັກ, ​ໂຮງງານ, ກິດຈະການ, ຮ້ານ​ຄ້າ, ​ໂຮງ​ແຮມ, ທະນາຄານ, ການ​ບໍລິການ, ການ​ຜະລິດ​ອຸດສາຫະກຳ, ກະສິກຳ​ທີ່​ຫລາກ​ຫລາຍ​ສາຂາ​ວິຊາ​ອາຊີບ ​ເພື່ອ​ສະໜອງ​ຄວາມ​ຮຽກຮ້ອງ​ຕ້ອງການ​ທາງ​ສັງຄົມ.

ຍິ່ງ​ໄປ​ກວ່າ​ນັ້ນ, ຍັງ​ມີ​ແຫ​ລ່ງຂ່າວ​ໃຫ້​ຮູ້​ຕື່ມ​ວ່າ: ຕ່າງປະ​ເທດ​ພວມ​ມີ​ຄວາມ​ສົນ​ໃຈຕ້ອງການ​ມາ​ລົງທຶນ​ຢູ່ ສປປ ລາວ ​ໃນ​ຫລາຍ​ຂະ​ແໜງ​ການ​ກິດຈະການ​ໃນ​ເຂດ​ເສດຖະກິດ​ພິ​ເສດ, ​ເຂດ​ເສດຖະກິດ​ສະ​ເພາະ ຫລື​ວ່າ ​ໃນ​ບັນດາ​ເຂດ​ແຂວງ​ທີ່​ມີ​ທ່າ​ແຮງ​ໃນ​ແຕ່​ລະ​ດ້ານ​ໃນ​ທົ່ວ​ປະ​ເທດ ​ເຊິ່ງມາ​ຮອດ​ປັດຈຸບັນ​ນີ້ ​ແຕ່ລະ​ຂົງ​ເຂດ​ເສດຖະກິດ​ໄດ້​ມີ​ການ​ລົງທຶນ​ຂອງ​ຕ່າງປະ​ເທດ​ໄປ​ແລ້ວ​ຫລາຍ​ພັນຕື້​ໂດ​ລາ. ​ໃນ​ບັນດາ​ປະ​ເທດ​ທີ່​ມາ​ລົງທຶນ​ຫລາຍ​ກວ່າ​ໝູ່​ກໍ​ແມ່ນ ສປ ຈີນ, ຫວຽດນາມ, ​ໄທ, ​ເກົາຫລີ, ຍີ່ປຸ່ນ ​ແລະ ຫລາຍໆ​ປະ​ເທດ.

ນີ້​ຄື​ສິ່ງ​ບົ່ງ​ບອກ​ທີ່​ມາ ​ແລະ ຄວາມ​ຕ້ອງການ​ທາງ​ດ້ານ​ແຮງ​ງານ​ພາຍ​ໃນ​ປະ​ເທດ ຍ້ອນ​ວ່າການ​ຜະລິດ​ກັບ​ກຳລັງ​ການ​ຜະລິດ​ມັນ​ຕິດ​ພັນ​ກັນ​ຢ່າງ​ສະໜິດ​ແໜ້ນ ​ແລະ ບໍ່​ສາມາດ​ຕັດ​ແຍກ​ອອກ​ຈາກ​ກັນ​ໄດ້. ຕົວຢ່າງ​ໃຫ້​ເຫັນ​ຢ່າງ​ຈະ​ແຈ້ງ​ໃນ​ມໍ່ໆ​ມາ​ນີ້ ​ໂຄງການ​ກໍ່ສ້າງ​ເສັ້ນທາງ​ລົດ​ໄຟ​ຄວາມ​ໄວ​ສູງ ລາວ-ຈີນ ​ໄດ້​ຮັບ​ສະໝັກ ​ແລະ ຝຶກ​ອົບຮົມ​ແຮງ​ງານ​ລາວ​ຫລາຍ​ພັນ​ຄົນ ​ເພື່ອ​ປະກອບ​ເຂົ້າ​ໃນ​ບັນດາ​ວຽກ​ງານ​ໃນ​ຂະ​ແໜງ​ການ​ຕ່າງໆ​ຂອງ​ໂຄງການ​ດັ່ງກ່າວ​ທີ່​ໃກ້​ຈະ​ສຳ​ເລັດ​ໃນ​ປີ 2021 ​ແລະ ຍັງ​ຈະ​ສືບ​ຕໍ່​ຮັບ​ສະໝັກ​ຝຶກ​ອົບຮົມ​ໄປ​ຢ່າງ​ຕໍ່​ເນື່ອງ ຖ້າ​ໂຄງການ​ນີ້​ໄດ້​ສຳ​ເລັດ ​ແລະ ​ເລີ່​ມບໍລິການ. ສ່ວນ​ກິດຈະການ​ອື່ນໆ​ທີ່​ນອນ​ຢູ່​ໃນ​ໂຮງ​ຈັກ-​ໂຮງງານ ​ແລະ ພື້ນຖານ​ການ​ຜະລິດ​ກໍ​ຕ້ອງການ​ແຮງ​ງານ​ລາວ​ຢ່າງ​ຫລວງຫລາຍ​ເໝືອນ​ກັນ.

