ເຈົ້າໜ້າທີ່ຮຽກຮ້ອງໃຫ້ຜູ້ໃຊ້ລົດໃຊ້ຖະໜົນເປັນເຈົ້າການປະຕິບັດກົດລະບຽບຈະລາຈອນໃຫ້ເຂັ້ມງວດ

ທ່ານ ພັທ ບຸນມາກ ສູນດາໄລ ຮອງຫົວໜ້າພະແນກຕຳຫລວດຈະລາຈອນ ນະຄອນຫລວງວຽງຈັນ ໃຫ້ຮູ້ວ່າ: ເພື່ອເຮັດໃຫ້ງານບຸນປະເພນີອອກພັນສາປະວໍລະນາ ຊ່ວງເຮືອທ່າວັດຈັນປະຈຳປີ 2020 ນີ້ມີຄວາມເປັນລະບຽບຮຽບຮ້ອຍ ແລະ ສະຫງົບປອດໄພ, ທາງເຈົ້າໜ້າທີ່ຕຳຫລວດຈະລາຈອນໄດ້ຈັດວາງກຳລັງເຂົ້າໃນງານບຸນດັ່ງກ່າວ 52 ຈຸດ, 221 ສະຫາຍ ຊ່ວຍຈັດສັນຄວາມເປັນລະບຽບຮຽບຮ້ອຍໃນການສັນຈອນຂອງຜູ້ໃຊ້ລົດໃຊ້ຖະໜົນ ພ້ອມທັງກວດກາທາດເຫລົ້າ, ຜູ້ທີ່ດື່ມສິ່ງມຶ່ນເມົາແລ້ວຂັບຂີ່ລົດ ເພື່ອຫລີກລ່ຽງການເກີດອຸປະຕິເຫດ ແລະ ສິ່ງຫຍໍ້ທໍ້ອື່ນໆ.

ພ້ອມນີ້, ທ່ານຍັງໄດ້ຮຽກຮ້ອງໃຫ້ນັກຂັບຂີ່ທຸກຄົນຈົ່ງເປັນເຈົ້າການເຄົາລົບ ລະບຽບກົດໝາຍ, ປະຕິບັດກົດລະບຽບຈະລາຈອນ ແລະ ຂໍ້ຫ້າມຕ່າງໆໃຫ້ເຂັ້ມງວດ, ພ້ອມໃຫ້ອຳນວຍຄວາມຮ່ວມມືກັບເຈົ້າໜ້າທີ່ປະຕິບັດວຽກງານໄດ້ສະດວກ ແລະ ເອົາໃຈໃສ່ສຶກສາອົບຮົມລູກຫລານຂອງຕົນໃຫ້ມີສະຕິໃນການຂັບຂີ່ ເພື່ອຫລີກເວັ້ນການເກີດອຸປະຕິເຫດ.