ຍີ່ປຸ່ນ ປະກາດສັກວັກຊີນຕ້ານໂຄວິດ ໃຫ້ປະຊາຊົນທຸກຄົນຟຣີ
ກະຊວງສາທາລະນະສຸກຍີ່ປຸ່ນປະກາດສັກວັກຊີນຕ້ານໂຄວິດ-19 ໃຫ້ພົນລະເມືອງຊາວຍີ່ປຸ່ນທຸກຄົນຟຣີ. ຂະນະທີ່ ລັດຖະບານທຸ້ມເທເຕັມທີ່ເພື່ອຫາວັກຊີນໃຫ້ພຽງພໍພາຍໃນເຄິ່ງປີທຳອິດຂອງປີ 2021.
ສຳນັກຂ່າວຕ່າງປະເທດລາຍງານວ່າ: ກະຊວງສາທາລະນະສຸກຍີ່ປຸ່ນໄດ້ປະກາດວ່າ: ພົນລະເມືອງຊາວຍີ່ປຸ່ນທຸກຄົນຈະໄດ້ຮັບການສັກວັກຊີນຕ້ານໄວຣັສໂຄວິດ-19 ໂດຍບໍ່ເສຍຄ່າໃຊ້ຈ່າຍໃດໆ ໂດຍມີເປົ້າໝາຍຈະຫລຸດຈຳນວນການຕິດເຊື້ອ ແລະ ການເສຍຊີວິດຈາກໂຄວິດ-19 ເຊິ່ງລັດຖະບານຍີ່ປຸ່ນໄດ້ຕັ້ງງົບປະມານໃນເລື່ອງນີ້ເອົາໄວ້ 6,71 ແສນລ້ານເຢນ ຫລື ປະມານ 6.400 ລ້ານໂດລາສະຫະລັດ.
ລາຍງານລະບຸວ່າ: ລັດຖະບານຍີ່ປຸ່ນທຸ້ມເທຄວາມພະຍາຍາມຢ່າງເຕັມທີ່ໃນການຈັດຫາວັກຊີນຕ້ານໂຄວິດ-19 ໃຫ້ພຽງພໍພາຍໃນ 6 ເດືອນຕົ້ນປີ 2021 ເພື່ອສັກໃຫ້ພົນລະເມືອງຊາວຍີ່ປຸ່ນທຸກຄົນ ໂດຍລັດຖະບານຍີ່ປຸ່ນໄດ້ເຮັດຂໍ້ຕົກລົງຮ່ວມກັບບໍລິສັດແອສຕຣ້າເຊນເນກ້າ ຜູ້ຜະລິດຢາຂອງອັງກິດ ແລະ ບໍລິສັດໄຟເຊີ ຜູ້ຜະລິດຢາລາຍໃຫຍ່ຂອງອາເມລິກາ ເພື່ອສົ່ງມອບວັກຊີນທັນທີທີ່ການພັດທະນາປະສົບຜົນສຳເລັດ.