ດັ່ງ​ພວກ​ເຮົາ​ຮັບ​ຮູ້​ນຳ​ກັນ​ແລ້ວ​ວ່າ, ບັນຫາ​ການ​ອອກ​ແຮງ​ງານ​ຢູ່​ພາຍ​ໃນ​ປະ​ເທດ ​ເຖິງ​ວ່າ​ຈະ​ມີຄ່າ​ແຮງ​ງານ​ຕໍ່າ​ກວ່າ​ປະ​ເທດ​ເພື່ອນ​ບ້ານ, ​ແຕ່​ມັນ​ກໍ​ມີ​ຂໍ້​ສະດວກ ​ແລະ ມີ​ຜົນ​ປະ​ໂຫຍ​ດຫລາຍ​ດ້ານ ​ເປັນຕົ້ນ​ແມ່ນ​ບັນຫາ​ຄວາມ​ປອດ​ໄພ, ອັນ​ສອງ​ມາ​ແມ່ນ​ບໍ່​ຕົກ​ຢູ່​ໃນ​ຄວາມ​ສ່ຽງ​ການ​ຄ້າ​ມະນຸດ, ບໍ່​ຖືກ​ຕົວະ​ຍົວະ​ຫລອກ​ລວງ ຫລື ປຸ້ນ​ຈີ້​ເອົາ​ຊັບ​ສິນ​ໃນ​ເວລາ​ກັບ​ມາ​ບ້ານ​ ດັ່ງ​ເຮົາ​ເຫັນ​ແຫ​ລ່ງຂ່າວ​ຊ່າ​ລື​ກັນ​ໃນ​ຫລາຍ​ປີຜ່ານມາ. ອີກ​ປະການ​ໜຶ່ງ ກໍ​ເປັນ​ການ​ສົ່ງ​ເສີມ​ກຳລັງ​ແຮງ​ເສດຖະກິດ​ຂອງ​ຊາດ ​ເພາະ​ຄວາມ​ຈະ​ເລີ​ນຮຸ່ງ​ເຮືອງ​ຂອງ​ປະ​ເທດ​ຊາດ​ກໍ​ແມ່ນ​ຄົນ​ໃນ​ຊາດ​ເປັນ​ຜູ້​ບຸກ​ເບີກ​ສ້າງສາ ນັບ​ແຕ່​ເສດຖະກິດ​ຄອບຄົວ, ​ເສດຖະກິດ​ລວມໝູ່, ​ບຸກຄົນ, ນິຕິບຸກຄົນ ຈົນ​ກາຍ​ເປັນ​ເສດຖະກິດ​ຂອງ​ຊາດ.

