ຊົມ​ເຊີຍ​ວັນ​ທີ 7 ຕຸລາ ວັນ​ຄູ​ແຫ່ງ​ຊາດ

- 555 20 - ຊົມ​ເຊີຍ​ວັນ​ທີ 7 ຕຸລາ ວັນ​ຄູ​ແຫ່ງ​ຊາດ
- Untitled design - ຊົມ​ເຊີຍ​ວັນ​ທີ 7 ຕຸລາ ວັນ​ຄູ​ແຫ່ງ​ຊາດ

ໂດຍ: ທິດກໍ່າ

ວັນ​ທີ 7 ຕຸລາ 2020 ​ເປັນ​ວັນ​ຄູ​ແຫ່ງ​ຊາດ ​ເປັນ​ວັນ​ສຳຄັນ​ທາງ​ປະຫວັດສາດ​ວັນ​ໜຶ່ງ​ຂອງ​ປະຊາຊົນ​ລາວ​ບັນດາ​ເຜົ່າ ກໍ​ຄື​ຄູ​-ອາຈານ​ທີ່​ມີ​ພັນທະ​ໜ້າ​ທີ່​ສິດສອນ ​ເພື່ອ​ສ້າງຄົນ​ໃນ​ພາລະ​ກຳ​ປະຫວັດສາດ​ທຸກ​ຍຸກ​ສະ​ໄໝ​ໃຫ້​ກາຍ​ເປັນ​ຊັບພະຍາກອນ​ທີ່​ດີ ​ແລະ ​ເປັນ​ທຶນຮອນ​ອັນ​ປະ​ເສີດຂອງ​ຊາດ. ສ່ວນວ່າ​ປະຫວັດສາດ​ທີ່​ໄປ​ທີ່​ມາ​ຂອງ​ວັນ​ທີ 7 ຕຸລານັ້ນ ​ໄດ້​ຖື​ເອົາວັນ​ທີ່​ນາຍຄູ​ຄຳ​ໄດ້​ເຂົ້າ​ເປັນ​ນາຍຄູ​ມື້ທຳ​ອິດ​ຂອງ​ຄົນ​ລາວ​ໃນ​ຍຸກ​ຝຣັ່ງ​ເຂົ້າມາ​ປົກຄອງ ​ແລະ ​ເປັນ​ຜູ້​ທຳ​ອິດ​ຂອງ​ຄູ​ລາວ​ພາຍຫລັງ​ໄດ້​ຜ່ານ​ການ​ຝຶກ​ອົບຮົມ​ເປັນ​ຄູ​ເລັ່ງລັດ​ສຳລັບ​ຜູ້​ທີ່​ໄດ້​ຮຽນ​ຈົບ​ຂັ້ນປະຖົມ​ສຶກສາ ​ແລະ ນາຍ​ພາສາ​ແປ​ຝຣັ່ງ​ ​ໃນ​ວັນ​ທີ 7 ​ເດືອນ​ຕຸລາ 1907 ນັ້ນ​ເອງ. ​ເພາະສະນັ້ນ ຈຶ່ງ​ໄດ້​ຖື​ເອົາ​ວັນ​ທີ 7 ຕຸລາ ​ເປັນ​ວັນ​ຄູ​ແຫ່ງ​ຊາດ​ໃນ​ຍຸກ ສປປ ລາວ.