​ ຂໍ​ພຽງ​ແຕ່​ມີ​ວິຊາ​ຊີບ ບໍ່ມີວັດອົດຕາຍ ແຮ່ງນັບ​ມື້ຈະ​​ສົດ​ໃສ - Wave100S AD to Website 2020 0 - ​ ຂໍ​ພຽງ​ແຕ່​ມີ​ວິຊາ​ຊີບ ບໍ່ມີວັດອົດຕາຍ ແຮ່ງນັບ​ມື້ຈະ​​ສົດ​ໃສ

​ເມື່ອ​ຕັ້ງ​ໂຈດ​ກັນ​ວ່າ, ​ເພື່ອ​ສ້າງ​ເງື່ອນ​ໄຂ​ໃຫ້​ເຮົາ​ເອງ​ມີ​ວຽກ​ເຮັດ​ງານ​ທຳ​ຈະ​ຕ້ອງ​ເຮັດ​ແນວ​ໃດ ? ຄຳ​ຕອບ​ທີ່​ແນ່ນອນ​ກໍ​ຄື ຕ້ອງ​ມີ​ວິຊາ​ຊີບ ຫລື ມີ​ວິຊາ​ສະ​ເພາະ​ຢ່າງ​ເຕັມຕົວ ​ແລະ ມີ​ຄຸນ​ນະພາ​ບ ຈຶ່ງ​ຈະ​ສາມາດ​ມີ​ວຽກ​ເຮັດ​ງານ​ທຳ​ທີ່​ແນ່ນອນ​ໄດ້. ປັດຈຸບັນ ພັກ ​ແລະ ລັດຖະບານ​ເຮົາ​ພວມ​ສົ່ງ​ເສີມ​ນັກຮຽນ-ນັກ​ສຶກສາ​ທີ່​ຮຽນ​ຈົບ​ມັດທະຍົມ​ທຸກ​ລະດັບ​ເຂົ້າ​ໄປ​ສຶກສາ​ຮໍ່າຮຽນ​ໃນ​ຂະ​ແໜງ​ວິຊາ​ຊີບ​ເຊັ່ນ: ຮຽນ​ກົນ​ຈັກ, ຈັກ​ກົນ, ຮຽນ​ກໍ່ສ້າງ, ຮຽນ​ຊ່າງ​ເຮືອນ, ຊ່າງ​ຈອດ, ຮຽນ​ຕັດຫຍິບ, ​ໂຮງ​ແຮມ, ຮ້ານ​ອາຫານ, ປູກຝັງ, ລ້ຽງສັດ ​ແລະ ຂະ​ແໜງ​ການ​ອື່ນໆ​ທີ່​ເຫັນ​ວ່າ​ຮຽນ​ຈົບ​ອອກ​ມາ​ແລ້ວ​ສາມາດ​ປະກອບ​ເປັນ​ອາຊີບ​ຂອງ​ຕົນ​ໄດ້​ເປັນ​ຢ່າງ​ດີ. ຈາກ​ຄວາມ​ຕ້ອງການ​ດັ່ງກ່າວ, ພັກ ​ແລະ ລັດຖະບານ​ຈຶ່ງ​ໄດ້​ສ້າງ​ໂຮງຮຽນ​ອາຊີວະ​ສຶກສາ​ທັງ​ພາກ​ລັດ ​ແລະ ​ເອກະ​ຊົນ​ຂຶ້ນຢ່າງ​ຫລວງຫລາຍ​ຢູ່​ຂັ້ນສູນ​ກາງ ​ແລະ ທ້ອງ​ຖິ່ນ ອັນ​ເປັນ​ການ​ສ້າງ​ເງື່ອນ​ໄຂ​ໃຫ້​ຜູ້​ຕ້ອງການ​ຮຽນ​ໄດ້​ເຂົ້າ​ເຖິງ​ໃນ​ທຸກຂະ​ແໜງ​ການ ​ແລະ ທຸກ​ຂົງ​ເຂດ​ໃນ​ທົ່ວ​ປະ​ເທດ.

​ແນວ​ໃດ​ກໍ​ຕາມ, ມາ​ເບິ່ງ​ໃນ​ດ້ານ​ຄວາມ​ເປັນ​ຈິງ​ແລ້ວ ​ໃນ​ຫລາຍ​ສິບ​ປີຜ່າ​ນມາ ຄົນ​ເຮົາ​ສ່ວນ​ຫລາຍ​ມັກ​ແຕ່​ໄປ​ຮຽນ​ຂະ​ແໜງ​ການ​ເງິນ, ການ​ທະນາຄານ, ບໍລິຫານ​ທຸລະ​ກິດ ຮຽນ​ຈົບ​ມາ​ຕ້ອງການ​ເປັນ​ພາສີ, ​ເປັນ​ອາກອນ, ​ເປັນ​ເຈົ້າ​ເປັນ​ນາຍ, ​ເຮັດ​ວຽກ​ຢູ່​​ໃນ​ໂຕະ​ຕັ່ງ, ນັ່ງ​ຫ້ອງ​ແອ, ​ເຮັດ​ໜ້ອຍ​ຢາກ​ໄດ້​​ເງິນ​ຫລາຍ ​ແຕ່​ລະດັບ​ຄວາມ​ຮູ້​ຄວາມ​ສາມາດ ​ແລະ ຄຸນ​ນະພາ​ບຂອງ​ຕົນ​ເອງ​ພັດ​ພໍ​ໄດ້​ແຕ່​ມ້າມ​ແປະ​ພຸງ ມັນ​ກໍ​ເລີຍ​ຄື​ໄມ້ຄ້ຳກ້ວຍກັບ​ກ້ວຍຄ້ຳ​ໄມ້.

​ເຖິງ​ຢ່າງ​ໃດ​ກໍ​ດີ, ​ໄປ​ຄຽງ​ຄູ່​ກັບ​ການ​ຫັນ​ເອົາ​ຄຸນ​ນະພາ​ບຂອງ​ລະບົບ​ການ​ສຶກສາ​ ​ເພື່ອ​ສ້າງ​ຄົນ​ຢູ່​ບ້ານ​ເຮົາ​ໃຫ້​ນັບ​ມື້ດີ​ຂຶ້ນ, ມາ​ຮອດ​ປັດຈຸບັນ​ກໍ​ເຫັນ​ວ່າ​ນັກຮຽນ​ນັກ​ສຶກສາ​ທີ່​ຮຽນ​ຈົບ​ໃນ​ສາຂາ​ວິຊາ​ຕ່າງໆ ​ໄດ້​ມີ​ຄຸນ​ນະພາ​ບ ​ແລະ ຄ່ອຍໆ​ເຊື່ອມ​ໂຍງ​ເຂົ້າກັບ​ສາກົນ​ໄດ້. ​ໃນ​ຕໍ່ໜ້າ​ນີ້ ພາລະກິດ​ການ​ສ້າງສາ​ພັດທະນາ​ປະ​ເທດ​ຊາດ​ນັບ​ມື້ຂະຫຍາຍຕົວ ​ແລະ ພວມ​ຕ້ອງການ​ຄົນ​ມີ​ຄວາມ​ຮູ້​ຄວາມ​ສາມາດ ​ແລະ ມີ​ວິຊາ​ສະ​ເພາະ​ທີ່​ແນ່ນອນ ຈຶ່ງ​ຈະ​ສາມາດ​ລ້ຽງ​ປາກ​ລ້ຽງ​ທ້ອງ​ໃຫ້​ຮັ່ງມີ​ເຂັ້ມ​ແຂງ​ໄດ້.

 

​ ຂໍ​ພຽງ​ແຕ່​ມີ​ວິຊາ​ຊີບ ບໍ່ມີວັດອົດຕາຍ ແຮ່ງນັບ​ມື້ຈະ​​ສົດ​ໃສ - WhatsApp Image 2020 05 27 at 5 - ​ ຂໍ​ພຽງ​ແຕ່​ມີ​ວິຊາ​ຊີບ ບໍ່ມີວັດອົດຕາຍ ແຮ່ງນັບ​ມື້ຈະ​​ສົດ​ໃສ
No comments yet! You be the first to comment.

Leave a Reply

Your email address will not be published.

This site uses Akismet to reduce spam. Learn how your comment data is processed.

error: Alert: Content is protected !!