ຫລັງ​ຈາກ​ນາຍຄູ​ຄຳ​ໄດ້​ເປັນ​ຄູ​ສອນ​ແລ້ວ ​ໄດ້​ເຂົ້າສິດສອນ​ຢູ່​ໂຮງຮຽນ​ຕັບ​ໂຟ​ແຣງ ​ໃນ​ປີ 1913 ​ເປັນ​ເວລາ​ຫລາຍ​ປີ​ຈຶ່ງ​ເຫັນ​ໄດ້​ທາດ​ແທ້​ການ​ກົດ​ຂີ່​ຂູດ​ຮີດ​ຂອງ​ຈັກກະພັດ​ຝຣັ່ງທີ່​ມີ​ຕໍ່​ຄົນ​ລາວ, ​ເພິ່ນ​ໄດ້​ວິ​ເຄາະ, ​ໄຈ້​ແຍກ​ເຖິງ​ລັກສະນະ, ຮູບ​ການ, ວິທີ​ການ​ຕ່າງໆ​ໃນ​ການ​ກົດ​ຂີ່​ຂູດ​ຮີດ​ຂອງ​ພວກ​ຝຣັ່ງ ທັງ​ໄດ້​ຍ້ອງຍໍ​ສັນລະ​ເສີນ​ຂອງ​ເຈົ້າອານຸວົງ ຈຶ່ງ​ເຮັດ​ໃຫ້​ຄົນ​ລາວຈໍານວນ​ໜຶ່ງ​ທີ່​ນິຍົມ​ຝຣັ່ງບໍ່ພໍ​ໃຈ ​ແລ້ວ​ກ່າວ​ຫາ​ນາຍຄູ​ຄຳ​ວ່າ​ເປັນ​ຄົນ​ສ້າງ​ຄວາມ​ປັ່ນ​ປ່ວນ​ພາຍ​ໃນ ຢາກ​ດີ​ຢາ​ກ​ເດັ່ນ, ຈົນ​ມາ​ຮອດ​ກາງ​ເດືອນ​ພະຈິກ 1920 ນາຍຄູ​ຄຳ​ຈຶ່ງ​ໄດ້​ນຳພາ​ການ​ຕໍ່ສູ້​ຂອງ​ປະຊາຊົນ​ຕ້ານ​ອຳນາດ​ການ​ປົກຄອງ​ຂອງຝຣັ່ງ ​ໂດຍ​ມີ​ການ​ເຄື່ອນ​ໄຫວ​ຈາກ​ຖານ​ທີ່​ໝັ້ນ​ເຂດ​ບ້ານ​ຫ້ອມ-ຫາດ​ກັນຊາ​ເຂົ້າສູ່​ຕົວ​ເມືອງ​ວຽງ​ຈັນ ​ເພື່ອ​ຂັບ​ໄລ່​ໄຖ​ຫົວ​ພວກ​ຝຣັ່ງອອກ​ຈາກ​ປະ​ເທດ​ລາວ. ​ໃນ​ການ​ຕໍ່ສູ້​ຜະ​ເຊີນ​ໜ້າ​ກັນນັ້ນ, ພວກ​ຝຣັ່ງ​ໄດ້​ວາງ​ກຳລັງ​ປ້ອງ​ກັນ​ຕົວ​ເມືອງ​ວຽງ​ຈັນ​ໄວ້​ຢ່າງ​ແໜ້ນໜາ ​ແລະ ​ໃຊ້​ອາວຸດ​ປືນ​ທັນ​ສະ​ໄໝ​ຕອບ​ໂຕ້ ​ແລະ ​ເກີດ​ການ​ປະ​ທະ​ກັນ​ຢ່າງ​ຮຸນ​ແຮງ ​ແລະ ດຸ​ເດືອດ ຈົນ​ເຮັດ​ໃຫ້​ປະຊາຊົນ​ຖືກ​ບາດ​ເຈັບ ​ແລະ ​ເສຍ​ຊີວິດ. ຈາກ​ນັ້ນ ຂະ​ບວນການ​ຕໍ່ສູ້​ຂອງ​ນາຍຄູ​ຄຳ​ໄດ້​ແຕກ​ກະຈັດກະຈາຍ​, ນາຍຄູ​ຄຳ​ເອງ​ກໍ​ຖືກ​ບາດ​ເຈັບ​ມີ​ບາດ​ແຜ ​ແລະ ​ໄດ້​ເຂົ້າປິ່ນປົວ​ຢູ່​ໂຮງໝໍ​ມະ​​ໂຫສົດ ພາຍ​ໃຕ້​ການ​ຄວບ​ຄຸມ​ຕົວ​ຂອງ​ທະຫານ​ຝຣັ່ງ​ໃນ​ຄະດີ​ນັກ​ໂທດ​ຕິດ​ຄຸກ​ວຽງ​ຈັນ.

ນາຍຄູ​ຄຳ​ໄດ້​ຊອກ​ຫາ​ໂອກາດ​ທີ່​ຜູ້​ຄວບ​ຄຸມ​ເຜີ​ຕົວ ​ແລ້ວ​ກໍ​ໂຕນ​ໜີ​ອອກ​ຈາກ​ໂຮງໝໍ ຜ່ານ​ຫາດ​ດອນ​ຈັນ​ລອຍ​ຂ້າມ​ຂອງ​ໄປ​ຝັ່ງ​ປະ​ເທດ​ໄທ ອາ​ໄສ​ຢູ່​ນຳ​ຍາດ​ພີ່ນ້ອງ ​ແລ້ວ​ສືບ​ຕໍ່​ປະກອບສ່ວນ​ ທັງ​ຊອກ​ວິທີ​ໃນ​ການ​ຕໍ່ສູ້​ເພື່ອ​ເອກະລາດ​ຂອງ​ຊາດ​ລາວ ຈົນ​ເພິ່ນ​ເສຍ​ຊີວິດ​ໃນ​ເວລາ​ຕໍ່​ມາ​ຢູ່​ປະ​ເທດ​ໄທ. ນີ້​ຄື​ປະຫວັດສາດ ​ແລະ ທີ່​ໄປ​ທີ່​ມາ​ຂອງ​ວັນ​ທີ 7 ວັນ​ຄູ​ແຫ່ງ​ຊາດ​ນັ້ນ​ແບບ​ສັງ​ເຂບມາ​ກ່າວ​ສູ່​ກັນ​ຟັງ.

​ແນວ​ໃດ​ກໍ​ຕາມ, ຈາກ​ຕົ້ນ​ເຫດ​ທີ່​ກ່າວ​ມາ​ນີ້ ວັນ​ທີ 7 ຕຸລາ 2020 ອັນ​ເປັນ​ວັນ​ຄູ​ແຫ່ງ​ຊາດ ​ເຊິ່ງມີ​ອາຍຸ​ຄົບຮອບ 26 ປີ ຖ້າ​ທຽບ​ໃສ່​ອາຍຸ​ຂອງ​ຄົນ​ເຮົາ​ກໍ​ພວມ​ຢູ່​ໃນ​ໄວ​ໜຸ່ມ, ພວມ​ມີ​ກຳ​ລັງ​ວັງຊາ​ແຂງ​ແຮງ, ມີ​ແນວ​ຄິດ​ມັນສະໝອງ​ທີ່​ວ່ອງ​ໄວ​ໃສ​ແຈ້ງສຽບ​ຂາດ ມັນ​ກໍ​ປຽບ​ເໝືອນ​ທ່າ​ແຮງ​ຂອງ​ລະບົບ​ການ​ສຶກສາ​ຢູ່​ບ້ານ​ເຮົາ​ປັດຈຸບັນ ພວມ​ໄດ້​ຮັບ​ການ​ພັດທະນາ​ໃຫ້​ເຕີບ​ໃຫຍ່​ຂະຫຍາຍຕົວ​ໄປ​ເລື້ອຍໆ. ສຳລັບ​ຖານະ​ບົດບາດ​ຂອງ​ຄູ-ອາຈານ​ທີ່​ເປັນ​ແມ່ພິມ​ຂອງ​ຊາດ, ​ເປັນ​ແມ່​ຜູ້​ທີ​ສອງ​ຂອງ​ເຫລົ່າ​ນັກຮຽນ​ນັກ​ສຶກສາ ກໍ​ຍິ່ງ​ໄດ້​ຮັບ​ການ​ເຊີດ​ຊູ​ສັນລະ​ເສີນ​ໃນ​ເງື່ອນ​ໄຂ​ທີ່​ພັກ ​ແລະ ລັດຖະບານ​ເຮົາ​ໄດ້​ໃຫ້​ຄວາມ​ສຳຄັນ ​ແລະ ມອບ​ໝາຍ​ໜ້າ​ທີ່​ອັນ​ມີ​ກຽດ​ຄື: ສ້າງ​ຄົນ​ໃຫ້​ເປັນ​ຄົນ, ສ້າງ​ຄົນ​ໃຫ້​ມີ​ວິຊາ​ຄວາມ​ຮູ້​ຄວາມ​ສາມາດ​ສະຫລາດ​ຫລັກ​ແຫລມ, ມີ​ສິນ​ທຳ​ຮູ້​ຕໍ່າ​ຮູ້​ສູງ, ມີ​ຄວາມ​ກະຕືລືລົ້ນຕໍ່​ອະ​ນາ​ຄົດ​ຂອງ​ຕົນ​ເອງ ​​ເພື່ອ​ປະ​ເທດ​ຊາດ ທັງ​ປົກ​ປັກ​ຮັກສາ​ພັດທະນາ​ມາ​ຕຸ​ພູມ​ຂອງ​ຕົນ​ໃຫ້​ມີ​ຄວາມ​ຈະ​ເລີ​ນຮຸ່ງ​ເຮືອງ​ຕໍ່​ໄປ​ພາຍ​ໜ້າ.

- Wave100S AD to Website 2020 0 - ຊົມ​ເຊີຍ​ວັນ​ທີ 7 ຕຸລາ ວັນ​ຄູ​ແຫ່ງ​ຊາດ

​ໃນ​ປັດຈຸບັນ, ​ແມ່ນ​ຍິ່ງ​ກວ່າ​ເວລາ​ໃດ​ໝົດ​ທີ່​ຄູ-ອາຈານ​ເຮົາ​ຕ້ອງ​ໄດ້​ເຊີດ​ຊູ​ຖານະ​ບົດບາດ​ຂອງ​ຕົນ​ໃຫ້​ກ້າວ​ທັນ​ກັບ​ໂລກ, ທັນ​ກັບ​ຍຸກ​ສະ​ໄໝ​ທີ່​ປະ​ເທດ​ຊາດ​ພວມ​ເຊື່ອມ​ໂຍງ​ເຂົ້າກັບ​ພາກພື້ນ ​ແລະ ສາກົນ. ພາລະກິດ​ອັນ​ສຳຄັນ​ຍິ່ງ​ຂອງ​ຄູ-ອາຈານ​ລາວ​ເຮົາ ຄື​ສ້າງຊັບພະຍາກອນ​ມະນຸດ​ໃຫ້​ບຸກທະລຸ​ຕາມ​ຄວາມ​ມຸ້ງ​ມາດ​ປາຖະໜາ​ຂອງ​ພັກ ​ແລະ ລັດຖະບານ ກໍ​ຄື​ເພື່ອ​ຄວາມ​ຈະ​ເລີ​ນຮັ່ງມີ​ຂອງ​ປະ​ເທດ​ຊາດ​ໃນ​ອະນາຄົດ. ນັກ​ສຶກສາ​ຈະ​ເປັນ​ຄົນ​ດີ, ມີ​ຄຸນ​ນະພາ​ບ, ມີ​ວິ​ຊາ​ອາຊີບ​ທີ່​ແນ່ນອນ, ໜັກ​ແໜ້ນ​ໝັ້ນຄົງ​ກໍ​ແມ່ນ​ເລີ່​ມຈາກ​ຄູ-ອາຈານ​ເປັນ​ຜູ້​ສິດສອນ, ອະນາຄົດ​ຂອງ​ເດັກ​ເຍົາວະ​ຊົນ, ຊາວ​ໜຸ່ມ​ນັກຮຽນ​ນັກ​ສຶກສາລາ​ວຈະ​ກາຍ​ເປັນ​ທຶນຮອນ​ອັນ​ປະ​ເສີດ​ຂອງ​ຊາດ​ລາວ ກໍ​ຂໍ​ຝາກ​ໄວ້​ນຳ​ຄູ​-ອາຈານ​ເປັນ​ຜູ້​ສິດສອນ​ໃຫ້​ສົມ​ກັບ​ຄຳ​ຂວັນ​ທີ່ວ່າ: ຄູ​ເປັນ​ແມ່ພິມ​ຂອງ​ຊາດ, ​ເປັນ​ວິສະວະກອນ​ແຫ່ງ​ດວງ​ວິນ​ຍານ ​ແລະ ​ເປັນ​ພໍ່​ແມ່​ຜູ້​ທີ​ສອງ​ຂອງ​ເຫລົ່າ​ເດັກນ້ອຍ​ເຍົາວະ​ຊົນ, ນັກຮຽນ-ນັກ​ສຶກສາ. ຄູ-ອາຈານ​ລາວ​ຈົ່ງ​ກ້າວ​ໄປ, ນ້ຳ​ໃຈ​ວັນ​ທີ 7 ຕຸລາ ໝັ້ນຍືນ !.

 

- WhatsApp Image 2020 05 27 at 5 - ຊົມ​ເຊີຍ​ວັນ​ທີ 7 ຕຸລາ ວັນ​ຄູ​ແຫ່ງ​ຊາດ
- WhatsApp Image 2020 05 27 at 5 - ຊົມ​ເຊີຍ​ວັນ​ທີ 7 ຕຸລາ ວັນ​ຄູ​ແຫ່ງ​ຊາດ
error: Alert: ເນື້ອຫາຂ່າວມີລິຂະສິດ !!